Joshua 17 - ŊWÀʼ NYÙY

Nsay rám Manasse ye yí dzə́ e mbìv yee fo shùy yii nəə

¹ Nsay ye vé‑eè foon e rám Manassèe rə̀ne. Manasse‑eè dzə̀ wan Joosev mbìy, a wan Manasse‑eè dzə̀ Makir, a yì‑iì dzə̀ tàr à Gilead. Mo Gilead‑iì dzəə̀n wir rə̀r wo tavín, vé‑eè fò nsay e kfə́ə rəə́ é ndzə̀n Jordan, e mbìv yee fo shùy yii tó, a nsay ye vé‑eè foon‑eè dzə̀ yeé Bashan wùn à yìmòʼ ye vé‑eè loòn, a yòŋ ji Gilead.

² Fo kibér ke rám Manasse ki, áwune nèn kòóy yéev yee nsay e ndzə̀n Jordan və̀n woo fo shùy yii nəə. Vé‑eè fò mo kfə́ə sév sí dzə̀kìn, a sí dzə̀ jii, yé Abieser wùn à yé Heleki, à yé Asrieli, à yé Shekeme, à yé Heferi, e lì yé Shemida. Á kfəə́ se wìr ve dzəə̀n rám Manasse woo wan Joosev.

³ Yii bèy, Tsəlofehad woo wir rǎm Manasse wùmòʼ yòʼ‑oò ló a ker wán woo lumèn. Tàr wov‑iì dzə̀ Hefer woo wan Gilead, woo wan Makir, woo wan Manasse. Wù‑uù kér wón a dzə̀ vee vikìy, a yír sév sí dzə̀ jii, Maala wùn à Noa, à Hogla, à Milka, e lì Tirsa.

⁴ Áwune nèn wìy yèn Eleasar woo taà cù, à Joshua woo wan Nun, à vilìmbìy vi, e sùúy jii, «Nyùy Tàr‑iì yòŋ e Mooser ji wù fó á vitsə́ʼ e vèr réŋréŋ mo á fó aàfə́r vér vee vilume.» Á ku nèn fò áwune nsay aàfə́r vév vee vilumé mvəm ji vév vee vitsə́ʼ réŋréŋ mo Nyùy Tàr‑iì yòŋèn.

⁵ Bìʼ bey, nsay rám Manasse yeé mbìv Jordan yee fo shùy yii nəə nèn fəə̀ virə́ʼ e ghvə̀m, e bóo lì nsay Gilead wùn à ye Bashan ye yì dzəə̀n é ndzə̀n Jordan fèsə.

⁶ Yì‑iì fəə̀ bey, bìʼ fo wón vee vikìy veé ram Manassèe‑eè səən vitsə́ʼ réŋréŋ moo vee vilum. A vé‑eè fò ne nsay Gilead rə̀y e kibér ke wìr veé ram Manasse ki.

⁷ Nsay rám Manasse nèn kèʼ fo ye rám Asher, e dù e Mikmetat, a fóo dzə̀ é mbìv Shekem yee fo shùy yii tó. Bìíy nen wòm tsə́n tsə́n, e dù, e mèé fo wíri dzə́ e ghaa dàn woó Tappua.

⁸ Nsay Tappua wáa dzə ye Manasse, yii bèy, mvə̀mlaʼ yeé Tappua wáa dzə ye Efrayim mo yì fə̀m tíy e bìíy nsay wón Manasse.

^9-10 Bìíy nen sə̀y tsə́n tsə́n, e dù, e bàʼ e kiwoóy ké ndzəv yee Kana, a gwàmrì kuy kuy, e dù, e ndzə̀y e Rìbà Ndzə̀v woo Mediteranean. Nsay ye yì kfənen tsə́n wáa dzə ye rám Efrayim, ye yì kfənen kuy nén a dzə ye rám Manasse. A wír veé ram Efrayime kér ŋkà se laʼ símóʼ sí é nsay rám Manasse fèy. Fo mbìv wòŋ yee fó kùy, rám Manassèe nen jàv bìíy wùn à yé Asheri e mbìv yìmòʼ, e kfə̀n jàv wùn à yé Issakari e mbìv ye yì kiʼ fo shùy yii tó.

¹¹ A wír veé Manassèe kù kér ŋkà se laʼ símóʼ sí wùn à ntèʼ seé ghaŋ wo si e nsay Issakar, à ye Asher. Ŋkà se laʼ sìn si‑iì dzə̀ ji Bet‑Shean, à Ibleyam, à Dor wo á yoŋ sa ji Nafat, à En‑Dor, à Taanak, e lì Megiddo.

¹² Yii bèy, la wón Manassèe yòʼ yù fóo jùm wír veé Kanan fo fo. Á ku nèn a dzə e nsay foo fèy.

¹³ Fə̀m‑eè lòo dzə fo bàm ye wír veé Israyi‑iì kùʼùn ne, a ker vitaáví, á yòʼ‑oò lo yù fó jùm wír veé Kanan adzə̀m. Yii bèy, vé‑eè kàn, á wáa lìm fo áwune.

Rám Efrayim wùn à kintoʼnìn ke yé Manassèe lón ji á dzəsi nsay yev

¹⁴ Wír veé ram Joosevi nèn yòŋ e Joshua jii, «Nyùy Tàr səə̀vì ne ver, á wáa dzə anín, à fó ver a dzə̀ kirə́ʼ kimòʼón ji vitsə́ʼ vér bìʼ ka?»

¹⁵ Joshua nèn sùúy aáwune jii, «Mo vèn dzəə̀n wír anín, a woŋ agwan woó nsay Efrayime fátir e ŋàŋ fo vèn, vèn kóʼ é kòv, e wír veé Peris wùn à veé Refayimé nsay, e gwàr kóví, e yòv fóo.»

¹⁶ Rám Joosevi yòŋ jii, «Woŋ agwan wórí yòʼ fə̀m dzə̀ wú ghèén ver, a ké mboʼ ki dzə̀ jii, wír veé Kanan vee fó adzə̀me kér *viténtén vé rər vé kisha vi, a veé Bet‑Shean wùn à ntèʼ see fó si kérí, a ve á dzəə̀n é Mboʼ Jesreeli kér sa.»

¹⁷ Joshua nèn sùúy e wír veé ram Joosev ve á ràmèn fo Efrayim, à ve á ràmèn fo Manassèe jii, «Vèn dzə̀ wír nyanyày, e kfə̀n a ker vitaáví é ŋàŋ, bó vèn yòʼ yíi a ker kirə́ʼ kimòʼón cáʼ.

¹⁸ Á bèy, woŋ agwane yíi a dzə wón e dzə̀m, fə̀m mo dzəə̀n kóv, vèn yíi gwàr, e yòv, e dù, e meé mo agwane duùn ben. Ké wìr veé Kanan, fə̀m mo áwune kér viténtén vé rər vé kisha vi, e kfə̀n tàvkír, vèn kù yíi jùm, e fəə́r fo nsay.»