Joon 7 - ŊWÀʼ NYÙY

Jesus wùn aàfə́r vəə́

¹ Kee shooy ki shaà, Jesus kú a ghan a dzə̀ é Galeli foo fèy, e làa yòʼ a dù e mbìv Juda, bìʼ fo atǎr wòŋ veé Judàa‑aà sí wooy ji á yúyrí á wun.

² Ghán sí nèn wìy ghèén, a dzə̀ se wír veé Judàa yii kér *kiŋkàʼ ke á yoŋ ji ké tàv sé ghan,

³ afə́r Jesuse nèn sùúy sho jii, «Bo à kì yíi dù e mbìv Juda, áàŋgaà vé ŋgoo fíʼ yèn vinyo ve à rə́si yii.

⁴ Wìr wo wù taʼ ji lim rəə́ fəə́sín yòʼ yii woóne sho woónén. Mo à dzə́ ji à yii viŋgaʼnìn ve vinyò, kí bòŋ ji à fəə́sín shó, é wíri yén.»

⁵ A vé‑eè suuy bèy, bìʼ fo áwune vee afə́r vəə́ yòʼ fə̀m‑eè wáy sa shilív e wun wùn.

⁶ Jesus bìnèr jii, «Ghán se dzə̀ m fəə̀sín sí yóʼ ne ghèén, a ghán sidzə̀m si kù dzə̀ sigheénén fo vèn.

⁷ Bó yòʼ dzə̀ wíri wàa bàn ven. A dzə̀ á wàa bàn a dzə̀ mo, bìʼ fo m tóʼti vinyo vév ve bi ví.

⁸ Kú a dù ven fó kiŋkàʼ foo fèy, m yòʼ du. Sém see ghán sí yóʼ ne ghèén.»

⁹ Wù suúy bey, e nèn gòʼ e Galeli.

Jesus dú kiŋkàʼ e Jerusalem

¹⁰ Mo afə́r vəə́ duùn fó kiŋkàʼ fèy, wù wìy sìíy, a jùmrì sa, e lòo dù, e nyàʼtí nyaʼtín.

¹¹ Atǎr wòŋ veé Judàa nèn dù, a dzə̀rnìn wun fo kiŋkàʼ fèy ji wù sà fèn bèé á?

¹² Wìr dzə̀m ku rə̀sí, a ghay a dzə̀ kinyo kfə́. Aámóʼó bínsi ji wù dzə̀ á wír wo juŋ. Aámóʼó sháʼnin shàʼnín ji wù taʼ, e boʼtí a wíri.

¹³ A bó yòʼ‑oò dzə̀ wìr wàa binsí kinyo ke Jesus e ŋgèŋgèr, bìʼ fo vé‑eè fan vé wòŋe.

¹⁴ Vishiíy vé kiŋkàʼ vi jàv e ntìntìn, Jesus nèn nə̀ə́ e *lav cù, a yeʼéy wíri.

¹⁵ Vé wòŋe yuúrí, a ker gháʼ jii, «Wìr və̀n sà yèʼéy vin vee vinyo fo feé, a bó á yòʼ kì wír wo wù yeʼeyin wun a?»

¹⁶ Jesus lò, e sùúy jii, «Kinyo ke m yéʼey kìn ki yòʼ lò fo mò, dzə̀ ké ŋgaà wo wù tumen mo.

¹⁷ A wìr wày ji wun wáa yiì a dzə̀ kinyo ke Nyùy taʼà, ŋgaàŋ nèn wìy kìíy rú ji kinyo ke m yéʼey kìn ki sà lò fo Nyùy, mo kí lò a dzə̀ fo mò á.

¹⁸ Wìr wo wù yii kinyo ji yii wun, ŋgaàŋ taʼ a dzə̀ ji wíri wáa burí wun. Wìr wo wù kù yii taʼ kfə́ ji á wáa burí a dzə̀ wír wo wù tumen wun, nén a suúy a dzə̀ vinyo ve ru ví, a bó yòʼ dzə̀ wù lòʼ kinyo.

¹⁹ Mooser yòʼ‑oò lo fò nsər e vèn a? Wìr fo vèn wo wù lem nsər yee shooy dzə̀ la? Vèn kfə́n a tàʼ ji á yúyrí mo fó gha?»

²⁰ Wíri bìnèr jii, «À dzə̀ ben, a nyùy wùmòʼ jívir vifií vé. Wìr wo wù taʼ ji wun yúyrí wò dzə̀ la?»

²¹ Jesus bìnèr jii, «Mò‑oò yiì kinyo kimòʼón e kishiíy ké bám, vèn wáa ker gháʼ.

²² Yii bèy, mo Mooser‑iì foon nsər e vèn ji kishiíy kí gheenè, á nàŋsín wán woo lumèn, kí lòo gheén a dzə̀ ké bam, vèn kù nàŋsín sa. A bó yòʼ‑oò kèʼ Mooser mbèʼ se saŋén sí, kí‑iì lò a dzə̀ fo atǎr ram yéné.

²³ Mo vèn yii kee shooy ji fo vèn shóʼór nsər Mooser, kfən yiì ka, bo vèn wáa yu nyár vèsən, a mò‑oò fèr wír férin é kishiíy ke bam?

²⁴ Lá vèn yòʼ a sayrí kinyo ke wìr ndzə ndzə. Vèn kiíy mo kí dzəə̀n, e bó a sayrí.»

Wíri gháynin kinyo ke *Mfə̀ə́r

²⁵ Jesus wáa suŋnín bèy, wír veé Jerusalem foo fèy ámóʼó wáa ghaynín jii, «Wìr wo á taʼ ji á yuyrí və̀ne lèn,

²⁶ a wù súŋnin e wírí si tèéter, la wìr yòʼ a ghay a kinyo. A tàm ghan símóʼ sí, bo vé wòŋe sí yén ji dzə̀ rú Mfə̀ə́r wo Nyùy‑iì kàʼàn.

²⁷ A bó yòʼ dzə̀ wàa dzə wun, bìʼ fo vèr kiìn fo wìr və̀n loòn. Mfə̀ə́r wíy bvəy kfə́, é la wìr yòʼ kìíy fo wù loòn.»

²⁸ A Jesus kù dzəə́ yéʼey wíri é lav cù fèy, wù nèn lò, e shùsín kitávín jii, «A dzə̀ vèn kìíy mo, e kìíy fo m loòn. Yii bèy, a bó m yòʼ dzə̀ fen fo mǒ kitu. Yì‑iì tùm wír wùmòʼ mo, a ŋgaàŋ dzə̀ ŋgaà suuyrú, a bó vèn yòʼ kì wun.

²⁹ Kù kì mo ŋgaàŋ, bìʼ fo m loòn fo ŋgaàŋ wùn, a tùm ŋgaàŋ mo.»

³⁰ Á yú kee shooy, e nèn a tàʼ ji á koó Jesus, a bó yòʼ‑oò dzə̀ á kùm, bìʼ fo ghán se Nyùy‑iì sìysìn sí yòʼ‑oò ló ne ghèén.

³¹ Yii bèy, a wír ámóʼó kù yòʼ wáy shilív e Jesus wùn anín, suuy ji Mfə̀ə́r sà wíy wìy, é wù yii vinyo ve ví din vitaáví vé Nyùy, e shaà ve wìr və̀n yii a.

Vé wòŋe túm ji á koó Jesus

³² Wír veé mbìv *Farasii yú mo wíri kfəynìn kinyo kee kùm Jesus kìn, e nèn dù, e sìysì wùn à vitú ve atàá cùu, á túm vé rərí ji á du, e koò á Jesus.

³³ Jesus nèn a suúy e wíri jii, «M dzəə́ yìi ndzə̀ytì vèsən fen shishàr, e nèn a kfən fo ŋgaà wo wù‑uù tumen mó wùn,

³⁴ a vèn wíy siíy, a tàʼ mo, e làa yòʼ dzə́ə yen, a bó yòʼ dzə̀ vèn wìy fo m du.»

³⁵ Vé wòŋe nèn a kfə̀ynìn jii, «Jwè və̀n suuy ji wun du fèé, fo bó yòʼ dzə̀ vèsən yèn wun? A tàm bo wù taʼ, a ghan fo wír veé Juda ve á dzəə̀n é vitum vímóʼ ví, a yeʼéy wír vee fó.

³⁶ Kí búŋ fó bèy, bo yiì ka, bo wù wáa suúy ji vèsən wíy siíy, a tàʼ wun, e làa yòʼ yen, a bó yòʼ dzə̀ vèsən wìy fo wun du?»

Jesus káʼ wír və́ e Kiyoy ke Nyùy ki

³⁷ Wìy lòo dzə e kishiíy ke vé‑eè sí maar kiŋkàʼ kìy, a dzə̀ kishiíy ke kuʼùn kí fó kiŋkàʼ foo fèy, Jesus nànèn e wírí ntìntìn, e jàŋ kitávín jii, «A kilòŋ kí yúm wír, wù wìy, e yèn mo, e rəə̀r kilòŋ kfə́.

³⁸ A ké wìr wo wù wáy shilív e mǒ wùn kí wíy a dzə mo vé‑eè yòŋèn é Ŋwàʼ Nyùy ji ‹Ntòŋ sé ndzəv sí wíy a fəə fo ŋgaàŋ shiliv, a fo mendzə́v me mè fó dzəʼə̀m yee là may.› »

³⁹ Jesus wáa suúy kin, a wù yoŋ a dzə̀ Kiyoy ke Nyùy ke wír ve á wáy shilív e wùn wùné wíy a ker. Wáa dzə e ghan see shooy, a bó Nyùy yóʼ ne tùm Kiyoy kee shooy, bìʼ fo wù yòʼ‑oò ló ne kòʼór Jesus, wù nəə́ e wùn vikùʼùy.

Wíri bvəə́ri fo Jesus kitu

⁴⁰ Wíri yú kinyo ke Jesus jàŋèn kin, ámóʼó wáa suúy jii, və̀n dzə̀ rú Ŋgaà Ntum Nyùy wo á shiyì.

⁴¹ Aámóʼó suuy jii, sì á *Mfə̀ə́r wo Nyùy‑iì kàʼàn və̀y. Ámóʼó nèn a kìnèn kìnmèn jii, Mfə̀ə́r sà‑aà wíy lòo wìy, é wù fəə́ a dzə̀ fó Galeli a?

⁴² Á sà yòʼ‑oò sàŋ é Ŋwàʼ Nyùy ji Mfə̀ə́r wíy fəə a dzə̀ fo Fòn Davir ram, a wù wíy lò a dzə̀ fó Betlehem fo láʼ à Daviri‑iì dzəə̀n á?

⁴³ Wíri bìʼ bèy, e nèn bvəə̀rí fo Jesus kitu.

⁴⁴ Ámóʼó wáa tàʼ ji á bám wun, yii bèy, e làa yòʼ kùm gheéy.

Vé wòŋe méŋ Jesus

⁴⁵ Vé rər ve vé‑eè wìyìn ji á koó Jesus vìyi kfə́n fo vitú ve atàá cù wùn à wír veé mbìv Farasi vìyi. Á nèn dù, a saʼ jii, «Vèn wìy là Jesus və̀y ji ka?»

⁴⁶ Á bìnèr jii, «Bó wìr yòʼ‑oò yiì ne sùŋnín moo wír woo shooy.»

⁴⁷ Vé Farasi vìyi nèn dzə̀r jii, «Wù dù ne sa, a laàrì sí yén a?

⁴⁸ Vèn yén ne, a wìr fo vé wòŋe kìn woó mbìv *Farasi wùmòʼ tíy e wùn kinyò a?

⁴⁹ Ké màŋgòŋ və̀sə ki dzə̀ ji bó á yòʼ kì á Ŋwàʼ Nyùy, a lǒn Nyùyi shòv ne áwune.»

⁵⁰ Nikudemon wo wù‑uù duùn é kishiíy kímóʼ kí, e ghàn Jesus wáa dzə fo, a dzə̀ wír fo vé wòŋ vìyi. Wù nèn lò, e dzə̀r jii,

⁵¹ «Nsər yèsən biímé ji dzə̀ á yiì kinyo e wìr, a bó á yoʼ dzə̀ʼə̀r ŋgaàŋ fo si, e yù mo kí dzəə̀n á?»

⁵² Á nèn dzə̀r shó jii, «À dzə̀ sá e ŋgoo wìr woó Galeli fèy à? Ku tàr Ŋwàʼ Nyùyi kijuŋ, áà yén ji bó yòʼ dzə̀ *ŋgaà ntum Nyùy wùmòʼ wìy fəə̀ fó Galeli foo fèn.» [

⁵³ Á nèn tàʼrí, e dùkìr aáwuné melaʼ.