Joshua 2 - ŊWÀʼ NYÙY

Joshua túm vé ŋkiyi é Jeriko

¹ Joshua woo wan Nun nèn tùm wír abaà fó Shittim fo vé‑eè bee ji á du á bám bám, e kìy á woŋ. Wù suúy aáwune jii, «Vèn du, e shwèʼ woŋ Kanan, bo taaka ŋkàlaʼ yee Jeriko.» Wír vìyi nèn lò, e dù mèé e ŋkàlaʼ fèy, e nə̀ə́ e sàkì wùmǒʼ lav, aá yoŋ ji Rahav, e beè fo.

² Kí tó e fòn woó Jeriko kitùʼùr ji wír veé Isray ámóʼó wìy a fo vitsə́ʼə́ ji á shwéʼ á woŋ.

³ Fòn nèn tsə̀nsí toóy ji Rahav wiy á e wír ve á wìyìn, e beè e wun lavi, bìʼ á fo á wìyìn ji á shwéʼ á woŋ e dzə̀m.

⁴ Yii bèy, a wiíy və̀n kì lìtì ne wír vee abaà viy, wù nèn bìnèr jii, «Dzə̀ á rú, wíri lo wìy a, e nə̀ə́ a mo, bo wáa dzə a ji bó m yoʼ waà kìíy ji á sà kì wìy fó feé á.

⁵ Ghán se á yii sə́ti shúu kày e meraaràŋ si kì ghèén, á nen fəə̀, kìn á dù dzə́ə ka, bo bó m yoʼ waà kìíy. Aá jùmrì cér, á waà kòóy.»

⁶ A Rahav suuy bèy, a wù kì lì ne vilum vìy, e kòʼ shó e kikfəv, e lìtì e sar se vishaarín ve làv ŋkom ve wù‑uù naŋsin e lèm fo.

⁷ Aŋgàa ntum fòn vìyi nèn fəə̀, a jùm wír vìy, a dù e dzəə̀ Jordan, e jùm, e dù mèé e tuumé ndzəv. Kù mo vé jùme kì fəən láʼ, á nèn sə̀tí shúu kày fo bàm.

⁸ Rahav siíy e kòʼ é kikfəv, e yèn vé ŋkiy vìy, a bó á yóʼ ne buùné, e sùúy aáwune jii,

⁹ «M kì ji Nyùy Tàr wày ne woŋ və̀n e věn kiwo, a kindzə́m kén kí gwàr ne ver, a wìr dzə̀m woó wòŋàn sí fan ven fánen.

¹⁰ Vèr‑iì lo yù mo Nyùy Tàr‑iì shèsìn Rìbà Ndzə̀v wo Baar, wù yúm ji vèn túm é ghan se vèn‑eè fəən fó Ejiv. Vèr kfə̀n‑eè yù sá kinyo ke vèn‑eè yiìn áàfon veé Amor vee abaà veé ndzə̀n Jordan fèsə, vee Sihon wùn Og, e laàr áwune láarin.

¹¹ Kù mo vèr‑iì yuun vinyo vìn, tím yérí kpú, wìr dzə̀m seèm bìʼ ven. Rúrú, Nyùy Tàr woo Nyùy won kù dzə̀ wun Nyùy wo wù sáʼ yúv wùn à nsay.

¹² M nén a lon jii, mo m yiìn ne kijuŋ e vèn, vèn liʼ ri e Nyùy Tǎr yir ji vèn yíi yiì sa kijuŋ e mò, e kfə̀n yiì e kfə́ə yémé. Vèn fó ri mo kisəəm, é m fiʼ kìíy rú jii,

¹³ vèn yíi bavtí vèr à tàr wor, à yè wor, à lúmér sém sí wùn à jemèr si, à wìr wov e dzə̀m, e sə ver adzə̀m fo kpu.»

¹⁴ Wír vìyi bìnèr sho jii, «Kpúu li ver, a vèr fen dzə̀ làa yòʼ bavtí ven. Aà dzə̀ làa fiìnè ver, bo vèr yíi a leéy fo wò e ghan se Nyùy Tàr foon ne nsay rə̀n ji yéer.»

¹⁵ Mo lav ye Rahav‑iì shiiy sho‑oò làŋsìn wùn à kirə́v ké kày yeé ŋkàlaʼ ki, wù nèn lì wír vìy, e sə̀ʼə́r e kfəə̀ fó shùu wundu e bǎm kày.

¹⁶ Wù lòo səʼə́r, e sùúy aáwune jii, «Vèn du áàgwan, fo vé jwime yén ven. Vèn lir fó vishiíy vitaár. Á yií jwím ntéŋ, kfə́n e bàm, é vèn nèn fəə̀, a dù du yén.»

¹⁷ Vilum vìyi yòŋ e wun jii, «Ku kìíy jii, fo kilìʼ ke à yiìn, vèr líʼ e wò, bo bó vèr yòʼ yíi lì njò, aà fen dzə̀ làa yòʼ yiì kinyo ke vèr yíi suúy e wò.

¹⁸ Vèr wíy wiy e wòŋàn, à kù sə̀ə́y kinsàr ke ndzə̀y ke kí shé kìn e shùu wundu fèn wo à fəərin ver fó fo, é vèn báʼtí e wò lav, vèn à tàr won, à yè won, e lì lúmér sé wùn à wìr dzə̀m woo tàr wón kfəə.

¹⁹ A wìr wìy fəə̀ é ndzə, e dù e màdzəə̀, bo njò wíy a dzə rə́ə, é la vèr yòʼ lì lòn. Yii bèy, a kinyo ki wìy kòóy wír, a wù dzə̀ é mvə̀m lav vèn wun, bo njò dzə̀ yéer.

²⁰ Yii bèy, aà bì wír kinyo ke vèr wìyìn, bo bó vèr yòʼ dzəə́ yìi ghvəm kilìʼ ke à yiìn vèr líʼ, a bó vèr yòʼ yíi a ker njò yìmòʼ.»

²¹ Wù bìnèr jii, «Kí kù tíy e věn jì, e nèn tsə̀nsí, á wáa dù. Á dù, wù kúr kinsàr ke ndzə̀y ke kí shé kìy e shùu wundu.»

²² Vé ŋkiy vìyi ló, e dù aàgwan, e dzə̀ʼə̀m fo vishiíy vitaár, e meé mo vé‑eè yenen ji á jwìm á ne áwune ntéŋ, e kfə̀nkír. A vé‑eè lo jwìmér áwune vitóŋtóŋ vidzə̀m, e làa yòʼ yen.

²³ Vilum vee abaà víyi nèn sə̀y fó agwan, e tùm ndzə́v, e kfə̀n é bàm, e dù yèn Joshua woo wan Nun, e fèr kinyo kidzə̀m ke kí‑iì kooyin áwune.

²⁴ Á suúy e Joshua jii, «Ké ru kí, Nyùy Tàr wày ne woŋ woo shooy e dzə̀m e vèsə́n kiwo. Jòkìnyàʼ, a kindzə́m kí kù gwar wir dzə̀m woo fó gwárin bìʼ vèsən.»