Joshua 1 - ŊWÀʼ NYÙY

Nyùy Tàr naárí e Joshua mo wù yíi tòn Kanan

¹ Mo Mooser woo ŋgaà lìm Nyùy‑iì kpuun, Nyùy Tàr yòŋ Joshua woo wan Nun, wun woo Joshua wo wù‑uù sə́ Mooser, e sùúy sho jii,

² «Mooser woo ŋgaà lìm wom kpù ne, lò ri lèn, e tùm ndzə́v yee Jordane. Ku lì wír vìne, aá du, e nə̀ə́ e wòŋ wo m sí fó aáwune vee rám Isray.

³ Kirə́ʼ kidzə̀m ke vèn yíi dù, e tiír kiwuú kén shó, m fò ne e vèn. M fò ne ji kén réŋréŋ mo mò‑oò kàʼàn Mooser.

⁴ Nsay yen yíi kèʼ fo kirə̀ʼ ké woʼ kí, e dù, e meé e Lebanon, e kèʼ fo ndzəv ye wiy yee Yufret, e lì nsay wìr veé Hit e dzə̀m, e dù bàʼ e Rìbà Ndzə̀v woo Mediteranean fo shùy yii nəə.

⁵ Bó vèn wìr yòʼ wíy tam, é wù gháʼ wò, e dù meé mo à wíy a dzə sho. Mo mò‑oò dzəə̀n vèr Mooser, kù dzə̀ réŋréŋ mo m wíy a dzə wòsò. Bó m yòʼ wíy màʼtì wò, a bó yòʼ dzə̀ m màʼày wò.

⁶ Kúr tímé, e wày ŋàŋ. Kù yíi lì wò wír vìn, e nəə́ sho e nsay fèn, é bo á yov woŋ wo mò‑oò lìʼìn vèr aàtǎr ram véví ji m wíy fo aáwune.

⁷ Dzə̀ cáʼ ji à ku kùr a dzə̀ á tím, e wày ŋàŋ. Ku yèn ji à kú a yunín a kinyo kidzə̀m keé Ŋwàʼ Nsər wo Mooser woo ŋgaà lìm wom‑eè foon e wò, a yiì réŋréŋ mo kí dzəə̀n. Lá à yòʼ bìn ndzə̀m e yìmòʼ yee ntir, é dzə́ə sé si nèn a ran e kirə̀ʼ kidzə̀m ke à du sho.

⁸ Lá à yòʼ wìy yàr fó a yòŋ Ŋwàʼ Nsər və̀n. Á yòŋ, a rə̀tì e shùy wùn à vitsə́ʼə́. Kú a yen ji à wáa yunín a kinyo kidzə̀m ke kí dzəə̀n shó, é dzə́ə sé si nèn a ran, é vinyo vé vi wáa ghan kijuŋ.

⁹ Kí m lo yòŋ e wò ji à kúr tím, e wày ŋàŋ. Lá à yòʼ a fàn, lá à yòʼ weèy. Nyùy Tàr woo Nyùy won dzə̀ vèn wun kirə́ʼ ke à du sho kidzə̀m.»

¹⁰ Joshua nèn yòŋ e vilìmbìy ve wíri ví jii,

¹¹ «Vèn shaa, e ghànén e kibeèy, e wírí shuù se vibàn, e sàʼ ji wìr dzə̀m báʼtí á kúr rə, bìʼ á fo, e bǎm vishiíy vitaár, aáwune túm á ndzə́v yee Jordan rə̀n, e nə̀ə́ e wòŋ, e yòv nsay ye Nyùy Tàr woo Nyùy wov foon aáwune.»

¹² Joshua nèn kfə̀n sùúy lèn e kfə́ə Ruben wùn à yé Gadi, à kintoʼnìn ke kfəə yee yé Manassèe jii,

¹³ «Vèn kuúmé kinyo ke Mooser woo ŋgaà lìm Nyùy‑iì suuyin e vèn kí. Wù‑uù sùúy jii, Nyùy Tàr woo Nyùy won fò ne ven kirə́ʼ kén ké meèmè, a dzə̀ nsay yeé ndzə̀n Jordan rə̀n.

¹⁴ Kí nén a dzə jii, vikìy vén wùn à wóné, à nyám si yíi gòʼ e ndzə̀n Jordan fèn, e nsay ye Mooser‑iì foon e vèn. Yii bèy, wír vén rərí yíi líysin e ndzən fésə, aá báʼtí ne vifá ve rər, e fíʼ sə afə́r vén,

¹⁵ e meé mo Nyùy Tàr yíi yiì, vèn maʼ rə́r, sí bórí, aá yov nsay ye Nyùy Tàr‑iì foon aáwune. Á yovì, é bo vèn kfə́n é bàm, e yòv yéen yee nsay ye Mooser woo ŋgaà lìm Nyùy‑iì foon e vèn ji yéen é ndzə̀n Jordan fèn, e mbìv yee fo shùy yii tó.»

¹⁶ Áwune bìnèr e Joshua jii, «Vèr yíi a yiì kinyo kidzə̀m ke à yòŋèn e vèr, a dù e kirə̀ʼ kidzə̀m ke à túm ver shó.

¹⁷ Mo vèr‑iì yúnin Mooser e kinyò kidzə̀m, bo kù dzə̀ réŋréŋ mo vèr yíi a yunín wò. Kù dzə̀ cáʼ ji Nyùy Tàr woo Nyùy wò kú a dzə vèn wun mo wù‑uù dzəə̀n wùn Mooser.

¹⁸ A dzə̀ wír wo wù táv kitú fo wò, kìn wù ŋwáy sáʼ yé, e làa yòʼ a yiì kinyo ke à yòŋèn, bo á kù yíi laàr wun. Kù dzə̀ cáʼ ji à kúr á tím, e wày ŋàŋ.»