Joshua 23 - ŊWÀʼ NYÙY

Joshua súŋnín kisúŋnìn ke bàm kí, e tìr wír veé Isray

¹ Ntàm wìy dàr mo Nyùy Tàr‑iì yiìn, wír veé Israyi meèmè fo aŋgaà vév vibàné wo, a vé‑eè kaàrí áwune, e tàr. Yì‑iì dzə̀ é ghan fen, a Joshua dzə́n ne e ŋàŋ.

² Wù nèn bàʼtí wír veé Isray adzə̀m, aá dzə̀ jii, vilìmbìy wùn aàtǎr saʼa, à wír ve á tínen nsaʼ si, à wír ve á tóm áwuneé. Wù lò, e yòŋ áwune, a suúy jii, «M dzə̀n ne, viyá vém ví dúnén.

³ Vèn‑eè lo yèn kinyo kidzə̀m ke Nyùy Tàr woo Nyùy wòsən‑eè yiìn e vitúm vìn vi, e fò e vèsən. Yì‑iì funèn wun woo Nyùy Tàr woo Nyùy wòsən áwune, e fò e vèsən.

⁴ Vèn yén ri ké vitum ve ví berin là ton vi, m jàv ne nsay yev, e fò e rám sén sí ji vitsə́ʼ vév. Kù sì nsay yen, e lì ye vitum ve mò‑oò tònèn, e kèʼ fo ndzəv yee Jordan, e dù bàʼ e Rìbà Ndzə̀v woo Mediteranean, e mbìv yee fo shùy yii nəə.

⁵ Vèn yíi nəə́ e nsay vitum ve ví berin, é Nyùy Tàr jum áwune, e fə̀ə́r, é vèn yov nsay yev mo Nyùy Tàr woo Nyùy wòsən‑eè kàʼàn ne.

⁶ Kí ku nèn a dzə jii, vèn kú a tiy kitávín, e wày ŋàŋ ji vèn kú a yiì kinyo kidzə̀m ke kí dzəə̀n kisáŋén é Ŋwàʼ Nsər Mooser. Lá vèn yòʼ rə̀ʼə́m fo fo, a kfən e koy yìyí, kìn é koy ŋkoòvìi,

⁷ fo vèn shwír wún vèn à vitúm ve ví berin e věn mvəm ví. Lá vèn yòʼ fə̀m a gaʼ yír sé anyùy vév. Lá vèn yòʼ a lìʼ kilìʼ, a kàn yír sév. Vèn wáa yen fó a ghvəm áwune, a tsəm aáwuné si.

⁸ Vèn ku yèʼtí a dzə̀ e Nyùy Tàr woo Nyùy wón wùn mo vèn‑eè sí yii, e to lán,

⁹ a kuumé jii, mo vèn‑eè nəə e wòŋ, Nyùy Tàr‑iì jum vitúm fo věn mbìy, a dzə̀ ve ví ghaamen, e tàvkír. A bó wìr yòʼ‑oò lo tàm vèn áwune, e tòn ven e wìy to lán.

¹⁰ Wìr mòʼón fo vèn kù wíy fùnèn wír nsə̀kì, aá léʼkír, bìʼ fo funèn Nyùy Tàr woo Nyùy won vindzəʼ vén mo wù‑uù kàʼàn.

¹¹ Vèn ku nèn a kìm vitú vén ví, a kòŋ Nyùy Tàr woo Nyùy won.

¹² A kí shaà fo bèy, vèn yiì lò, e bìnkìr, a suusín vèn à vitúm ve ví berin e věn mvəm vin, a tatí vijín vèn áwune, à lì wón vév, áwune wáa lì vén,

¹³ vèn wàa kiíy, e ké ru kí ji bó Nyùy Tàr woo Nyùy won yòʼ dzəə́ yiì a jùm a vitúm vìn fo věn mbìy. Bo vitúm vìn vi yíi lò, a dzə làm wo vèn koó sho, a dzə kitám ke vèn li sho, e kfə̀n a dzə sòv e věn buu nsaŋ, a dzə njoŋ e věn wàn si. Bo kù sì bey, e meé mo vèn wíy rèŋ, e mày fo nsay ye juŋ ye Nyùy Tàr woo Nyùy won foon e vèn rə̀n.

¹⁴ «Lèn, vèn yuúrí, e yù, m sí reŋ, mayì, a m sí kfə́n e bàm mo kifá kidzə̀m ki kù kfə́né. Ven adzə̀m, vèn kì kijuŋ, a melív men mè bínsi sa jii, fo vinyò vidzə̀m ve Nyùy Tàr‑iì kàʼàn ven shó, bó kinyo kimòʼón ki yoʼ gòʼ la wù yii.

¹⁵ Mo Nyùy Tàr yiìn ne vinyo ve juŋ ve wù‑uù kàʼàn ven shó vidzə̀m, bo kù dzə̀ sá mo dzə̀ wù wìy yiì ve bi ví vidzə̀m, e màʼ ŋgeʼ e věn kitu, e meé mo wù‑úù laar ven fó nsay ye juŋ ye wun woo Nyùy Tàr woo Nyùy won‑eè foon e vèn.

¹⁶ A vèn wìy a dzə, e làa yòʼ a tiy e *mensàŋ me Nyùy Tàr woo Nyùy won me wù‑uù yòŋèn ji vèn wáa tiy sho, e dù, a ghvəm a dzə̀ anyùy ámóʼó, a tsəm aáwuné si, bo Nyùy Tàr wíy shwiíy kilòŋ vèn áwune. Wù shwiiyì, é wù maʼ ŋgeʼ e věn kitu, é vèn wìy rèŋ cércér fo nsay ye juŋ ye wù‑uù foon e vèn.»