Joshua 21 - ŊWÀʼ NYÙY

Ŋkà se laʼ se vé‑eè foon e rám Levìi

¹ Yì‑iì dzə̀ é ghan sin, atǎr kfəə se rám Levìi nèn dù, e yèn Eleasar woo taà cù wùn à Joshua woo wan Nun, aàtǎr kfəə veé ram seé Isray adzə̀m,

² aá dzə́ e Shilo e nsay Kanan. Á wíy, e sùúy jii, «Nyùy Tàr‑iì shaà fo Mooser, e sùúy jii, ‹Á fó á ŋkà se laʼ se vèr wáa dzə sho, é sí wáa ker kwáʼ fo ghaŋ fo dzə̀ vèr wàa lèm nyám sér.› »

³ Á bèy, wír veé Israyi nèn shòʼtí ŋkà se laʼ símóʼ sí fo áwuné nsay, e fò e wír veé ram Levi wùn à kwáʼ se nyàm si fó ghaŋ, réŋréŋ mo Nyùy Tàr‑iì yòŋèn ji á yii.

⁴ A vé‑eè tar, bo á fo ŋkà se laʼ sìn e wír veé ram Levìi. Á kèʼ tar, ké mbìy ki fəə́ ji ké kfəə Kohat mo lav sév sí dzə̀kìn. Á nèn tòmbìy kwàŋ ké wìr vév ve á ràmèn fo Aaron woo taà cù. Á fó áwune ŋkà se laʼ nshòv sitaár e ghvə̀m, se vé‑eè shoʼtin fó nsay rám Juda wùn à yé Simeone, à yé Benjamine.

⁵ Kibér ke kfəə Kohat ki nèn sə̀ ŋkà se laʼ e ghvə̀m ji vitsə́ʼ vév, a dzə̀ se vé‑eè shoʼtin fó nsay rám Efrayim, à yé Dane, à yé kintoʼnìn ke rám Manassèe.

⁶ Kfəə́ se Gershon si nèn sə̀ ŋkà se laʼ nshòv sitaár e ghvə̀m se vé‑eè shoʼtin fó nsay rám Issakar, à yé Asheri, à yé Navtalìi, à yé kintoʼnìn ke rám Manasse ke kí dzəə̀n é Bashan ki.

⁷ Kfəə́ se Merari si nèn sə̀ ŋkà se laʼ nshòv sibaà e ghvə̀m mo kfə́ə sév sí dzə̀kìn, a vé‑eè shòʼtí fó nsay rám Ruben wùn à yé Gadi, à yé Sebulune.

⁸ A wír veé Israyi‑iì shwèŋ shwéŋén, e bóo kiíy ŋkà se laʼ se á fó e rám Levi wùn à kwáʼ se nyàm see fó ghaŋ si. Vé‑eè yiì réŋréŋ mo Nyùy Tàr‑iì naàrìn e Mooser ji á wíy siíy, a yiì.

^9-10 Mo vé‑eè jav virə́ʼ e wír veé ram Levìi bey, vé‑eè tòmbìy fò ké wìr veé kfəə se Kohat ve vé‑eè ràmèn fo Aaron, bìʼ fo vé‑eè lóo tàr, tómbìy fəə̀ kév, a yír sé ŋkà se laʼ se vé‑eè shoʼtin fo rám Judàá nsay, à yé Simeone, e fò aáwune sí sìne.

¹¹ Vé‑eè fò Kiriat‑Arba wo yírí loòn fo Araba woo tàr à Anak, a kù dzə̀ Hebron woó mbìv agwan veé Juda. Vé‑eè fò, e tàtí kwáʼ se nyàm se sí kaarin fó.

¹² Yii bèy, a vé‑eè fò ne kwáʼ se á fəən láʼ wùn à ntèʼ seé ŋkàlaʼ fèn si e Kalev woo wan Jefunne ji və́ vee virə́ʼ.

¹³ Mo vé‑eè foon Hebron woo ŋkàlaʼ kilìr və̀n, à kwáʼ nyàm woo fó ghaŋe e rám Aaron woo taà cùu, á nèn kfə̀n dzə̀sì ŋkà se laʼ símóʼ sí, a sí dzə̀ jii, Libna

¹⁴ wùn à Jattir, à Eshtemoa,

¹⁵ à Holon, à Debir,

¹⁶ à Ayin, à Jutta, à Bet‑Shemesh, yee shó wùn à kwáʼ və́ nyàmé. Ŋkà se laʼ si nèn fəə̀ bvə̀ʼə̀ fo nsay rám Juda wùn à yé Simeone.

¹⁷ Fo nsay rám Benjamin, vé‑eè shòʼtí ŋkà se laʼ see jii, Gibeon wùn à Geba,

¹⁸ à Anatot, à Almon, ŋkà se laʼ sikweè, yee shó wùn à kwáʼ nyàm vəə́.

¹⁹ Ŋkà se laʼ sidzə̀m se vé‑eè foon é rám Aaron ye yì‑iì dzəə̀n atàá cù si nèn a dzə nshòv sitaár e ghvə̀m sidzə̀m wùn à kwáʼ sév sé nyàm si.

²⁰ Fo kibér ke wìr veé ram Levi ve dzəə̀n kfə́ə Kohat, á fó ŋkà se laʼ símóʼ sí se vé‑eè shoʼtin fó nsay rám Efrayim.

²¹ A sí dzə̀ ji Shekem wo yì‑iì dzəə̀n ŋkàlaʼ kilìr yìmòʼ e mbìv agwan veé nsay Efrayim, e fò Geser,

²² à Kibsayim, à Bet‑Horon. Wáa dzə ŋkà se laʼ sikweè, yee shó wùn à kwáʼ və́ nyàmé.

²³ Ŋkà se laʼ see lò fo rám Dan si‑iì dzə̀ jii, Elteke wùn à Gibbeton, à

²⁴ Ayjalon, à Gat‑Rimmon, ŋkà se laʼ sikweè, yee shó wùn à kwáʼ və́ nyàmé.

²⁵ Fo mvə̀m nsay kintoʼnìn ke rám Manasse, á shóʼtí ŋkà se laʼ sibaà, see jii, Taanak wùn à Gat‑Rimmon, e lì kwáʼ sév sé nyàm.

²⁶ Á ŋkà se laʼ se vé‑eè foon e kfəə́ se Kohat si, sí nén a dzə sidzə̀m e ghvə̀m, à kwáʼ sév sé nyàm si.

²⁷ Ké wìr veé ram Levi ve dzəə̀n kfə́ə Gershon ki dzə̀ jii, ŋkà se laʼ sév símóʼ sí‑iì lò fó nsay kintoʼnìn ke rám Manasse ki, a sí dzə̀ jii, Golan woó Bashan, a dzə̀ ŋkàlaʼ kilìr, e lì Beeshtera, ŋkà se laʼ sibaà, yee shó wùn à kwáʼ və́ nyàme.

²⁸ Fo nsay rám Issakar, á shóʼtí ŋkà se laʼ sikweè, sidzə̀m wùn à kwáʼ sév sé nyàm si. A sí dzə̀ jii, Kishion wùn à Daberat,

²⁹ à Jarmut, à En‑Gannim.

³⁰ Fo nsay rám Asher, á shóʼtí ŋkà se laʼ sikweè, sidzə̀m wùn à kwáʼ sév sé nyàm si. A sí dzə̀ jii, Mishal wùn à Abdon,

³¹ à Helkat, à Rehov.

³² Fo nsay rám Navtali, á shóʼtí ŋkà se laʼ sitaár, sidzə̀m wùn à kwáʼ sév sé nyàm si. A sí dzə̀ jii, Kedesh woo ŋkàlaʼ kilìr e Galeli, à Hammot‑Dor, à Kartan.

³³ Ŋkà se laʼ sidzə̀m se vé‑eè foon e wír veé Gershon mo kfə́ə sév sí dzə̀kìn sí nèn a dzə nshòv sitaár e ghvə̀m, yee shó wùn à kwáʼ və́ nyàm woo fó ghaŋe.

³⁴ Fo kibér ke rám Levi, ke yì‑iì dzəə̀n kfə́ə Merari, ŋkà se laʼ sév símóʼ sí lò fo nsay rám Sebulun, a sí dzə̀ jii, Jokneam wùn à Karta,

³⁵ à Dimna, à Nahalal, yee shó wùn à kwáʼ nyàm vəə́.

³⁶ Fo nsay rám Ruben, á shóʼtí ŋkà se laʼ sikweè, yee shó wùn à kwáʼ və́ nyàme, a sí dzə̀ jii, Beser wùn à Jahas,

³⁷ à Kedemot, à Mefa‑At.

³⁸ Fo nsay rám Gad, á shóʼtí ŋkà se laʼ sikweè. Sidzə̀m si kú a dzə wùn à kwáʼ sév sé nyàm si, a dzə̀ Ramot woo ŋkàlaʼ kilìr e Gilead, à Mahanayim,

³⁹ à Heshbon, à Jaser.

⁴⁰ Ŋkà se laʼ se vé‑eè foon e wír veé Merari mo kfə́ə sév sí dzə̀kìn, sí nèn a dzə sidzə̀m ji nshòv sibaà e ghvə̀m. Á mo vé‑eè màysìn vinyo ve rám Levi.

⁴¹ Ŋkà se laʼ se rám Levi sidzə̀m mo sí dzəə̀n e wír veé Israyí mvə̀m vitsə̀ʼ sí nén a dzə nshòv waamé e mkweè, e lì kwáʼ sév sé nyàm.

⁴² Ŋkà se laʼ sìn si‑iì kér kwáʼ sév sé nyàm e kitu kitu. Ŋkàlaʼ yee shó lo, yì wàa ker kwáʼ və́ nyàm, a wú kaárí yee shó e tàr. Kí nen kù a dzə bèy, ŋkà se laʼ sìn sidzə̀m.

⁴³ Á bèy, Nyùy Tàr nèn fò nsay dzə̀m e wír veé Israyi mo wù‑uù lìʼìn áàtàr véví ji wun wíy fo. Áwune sə́ nsay yee shooy bèy, e nèn a dzə fo.

⁴⁴ Nyùy Tàr nèn fò áwune meemè mbìv sidzə̀m, kù mo wù‑uù lìʼìn ne aàtàr véví. Bó ŋgaà vibàn wov yòʼ‑oò lo ghàʼ áwune, fə̀m e mòʼón. Nyùy Tàr‑iì wày aŋgàa vibàn vév adzə̀m aáwuné kiwo.

⁴⁵ Nyùy Tàr‑iì lo yiì vinyo vidzə̀m ve wù‑uù kàʼàn wír veé Isray sho.