Kèʼlo 15 - ŊWÀʼ NYÙY

Nyùy gwár mensaŋ wùn Abram

¹ Vinyo vee shooy vi koóy bey, e shaà, Nyùy yiì, vinjeenjèm vi shaà e Abram si, wù yú jí Nyùy Tàr, a yì suuy jii, «Abram, lá à yòʼ a fàn. M dzə̀ ŋkeè wò, a vilaámé vé vi yíi kùʼ feyì.»

² Yii bèy, Abram bìnèr jii, «Éè Nyùy Tàr woo Taà Ndzə, a dzə̀ vilaámé vé vi dzəə yiì yiì ka ke juŋ ki e mò, a m dzə̀ là wán, a njìlaʼ wom dzə̀ Elieser woó Damaskus?»

³ Abram kú a suúy jii, «Ku yèn ri, à yoʼ fò mo wón gheéy, bo kwàn wo á dzəən e mǒ lavi yíi a dzə njìlaʼ wom.»

⁴ Wù ku nèn yù jí Nyùy Tàr, a yì suuy jii, «Wìr və̀n yòʼ wíy a dzə njìlaʼ wò. Kù wíy a dzə wán woo wò vito.»

⁵ Nyùy Tàr nèn lì Abram, e fəə̀ shó fo ndzə, e sùúy sho jii, «Leéy yúví, e tàŋ mejiy mè, a fèn dzə̀ à tàŋ. Á mo rám yée wíy a dzə.»

⁶ Abram biímé kinyo ke Nyùy Tàr, Nyùy Tàr nèn lì wun ji wír woo là jay bìʼ shilív she wù‑uù wayin e wun wùn.

⁷ Nyùy Tàr suúy shó jii, «Dzə̀ mo woo Nyùy Tàr wo mò‑oò liìn wò fo Ur, e wòŋ Kaldea ji m fó á woŋ və̀n ji wó.»

⁸ Yii bèy, Abram suúy jii, «Éè Nyùy Tàr woo Taà Ndzə, m yíi ghan e le, e bóo kiíy ji wíy a ker mo?»

⁹ Nyùy Tàr bìnèr sho jii, «Tàʼ wan nàʼ woo wiíy wùn à kifum ke bvəy ki, à kiyáʼ ki sá, é vifá vìn vidzə̀m vi wáa dzə vee viyá vitaár vitaár. Lì sá kibìŋ wùn à kibuù ki, e wìy sho.»

¹⁰ Abram nèn bàʼtí vifá vìn vidzə̀m, e wìy sho e Nyùy si, e seèrí, e tòʼtí e ntìntin ntìntìn, e neèr vintóʼ vee shooy, ví wáa kìʼnìn, e nèn seèrí menə́n, e lèm là tóʼnín.

¹¹ Mo wù neèrìn nyám sìy, vilùŋŋgùrúʼ ví lóo wìy ji ví kfə́rí, wù wàa jùm.

¹² Kù mo shùy‑iì màʼàn mbàŋ, Abram nèn lò buùné, e tònén. Wù lòo buuné, wúné lò, e beèmé wun, fan ye ghaʼáné nəə́ e wun shiliv.

¹³ Nyùy Tàr suúy shó jii, «Á kiíy feyì feyì jii, rám yée wíy dù, a dzə viŋgwìy e wòŋ wúmóʼó wo bó yòʼ dzəə̀n wóv, e wìy a rèŋ vikwàn fó kiyá ghii kweè, aá wáa nyàvrì aáwune.

¹⁴ Á bèy, m wíy màʼ ŋgeʼ e kitum kee fo áwune reŋ vikwàn. Fo bàm, aáwune wìy fəə̀ fó fo wùn à bùʼ nyanyày.

¹⁵ Fo ké ki, à wíy dzə̀n e mbòómbòŋén, e kpu vèn à nyaáŋ, aá dzəəme wò, áà du, e tàtí atàr vé.

¹⁶ A kí wíy lì kiyá ghii kweè, é bo rám yée kfə́n é bàm fen, bìʼ fo vinyo ve wìr veé Amor ve bi ví yóʼ ne kùʼ, e mèé ve a dzə̀ m màʼ ŋgeʼ aáwuné kitu.»

¹⁷ Shùy yiì nə̀ə́, ndzə sə́n, Abram sàsìn, e yèn ntòn, a kindzə́ʼ ki dzəm fo fo, e kfə̀n yèn kikaʼày, a və́yí baári fo fo, a ví shaasìn e nsàn se vintoʼ ve nyàm vìy.

¹⁸ Á *mensaŋ me Nyùy‑iì gwàrìn wùn Abram e kishiíy fóo fèy, a suúy jii, «M fó woŋ və̀n e rám yée, e kèʼ fo ndzəv yeé Ejiv, e dù, e bàʼ e ndzəv ye wiyí, ye dzəə̀n Yufret.

¹⁹ Kù dzə̀ woŋ və̀n wo dzəə̀n wó wìr veé Ken wùn à veé Kenas, à veé Kadmon,

²⁰ à veé Hit, à veé Peris, à veé Refa,

²¹ à veé Amor, à veé Kanan, à veé Girgash, e lì veé Jebus.»