Joshua 11 - ŊWÀʼ NYÙY

Joshua tón Fòn Jabin wùn à vé kiŋkaày vəə́

¹ Fòn Jabin woó Hasor yú mo Isray tònèn vitúm vìn, e nèn bì Fòn Jobav woó Madon wùn à fòn woó Shimron, à fòn woó Akshaf.

² Wù kfən bì sá afon veé wòŋ kùyi adzə̀m ve vé‑eè dzə́ aàgwan, e bì veé mbuŋ Jordan wo wù kfənen tsə́n fó kibaŋ keé Kineret, e bì veé mboʼ sa, e bì veé Shefela, e sar se agwan, e lì veé Dor e ghaa rìbà ndzə̀v.

³ Wù kfən bì sá wír veé Kanan adzə̀m, veé mbìv Jordan yeé koy yìyí wùn à yeé koy ŋkoòvì, e bì wír veé Amor, à veé Hiti, à veé Perisi, à veé Jebusi e wòŋ agwan, à veé Hiv vé a kfənér e sar Gwan Hermon e ŋgvən yeé Mispàa.

⁴ Áwune ku nèn fəə̀ wùn à vé rər véví adzə̀m. Mànjòŋ‑eè dzə̀ moo síy seé meshavtí bey, e bóo lì nyanyày nyàm se ŋkoʼ, à *viténtén vé rər ví.

⁵ Afon vìn adzə̀me tátí shuu wóv rər, e wìy beè kirə́ʼ kimòʼón e ghaa kisə̀m keé Merom, aá báʼtí ne ji á funen wír veé Isray.

⁶ Nyùy Tàr yòŋ Joshua, e sùúy sho jii, «Lá à yòʼ a fan áwune. Yíi lòo dzə kibvəə́shí moo lèn bèn, a mo woo Nyùy Tàr yúyrí ne áwune, e fò e Isray. Vèn wíy gwàtì nyám sév sé ŋkoʼ fo taŋ se shwin, e tòn viténtén vév e və́yí.»

⁷ Joshua yú bey, wùn à vé rər vəə́ ku nèn lò, e woòné, e ghìʼ afon vìy e rə́r sí, e ghaa kisə̀m keé Merom.

⁸ Á bèy, Nyùy Tàr wáy afon vìy wùn à vé rər véví e wír veé Israyí wo, Isray wáa jùm áwune, a yuyrí, e jùm bèn, e dù bàʼ e Sidon wo wiy, e shaà dù e Misrefot‑Mayim, e kfə̀n jùm e dù duùn é mbìv yee fo shùy yii tó, e dù bàʼ e mboʼ yeé Mispe, e yùyrí áwune yúyrín, la wìr yòʼ gòʼ e tin.

⁹ Joshua ku nèn yiì mo Nyùy Tàr‑iì yòŋèn, e gwàtì nyám sév sé ŋkoʼ fo taŋ se shwin, e tòn viténtén vév e və́yí.

¹⁰ Joshua nèn lò siìr ŋkfənèr e ghan fóo fèy, e tòn Hasor, e yùyrí fon woo fó. Wáa dzə e ghan see shooy, a Hasor‑iì dzə̀ kitúm ke kí‑iì tíy vitú fo vitúm vee fó vi vidzə̀m.

¹¹ Wír veé Israyi yúyrí wir dzə̀m wo wù‑uù dzəə̀n fó, e laàr áwune ŋkuuŋkùŋ, la wìr yò gòʼ, e nèn tòn ŋkàlaʼ Hasor e və́yí.

¹² Joshua tòn ŋkà se laʼ sìy sidzə̀m wùn aàfon véví, e yùyrí wir dzə̀m, e laàr fó láarin réŋréŋ mo Mooser woo ŋgaà lìm Nyùy Tàr‑iì yòŋèn ji á kù wíy yiì.

¹³ Yii bèy, la Isray yòʼ yù fóo tòn ŋkà se laʼ se sí‑iì taá e vitu ve aŋkoŋ. Kù‑uù mày Hasor cáʼ wo Joshua‑aà tònèn.

¹⁴ Wír veé Israyi kuúy vifá vidzə̀m fo ŋkà se laʼ se á tònèn wùn à nyám si ji nsàʼmboʼ wov, e kù laàr wir dzə̀m láarin e nyùy, e làa yòʼ bavtí wír.

¹⁵ Joshua‑aà lo yiì réŋréŋ mo Nyùy Tàr‑iì yòŋèn e Mooser woo ŋgaà lìm və, é bo wù yoŋ e wun ji á mo wù yii. Bó wù yòʼ‑oò lo yàr kinyo là yii fo vinyò vidzə̀m ve Nyùy Tàr‑iì yòŋèn e Mooser.

Joshua wùn à vé rər vəə́ tón woŋ woó mbìv taa, e dù, e meé e mbìv ròŋ

¹⁶ Á bèy, Joshua nèn sə̀ nsay vitum vee shooy e dzə̀m. Wù sə́ ye vitum veé mbìv aŋkoŋ, e sə̀ yeé mbìv Negev, à nsay Goshen e dzə̀m, à mbìv Shefela e sar se agwan, à mbuŋ Jordan. Yì‑iì sə̀ wun nsay ye dzəə̀n ji woŋ Isray e dzə̀m, yeé aŋkoŋ wùn à yeé mboʼ si,

¹⁷ e kèʼ fo Gwan Halak wo wù ràmèn, e kìʼ Seir, e dù meé e Baal‑Gad e mboʼ yeé Lebanon, a kfən tsə́n fó Gwan Hermon. Wù tón afon vee fó adzə̀m, e koòrí, e yùyrí.

¹⁸ Joshua‑aà màʼ rə́r ntàmda wùn aàfon vee shooyi.

¹⁹ Bó ŋkàlaʼ ye yì‑iì yiìn nsìysì wùn à wír veé Israyi yòʼ‑oò ló a dzə sho. Kù‑uù mày wír veé Hiv ve vé‑eè dzə́ e Gibeon. Wír veé Israyi‑iì tòn vitúm vìn vidzə̀m e shùu rər,

²⁰ bìʼ fo Nyùy Tàr‑iì yiìn, á táv kitú, e wìy tàm wùn à Isray e shùu rər. Á tám bey, Nyùy Tàr nèn yiì, Isray laàr áwune ŋkuuŋkùŋ là mendzən réŋréŋ mo Nyùy Tàr‑iì yòŋèn e Mooser ji á yii.

²¹ Yì‑iì dzə̀ é ghan sin, Joshua dù, e laàr viŋgáʼ ve wìr veé ram Anak. Áwune‑eè shiiy e virə̀ʼ vé aŋkoŋ e nsay ye yì dzəə̀n lèn ji woŋ woo Juda wùn à ye yì dzəə̀n ji woŋ woo Isray, a vé‑eè yàm a dzə e ŋkà se laʼ see jii, Hebron wùn à Debir, à Anav. Joshua kù‑uù laàr áwune láarin adzə̀m, à ŋkà se laʼ sév sí.

²² Bó kiŋgáʼ ke wìr ki yòʼ‑oò lo bèr e wír veé Israyí nsay. Kù‑uù mày Gasa wùn à Gat, à Ashdod fo wír vìne‑eè berin ashàr.

²³ Á mo Joshua‑aà səən nsay e dzə̀m, kù réŋréŋ mo Nyùy Tàr‑iì suuyin e Mooser ji á kù wíy yiì. Joshua nèn fò ji vitsə́ʼ vé wìr veé Isray, e jàvtì aáwune mo kfə́ə sév sí dzə̀kìn. Dzə̀ é ghan sin se wír veé Israyi‑iì meèmèn fó rər.