Joshua 16 - ŊWÀʼ NYÙY

Nsay rám Efrayim, à ye kintoʼnìn ke rám Manasse ke kí dzə́ e mbìv yee fo shùy yii nəə

¹ Nsay ye vé‑eè foon e wír ve vé‑eè ràmèn fo Joosevi rə̀ne. Bìíy yee fó tsən‑eè kèʼ fó ndzəv yee Jordan e ghaa adàn ve á dzəə̀n é mbìv Jeriko ye yì kiʼ fo shùy yii tó. Yì nèn dù, e shaà Jeriko, e kòʼ, e dù tòsín wóʼ, e nə̀ə́ e mbìv aŋkoŋ veé Betel.

² Yì nèn shaà Betel, e dù e Lus, e kfə̀n shaà, e bìʼír e Atarot fo dzəə̀n ŋgvən wìr veé Arek,

³ e nèn lò, e sə̀y, a dù e mbìv yee fo shùy yii nəə, e dù bàʼ e wír veé Jafletí ŋgvən, a shaà, a dù e ŋgvən Bet‑Horon Tsə̀n, e shaà dù e Geser, e nèn dù ndzə̀y e Rìbà Ndzə̀v woo Mediteranean.

⁴ Rám Manasse wùn à yé Efrayim ye yí‑iì sanen fo Joosev e bàá nèn kòóy vitsə́ʼ vév é nsay foo fèy.

Bìíy se nsay rám Efrayim

⁵ Nsay ye vé‑eè foon e rám Efrayim mo kfə́ə sév sí dzə̀kìné rə̀ne. Bìíy yee fó tsən‑eè kèʼ fó Atarot‑Addar, e dù mèé e Bet‑Horon Kùy,

^6-8 e dù shaà Tappua, e kù a dù e mbìv yee fo shùy yii nəə, e mèé e ndzəv yee Kana, a gwàmrì, e dù ndzə̀y e Rìbà Ndzə̀v woo Mediteranean. Fo mbìv yee kuy, bìíy lò fo Mikmetat, e siìr ŋkfənèr, a dù e mbìv yee fo shùy yii tó, e dù shaà Taanat‑Shilo, e kù a shaà, a dù e mbìv yee fo shùy yii tó, e dù bàʼ e Janoa. Yì nèn lò fo fo, e sə̀y é Atarot wùn ǎ Naara, e dù kùm Jeriko, e nèn dù ndzə̀y e shùu ndzəv yee Jordan. Á nsay ye vé‑eè foon e rám Efrayime ji vitsə́ʼ vév mo kfə́ə sév sí dzə̀kìn,

⁹ e kfə̀n lì sa ŋkà se laʼ símóʼ sí wùn à ntèʼ sév sí se sí dzəə̀n é nsay rám Manasse, aá lém jeéy ji sé rám Efrayim.

¹⁰ Yii bèy, bó wír veé ram Efrayime yòʼ‑oò lo jùm wír veé Kanan ve vé‑eè dzəə̀n é Geser. Wír veé Kanan vìne ku nèn a dzə e wír vee Efrayimé mvəm e shem lán, aá dzə̀ ji akwǎn wìr veé Efrayim.