Joon 3 - ŊWÀʼ NYÙY

Jesus naárí dzəʼə̀m ye fíyi e Nikudemon

¹ Wìr wùmòʼ wáa dzə e Jerusalem foo fèy, aá yoŋ ji Nikudemon, a dzə̀ wír fo atǎr wòŋ veé Juda, e kfə̀n a dzə wír woó mbìv *Farasi.

² Wù nèn wìy lò vitsə́ʼ vímóʼ ví, e dù, e yèn Jesus, e yòŋ jii, «Ŋgaà Yèʼey, vèr kì ji tùm Nyùy wò ji à wiy, a yeʼéy ver. Bó yòʼ dzə̀ wìr wàa yiì viŋgaʼnìn ve vinyò ve à yii vìn, a bó túm Nyùy ŋgaàŋ.»

³ Jesus bìnèr jii, «Kú a kiíy rúrú jii, bó yòʼ dzə̀ wìr shòv sáʼ Nyùy e si, a bó á kfən dzə̀ə́ ŋgaàŋ dzəə́n ji wír wo fíy.»

⁴ Nikudemon dzə́r jii, «A wìr kùy, a wù kúy ne, á kfə̀n dzə̀ə́ wun e le? A dzə̀ wù kfə̀n nə̀ə́ e yè wóv bvə̀m, wù dzə̀ə́ wun ji akàŋ abaà á?»

⁵ Jesus bìnèr jii, «Kinyo ke m suuy kìn ki dzə̀ ke ru kí. Aá dzə̀ là fó dzəə́ wír fo mendzə̀v, é Kiyoy ke Nyùy ki kfən dzə̀ə́ ŋgaàŋ, bo bó yòʼ dzə̀ ŋgaàŋ nə̀ə́ e Nyùy mvə̀m saʼ.

⁶ Kifá ke wìr dzəə fo bvə̀m ki kù dzə̀ ji wír, a kifá ke Kiyoy ke Nyùy ki dzəə ki dzə̀ ke kí lo a dzə̀ fo Nyùy.

⁷ Lá à yòʼ a ker gháʼ ji m suuy ji á kér fó kfə̀n dzəə́ wír ji wír wo fíy.

⁸ Yén ké shwer ki. Wú yii du a dzə̀ fo wú koŋè. Wìr lo, wù kù yù a dzə̀ mo wú shaa, a bó wù yòʼ kì fo wú loòn, a bó yòʼ dzə̀ wù kìíy fo wú du, e jòʼsì. Dzə̀ sá réŋréŋ mo Kiyoy ke Nyùy ki yii gháné, e bó a dzəə́ wír ji wír wo fíy.»

⁹ Nikudemon nèn kfə̀n ghày jii, «A dzə̀ kee shoon ki ghàn é le, e bóo koóy?»

¹⁰ Jesus bìnèr jii, «Yéʼey wò wír veé Isray, kfə̀n méŋ vinyo vìn à?

¹¹ Kú a kiíy rú jii, vèr súŋnin vinyo vìn a dzə̀ ve wíri kiìn mo ví dzəə̀n, kfə̀n fer ve á yén mo ví kooyì, a bó ven vee aŋgàa yeʼéyi yòʼ biíme kinyo ke vèr fiʼtì.

¹² Mo m fer vinyo a dzə̀ ve ví kooy e nsay fèn, a ví gháʼ fo vèn biímé, a m lò, a fèr a dzə̀ veé yuv, bo bó yòʼ dzə̀ vèn kìíy mo ví dzəə̀n.

¹³ Wìr wùmòʼ yòʼ‑oò yiì ne kòʼ e Nyùy wòŋ woó yuv, kù mày ŋgaà wo wù loòn fó fo, wo yírí dzəə̀n *Wanwìr.

¹⁴ Kú a kiíy jii, mo Mooser‑iì koʼorin yó ye vé‑eè fèrìn e kisha ki é kici, e kirə̀ʼ ké woʼ kí, kù dzə̀ réŋréŋ mo á kér fó wìy koʼór sa ŋgaà wo yírí dzəə̀n Wanwìr e kici,

¹⁵ é wír ve á wáy shilív é wùn wó adzə̀me luŋ, a ker dzəʼə̀m yee là may.

¹⁶ «Nyùy kòŋ ne wír veé ndzə adzə̀m e ŋàŋ, e fò màyshó Wan və ji wìr dzə̀m wo wù wáy shilív é wùn wó luŋ, a ker dzəʼə̀m yee là may, e làa yòʼ nəə́ e ŋgeʼ yee là may.

¹⁷ A bó Nyùy yòʼ tùm Wán və é ndzə fèn ji wù wáy wíri a dzə̀ é lòn. Wù tùm ji wù yii, é wíri luŋ.

¹⁸ Wír wo wù wáy shilív e Wàn Nyùy wùn bòy ne fo lòn. Wìr wo wù tén fó way lì ne lòn, bìʼ fo wù leeyin wír wo dzəə̀n Wan Nyùy ntéŋ, a bó wùmòʼ yòʼ kfə̀n dzə̀.

¹⁹ A dzə̀ á kù lì lòn, bìʼ fo rán ye yí loòn fo Nyùyi wìyìn ne e ndzə fèn, á kú a kòŋ fó a ghan a dzə̀ é ndzə ye sənér, bìʼ fo á yii vinyo ve bi ví.

²⁰ A kí dzə̀ bey, bìʼ fo wìr wo wù yii vinyo ve bi ví, ban rán yee shooy, léʼ leʼén fo á wáa yen vinyo ve wù yii.

²¹ Yii bèy, a wìr wo wù yii kfə́ a dzə̀ vinyo ve ru ví nèn fəə́sin fo rán yee shooyi dzəə̀n, aá fíʼ a yen ji vinyo ve wun yii vi dzə̀, a ví lò a dzə̀ fo Nyùy.»

Kinyo ke Jesus ki shaà ké Joon

²² Kee shooy ki shaà, Jesus wùn à wón və́ lìme dù e mbìv yìmòʼ é wòŋ woo Juda foo fèy. Wùn áwune wáa dzə fo, wù wáa way wíri é ndzəv.

²³ A Joon wáy sa wíri é ndzəv. Wù‑uù dzə̀ kfə́ é ntèʼ yee Anon ye yì dzəə̀n é ghaa ntèʼ yee Salim, bìʼ fo ndzə́ví‑iì dzəə̀n fó kijuŋ. Wíri wáa wìy, wù wáa way áwune é ndzəv.

²⁴ Ghán sin si‑iì dzə̀, a bó á yóʼ ne koò Joon, e wày é sháŋ.

²⁵ Wón lìm Joon wùn à wìr woó Juda wùmòʼ nèn lò, e kèʼ, a bìʼ jii, dzəə̀ yee réŋ ye dzə̀ wìr *kfə̀mrí kitú, e bóo ran fo Nyùy sà dzə̀ rəné á?

²⁶ Wón lìm Jooné nèn lò, e dù, e yèn wun, e yòŋ jii, «Ŋgaà Yèʼey, kuúmé wír wo vèn wun‑eè dzəə̀n é ndzə̀n ndzə̀v yee Jordan, aà din e wíri və̀y. Və̀sə lèn mo wù sí wáy sa wíri é ndzəv, a wìr dzə̀m sí du a dzə̀ fó.»

²⁷ Joon bìnèr jii, «Kù fó Nyùy lim wìr ye wù wáa lìm.

²⁸ Vèn‑eè lo yù sá mo m suuy ji bó m yòʼ dzə̀ *Mfə̀ə́r wo Nyùy‑iì kàʼàn. Nyùy‑iì tùm mo ji m shém a dzə̀ fó mbìy.

²⁹ Wìr wo wù kooy jín dzə̀ lum jìn. Ŋkar rə lóo tiy fo ghaŋ, lóo yu mo wù yoŋrì, wù wàa sheʼrí sheʼrín. M nén a dzə sa moo ŋkar lum jìn, a sheʼrí lèn feyì.

³⁰ Vinyo və́ ví kér fó a dù fo mbìy, é vém ví wáa kfən fo bàm.»

³¹ Wìr wo wù loòn a dzə̀ fó yuv, shaà wir dzə̀m. Wìr wo wù loòn kfə́ a dzə̀ fó nsay fèn, kú a dzə ji wír woó nsay, nèn fer sa a dzə̀ vinyo veé nsay. Mo wìr wo wù loòn fó yuv shaàn wir dzə̀m,

³² wù nén a fìʼtì sa a dzə̀ vinyo ve kù‑uù yén wun, kfə̀n yú e vituʼùr və́ ví. A bó wíri yòʼ fə̀m biíme kinyo kfə́ gheéy.

³³ Yii bèy, a wìr wo wù biíme kù yòʼ din ji kinyo ke Nyùy yii kìn ki dzə̀ ke ru kí,

³⁴ bìʼ fo wìr wo Nyùy tumen və̀n súŋnin a dzə̀ jí se dzəə̀n sé Nyùy, mo wù‑uù foon Kiyoy kfə́ shó là mfìʼ.

³⁵ Nyùy Tàr koŋ Wán və, a wù wày ne vinyo vidzə̀m a dzə̀ e wùn kiwo.

³⁶ Wìr wo wù wáy shilív e Wàn Nyùy wùn sí kér dzəʼə̀m yee là may. Wìr wo bó wù yòʼ yú kinyo kfə́ yòʼ wíy a ker dzəʼə̀m yee shooy gheéy. Lǒn Nyùyi kù gòʼ ne e ŋgaàŋ kitu ghán sidzə̀m.