Joshua 18 - ŊWÀʼ NYÙY

Joshua jáv nsay e rám seé Isray se sí‑iì berin sí

¹ Wìr dzə̀m woó Isray nèn lò, e bànén e Shilo, e tùúy *kibàn ké ntàsín fó. Mo á fə̀m‑eè tònèn ne woŋ, a nsay néŋ e mboʼ,

² á yòʼ‑oò ló ne fò nsay e rám sí sidzə̀m. Rám sí‑iì dzəə́ bér saàmbà se á yòʼ‑oò ló ne fò vév vee vitsə́ʼ.

³ Joshua nèn yòŋ e wír veé Israyi jii, «Vèn yíi màʼ wún ben e meé e le, e bóo sə nsay ye Nyùy Tàr woo Nyùy atǎr ram yén‑eè foon e vèn?

⁴ Vèn shóʼtí vilum ataár ataár mo rám sí dzə̀kìn, e tsə̀nsí, aá du, e ghàn woŋ dzə̀m, e tàr mo dzə̀ á jàv e rám sí ji vitsə́ʼ vév. Á yii bèy, aá nèn kfə̀n é bàm, e yèn mo.

⁵ Vèn yíi toʼtí virə́ʼ saàmbà, é Juda goʼ e wun kirə̀ʼ ke kí kfənen tsə́n, é wír veé ram Joosevi goʼ e kév kee kirə́ʼ kí ke kí kfənen kuy.

⁶ Vèn sáŋ, e naàrì mo woŋ və̀ne dzəə̀n vintóʼ saàmbà, e nèn wìy naàrì e mò dzə́ə ye vèn yenen shó, é m neer e Nyùy Tàr woo Nyùy wòsə́n si, a tàr, é wù wáa dìn mo dzə̀ m jàv e vèn.

⁷ Yii bèy, wír veé ram Levìi yòʼ yíi a ker nsay e věn mvəm, bìʼ fo kév kí kù mày ji áwune wáa lìm ji atàá cù Nyùy Tàr, a wír veé ram Gad wùn à vé Ruben, à vé kintoʼnìn ke rám Manassèe sí kér yéev yee nsay e ndzə̀n Jordan yee fo shùy yii tó mo Mooser woo ŋgaà lìm Nyùy Tàr‑iì foon aáwune.»

⁸ Vilum vìyi lòo lò ji á waà sí du, a sìysì woŋ, Joshua naàrì aáwune jii, «Vèn du, e ghàn, e kìy woŋe, e sàŋ mo wú dzəə̀n, kfə́n e bàm, é m nèn neèr e Nyùy Tǎr si, e Shilo fèn, e tàr, e bóo fo e vèn.»

⁹ Wír vìyi nèn dù, e ghàn é wòŋ foo fèy, e sàŋ é ŋwàʼ mo virə́ʼ vee saàmbà vi dzəə̀n wùn à ŋkà se laʼ sév sí, e nèn kfə̀n, e yèn Joshua e kibeèy é Shilo.

¹⁰ Joshua nèn tàr virə́ʼ vin e Nyùy Tǎr si e Shilo foo fèy, e jàvtì e rám seé Isray si, rám yee shóo wáa ker kfə́.

¹¹ Joshua‑aà kèʼ, e tàr ké rám Benjamin, kí fəə́ mbìy mo kfə́ə sév sí dzə̀kìn. Kí fəə́ ji nsay yev dzə̀ á e ye rám Juda wùn à ye rám Jooseví nsàn.

¹² Fo mbìv yee kuy, bìíy yev kèʼ fo Jordan, e nèn kòʼ é wòŋrí gwan, kuy kuy fo Jeriko, e kòʼ é wòŋ agwan, e kù a dù e mbìv yee fo shùy yii nəə, e dù bèy, e bàʼ e woʼ yeé Bet‑Aven.

¹³ Bìíy ló fó fo, e lìysín, e dù, e bàʼ e bam wo wù dzəə̀n tsə́n fo Lus wo dzəə̀n sá ji Betel, e nèn shaà, e sə̀y é Atarot‑Addar wo wù dzəə̀n é ghaa gwan wo wù dzəə̀n tsə́n fo Bet‑Horon Tsə̀n.

¹⁴ Bìíy nèn dù, e bàʼ e mbìv gwan ye yì kiʼ fo shùy yii nəə, e rə̀ʼə́m, e kù a dù tsə́n tsə́n, e dù bèy, e bàʼ e ŋkìʼnìn Bet‑Horon, e dù, e jòʼsì e Kiriat‑Baal, a dzə̀ sá ji Kiriat‑Jearim, a dzə̀ ŋkàlaʼ rám Juda. Á bìíy nsay Benjamin e mbìv yee fo shùy yii nəə.

¹⁵ Bìíy yee tsə́n nen kèʼ fo ghaŋ se Kiriat‑Jearim, e dù e Efron fo ntòŋ sé ndzəv seé Neftoa si dzə̀kìn.

¹⁶ Yì nen sə̀y, a dù, e bàʼ e ghaa gwan wo wù kíy Kiwoóy ké Ben Hinnom, ke kí ndzəy kuy fo Kiwoóy ké Refayim. Yì nen sə̀y é Kiwoóy ké Hinnom tsə́n fó wòŋrí gwan woó Jebusi, e sə̀y róŋ róŋ, e bàʼ e En‑Rogel.

¹⁷ Yì nèn tèém, a dù e mbìv yee kuy, a kìʼ En‑Shemesh, e shaà, e dù e Gelilot e ŋkìʼnìn ŋgèm sibaà é Adummim, e nèn sə̀y é kilan ke Bohan wo yì‑iì dzəə̀n wan Ruben.

¹⁸ Yì lò fo fo, a dù, a shaà kuy fo wòŋrí gwan wó a biʼtí, a kiy Jordan, e nèn sə̀y é mbuŋ Jordan,

¹⁹ e dù shaà kuy fo wòŋrí abam veé Bet‑Hogla, e nèn ndzə̀y e Ndzə́v Shiŋgwaŋe, e kibùʼ ke kùy ki, fo Jordan du, nəə. Á bìíy yeé mbìv yee tsə́n.

²⁰ Jordan nén a dzə bìíy yeé mbìv yee fo shùy yii tó. Á mo bìíy dzəə̀n, ye yì‑iì kaarin nsay rám Benjamin mo kfə́ə sév sí dzə̀kìn.

²¹ Ŋkà se laʼ se rám Benjamin mo kfə́ə sév sí‑iì dzə̀kìn sí síne. Símóʼ sí dzə̀ jii, Jeriko, Bet‑Hogla, Emek‑Kesis,

²² Bet‑Araba, Tsəmarayim, Betel,

²³ Awim, Para, Ofra,

²⁴ Kefar‑Amoni, Ofni, e lì Geba. A dzə̀ ji ŋkà se laʼ nshòv sibaà e ghvə̀m wùn à ntèʼ sév sí.

²⁵ Símóʼ sí wáa dzə jii, Gibeon, Rama, Beerot,

²⁶ Mispe, Kefira, Mosa,

²⁷ Rekem, Irpeel, Tarala,

²⁸ Tsəla, Ha‑Elev, Jebus a dzə̀ ji Jerusalem, Gibea, e lì Kiriat‑Jearim. Ŋkà se laʼ nshòv sikweè e ghvə̀m wùn à ntèʼ sév sí. Á ŋkà se laʼ se rám Benjamin mo kfə́ə sév sí dzə̀kìn.