Joshua 5 - ŊWÀʼ NYÙY

¹ Á bèy, afon veé mbìv Jordan yee fo shùy yii nəə adzə̀me lòo yu mo Nyùy Tàr tinen ndzə́v yee Jordan, yí tiím, e mèé mo wír veé Israyi‑iì tumen e mày, tím yéví kpú, wún wóví seèm, la áwune yòʼ kfə̀n a ker vitaáví vée fùnèn wír veé Isray. Aàfon vee shooyi‑iì dzə̀ veé Amor wùn à veé Kanane, a veé Kanane‑eè dzə̀ kév a dzə̀ é ghaŋ se rìbà ndzə̀v.

Joshua sáŋ mbèʼ se vilum veé Isray e Gilgal

² Nyùy Tàr nèn yòŋ Joshua e ghan fóo fèy, e sùúy jii, «Fèr kem si e sáylúme, e kfə̀n sàŋ mbèʼ se vilum veé Isray si shó mo vé‑eè saŋen sé vé mbìyi.»

³ Joshua nèn fèr kem si e sáylúme, e sàŋ mbèʼ se vilum veé Isray e Gwan Nsàŋmbèʼ.

⁴ A kinyè ké kinyò ke kí‑iì yiìn bo wù yii bey ki dzə̀ jii, vilum adzə̀m ve vé‑eè meen ne móo màʼ rə́rí‑iì kpù é dzəə, aá dzə̀ é woʼ mo vé‑eè loòn fó Ejiv.

⁵ Vé‑eè lo sàŋ mbèʼ se wìr dzə̀m wo wù‑uù loòn fó Ejiv. Yii bèy, ve vé‑eè dzəə̀n é woʼ é ghan se vé‑eè ghán e yuví‑iì dzə̀ə́ e nshòmé.

⁶ Mo wír veé Israyi‑iì ghanen é woʼ kiyá mkweè, vilum ve vé‑eè siìn antav e ghan se vé‑eè lo fo Ejivi nèn kpù mày. Vé‑eè kpú bìʼ fo á yòʼ‑oò lo yùnín Nyùy Tàr, Nyùy Tàr nèn lìʼ ji bó wìr fo áwune yòʼ wíy shov a woŋ Kanan e si, woŋ wo wun‑eè kàʼàn atàr vév shó ji wun wíy fo e rám yéví, a kù dzə̀ woŋ, a vín nàʼ wùn à vilu vi tsəətìn sho.

⁷ Bìʼ kee shooy, nén a dzə wón wìr vìn ve Joshua‑aà saŋen mbèʼ sév. Nyùy Tàr‑iì lìy wír vìn ji á li á kilíŋ ke atàr vév, a vé‑eè dzə̀ə́ e nshòmé, bìʼ fo á yòʼ‑oò lo sàŋ mbèʼ sév é dzəə.

⁸ Mo á saŋen mbèʼ se wìr dzə̀m e màysì, áwune gòʼ e kibeèy aáwuné virə̀ʼ, e mèé mo kileémé kí‑iì bonen.

⁹ Nyùy Tàr yòŋ Joshua, e sùúy jii, «Lán və̀n, m tsə̀ʼ ne nshoórsí woó Ejiv fo věn kitu.» Mo Nyùy suuyin bey, á nen yòŋ fó ji Gilgal, e shem lán.

¹⁰ Lòo dzə e ŋkuùr kishìíy kee nshòv sikweè e ghvə̀m e ŋwee foo fèy, wír veé Israyi nèn yiì *Ŋkǎʼ Yáʼayshaà, aá dzəə́ bee e Gilgal, e mboʼ yeé Jeriko.

¹¹ Ndzə rán, a kishiíy ké Ŋkǎʼ Yáʼayshaà ki máy ne, áwune yí vifá a dzə̀ veé nsay foo fèy. Vé‑eè yì kibán kee là nyaà wùn à sáŋ yee *barli ye kaŋéné, e kishiíy fóo fèy.

¹² Vifá ve yi vee *manna vi nèn mày e kishiíy kee shooy la wír veé Israyi yòʼ kfə̀n a yi manna. Á nèn kù a yi a dzə̀ vifá ve yi veé wòŋ Kanan, e kèʼ fo kiya foo fèy.

Mfòóme Nyùy Tàr bvə́ysín e Joshua si

¹³ Wìy lòo dzə e kishiíy kímóʼ kí, a Joshua dzə́ e ghaa ŋkàlaʼ Jeriko, wù lòo sìn, e yèn a wìr tíy e wun si, kér nyùy rə̀r é kiwo. Joshua kóʼtí, e ghày shó jii, «Mbaà, à wìy bìʼ ver moo, à wìy bìʼ aŋgaà vér vibàn á?»

¹⁴ Wù bìnèr jii, «Nyaa mò, m dzə̀ kém tàá mfòóme Nyùy Tàr, bó m yoʼ wìy wír wùmòʼ.» Joshua nèn gvə̀ʼtí e wun si, e tsə̀m sí fo nsay, a ghvəm wun, a ndzəy jii, «Kfə́ə ntum ye Nyùy Tàr kér bìʼ kwàn və́ bèn dzə̀ ji ka?»

¹⁵ Tàá mfòóme Nyùy Tàr bìnèr e Joshua jii, «Shóʼtí alábáʼá fo wò wuù, bìʼ fo à tíy a dzə̀ e Nyùy kirə́ʼ ke ranén kí.» Joshua ku nèn yiì bèy.