Joon 9 - ŊWÀʼ NYÙY

Jesus mvə́ʼ sí wìr wo vé‑eè dzəən, a sì mfìr

¹ Jesus dù, e lòo kaarí, e yèn wír wùmòʼ, aá kù‑uù dzə̀ə́, a sì mfìr.

² Wón və́ lìme nèn dzə̀r shó jii, «Ŋgaà Yèʼey, lǒn wìr və̀ne dzə̀ a dzə̀ e wùn kiwo mo wú lò fo tàr wov wùn yè wov á?»

³ Wù bìnèr jii, «Bó yòʼ dzə̀ ji lòné lò fo wìr və̀n, kìn fo tàr wov wùn yè wov. Vé‑eè dzə̀ə́, a sì mfìr bèn ji Nyùy fiʼ wìy dìn vitaáví və́ é wùn wó.

⁴ Kí nén a dzə jii, vèsən kér fó a yiì lim ye Tàr wor wo wù‑uù tumen mo foon ji á wáa yiì, a ghán sí dzə̀ə́ sho. Ghán sí yíi mày moo ndzə ye yì loòn, e sàsìn, e sə̀n, é la wìr yòʼ dzəə yiì kinyo.

⁵ Mo m dzə̀ə́ e ndzə fèn, m dzə̀ rán ye yí kaʼày wír veé ndzə.»

⁶ Wù suúy bey, e nèn cù mentíy fo nsay, e tòvtí, e làr, e tsəə̀ e mfìr və̀y si,

⁷ e sùúy sho jii, «Dù é kisə̀m ke á yoŋ ji Siloam, e sù sí yée fó.» A nsàv yìr yee Siloam rə̀n dzə̀ ji Lontum. Wù dù, e sù, a kfən e mvə̀mlaʼ, a wù sí yén virə́ʼ.

⁸ Wír vee wùn kiliŋ, wùn à ve vé‑eè sí yén, a wù rə́si dzə́, lón viloòneé nèn a ghaynín jii, bó və̀n sà yòʼ dzə̀ mfìr wo wù‑uù rə́si dzə́ fèn, lón vifá a?

⁹ Aámóʼó suuy jii, dzə̀ á wun. Aámóʼó kinèn ji wù shwìnín a shwínmén. Wìr və̀y yú bey, e bìnsí jii, «Dzə̀ mo woo shó.»

¹⁰ Á nèn dzə̀r shó jii, «À ghàn é le, e bó a yen virə́ʼ lèn?»

¹¹ Wù bìnèr jii, «Wìr wo á yoŋ ji Jesus kì tòvtí nsay, e tsəə̀ e mǒ si, e sùúy ji m du, e sù e kisə̀m ke á yoŋ ji Siloam. Mo m duùn, e sù, e nèn a yen virə́ʼ.»

¹² Á nèn dzə̀r shó jii, «Wìr woo shó bèé?» Wù bìnèr jii, «Bó m yòʼ kì fo wù dzəə̀n lèn.»

Vé wòŋe kinèn vitaáví ve Nyùy fó e Jesus

¹³ Á nèn lò, e lì wír və̀y, e dù, e yèn wír veé mbìv *Farasi sho.

¹⁴ A Jesus kì tòvtí nsay, e mvə̀ʼ sí wìr və̀y a dzə̀ é *kishiíy ké bam.

¹⁵ Wír vee Farasi vìyi nèn kfə̀n dù, a dzər e wìr və̀y mo wù kì ghanen, e bó a yen virə́ʼ. Wù suúy jii, «Jesus kì tsəə̀ nsay e mǒ si, m dú, e sù, e nèn a yen virə́ʼ.»

¹⁶ Wír Farasi vìy ámóʼó nèn sàyín jii, «Bó Jesus və̀n yòʼ dzə̀ wír wo wù lo ntum Nyùy gheéy, wù shóʼor nsər kishìíy ké bam.» Aámóʼó dzə́r kév jii, «A dzə̀ wír, a bó Nyùy yòʼ kì wun, wù wàa yiì viŋgaʼnìn ve vinyò vee ben à?» Á bìʼ bèy, e bvəə̀rí.

¹⁷ Á kfən lò, e dzə̀r e wìr və̀y jii, «Wò wo wù mvə̀ʼə̀n a dzə̀ sí yé, à yèn ké, a dzə̀ wír woó le?» Wù bìnèr jii, «M yén ji dzə̀ *ŋgaà ntum Nyùy.»

¹⁸ Atǎr wír veé Juda vìyi wáa dzətí sho bèy, e làa yòʼ fə̀m a biimé ji wù‑uù dzə̀ rú á mfìr, e bóo kfə̀n a yen virə́ʼ. Á nèn lò, e jàŋ tàr wov wùn yè wov, e dzə̀r aáwune, e bóo biimé.

¹⁹ A vé‑eè dzə́ti jii, «Və̀n dzə̀ rú wán won wo á yoŋ ji vé‑eè dzəə, a sì mfìr à? Kí ghàn é le, bo wù wáa yen virə́ʼ lèn?»

²⁰ Á bìnèr jii, «Vèr kì ji dzə̀ wán wor féyì feyì, e kfə̀n kìíy ji vèr‑iì dzəə, a sì mfìr.

²¹ Yii bèy, a bó vèr yoʼ kìíy mo kí ghanen, bo wù wáa yen virə́ʼ lèn, a bó vèr yòʼ kì sá wír wo wù mvə̀ʼə̀n sí rə́. Vèn wáa dzər a dzə̀ shó, sí rəə́ ràn ne, dzə̀ wù bìnèr fo wùn kinyò.»

²² Aá ndzə́v lám bey, a vé‑eè fan a dzə̀ vé wòŋe, bìʼ fo vé‑eè sìysìn ne jii, a wìr bìnsí ji Jesus dzə̀ *Mfə̀ə́r wo Nyùy‑iì kàʼàn, á jùm á ŋgaàŋ fo kintatì keé ŋgày bùnrì.

²³ Á fo kí‑iì loòn, é bo tàr à wìr və̀y wùn yè wov wáa suúy ji sí wané ràn ne, á wáa dzər a dzə̀ á sho.

²⁴ Vé wòŋe kfən lò, e jàŋ wír wo yì‑iì siìn mfìr woo shooy fo akàŋ vee abaà, a suúy sho jii, «Lìʼ yír Nyùyi, e sùúy kinyo ke ru kí. Vèr kì féyì ji Jesus və̀n dzə̀ á wír wo bi.»

²⁵ Wù nèn bìnèr jii, «Kìn dzə̀ wír wo bi, bo bó yòʼ dzə̀ m kìíy. Kém ke m kiìn kí dzə̀ jii, mò‑oò dzə̀ mfìr, a m sí yén virə́ʼ lèn.»

²⁶ Á kfə́n a dzətí sho jii, «Wù kì yèe e wò, e bóo mvə̀ʼ sí yé?»

²⁷ Wù bìnèr jii, «M kì sí suuy, la vèn yòʼ a tàʼ ji á yú. Vèn kfə̀n taʼ, e yu lèn, e yèe le? Vèn taʼ a jùmrì sa kinyo ke wìr woo shooy à?»

²⁸ Á nèn kèʼ, a kuùrì kuùrìn jii, «Kù biíme wò kinyo ke wìr woo shooy. Vèr tíy kér a dzə̀ vèr à Mooser.

²⁹ Vèr kì jii, Nyùy‑iì lo sùŋnín wùn Mooser, yii bèy, fo ké wìr və̀n ki, vèr yòʼ kì fo wù loòn.»

³⁰ Wìr və̀y nèn sùúy jii, «Kinyo kìn ki tárir mo féyì. Vèn suuy ji bó vèn yòʼ kì fo wìr və̀n loòn, a wù mvə́ʼ ne sí yém,

³¹ a vèsən kì kijuŋ ji bó Nyùy yòʼ yii yuúri kinyo ke wìr wo bi, wù kù yii yuúri kinyo a dzə̀ ké wìr wo wù ghvə́m wun, yii mo wù taʼà.

³² Kèʼ mo ndzə‑əə̀ kèʼèn, bó á yòʼ‑oò yù ne ji wìr kì mvə̀ʼ sí wìr wo vé‑eè dzəən, a sì mfìr.

³³ A wìr və̀n kì bùŋ fó wìr Nyùy, bo bó yòʼ dzə̀ wù yiì kinyo kee ben.»

³⁴ Á nèn a kuùrì kuùrìn jii, «À dzə́, a vé‑eè dzə̀ə́ wò e kikun ké lòn kí, aà taʼ ji à yéʼéy ver a?» Á nèn jùm fo kintatì keé ŋgày bùnrì.

Wír wo dzəə̀n mfìr fo Nyùy mbìv

³⁵ Jesus yú kinyo ke kí kooyin, e nèn tàʼ wír və̀y, e dzə̀r shó jii, «À wày ne shilív e wìr wo yírí dzəə̀n *Wanwìr wùn a?»

³⁶ Wù bìnèr jii, «Taàtá, ku dìn ŋgaàŋ, é m wáy shilív é wùn wó.»

³⁷ Jesus bìnèr jii, «À yèn ne ŋgaàŋ, a súŋnin vèn ŋgaàŋ lèn.»

³⁸ Wù nèn yòŋ jii, «Tàr, bo m biìmé ne,» e tsə̀m é si wo, a fo ghvə́m sho.

³⁹ Jesus lò, e sùúy jii, «M wìy e ndzə fèn ji m sáyrí wíri, é wír ve dzəə̀n amfìri wáa yen virə́ʼ, é ve á kwaʼ ji á yén virə́ʼə́ kfə́n ji amfìr.»

⁴⁰ Wír veé mbìv Farasi ámóʼó wáa tiy e Jesus ghaŋ. Á yú bey, e sàyín jii, «À taʼ, a yòŋ ver ji amfìr à?»

⁴¹ Wù bìnèr jii, «A vèn kì dzə̀ amfìr, bo bó á yòʼ kì kér njò. Mo vèn kù táv tavín ji vèn yén virə́ʼ, bo njò yen kù dzə̀ə́ e vèn.»