Joshua 10 - ŊWÀʼ NYÙY

Joshua wùn à wír veé Israyi tón vitum veé Amor

¹ Adonisedek woo fon woó Jerusalem yú mo Joshua tònèn Ay, e laàr fó láarin e dzə̀m, e yiì e Ay wùn à fòn woo fó mo wù‑uù yiìn e Jeriko wùn à wóov woo fon. Wù kfən yù sá ji wír veé Gibeone tàr á ne shuu wùn à wír veé Israyi, a dzə aáwuné mvəm.

² Wù nèn a fàn e ŋàáŋàŋ, bìʼ fo ntèʼ yee Gibeon‑eè dzəə̀n e wíy. Yì‑iì shwìnín ntèʼ ye fòn dzəə̀n fó, e kfə̀n a dzə sa, a yì‑iì kùʼ e shaà yee Ay, a vilum vee fó adzə̀me távkír é ŋàŋ.

³ Fòn Adonisedek nèn tsə̀nsí ntum e Hoham woo fon woó Hebron, e kfə̀n tsə̀nsí e Piram woo fon woó Jarmut, e tsə̀nsí e Jafia woo fon woó Lakish, e tsə̀nsí e Debir woo fon woó Eglon, e yòŋ jii,

⁴ «Vèn wiy, e sə̀ mo, é vèsən funen wír veé Gibeon, bìʼ fo áwune tarin ne shuu wùn à Joshua, à wír veé Israyi.»

⁵ Afon veé Amor vee atàn vìne nèn bàʼtí shuu sév sé rər, e dù gìŋ Gibeon, e taàmé áwune e rə́r sí. Kù‑uù dzə̀ afon vee jii, woó Jerusalem wùn à woó Hebron, à woó Jarmut, à woó Lakish, à woó Eglon.

⁶ Wír veé Gibeone nèn tsə̀nsí ntum e Joshua, a wù dzə̀ é kibeèy é Gilgal jii, «Lá à yòʼ bùʼúr fó màʼ kiwó e věr wùn. Kú a wìy cér, e tòm ver, e sə̀ ver. Afon veé Amor adzə̀m ve á dzə́ aàŋkoŋe lò ne, e bàʼtí, e tàŋ rə́r, e taàmé ver.»

⁷ Joshua nèn lò fo Gilgal wùn à mànjòŋ və e dzə̀m, à vé rər ve tavkíné adzə̀m.

⁸ Nyùy Tàr suúy e Joshua jii, «Lá à yòʼ a fàn. M wày ne áwune e wò kiwo. Wìr yòʼ dzə̀ shó wo wù wíy tam vèn wun, e tòn wò.»

⁹ Joshua wùn à vé rər vəə́ ku nèn lò fo Gilgal, e ghàn vitsə́ʼ vifur. Yì wáa ran, á ku nèn ràŋ wír veé Amor.

¹⁰ Nyùy Tàr wáy kindzə́m e wír veé Amorí shiliv, á wáa fàn, a tùʼtìn e shúu rər woó Israyí si. Wír veé Israyi wáa jùm áwune, a gwàtì e Gibeon foo fèy, e jùm, e sə̀y shó e dzəə̀ Bet‑Horon. Á ku jùm, e gwàtì bèy, e sə̀y é Aseka wùn ǎ Makkeda.

¹¹ Wír veé Amori wáa leʼ veé Isray, e lòo səy e dzəə̀ Bet‑Horon ye yì du e Aseka, Nyùy Tàr sə́ʼə́r lúm se mentiy fo yuv aáwuné kitu. Kùʼùn wìr wáa dzə wo yì‑iì yuyrin mentíy, e shaà wo yì‑iì yuyrin wír veé Isray.

¹² Wáa dzə e kishiíy fóo fèy ke Nyùy Tàr‑iì wayin wír veé Amor e wír veé Israyí kiwo, Joshua suúy e Nyùy Tàr e wír veé Israyí si jii, «Nyùy Tàr, yiì, é shùy tiím é kitu ke wòŋ Gibeon, é ŋwee tiím é kitu ke mboʼ yeé Ayjalon.»

¹³ Shùy ku nèn gòʼ, a tiy, ŋwee wáa tiy e meé mo Isray‑iì tònèn aŋgaà vév vibàn. Vé‑eè sàŋ kinyo kee shooy e Ŋwàʼ Jashar jii, shùy‑iì tìím é ntìntìn yùv moo kishiíy kifur bèy, e làa yòʼ a nəə́.

¹⁴ Bó kishiíy kí yòʼ‑oò yiì ne a dzə moo kin, a kí yòʼ kfə̀n‑eè yiì a dzə ke Nyùy Tàr yúnín wir msòŋ. Dzə̀ rú ji Nyùy Tàr‑iì màʼ á rə́r sé wìr veé Isray.

¹⁵ Á wìy màysì rə́r sin, Joshua wùn à shúu rər woó Israyi nèn kfə̀n é bàm é kibeèy é Gilgal.

Joshua koó afon atàn veé Amor, e laàr

¹⁶ Yii bèy, afon vee atàn veé Amor vìyi‑iì lò, e lèʼ, e làáy e mbvə̀ʼ e Makkeda.

¹⁷ Á yòŋ e Joshua jii, «Á yèn ne afon vee atàn vìy, aá laay e mbvə̀ʼ yeé Makkeda.»

¹⁸ Wù suúy jii, «Vèn dzəə́r vimà vé vilan, e sə̀tí shúu mbvə̀ʼə shó, e lèm vilum ámóʼó, aá wáa shìy.

¹⁹ Yii bèy, lá vèn yòʼ gòʼ fo. Vèn jum kén a dzə̀ aŋgaà vén vibàné, a nyoòrì áwune e rə́r sí fó bàm fó bàm. Lá vèn yòʼ biìmé aá nəə́ aáwuné ŋkà se laʼ. Nyùy Tàr woo Nyùy won wày ne áwune e věn kiwo.»

²⁰ Joshua wùn à vé rərí ku nèn a gwàtì wír veé Amor gwátin, e meé mo vé‑eè laàrìn áwune ŋkuuŋkùŋ. Yii bèy, ámóʼó ku yòʼ lèʼkír, e jeètí, e nə̀ə́ aáwuné ŋkà se laʼ.

²¹ Vé rər Joshua adzə̀me kfə́n é bàm kijuŋ e kibeèy é Makkeda. Kitúm kímóʼ kí yòʼ kfə̀n‑eè dzə̀ shó kée mvə̀ʼ shuu, e guùtì wír veé Isray.

²² Á kfə́n é Makkeda bèy, Joshua nèn yòŋ jii, «Vèn mvəʼ shúu mbvə̀ʼə lèn, e fə̀ə́r afon vee atàn vìyi, e wìy sho fèn.»

²³ Á nèn yiì bèy, e fə̀ə́r afon vee atàn vìy fo mbvə̀ʼ, e wìy yèn wun sho. Afon vee ji fon woó Jerusalem wùn à woó Hebron, à woó Jarmut, à woó Lakish, e lì woó Eglon.

²⁴ Mo á fəərin afon vìy, e wìy yèn Joshua sho bèy, wù jàŋrì wir dzə̀m woó Isray, e yòŋ aàmfòómé ve wùn áwune‑eè dzəə̀né jii, «Vèn kóʼtí fó mentsə̀m, e nyèŋ kilòŋ ké afòn vìn e kiwuú kén kí.» Áwune nèn kòʼtí, e wìy, e nyèŋrì vilòŋ vé afòn vìy e wúu yéví.

²⁵ Joshua nèn kfə̀n sùúy aáwune jii, «Lá vèn yòʼ a fàn, lá vèn yòʼ a weèy. Vèn kúr a dzə̀ tímé, e wày ŋàŋ. Á mo Nyùy Tàr yíi yiì bèy, e vé vibàn véné adzə̀m ve vèn áwune funènè.»

²⁶ Joshua yúyrí afon vìy, e sə̀ŋ é vici vitàn. Áwune rə́sí, a səŋ e vici fey, e meé e ŋkuùr.

²⁷ Shùy lòo toŋrí, Joshua sáʼ, á sə́ʼə́r dzə́n sév fó vici fey, e màʼrì e mbvə̀ʼ fo áwune‑eè laayin. Á màʼrì bèy, e nèn sə̀tí shúu mbvə̀ʼ e vilán vi, a ví kù dzə̀ə́ fo e wìy to lán.

²⁸ Joshua nèn tòn ŋkàlaʼ yee Makkeda e kishiíy fóo fèy, e yùyrí fon woo fó, e laàr wir dzə̀m fo fo ŋkuuŋkùŋ, e làa yòʼ ber wír. Wù kù‑uù yiì e fòn woó Makkeda mo wù‑uù yiìn e fòn woó Jeriko.

Joshua máysí, e tòn nsay wìr veé Amor

²⁹ Joshua wùn à shúu rər woó Israyi nèn lò fo Makkeda, e dù e Libna, e tàm wùn áwune.

³⁰ Nyùy Tàr nèn kfə̀n wày fó wùn à fòn wov e wír veé Israyí wo. Joshua teè fó, e laàr wir dzə̀m fo fo, e làa yòʼ ber wír, e yiì e fòn wov mo wù‑uù yiìn e fòn woó Jeriko.

³¹ Kee shoon ki shaà, Joshua wùn à shúu rər woó Israyi lò fo Libna, e dù, e gàŋ Lakish, wùn áwune tám.

³² Nyùy Tàr nèn wày Lakish e wír veé Israyí wo, wùn áwune tám vishiíy vibaà, Isray tòn, e teè wir dzə̀m woo fó mo vé‑eè yiìn e Libna.

³³ Fòn Horam woó Geser nèn wìy ji wun tóm á wír veé Lakish, Joshua tòn, e yùyrí wír və́ adzə̀m, la wìr yòʼ gòʼ e tin.

³⁴ Joshua wùn à shúu rər woó Israyi lò fo Lakish, e dù, e gàŋ Eglon, e taàmé áwune e rə́r sí, sí tsəə́m.

³⁵ Á ku nèn màʼ rə́r bey, Isray tòn ŋkàlaʼ yee shooy e kishiíy fóo fèy, e laàr wir dzə̀m láarin, kù mo vé‑eè lovtin e Lakish.

³⁶ Joshua wùn à shúu rər woó Israyi nèn kòʼ fó Eglon, e taàmé Hebron e rə́r sí,

³⁷ e tòn áwune, e yùyrí wir dzə̀m, à fòn wov. Wù tòn sa ŋkà se laʼ seé Hebron see fó ghaŋ sidzə̀m, e yùyrí wír vee fó adzə̀m, la wìr yòʼ gòʼ. Wù kù‑uù lòvtí shó réŋréŋ mo wù‑uù lovtin e Eglon. Wù‑uù laàr fó ŋkuuŋkùŋ, la wìr yòʼ bèr.

³⁸ Joshua wùn à shúu rər woó Israyi nèn siìr ŋkfənèr, e dù e Debir, e nə̀ə́ áwune e rə́r sí,

³⁹ e tòn wùn à fòn wov. Á kfən tòn sa ŋkà se laʼ sév sidzə̀m, e laàr wir dzə̀m ŋkuuŋkùŋ, la wìr yòʼ bèr. Joshua‑aà lòvtí e Debir réŋréŋ mo wù‑uù lovtin e Hebron, e lòvtí e Libna wùn à fòn wov.

⁴⁰ Á mo Joshua‑aà tònèn woŋ woo shooy e dzə̀m. Wù‑uù tòn vitúm veé mbìv aŋkoŋ, e tòn veé mbìv Negev, à veé mbìv Shefela e sar se agwan, e lì veé babá sí, a kfənér e mbìv ròŋ. Wù‑uù tòn virə́ʼ vin wùn aàfon véví adzə̀m, e làa yòʼ màʼtì wír. Wù kù‑uù yùyrí adzə̀m mo Nyùy Tàr woo Nyùy wìr veé Isray‑iì yòŋèn.

⁴¹ Joshua‑aà màʼ rə́r, e tòn virə́ʼ vee kèʼ fó Kadesh‑Barnea, e dù e Gasa, e tàtí woŋ Goshen e dzə̀m, e dù, e meé e Gibeon.

⁴² Wù‑uù tòn afon veé wòŋ fèn adzə̀m, e sə̀ nsay yev ghan mòʼón, bìʼ fo yì‑iì maʼ Nyùy Tàr, wun woo Nyùy wìr veé Isray rə́r sév.

⁴³ Joshua màysì bèy, wùn à shúu rər woó Israyi nèn kfə̀n é bàm é Gilgal.