Joon 17 - ŊWÀʼ NYÙY

Jesus bunrì fo wír vəə́

¹ Mo Jesus suuyin vinyo vìn ví mày, wù nàn sí, e lèéy yúv, e yòŋ jii, «Tàr, ghán sí ghèén ne. Ku dìn rì vikuʼùy vé Wan wò vi ji wíri lóo yen, aá wáa yen vikuʼùy a dzə̀ vé.

² Wò‑oò tàtí ne wír adzə̀m ji á wáa yu a dzə̀ fo mò woo Wán, é m wáa fo dzəʼə̀m yee là may a dzə̀ e vee shooy ve à shoʼon, e fò ji vémé.

³ A dzəʼə̀m yee là may rə̀ne dzə̀ jii, wìr kiíy wò, wo kù jòʼsìn wò Nyùy wo rù, e kfə̀n kìíy sa mo woo Jesus Kristu wo wò‑oò tumen é ndzə fèn.

⁴ A mò‑oò lo màysì lim ye wò‑oò foon e mò e dzə̀m, e dìn e nsay fèn mo vikuʼùy vé vi dzəə̀n.

⁵ Tàr wor, ku kfə̀n fò mo vikuʼùy vém viy lèn wo m tíy e wò si və̀n, vikuʼùy ve mò‑oò sí kér wòsò, é bo ndzə wìy a dzə.

⁶ «Mò‑oò ló a dìn mo wò woo Tàr wor dzəə̀n e wír ve wò‑oò shoʼon fo veé ndzə fèn, e fò ji vémé. Kù‑uù kér wò wír vee shoon, e bóo fo ji vém. A vé‑eè lo yù kinyo ké, e kù nèn lèm.

⁷ Aáwune kìíy ne lèn ji vinyo ve wò‑oò foon e mò vidzə̀m vi‑iì lò rú a dzə̀ fo wò.

⁸ Mò‑oò lo tiìsí vinyo ve wò‑oò tumen mo shó aáwune vidzə̀m, áwune biímé, e nèn kìíy rú ji m lò a dzə̀ fo wò, a yiì tùm wò mo.

⁹ «M nén a lon kinyo ke m lón kìn a dzə̀ fo áwune vee shoone. Bó m yòʼ lón fo wír ve dzəə̀n veé ndzə fène, m kù lón a dzə̀ fo áwune ve wò‑oò foon ji vém víne, bìʼ fo dzəə̀n wír vé.

¹⁰ Wír ve m kér adzə̀me kù dzə̀ ji vé, a vée dzə̀ vém. A dzə̀ áwune vin ve á din mo vikuʼùy vém ví dzəə̀n.

¹¹ Wáa dzə lèn, a m sí maʼtì ndzə rə̀n, a kfən fo wò wùn, aáwune yíi siíy kév, e gòʼ sho. Tàr, kù jòʼsì wò ji Nyùy. Kú a shìy áwune mo yír yée dzəə̀n, a dzə̀ yíwun yee yír ye wò‑oò foon sá e mò. Kú a shìy áwune, aá tátí a dzə ji kitú kimòʼón mo wòsò dzəə̀n sá ji kitú kimòʼón.

¹² Mò‑oò dzə́ vèr áwune é ndzə fèn, a shiy mo áwune mo yír yée kù dzəə̀n, yír ye wò‑oò foon e mò rəy. Mò‑oò kfə́vsi áwune, a bó wo mòʼón yòʼ‑oò lo lày. Kù‑uù lày wo yì‑iì siìn ŋgaà lòn ji kinyo ke vé‑eè saŋen e wò ŋwàʼ ki fiʼ ghèén.

¹³ «Mo m sí kfə́n fo wò wùn lèn, m nén a lon vinyo vìn vidzə̀m, a m dzə̀ə́ e ndzə fèn, é kishéʼrì ke m yii kér e mǒ shiliv kí maysi, e rùn sá aáwuné meliv.

¹⁴ M tiìsí ne jí sé aáwune, wír veé ndzə fène nén a bàn áwune, bìʼ fo áwune yòʼ dzəə̀n wír veé ndzə fèn, réŋréŋ mo bó m yòʼ dzəə̀n sá wír woó ndzə fèn.

¹⁵ A bó m yòʼ lón bèn ji à fəə́r áwune fó ndzə fèn. Ke m lón ki dzə̀ ji à kú a shìy áwune fo Satan woo ŋgaà vinyò ve bi ví.

¹⁶ Áwune yòʼ dzə̀ rú wír veé ndzə fèn réŋréŋ mo bó m yòʼ dzəə̀n sá wír woó ndzə foo fèn.

¹⁷ Kú a yiì, aáwune wáa kiíy kinyo ke dzəə̀n ke ru kí, a dzə ji wír vé ŋkuuŋkùŋ. Kù dzə̀ jí sé, kinyo ke ru kí.

¹⁸ Mo wò‑oò tumen mo é ndzə fèn, m tùm ne sa áwune fo wír veé ndzəə.

¹⁹ M nén a fo kitú kém e wò bìʼ áwune vin, aá fíʼ a dzə rú wír vé ŋkuuŋkùŋ.

²⁰ «M yòʼ bunrì a dzə̀ fo wír vìne cáʼcáʼ. M bunrì sa fo wíri adzə̀m ve á wíy siíy, a yu kinyo ke wír vìne fiʼtì, a way sa shilív e mǒ wùn.

²¹ A m lón jii, à ku yiì, aáwune tátí adzə̀m, a dzə ji kitú kimòʼón réŋréŋ mo wò woo Tàr dzəə̀n wòsò, a wòsò dzə̀ ji kitú kimòʼón. Ku yiì, aáwune wáa dzə sa e wòsò mvəm, é wír veé ndzə fène fíʼ biimé ji ntum ye mò‑oò loòn dzə̀ rú á ye.

²² Vikuʼùy ve wò‑oò bùʼùn mo shó vi dzə̀ sá ve m bùʼùn ne áwune shó, aá wáa dzə ji kitú kimòʼón réŋréŋ mo wòsò dzəə̀n.

²³ Mo wòsò dzəə̀n kintatì, vèr áwune lóo dzə sa kintatì, aáwune nèn màysì, e tàtí ŋkuuŋkùŋ, a dzə ji kitú kimòʼón, é wír veé ndzə fène yén ji ntum ye mò‑oò loòn dzə̀ rú ye, e kfə̀n yèn sá ji à koŋ wír vìn réŋréŋ mo à koŋ mo.

²⁴ «Tàr, mo m sí kfə́n fo wò wùn lèn, m koŋ ji wír ve wò‑oò foon e mò víne wáa dzə vèr áwune fo m dzəə̀n, aá fíʼ a yen vikuʼùy ve wò‑oò foon e mò, bìʼ fo wò‑oò sí koŋ mo, é bo ndzə wìy a kèʼ.

²⁵ Éè Tàr, kù yii yii wò kinyo kee réŋ, a bó wír veé ndzə fène yòʼ kì wò. Yii bèy, a mò‑oò kìíy ne wò, a wír vém víne kìíy ne rú ji mò‑oò lò ntum a dzə̀ ye.

²⁶ Mò‑oò lo yiì, áwune kiíy sá wò woo Nyùy, a m kù wíy a yiì, aá wáa kiíy, e fíʼ a kòŋ mo réŋréŋ mo à koŋ mo, é m wáa dzə aáwuné meliv.»