Joshua 20 - ŊWÀʼ NYÙY

Ŋkà se laʼ se kilìr

¹ Nyùy Tàr lò, e yòŋ e Joshua jii,

² «Yòŋ e wír veé Israyi ji á shóʼtí á ŋkà se laʼ símóʼ sí, e lèm ji sé kilìr mo mò‑oò naàrìn e Mooser ji wù suúy e wò.

³ A dzə̀ jii, a wìr lò e kimbùmmbúm, e yùyrí wír, là kiíy, wù lèʼ, e dù lìr fo, fo ŋgaà wìr siir ŋkfə́tír.

⁴ Wù léʼ, e dù lòo nəə́ e ŋkàlaʼ foo fèy, wù tìím é shùu kày woo fó, e naàrì kinyo kfə́ e kfə́m sé wìr see fo si, bo á kù‑úù səəvi wun fo, e fò kirə́ʼ ke wù wáa dzə sho fo.

⁵ Kí koóy ji ŋgaà ŋkfə́tír jumri, e wìy mèé fo, bo á yòʼ wáy ŋgaà kinjuyrìwìr e kiwo wo, bìʼ fo wù yoʼ lò yùyrí e kúmé, a wùn wun yòʼ‑oò ló a ker ŋkfəə́mé.

⁶ Wù kù yíi gòʼ e ŋkàlaʼ fèy, e meé mo wù wíy tiím e kibàʼ ke nsaʼ e kintatì kìn kí si, e kù a dzə fo, e meé mo taà cù wo kuʼùn wo wù sáʼ e ghan fóo fèy wíy kpu. Wù koŋ lèn, wù kfə̀n é bàm e wun laʼ e mvə̀mlaʼ yee fo wù‑uù nyeŋen.»

⁷ Wír veé Israyi nèn shòʼ Kedesh wo wù dzəə̀n é Galeli, e mbìv agwan veé nsay Navtali, e kfə̀n shòʼ Shekem woó mbìv agwan veé nsay Efrayim, à Kiriat‑Arba woó mbìv agwan veé nsay Juda, aá yoŋ sa ji Hebron.

⁸ Fo ndzə̀n Jordan fèsə, fo mbìv yee fo shùy yii tó, aá máʼtí ne Jeriko, e lìysín, á shóʼ Beser wo wù dzəə̀n e rám Rubené nsay, a fóo dzə̀ mboʼ gwan, e kirə̀ʼ ké woʼ kí, e kfə̀n shòʼ Ramot wo wù dzəə̀n é Gilead, e rám Gadí nsay, e kfə̀n shòʼ Golan wo wù dzəə̀n é Bashan e rám Manassèé nsay.

⁹ Á ŋkà se laʼ se vé‑eè shoʼtin ji a wìr woó Isray, kìn kiŋgwìy ke kí dzə́ aáwuné mvəm kí lòo dzə, e yùyrí wír e kimbùmmbúm là kiíy, wù lèʼ, e lìr fo, e nèn bòy fo ŋgaà ŋkfə́tír yúyrí wun, e meé mo wù wíy tiím e kintatì kí si, é bo á tar.