Joon 6 - ŊWÀʼ NYÙY

Jesus yiír wír ansə̀kì atàn

¹ Kee shooy ki shaà, Jesus lò, e dù, e tùmsín kibáŋ keé Galeli ke á yoŋ sa ji keé Tiberia.

² Màŋgòŋ báʼtí fó e gháʼán, a ghan e wùn bàm, bìʼ fo vé‑eè yén viŋgaʼnìn ve vinyò ve wù‑uù yii e vé yàsií wùn.

³ Jesus nèn lò, e kòʼ, e dzə̀ʼə̀m e gwan wùn à wón və́ lìme.

⁴ Wáa dzə e ghan see shooy, a sì ghán se wír veé Judàa kì sí yiì a ker *Ŋkǎʼ Yáʼayshaà.

⁵ Jesus lòo màʼ sí, e yèn, a màŋgòŋ wiy ji á yén a wun. Wù nèn dzə̀r e wan və lìm woo Filiv jii, «A dzə̀ vèsən yùn vifá ve yi fo feé fen, e bóo yiír màŋgòŋ və̀n sho?»

⁶ Wù‑uù dzə́r bèy, a wù kì kinyo ke wù yíi yiì, wù nèn a mùm Filiv múmen.

⁷ Filiv bìnèr sho jii, «Aá fə̀m yùn vifá ve yi e shùu danari ghii baà, la wír vìne yòʼ yì, e yù.»

⁸ Wùmòʼ woo wan lìm nèn njàʼàm, a dzə̀ Andru woo fər Simon Pita, e sùúy e Jesus jii,

⁹ «Wánlè kér ntuʼ se kiban fèn sitàn, wùn à sə́ si sibaà. Yii bèy, kee shoon ki yòʼ mèé e gha fo màŋgòŋ və̀n?»

¹⁰ Jesus suúy jii, «Vèn suúy, é wíri dzəʼəm fó nsay.» Mo kiyeʼ ki‑iì dzəə̀n fó kijuŋ, wìr dzə̀m nèn dzə̀ʼə̀m sho, a mbìv vilum dzə̀ moo ansə̀kì atàn bèy.

¹¹ Á dzə̀ʼə̀m, Jesus lì ntuʼ se kiban sìy, e beèrì Nyùy, e fò ji á jav e wír ve á dzə́ fo nsayi. Wù kfən lì sa sə́, e yiì sho réŋréŋ bey, wìr wáa yi mo wù koŋè.

¹² Á yí, e kùrkír, wù suúy e wón və́ lìme jii, «Vèn báʼtí vimbéʼ ve ví berin ví, e làa yòʼ biimé, é kifá ki lay.»

¹³ Á nèn bàʼtí, ví rún ŋkaà nshòv sibaà e ghvə̀m. A kù dzə̀ vimbéʼ ve ví berin fó ntuʼ se kiban see sitàn se wíri kì yiin siy.

¹⁴ Wíri yén kinyo ke Jesus yiìn, a kí din vitaáví vé Nyùy, á nèn a suúy jii, «Wìr və̀n dzə̀ rú *Ŋgaà Ntum Nyùy wo vé‑eè shiy ji wù wiy é nsay fèn.»

¹⁵ Jesus kiíy ji wír vìne sí lo, e bam wun ji á kóʼór á ji fon, wù nèn nyèŋ, e kfə̀n kòʼ kóʼón é mbìv agwan wùn mòʼón.

Jesus ghán e kitu ke ndzəv e kiwuú kí

¹⁶ Yiì lòo dzə e ŋkuùr, wón və́ lìme kaày e shùu kibaŋ,

¹⁷ e nə̀ə́ e kikoŋ ji á túmsin e ntèʼ yee Kapeenahum, a ndzə sə́n ne, a bó Jesus yóʼ ne wìy, á nèn a dù.

¹⁸ Kinsəm ki nèn lò, e sàsìn, a shaà kitávín, a tsəy ndzə́v, yí wáa sə̀ʼ.

¹⁹ Á kú a kìy kikóŋ, a dù, e lòo meé fomóʼó, aá kì màʼtì ne shúu kwaʼ moo amay ataár kìn akweè bèy, e yèn Jesus, a wù ghán a dzə̀ é kitu ke ndzəv, wiy, méʼ kikóŋ. Wún wóví kuúsí, á wáa fàn.

²⁰ Wù ku nèn yòŋ áwune jii, «Dzə̀ mo, lá vèn yòʼ a fàn.»

²¹ Á yú bey, a kòŋ fó lì wun e kikoŋ, e lòo sìn, a kikóŋ ki sí tíy a dzə̀ é shùu kwaʼ fo á kì du, e fəə.

Jesus dzə̀ vifá ve yi ve dzə̀ wìr lùŋ fó fo

²² Ndzə bvəə́shí, e jàv, màŋgòŋ wo wù‑uu gòʼòn é ndzə̀n kibàŋ və̀y nèn a tàʼ Jesus, bìʼ fo vé‑ee kiìn ji kikóŋ ki‑ii dzə fó e ŋkuùr kimòʼón cáʼcáʼ, nəə́ wón lìm Jesus sho, a dù, a bó Jesus yòʼ dzə̀.

²³ Vikóŋ vímóʼ ví nèn dù wìy fo ndzə̀n ntèʼ yee Tiberia, e tìím e ghaa kirə̀ʼ fo Jesus‑ee liìn kibán, e beèrì Nyùy, e yìír wíri shó.

²⁴ Mo màŋgòŋ və̀y kì tàʼàn ne Jesus ntéŋ, a bó wón və́ lìme yòʼ dzə̀ə́ sa fo, á nèn nə̀ə́ e vikoŋ fèy, a tumsín e ntèʼ yee Kapeenahum, a tàʼ Jesus fo fo.

²⁵ Á dù, e yèn é ndzən və̀sə, e ŋgèém jii, «Ŋgaà Yèʼey, à kì wìy ké fèn e ghàn ka?»

²⁶ Jesus kòr a dzə̀ lám aáwune jii, «M suuy ven kinyo ke ru kí ji bó vèn yòʼ ghán, taʼ mo ben ji bìʼ fo vèn‑ee yenen ji vinyo ve m yii vi din vitaáví vé Nyùy. Vèn wiy a dzə̀ bìʼ fo vèn‑ee yiin kibán, kí‑ii gháʼ ghaʼán.

²⁷ Lá vèn yòʼ a way vifií é vifa ve yi ve wìr yí, bo wù kù dzəə́ wìy kpu. Vèn wáa way vifií a dzə̀ é vifa ve yi ve ví fó dzəʼə̀m yee là may. Kù fó ŋgaà wo yírí dzəə̀n *Wanwìr vee shooy vee vifá ve yi, bìʼ fo Nyùy Tàr wayin kisəə́y ké lìm yee shooy a dzə̀ e wùn kiwo.»

²⁸ Wír vìyi nèn lò, e dzə̀r shó jii, «A dzə̀ vèr yèe lèn, e bó a yiì vinyo ve Nyùy taʼ ji á wáa yiì?»

²⁹ Jesus bìnèr jii, «Kinyo ke Nyùy taʼ ji vèn wáa yiì ki kù dzə̀ ji vèn wáy shilív e wìr wo wù tumén wùn.»

³⁰ Á nèn a dzər jii, «Kinyo ke à yii, ke kí din vitaáví vé Nyùy, é bo vèr yén, e wày shilív e wò wùn kí dzə̀ ka?

³¹ Atǎr ram yérí‑iì ló a ghan e kirə̀ʼ ké woʼ kí, a rəsí, a yi vifá ve yi ve vé‑eè yoŋ ji *manna. A dzə̀ vee shooy ve vé‑eè saŋen jii, ‹Wù‑uù fó áwune vifá ve yi, a ví‑iì lo a dzə̀ fó yuv.› »

³² Jesus bìnèr jii, «Vèn wáa kiíy rúrú ji bó yòʼ‑oò fó Mooser ven vifá ve yi ve ví‑iì lo fo yuv. Kù dzə̀ Tàr wor wo wù fó ven vifá ve yi ve dzəə̀n rú veé yuv.

³³ A vifá ve yi ve Nyùy fó vìn vi dzə̀ wír wo wù tumen fó yuv, wù wíy é nsay fèn ji wù fó dzəʼə̀m yee là may e wíri.»

³⁴ Wír vìyi yú kév bey, e nèn sàyín jii, «Taàtá, kú a fo ver vifá ve yi vee shooy ghán sidzə̀m.»

³⁵ Jesus nèn a suúy aáwune jii, «Dzə̀ mo wo dzəə̀n vifá ve yi ve ví fó dzəʼə̀m yee là may. Wír wo wù wiy, yén mo yòʼ dzəə́ wìy a yu jíŋ. A bó kilòŋ kí yòʼ dzəə́ wìy a yum wír wo wù wayin shilív e mǒ wùn.

³⁶ Yii bèy, a m lo sùúy e vèn jii, vèn yén mo e sí yéné, a bó á yòʼ fə̀m wáy shilív e mǒ wùn.

³⁷ A wír ve Tàr wor foon ji vém adzə̀me kù wíy a tàʼ mo, a wìy, a yen, a bó m yòʼ wíy jùm wo mòʼón gheéy.

³⁸ Mò‑oò lò fó yuv, e wìy e nsay fèn a dzə̀ ji m kú a yiì kinyo a dzə̀ ke sìysìn ŋgaà wo wù tumen mo ji m wáa yiì. A bó m yòʼ wìy ji m wáa yiì kinyo a dzə̀ ke kwaʼ mo.

³⁹ Kinyo ke ŋgaà wo wù tumen mo koŋ ki dzə̀ jii, lá m yòʼ biìmé, é wìr mòʼón lay fo ve wù‑uù foon e mòó, é wíy lóo dzə e ghan sé bàm sí, é m fəə́r áwune adzə̀m fo kpu.

⁴⁰ A Tàr wor sìysì ne ji wìr dzə̀m wo wù wiy, yén Wán və, wáy shilív é wùn wó wáa ker dzəʼə̀m yee là may. A kí dzə̀ jii, m wíy fəə́r ŋgaàŋ fo kpu e ghan sé bàm sí.»

⁴¹ Mo vé wòŋe yuun, a Jesus suuy ji wun dzə̀ vifá ve yi ve ví loòn a dzə̀ fó yuv, á nèn kèʼ, a ghvə̀vrì,

⁴² a kfə̀ynìn jii, «Bó wìr və̀n yòʼ dzə̀ Jesus woo wan Joosev à? Vèsən kì tàr wov wùn yè wov. A dzə̀ wù wàa suúy lèn ji wun wìy a dzə̀ fó yuv é le?»

⁴³ Jesus kiíy, e sùúy aáwune jii, «Vèn bér fó a ghvə̀vrì, a kfə̀ynìn.

⁴⁴ Bó yòʼ dzə̀ wír, wù wàa wìy, a yen mo, a bó bánrí Tàr wor wo wù tumen mo ŋgaàŋ. A m wíy fəə́r ŋgaàŋ fo kpu e ghan sé bàm sí.

⁴⁵ Vé‑eè sàŋ é Ŋwàʼ Aŋgàa Ntum Nyùy jii, ‹Wíy a yeʼéy Nyùy áwune adzə̀m.› Kí nén a dzə jii, wír wo wù yuúri yéʼéy Nyùy Tàr yee shooy, kiiy mo yí dzəə̀n, dzə̀ á wo wù wiy sa, yén mo.

⁴⁶ A bó yòʼ dzə̀ ji wìr‑iì yiì ne yèn sí Nyùy Tàr. Kù mày ŋgaà wo wù loòn fo Nyùy wo wù yenen ne sí wun woo Nyùy Tàr.

⁴⁷ A m suuy e vèn rúrú jii, wìr wo wù wáy shilív e mǒ wùn sí kér dzəʼə̀m yee là may.

⁴⁸ Dzə̀ mo wo m dzəə̀n vifá ve yi ve ví fó dzəʼə̀m yee là may.

⁴⁹ Atǎr ram yéné‑eè lo yì rú vifá ve yi ve vé‑eè yoŋ ji *manna e kirə̀ʼ ké woʼ kí, yii bèy, e kù kpùkír.

⁵⁰ A m dzə̀ kém vifá ve yi ve wìr yí, la wù yòʼ dzəə wìy kpù.

⁵¹ Dzə̀ mo vifá ve yi ve ví loòn fó yuv, ve ví fó dzəʼə̀m yee là may. A wìr yì vifá ve yi vìn, bo ŋgaàŋ shaarì. A vifá ve yi vìn vi dzə̀ wún wóm, wo m fó ji wír veé ndzə adzə̀me fíʼ wìy lùŋ fo fo.»

⁵² Vé wòŋ vìyi yú kin, e nèn kèʼ, a kfə̀ynìn jii, «A dzə̀ wìr və̀n fò wún və́ ji vèsən yí é le?»

⁵³ Jesus suúy jii, «Vèn wáa kiíy rúrú jii, a vèn dzə̀ là fóo yi wún ŋgaà wo yírí dzəə̀n *Wanwìr, e kfə̀n no sa mensə́ mvə, bo bó á yòʼ kér a dzəʼə̀m gheéy shishàr.

⁵⁴ Wìr wo wù yí wún wóm, kfə̀n nó mensə́ mem sí kér dzəʼə̀m yee là may. A kí dzə̀ jii, m wíy fəə́r ŋgaàŋ fo kpu e ghan sé bàm sí.

⁵⁵ Wún wómé dzə̀ vifá ve yi ve ru ví, a mensə́ mem mè dzə̀ nó yee rú.

⁵⁶ Wìr wo wù yí wún wóm, kfə̀n nó mensə́ mem, dzə̀ wo wù táti e mǒ wùn, a m táti sa vèr ŋgaàŋ.

⁵⁷ M dzə́, a kù yii vitaáví vé Tàr wor wo wù tumen mo, bo m wáa dzə, wun woo Tàr wor wo wù kù dzə́ a dzə̀ fo wùn vitaaví. Dzə̀ réŋréŋ sá mo vém vee vitaáví ví yii, bo wìr wo wù yí wún wóm wáa dzə.

⁵⁸ Vee shoon vee vifá ve yi vi dzə̀ ve ví loòn rú fó yuv, a bó yòʼ dzə̀ moo ve atǎr ram yéné‑eè yiin, e kù kpùkír vìy. Wìr wo wù yí vin vee vifá ve yi wíy lùŋ, a dzə ghán sidzə̀m.»

⁵⁹ Jesus‑eè fer vinyo vìn e ghan se wù‑uù yéʼey wíri é ŋgày bùnrì yeé Kapeenahum.

Jí se sí fó dzəʼə̀m yee là may

⁶⁰ Aŋgaà və́ ŋgoo yuúri yéʼéy rə̀n, kùʼùn wìr nèn lò, a nyàysì ji lám vəə́ tàv á feyì. Bó yòʼ dzə̀ wìr rə̀sí, a yuurí a kinyo kee ben.

⁶¹ Jesus ku nèn kìíy ji aŋgaà və́ ŋgoo sí ghvəvrì a kisúŋnìn kfə́, e dzə̀r jii, «A dzə̀ jí sin si yiì, vèn nyèŋ mo nyéŋén a?

⁶² Bo ŋgaàŋ wo yírí dzəə̀n *Wanwìr wíy kfən fo wù‑uù wìyìn, é vèn yée le?

⁶³ Vèn wáa kiíy jii, kù yii fó Kiyoy ke Nyùy dzəʼə̀m yee là may e wìr, a bó yòʼ dzə̀ wìr wàa ker fo wùn vitaaví. A jí se m súŋnin e vèn sin si lo fo Kiyoy kee shooy ki, nén a dzə síwun se sí fó dzəʼə̀m yee là may.

⁶⁴ Yii bèy, a wír ámóʼó dzə̀ e věn mvəm, a bó á yòʼ biíme kinyo kém.» Jesus wáa suúy bèy, a wù‑uù kìíy ne wír ve bó á yòʼ wáy shilív e wun wùn, e kfə̀n kìíy sa wír wo wù wíy kar menàŋ e wùn bàm.

⁶⁵ Wù kfən sùúy jii, «Kù dzə̀ kinyo ke kí yiìn, bo m suúy ji bó yòʼ dzə̀ wìr wìy ji wun yén mo, a bó bánrí Tàr wor ŋgaàŋ.»

⁶⁶ Kèʼ fo ghan see shooy, kùʼùn wìr nèn jàv ŋgoo, e làa yòʼ dzə́ə a ghan wùn à Jesus.

⁶⁷ Jesus lò, e dzə̀r sá e wón və́ lìm vee nshòv sibàá jii, «Vèn taʼ, a dù sa mo vísəə du à?»

⁶⁸ Simon Pita nèn bìnèr jii, «Tàr, vèr kfə̀n du, e yen a dzə̀ la? Kù jòʼsì wò wo à kér jí se sí fó dzəʼə̀m yee là may.

⁶⁹ Vèr wày ne shilív e wò wùn, e kìíy ji à lò rú fo Nyùy, aà dzə̀ Wan Nyùy.»

⁷⁰ Jesus bínér jii, «Mo m fə̀m‑eè liìn ven vee wír nshòv sibaà e ghvə̀m ji wón vém, vèn wáa kiíy ji wùmòʼ sì á wan Satan.»

⁷¹ A wù‑uù suuy kinyo kìn a dzə̀ e Judar woo wan Simon Iskariyor kitu. A dzə̀ wír fo vee nshòv sibaà e ghvə̀m vìyi wo wù‑uù wíy kar menàŋ e wùn bàm.