Joon 2 - ŊWÀʼ NYÙY

Jesus bínér mendzə́v é melùʼ

¹ Kishiíy kí shaà, ndzə bvəə́shí, e ràn, á wáa ker vijín é ntèʼ yee Kaana e Galeli foo fèy, yìy à Jesus dù fo,

² a vé‑eè bì sá Jesus wùn à wón və́ lìme.

³ Á yiì dù, e nò meluʼ, mè mày, yìy à Jesus suúy shó jii, «Meluʼ mè mày ne.»

⁴ Wù yòŋ jii, «Yìy, à wáa bi mo shó ji m yée? Ghán se dzə̀ m kèʼ lim yém sí yóʼ ne ghèén.»

⁵ Yè wov ku yòʼ sùúy e vé kijàvi jii, «Vèn wáa yu a dzə̀ fo Jesus, wù suuy mo wù suuyin, vèn wàa yiì.»

⁶ Mbìʼ sé mendzə̀v sí‑iì tíy fo ntuùfú, a dzə̀ se wír veé Israyi yii kér aáwuné melav ji á wáa sù virə́ʼ shó mo nsər yev taʼà. A wo mòʼóné dzə̀ moo kèʼ fo tin e tàn, e dù, e meé tin saàmbà.

⁷ Jesus yiì lò, e sùúy e vé kijàv vìyi jii, «Vèn tú mendzə́v mè, e wày é mbìʼ sí fey, é sí rúnkír.» Á ku nèn yiì bèy, mbìʼ siy si rúnkír ji njìír, e yèr.

⁸ Wù nèn sùúy jii, «Vèn sér memoʼ mè, e fò, é ŋgaà ntaŋ yútí.» Á sér, e dù, e fò shó.

⁹ Wù yútí, a mendzə́v mèy mè bínkír ne ji meluʼ, a bó wù yòʼ kì ji kì dzə̀ á mendzə́v, kù‑uù kì vé kijàv ve vé‑eè serin a dzə̀ mendzə́v. Wù nèn jàŋ ŋgaà vijìn,

¹⁰ e sùúy sho jii, «Wìr yii kaʼ kinyo, wù tòmbìy fə̀ə́r meluʼ me juŋ mè, wíri nó, yú, bo wù fó mee fó tèr. Kì yiì ka, bo à bávtí meluʼ me juŋ mè, a fəə́r a dzə̀ lèn?»

¹¹ Jesus‑eè yiì kinyo kìn e Kaana woó Galeli foo fèy, a dzə̀ kiŋgaʼnìn ke kinyò ke mbìy ki ke wù‑uù dìnèn, wíri wáa yen vitaáví ve Nyùy foon shó. Mo wón və́ lìme yenen, e nèn màysì, e wày shilív é wùn wó.

Jesus jum vé wayí fó *lav cù

¹² Kee shooy ki shaà, Jesus nèn lò, a dù e ntèʼ yee Kapeenahum. Yè wov wùn aàfə́r vəə́, à wón və́ lìme wáa dù wùn áwune. Á dù, e yiì vishiíy fó vishàr.

¹³ Mo yì‑iì siìn ghán se wír veé Israyi kì sí wìy a yi *Ŋkǎʼ Yáʼayshaà, Jesus nèn lò, a dù e Jerusalem.

¹⁴ Wù dù, e nə̀ə́ e lav cù, e yèn, aá fiinè nyám se cù see moo anàʼ, wùn aànjìi, à vibìŋ ví fó. Wù kfən yèn, a wír ámóʼó dzə́ fo, kúvsin mbàm se wìr ve vé‑eè wiykìr fo vitum vímóʼ ví, yí séʼ.

¹⁵ Wù nèn tàʼ kfəə̀, e sə̀ə́y ji ŋgwàn, a wiv wír vìy sho, a tatí wùn aànàʼa, aànjìi, a jùm fo lav cù fèy, a bàʼtì visə́r ve wìr ve vé‑eè kúvsin mbàm, mbàm sév sí wáa taʼrí fo nsay.

¹⁶ Wù kfə́n a kàntì wír ve vé‑eè fiinè vibìŋ jii, «Vèn shaʼar vifá vìn bèn, e fəə̀ shó. Lá vèn yòʼ bìnèr lav Tàr wor ji kirə́ʼ ké way.»

¹⁷ Wón və́ lìme nèn kuùmé kinyo ke vé‑eè saŋen é Ŋwàʼ Nyùy ji wìr wùmòʼ‑oò lò sùúy e Nyùy a jii, «M kér shií fo wò lav e ŋàŋ, a wù baári e mǒ shiliv moo və́y.»

¹⁸ Vé wòŋe yén kinyo ke Jesus yiìn kin, e dzə̀r shó jii, «À yii kinyo kìn moo la? Ku dìn kisəəm kí fo à li vitaáví, e bó a yiì vinyo ve à yii vìn.»

¹⁹ Wù bìnèr jii, «Vèn ker lav cù rə̀n, vishiíy ví lóo meé vitaár, a m siír ne fo.»

²⁰ Á dzə́r shó jii, «Vé‑eè bòm lav cù rə̀n kiyá nshòv ntuùfú e mkweè, áà wìy bòm ké vishiíy vitaár à?»

²¹ Aá suuy bèy, a bó á yòʼ kì ji wù yoŋ lav cù, a dzə̀ á yee kitú kfə́.

²² Wón və́ lìme nèn wìy sìíy sa, a kuumé kinyo ke wù‑uù màʼàn kin, a wù fəə́ ne fo kpu. Á nèn biìmé ji kinyo ke Jesus‑eè suuyin, a vé‑eè lo dìn sa e Ŋwàʼ Nyùy kìn, ki dzə̀ á rú.

²³ Jesus ku nèn a dzə e Jerusalem e ghan sé Ŋkǎʼ Yáʼayshaà sìn, a yiì viŋgaʼnìn ve vinyò, ví wáa dìn vitaáví vé Nyùy. Wír aníne wáa yen, a way shilív é wùn wó.

²⁴ Yii bèy, la Jesus yòʼ a way shilív aáwuné wùn ji sì rú á wùn áwune, bìʼ fo wù‑uù kiìn liì wíri kijuŋ.

²⁵ A bó yòʼ‑oò dzə̀ á kfə̀n a naàrì liì wìr sho náarin gheéy. Wù‑uù kì vinyo vidzə̀m ve ví dzəə̀n e wìr shiliv.