Joshua 4 - ŊWÀʼ NYÙY

Tíy se sí səəm túm ye vé‑eè tumen Jordan

¹ Kitúm kee Isray kidzə̀m ki líysín ndzə́v e mày, Nyùy Tàr suúy e Joshua jii,

² «Vèn shóʼtí vilum nshòv sibaà e ghvə̀m, wir mòʼón mòʼón fo ram seé Isray sidzə̀m,

³ e sùúy, aá táyrí tíy sí nshòv sibaà e ghvə̀m kù fo atàá cùu tíyí e kintìntìn ke ndzəv, e bèʼèy, e dù, e neèr fo vèn yíi shiíy lán.»

⁴ Joshua nèn jàŋrì wír vee nshòv sibaà e ghvə̀m ve wù kì shoʼtin ne, wir mòʼón mòʼón fo ram seé Isray sidzə̀m,

⁵ e sùúy aáwune jii, «Vèn shaa, e kfə̀n é Jordan, e dù e mbìy ŋkùv mensàŋ Nyùy Tàr woo Nyùy won, é wìr wáa lì tíy é mbèʼ, aá li mo rám sé wìr veé Isray si dzəə̀n.

⁶ Tíy see shooy si wíy a dzə ji kisəəm fo vèn. Wón véné wíy lóo dzər jii, ‹Nsàv tìy sin dzə̀ ka fo vèn,›

⁷ vèn bìnèr jii, ‹Ndzə́v yee Jordane‑eè tìnén é ghan se ŋkùv mensàŋ Nyùy Tàr‑iì meʼen fó. Vé‑eè lóo tum ndzə́v yee Jordan sho, yí tínén.› Á mo tíy sin si wíy a yiì, é wír veé Israyi wìy a kuumé e ŋgwàʼ sí ŋgwàʼ si kinyo ke kí‑iì kooyin é ndzəv yee Jordan.»

⁸ Á bèy, wír veé Israyi nèn yiì mo Joshua‑aà suuyin, e lì tíy sí nshòv sibaà e ghvə̀m fo mvə̀m ndzə̀v yee Jordan réŋréŋ mo rám seé Isray si dzəə̀n. Á kù‑uù yii mo Nyùy Tàr‑iì suuyin e Joshua. Áwune‑eè bèʼèy, e dù sho e kibeèy, e nèn neèr fo.

⁹ Joshua kfən tàʼ tíy yímóʼó nshòv sibaà e ghvə̀m, e tùúy e kirə̀ʼ fo atàá cùu‑uù tíy e ndzəv, kér ŋkùv mensàŋ. A tíy sin si kù dzəə́ tíy fo e shem lán.

¹⁰ Wíri kù‑uù gitì, túm ndzə́v, aàtàá cù ve vé‑eè béʼ ŋkùv mensàŋe kù tíy e kintìntìn ke ndzəv, e meé mo kinyo ke Nyùy Tàr‑iì yòŋèn e Joshua ji wíri yii kí‑iì màyìn. Kinyo kìn kidzə̀m ki kù‑uù kòóy réŋréŋ mo Mooser‑iì tiisin e Joshua fo ŋgùʼ.

¹¹ Mo wíri màysìn, e tùm é ndzən və̀sə, atàá cùu nèn bèʼèy ŋkùv mensàŋ Nyùy Tàr, a liysín sa, a wíri tíy, leeyì.

¹² A vilum vee Ruben kfəə wùn à vé Gadi, à kintoʼnìn ke vé Manassèe kì tùmsín ne e wír veé Israyí mbìy, aá báʼtí ne rə́r. Vé‑eè dù réŋréŋ mo Mooser‑iì suuyin aáwune fó ghan.

¹³ A shúu rər vəne‑eè bàʼtí moo wír nsə̀kì mkweè bèy, e tùm ndzə́v e ŋkùv mensàŋ Nyùy Tǎr mbìy, e taàmé rə́r é mboʼ yeé Jeriko.

¹⁴ Yì‑iì dzə̀ é kishiíy fóo fèy, Nyùy Tàr kóʼór ghay Joshua, e wìr dzə̀m woó Isray si. Á nèn kù a ghvəm wun ghán sidzə̀m, kù mo vé‑eè ghvə́m Mooser.

¹⁵ Nyùy Tàr lò, e sùúy e Joshua jii,

¹⁶ «Yòŋ, áàtàá cù ve á béʼ ŋkùv mensàŋe fəə́ fó ndzəv.»

¹⁷ Joshua nèn yòŋ aàtàá cùu jii, «Vèn fəə́ fó ndzəv.»

¹⁸ Atàá cù ve vé‑eè béʼ ŋkùv mensàŋ Nyùy Tàrí nèn a fəə fo ntìntìn ndzə̀v. Kù mo á láʼ kiwuú fó kwaʼ, ndzə́ví kfə́n é bàm, a leŋ réŋréŋ mo yí‑iì léŋé, a kuŋ virə́ʼ.

¹⁹ Lòo dzə e kishiíy kee ghvə̀m, e ŋwee mbìyi, wír veé Israyi kóʼ fó ghaa Jordan, e dù beè e Gilgal wo wù dzəə̀n é ŋguùŋè Jeriko fo mbìv ntoshùy.

²⁰ Joshua nèn lì tíy see nshòv sibaà e ghvə̀m, se vé‑eè fətin fó ndzəv yee Jordan, e tùúy e Gilgal foo fèy.

²¹ Wù suúy e wír veé Israyi jii, «Wíy lóo dzə e ghan se sí wiyì, a wàn dzə̀r e kitàr kí ji nsàv tìy sin sà dzə̀ ka á,

²² á yiì, é wóné kiíy ji wír veé Israyi‑iì tùm á ndzə́v yee Jordan rə̀n e nsay ye yumér.

²³ A kí dzə̀ jii, Nyùy Tàr woo Nyùy won‑eè yùmér ndzə́v yee Jordan e věn si, e mèé mo vèn‑eè tumen, kù mo wù‑uù yiìn e Rìbà Ndzə̀v wo Baar wo wù‑uù yumerin, e mèé mo vèr‑iì tumen.

²⁴ Wù‑uù yiì bey ji wír veé kitu ke nsay adzə̀me wìy a kiíy ji kóy Nyùy Tàrí waà tàv, é vèn wìy a ghvəm Nyùy Tàr woo Nyùy won, e wìy dù, e mày.»