Joshua 23 - ŊWÀʼ NYÙYJoshua súŋnín kisúŋnìn ke bàm kí, e tìr wír veé Isray 1 Ntàm wìy dàr mo Nyùy Tàr‑iì yiìn, wír veé Israyi meèmè fo aŋgaà vév vibàné wo, a vé‑eè kaàrí áwune, e tàr. Yì‑iì dzə̀ é ghan fen, a Joshua dzə́n ne e ŋàŋ. 2 Wù nèn bàʼtí wír veé Isray adzə̀m, aá dzə̀ jii, vilìmbìy wùn aàtǎr saʼa, à wír ve á tínen nsaʼ si, à wír ve á tóm áwuneé. Wù lò, e yòŋ áwune, a suúy jii, «M dzə̀n ne, viyá vém ví dúnén. 3 Vèn‑eè lo yèn kinyo kidzə̀m ke Nyùy Tàr woo Nyùy wòsən‑eè yiìn e vitúm vìn vi, e fò e vèsən. Yì‑iì funèn wun woo Nyùy Tàr woo Nyùy wòsən áwune, e fò e vèsən. 4 Vèn yén ri ké vitum ve ví berin là ton vi, m jàv ne nsay yev, e fò e rám sén sí ji vitsə́ʼ vév. Kù sì nsay yen, e lì ye vitum ve mò‑oò tònèn, e kèʼ fo ndzəv yee Jordan, e dù bàʼ e Rìbà Ndzə̀v woo Mediteranean, e mbìv yee fo shùy yii nəə. 5 Vèn yíi nəə́ e nsay vitum ve ví berin, é Nyùy Tàr jum áwune, e fə̀ə́r, é vèn yov nsay yev mo Nyùy Tàr woo Nyùy wòsən‑eè kàʼàn ne. 6 Kí ku nèn a dzə jii, vèn kú a tiy kitávín, e wày ŋàŋ ji vèn kú a yiì kinyo kidzə̀m ke kí dzəə̀n kisáŋén é Ŋwàʼ Nsər Mooser. Lá vèn yòʼ rə̀ʼə́m fo fo, a kfən e koy yìyí, kìn é koy ŋkoòvìi, 7 fo vèn shwír wún vèn à vitúm ve ví berin e věn mvəm ví. Lá vèn yòʼ fə̀m a gaʼ yír sé anyùy vév. Lá vèn yòʼ a lìʼ kilìʼ, a kàn yír sév. Vèn wáa yen fó a ghvəm áwune, a tsəm aáwuné si. 8 Vèn ku yèʼtí a dzə̀ e Nyùy Tàr woo Nyùy wón wùn mo vèn‑eè sí yii, e to lán, 9 a kuumé jii, mo vèn‑eè nəə e wòŋ, Nyùy Tàr‑iì jum vitúm fo věn mbìy, a dzə̀ ve ví ghaamen, e tàvkír. A bó wìr yòʼ‑oò lo tàm vèn áwune, e tòn ven e wìy to lán. 10 Wìr mòʼón fo vèn kù wíy fùnèn wír nsə̀kì, aá léʼkír, bìʼ fo funèn Nyùy Tàr woo Nyùy won vindzəʼ vén mo wù‑uù kàʼàn. 11 Vèn ku nèn a kìm vitú vén ví, a kòŋ Nyùy Tàr woo Nyùy won. 12 A kí shaà fo bèy, vèn yiì lò, e bìnkìr, a suusín vèn à vitúm ve ví berin e věn mvəm vin, a tatí vijín vèn áwune, à lì wón vév, áwune wáa lì vén, 13 vèn wàa kiíy, e ké ru kí ji bó Nyùy Tàr woo Nyùy won yòʼ dzəə́ yiì a jùm a vitúm vìn fo věn mbìy. Bo vitúm vìn vi yíi lò, a dzə làm wo vèn koó sho, a dzə kitám ke vèn li sho, e kfə̀n a dzə sòv e věn buu nsaŋ, a dzə njoŋ e věn wàn si. Bo kù sì bey, e meé mo vèn wíy rèŋ, e mày fo nsay ye juŋ ye Nyùy Tàr woo Nyùy won foon e vèn rə̀n. 14 «Lèn, vèn yuúrí, e yù, m sí reŋ, mayì, a m sí kfə́n e bàm mo kifá kidzə̀m ki kù kfə́né. Ven adzə̀m, vèn kì kijuŋ, a melív men mè bínsi sa jii, fo vinyò vidzə̀m ve Nyùy Tàr‑iì kàʼàn ven shó, bó kinyo kimòʼón ki yoʼ gòʼ la wù yii. 15 Mo Nyùy Tàr yiìn ne vinyo ve juŋ ve wù‑uù kàʼàn ven shó vidzə̀m, bo kù dzə̀ sá mo dzə̀ wù wìy yiì ve bi ví vidzə̀m, e màʼ ŋgeʼ e věn kitu, e meé mo wù‑úù laar ven fó nsay ye juŋ ye wun woo Nyùy Tàr woo Nyùy won‑eè foon e vèn. 16 A vèn wìy a dzə, e làa yòʼ a tiy e *mensàŋ me Nyùy Tàr woo Nyùy won me wù‑uù yòŋèn ji vèn wáa tiy sho, e dù, a ghvəm a dzə̀ anyùy ámóʼó, a tsəm aáwuné si, bo Nyùy Tàr wíy shwiíy kilòŋ vèn áwune. Wù shwiiyì, é wù maʼ ŋgeʼ e věn kitu, é vèn wìy rèŋ cércér fo nsay ye juŋ ye wù‑uù foon e vèn.» |
© 2022 CABTAL