Joshua 24 - ŊWÀʼ NYÙY

¹ Joshua kùm rám seé Isray, sí báʼtí é Shekem. Mo á wìyìn, wù jàŋrì ŋgày sé wìr wùn à vilìmbìy vi, à vé saʼa, à wír veé vitu ve ntaʼa ji á kóʼtí, a tiy e ŋkùv mensàŋ Nyùy Tǎr mbìy.

² Joshua yòŋ e wìr dzə̀m jii, «Vèn yuúrí kinyo ke Nyùy Tàr woo Nyùy wìr veé Isray suuyì. Kí dzə̀ jii, yì‑iì dzə̀ é yàŋgùʼ, aàtàr véné dzə́ é ndzə̀n Yufret, e mbìv yee fo shùy yii tó, cu a dzə̀ anyùy ámóʼó. Kù‑uù dzə̀ fo Tera woo tàr à Abraham wùn Nahor‑iì dzə́.

³ M nèn lì Abraham woo tàr à ràm yén, e lìysín ndzə́v yee Yufret sho, e nèn kù tsəə̀né wun, a ghan sho e wòŋ Kanan e dzə̀m, e kfə̀n yiì, wù wáa ker rám e nín. Mò‑oò fò wun wán woo Aysi.

⁴ M fó Aysi wón vee Esav wùn Jakov. Mò‑oò fò kirə́ʼ e Esav, a dzə̀ agwan veé Seir ji vitsə́ʼ və́, yii bèy, Jakov wùn à wón vəə́ sə́y kév a dzə̀ é Ejiv.

⁵ M wìy lò, e tùm Mooser wùn Aaron e woŋ Ejiv, e màʼ ŋgeʼ se tavkín sí fó. Fo bàm, m fəə́r ven fó wòŋ foo fèy.

⁶ Mò‑oò fə̀ə́r atàr vén fó wòŋ Ejiv, á meé é Rìbà Ndzə̀v wo Baar, vé rər veé Ejivi wáa jùm áwune e nyám se ŋkoʼ si wùn à *viténtén vé rər ví.

⁷ Atàr véné kàn mo woo Nyùy Tàr ji m sə́ á áwune. M yiì, virə́ʼ ví sə́n, e tìnér áwune fo wír veé Ejivi, e lò yiì, ndzə́ví wìy, e sùm wír veé Ejiv, e lèér. Vèn‑eè lo yèn e sí yéné kinyo ke mò‑oò yiìn e Ejiv. Fo bàm, vèn dzə̀ʼə̀m e kirə̀ʼ ké woʼ kí ntàmda.

⁸ «M nèn lì ven, e wìy sho e nsay wìr veé Amor fo vé‑eè dzə́, e mbìv Jordan yee fo shùy yii tó. Vèn áwune fùnèn, m wáy áwune e věn kiwo, e laàr fo věn mbìy, e lì nsay yev, e fòó vèn ji yéen.

⁹ Balak woo fon woó Moav woo wan Tsippor nèn ŋàʼáy, e taàmé wír veé Isray e vindzə̀ʼ. Wù‑uù jàŋ Balaam woo wan Beor, e tùm ji wù roʼ á ven,

¹⁰ yii bèy, m tén fóo yu kinyo ke Balaam. M yiì, wù səə̀vì ven sə́əvin, m fəə́r ven fó wo wo.

¹¹ Vèn túm Jordan, e wìy e Jeriko, vilum veé Jerikòo taámé ven é vindzə̀ʼ. Vitúm vímóʼ ví kfən taàmé sa ven, aá dzə̀ jii, wír veé Amor wùn à veé Perisi, à veé Kanane, à veé Hiti, à veé Girgashi, à veé Hivi, e lì veé Jebus. M ku yiì, vèn tón áwune adzə̀m.

¹² Mo vèn‑eè nyoorì áwune wiyì, m kú a way a dzə̀ fan aáwuné meliv, á wáa tùʼtìn e věn si, vèn wáa jùm. Kù dzə̀ mo vèn‑eè jùmèn afon veé Amor vee abaà. A bó vèn yòʼ‑oò lo tòn wír vìn a dzə̀ e vitaáví vén ví, kìn e vifá vén vé rər ví. Yì‑iì tòn mo, e fò e vèn.

¹³ M nen fò ven nsay ye bó vèn yòʼ‑oò lo lìm, e fò ŋkà se laʼ se bó vèn yòʼ‑oò lo bàʼrì, vèn wáa dzə sho, a yi báŋ se vici ve bó vèn yòʼ‑oò lo bìy, sé vici vé *vayin, à sé vici vé *oliv si.»

Joshua yií, wíri gwár mensaŋ wùn à Nyùy

¹⁴ Joshua nèn sùúy lèn jii, vèn wáa ghvəm a dzə̀ Nyùy Tàr, a cù wun rúrú, e kfə̀n a tiy tìítiy e wun kinyò. Vèn maʼti anyùy ve atàr véné‑eè cu e Mesopotamia, à ve vé‑eè cu e Ejivi. Vèn kú a cù a dzə̀ Nyùy Tàr.

¹⁵ A vèn tàn shií wó a ghvəm Nyùy Tàr, vèn nèn shòʼ é kishiíy ké lán ki anyùy ve vèn yíi a ghvəm. Kìn vèn yíi a ghvəm a dzə̀ anyùy ve atàr véné‑eè cu e Mesopotamia, kìn anyùy wìr veé Amor veé nsay ye vèn dzə́ sho. Bo, fo kém kí, vèr à kfə́ə yémé e dzə̀m, vèr yíi a ghvəm a dzə̀ Nyùy Tàr.

¹⁶ Wíri nyàysì, e bìnèr jii, «A dzə̀ yiì ka, é bo vèr maʼti Nyùy Tàr, a ghvəm anyùy ve səné.

¹⁷ Dzə̀ wun woo Nyùy Tàr woo Nyùy wòsən. Kù‑uù fə̀ə́r wun vèsən aàtàr vesəné fó wòŋ Ejiv fo vé‑eè reŋ vikwàn. Wù kfə̀n‑eè yiì viŋgaʼnìn ve vinyò e vèsə́n si, e tèʼtín vèsən dzə́ə sidzə̀m se vèsən‑eè ghán sho, téʼtin sa fo vitúm vidzə̀m vee fo vèsən‑eè shaa vi.

¹⁸ Nyùy Tàr‑iì jùm vitúm vidzə̀m fo vèsə́n mbìy, e jùm sa veé Amor ve vé‑eè dzə́ e nsay fèn. Bo vèr kù yíi a ghvəm sa a dzə̀ Nyùy Tàr, bìʼ fo kù dzəə̀n wun Nyùy wòsən.»

¹⁹ Joshua suúy lèn e wíri jii, «Bó vèn yòʼ dzə̀ ve dzə̀ á cù Nyùy Tàr. Nyùy Tàr dzə̀ Nyùy wo ranén, a wù kíyri ven é ŋàŋ. Bó yòʼ dzə̀ wù làysìn jay wìr ve á méŋ wun, táv a dzə̀ kitu.

²⁰ A vèn màʼtì Nyùy Tàr, a ghvəm a dzə̀ anyùy, bo wù yíi bìnkìr, e màʼ ŋgeʼ e věn kitu, e laàr ven, fə̀m mo wù‑uù yii kijuŋ e vèn.»

²¹ Wíri bìnèr e Joshua jii, «Àáy, vèr yíi a ghvəm a dzə̀ Nyùy Tàr.»

²² Joshua suúy aáwune jii, «Vèn dzə̀ anjen fo věn vitu ji vèn shòʼ á ne ji á yíi a ghvəm a dzə̀ á Nyùy Tàr.» Áwune bínsí jii, «Eè, vèr dzə̀ anjen.»

²³ Wù suúy aáwune jii, «Vèn fəə́r ri anyùy vitum ve vèn kéríi, e wày shilív shén a dzə̀ e Nyùy Tàr woo Nyùy woó Isray wùn.»

²⁴ Wíri bínsí, e sùúy jii, «Vèr yíi a ghvəm a dzə̀ Nyùy Tàr woo Nyùy wor, a yunín wun.»

²⁵ Á bèy, Joshua nèn bàʼtí wíri, á gwàr *mensaŋ wùn à Nyùy e kishiíy fóo fèy e Shekem. Joshua neèr sáʼ, e naàrì ntò se mensàŋ se dzə̀ wíri wàa tiy sho,

²⁶ e sàŋ jí sìn e Nyùy Ŋwàʼ Nsər, e lì màkìlan, e tùúy fo, e sar kici kee *terebint ke kí‑iì tíy e kirə̀ʼ ké cù ke Nyùy Tàr.

²⁷ Wù tuúy, e sùúy e wíri jii, «Vèn yén, tíy rə́ne yíi a dzə njen wòsən, bìʼ fo yí yuun ne jí se Nyùy Tàr yòŋèn e vèsən sidzə̀m. Yí kù yíi a dzə njen won, fo vèn lo, a shwèy Nyùy won, a meŋ wun.»

²⁸ Joshua nèn tàʼár wíri, á wáa dùkìr, wìr wáa kfən e wun kirə̀ʼ, wìr wáa kfən e wun kirə̀ʼ.

Kpú Joshua

²⁹ Vinyo vìn vi shaàkìr, bo Joshua woo ŋgaà lìm Nyùy Tàr woo wan Nun wáa kpu. Wù wáa kpu, a wù sì kiyá kishóv e ghvə̀m e wiì (110).

³⁰ Á dzəə̀mè wun e wun kirə̀ʼ é Timnat‑Sera, a dzə̀ é mbìv agwan veé Efrayim, a kfən kuy fo Gwan Gaash.

³¹ Wír veé Israyi‑iì ló a ghvəm Nyùy Tàr e Joshua ghan, e dù meé mo ŋgày sé wìr se sí‑iì shaàn wun si‑iì kpukin, ŋgày sé wìr se sí‑iì yenen viŋgaʼnìn ve vinyò ve Nyùy Tàr‑iì yiìn e wír veé Israyi vidzə̀m.

³² Á kfən dzəə̀mè vighvə́r vé Joosev ve wír veé Israyi‑iì koʼon shó fo Ejiv e Shekem. Vé‑eè dzəə̀mè é kirə̀ʼ ke Jakov‑iì yunen fo wón Hamor woo tàr à Shekeme, visha ve mbàm ve fəvír ví wií. A dzə̀ nsay yee shooy ye yì‑iì loòn, e kfə̀n ji vitsə́ʼ vé rám Joosev.

³³ Eleasar woo wan Aaron‑eè kpù, á dzəə̀mè wun e Gibea. Fóo‑oò dzə̀ mvəmlaʼ Finehas woo wán və. Vé‑eè fò wun kirə́ʼ kin, a kí dzə̀ áàgwan veé Efrayim.