Joshua 9 - ŊWÀʼ NYÙY

Wír veé Gibeone bóʼtí Joshua

^1-2 Afon vee lò fó Jordan, a kfənér e mbìv yee fo shùy yii nə́ə nèn yù mo wír veé Israyi tònèn vitúm. Veé agwane yú, veé mboʼ seé ghaa rìbà ndzə̀ví yú, e dù meé e Lebanon. Á yú bey, e nèn tàr shuu, e bàʼtí shúu wóv rər e mòʼón ji á funen á Joshua wùn à wír veé Israyi, aàfon vìne dzə̀ jii, fon woó Hit, woó Amor, woó Kanan, woó Peris, woó Hiv, e bóo lì woó Jebus.

³ Yii bèy, wír veé ŋkàlaʼ Gibeone yú mo Joshua lovtin e Jeriko wùn à Ay,

⁴ e lò kév bey, e tàv fìír, e nèn bàʼtí ghán. Vé‑eè lì vinshùʼ ve vibàm, e kùr e vimbèʼbìy ví ndzə̀m, e lì vitém vee júv a dzə̀ ve ví shùʼkìn ne, á tsə́mrí tsəmrín,

⁵ e kfə̀n wàyrí vintín ve alábáʼ aáwuné wuù, e màʼ ndzə̀y, a sí sáʼkír ne, e lì vifá ve yi, a ví yúm ne, e fə̀mnìn.

⁶ Áwune nèn dù, e yèn Joshua e kibeèy é Gilgal, a mbaà wùn à wír veé Israyi jii, «Vèr wìy ntàmda bèn ji vèsən gwar á *mensaŋ.»

⁷ Wír veé Israyi nèn yòŋ e wír veé Hiv vìyi jii, «A tàm bo vèn dzə́ e věr mentsə̀m, é vèsən yiì gwàr mensaŋ e le?»

⁸ Áwune bìnèr e Joshua jii, «Vèr sì akwàn vén.» Joshua kú a sòv jii, «Vèn dzə̀ ala, a vèn wìy fo feé?»

⁹ Á bìnèr jii, «Akwàn vée wìy ntàmda, bìʼ fo vèr‑iì yuun ne léŋ Nyùy Tàr woo Nyùy won. Vèr‑iì lo yù kinyo kidzə̀m ke wù‑uù yiìn é Ejiv,

¹⁰ e kfə̀n yù ke wù‑uù yiìn áàfon veé Amor vee abaà ve á dzəə̀n é ndzə̀n Jordan fèsə, vee ji Sihon woo fon woó Heshbon, à Og woo fon wìr veé Bashan, a wù dzə́ e Ashtarot.

¹¹ Mo vèr‑iì yuun, kfə́m sé wìr sér wùn à wìr dzə̀m woo věr kitum nèn shù ji vèr báʼtí á kur ghan, e wìy, e beè ven á jii, vèr kù sì á akwàn vén. Vèn ku biìmé a é vèsən gwar á mensaŋ.

¹² Vèn leéy búʼú vifá vé yi ve vèr‑iì liìn é kishiíy ke vèr‑iì lo, a ví lumè. Vèn leéy ri mo ví yumen ne, e kfə̀n fə̀mnìn.

¹³ Vitém ve melùʼ vìn vi‑iì dzə̀ vitin e ghan se vèr‑iì wáy meluʼ sho. Vèn leéy ri mo ví shùʼkìn ne. Ndzə̀y sér wùn aàlábáʼá kù sàʼkìr bèn a dzə̀ bìʼ ghán yeé dàŋ rə̀n.»

¹⁴ Wír veé Israyi nèn mùmrì vifá ve yi ve wìr vìy, a bó á yoʼ dù beè Nyùy Tàr.

¹⁵ Joshua nèn gwàr kikoŋnìn wùn áwune, e gwàr mensaŋ ji bó yòʼ dzə̀ á kfə̀n laàr a áwune. Vilìmbìy veé Isray vi nèn fìnèr e kilìʼ kí.

¹⁶ Mo á gwàrìn mensaŋ bèy, vishiíy ví shaà vitaár, wír veé Israyi kiíy ji wír vìyi kù dzə́ a fo ghaŋ.

¹⁷ Á nèn ŋàʼáy, a dù fo. Á ghán vishiíy vitaár, e nèn mèé e wír vìyí ŋkà se laʼ, a sí‑iì dzə̀ jii, Gibeon wùn à Kefira, à Beerot, à Kiriat‑Jearim.

¹⁸ Yii bèy, la wír veé Israyi yòʼ yùyrí wír vee fó, bìʼ fo vilìmbìy ve wìr veé Isray vi‑iì yiìn ne kilìʼ wùn áwune e yírNyùy Tǎr woo Nyùy wìr veé Isray. Màŋgòŋ nèn a ghvə̀vrì vilìmbìy.

¹⁹ Vilìmbìy vidzə̀m vi bìnèr jii, «Vèr kì lìʼ ne e Nyùy Tàr woo Nyùy woó Isray yir, a bó yòʼ dzə̀ lèn vèr kfə̀n kùm áwune.

²⁰ Bó yòʼ dzə̀ vèr kfə̀n yùyrí áwune. Áwune lo e gòʼ atin fo lòné shóv ver ji vèr yàʼáy a kilìʼ ke vèr‑iì yiìn vèr áwune.

²¹ Vèn maʼti, aáwune wáa dzə. Yii bèy, áwune yíi a dzə, a siv meŋkaʼ, e kfə̀n a tu mendzə́v, a fo e vèsən mo vèr kì yòŋèn aáwune.»

²² Joshua jàŋrì wír veé Gibeon, e dzə̀r aáwune jii, «Vèn kì bòʼtí ver ji ka? Vèn kì ghàn é le, e bó a yòŋ ji vèn wìy kwaʼda, a vèn dzə́ fo mentsə̀m fen?

²³ Bìʼ bey, lǒn Nyùyi shòv ne ven. Vèn sì akwàn. Vèn yíi a siv meŋkaʼ, a tu mendzə́v meé kibàn ké Nyùy Tàr woo Nyùy wor.»

²⁴ Áwune bìnèr e Joshua jii, «Vèr‑iì fàn a dzə̀ kpú, e bó a yiì bèy. Vèr‑iì lo yù kijuujùŋ ji Nyùy Tàr woo Nyùy won yòŋ ne a e ŋgaà lìm və woo Mooser ji wun wíy way a nsay rə̀n e věn kiwo. Vèn wíy lòo nəə́, é wun laàr á wir dzə̀m wo wù dzə́ sho.

²⁵ Vèr kù sì lèn e wò mbvə̀ʼ kiwo, yiì ri e vèr ke à yén ji kí dzə̀ réŋ, e kfə̀n a dzə rú.»

²⁶ Á bèy, Joshua nèn sə̀ wír vìy fo wír veé Israyí wo, la á yòʼ dzəə yùyrí áwune.

²⁷ Wáa dzə e kishiíy fen, Joshua ku nèn lèm wír veé Gibeon ji á wáa siv a meŋkaʼ, e kfə̀n a tu a mendzə́v, a fo a e wír veé Israyi, e kfə̀n a dù e mendzə́v mee Nyùy Tǎr kiy cù mè. Kí ku nèn a dzə bèy, e wìy to lán e kirə̀ʼ kidzə̀m ke Nyùy Tàr‑iì wíy shoʼ ji á wáa cù wun sho.