Joon 16 - ŊWÀʼ NYÙY

¹ «M fèr ne vinyo vìn vidzə̀m e vèn fo melív men mè wìy sìíy, a weèy.

² Á wíy siíy, a jùm jùm ven fó vintatì veé ŋgày se bùnrì. Ghán sí sí gheenè, wìr wíy yuyrí wír fo vèn, é wù wáa kwàʼ ji wun yiì a dzə̀ lim ye juŋe fo Nyùy.

³ Aá wíy a yiì bèy, bìʼ fo bó á yòʼ kiìn mo, a bó á yòʼ kì sá Tàr wor.

⁴ M sùúy ne vinyo vìn e vèn lèn ji ví wíy lóo koóy, é vèn nèn a kuumé ji mò‑oò ló a suúy e vèn fó ghan. «A bó m yòʼ‑oò lo tàv, a suúy vinyo vìn e vèn, bìʼ fo kù‑uù rə́si dzə́ vèsən.

⁵ Wáa dzə lèn, a m sí kfə́n fo wìr wo wù‑uù tumen mó wùn. Mo m sí du, wìr fo vèn yòʼ fə̀m dzə́r fo m du.

⁶ Yii bèy, mo suuyin ne mo lèn, vèn nén a dzə, a sòv a dzə̀ kitú.

⁷ A m suuy ven kinyo ke ru kí jii, lo ye m lo rə̀ne dzə̀ vishí vén ve juŋ vi. A m dzə̀ là fóo dù, bo bó yòʼ dzə̀ Ŋgaà Sə wo m kì yoŋ və̀y wìy wìy fo vèn. Kù wíy dù mo, e bóo tsənsí.

⁸ Wù wíy wìy, é wù din e wír veé ndzə fène mo áwune jáy, e bó a meŋ kinyo ke dzəə̀n ke bi kí, a meŋ ke ru kí, e kfə̀n a meŋ lǒn vinyò ve bi ví.

⁹ Aá méŋ kinyo ke dzəə̀n ke bi kí, a dzə̀ bìʼ fo á tén fó biimé kém kee kinyo.

¹⁰ Mo m kù yòʼ sí kfə́n fo Tàr wór wùn, é la vèn yòʼ dzəə wìy a yen mo réŋréŋ mo mò‑oò suuyì, kí nén a dìn ji á méŋ sa kinyo ke dzəə̀n ke ru kí.

¹¹ Mo fòn wo wù sáʼ ndzə rə̀n dzə́ lèn, a wù lí ne lòn, kí nen kfə̀n a dìn sa ji áwune jáy fó a meŋ lǒn vinyò ve bi ví.

¹² «Vinyo vi dzə̀ə́ sho vinín ve kì dzə̀ m fèr e vèn, a bó yòʼ dzə̀ lèn vèn kìíy vidzə̀m.

¹³ Wun woo Kiyoy ke Ranén kí wíy wìy, é wù yii, é vèn kiíy vinyo ve dzəə̀n ve ru ví vidzə̀m, bìʼ fo kù yii din wun kinyo ke dzəə̀n ke ru kí. A bó wù yòʼ wíy a suúy kinyo ji suuy wun. Wù kù wíy a tiisí a dzə̀ kinyo ke wù yú, a fèr ven vinyo ve ví dzəə́ wìy a koóy.

¹⁴ Wù wíy a nàn yír yém, bìʼ fo wù wíy a lì a dzə̀ vinyo vém, a fèr e vèn.

¹⁵ Vinyo ve Tàr wor vidzə̀m vi dzə̀ sá vém. Á kinyo ke kí yiìn, bo m wáa suúy ji Kiyoy ke Nyùy kìn ki wíy lì a dzə̀ vinyo vém, a fèr e vèn.

Jesus naarì mo wón vəə́ wìy sìíy, a dzə

¹⁶ «Bèr shishàr, é la vèn yòʼ dzəə wìy yèn mo. Shintàm shi lóo dàtìr, é vèn kfən yèn mo.»

¹⁷ Wón və́ lìm ámóʼó nèn a ghaynín jii, «Ke wù suuy bèn ki dzə̀ ji ka? Wù suuy ji wun sí lo, a kfən fo Tàr wov, a bèr shishàr, é la vèsən yòʼ dzəə wìy yèn wun, shintàm shi lóo dàtìr, aá kfən yèn á wun.

¹⁸ Shintàm she wù yoŋ shìn shi dzə̀ sheé le? Vèsən yoʼ kìíy kinyo ke wù suuy kìn.»

¹⁹ Jesus kiíy ji á taʼ, e dzər a kinyo, e dzə̀r jii, «Kinyo ke vèn gháynin kìn ki dzə̀ ke m kì suuyin ji bèr shishàr, é la vèn yòʼ dzəə wìy a yen mo, shintàm shi lóo dàtìr, aá kfən yèn à?

²⁰ M suuy e vèn rúrú jii, vèn wíy siíy, a dìy, a sòv vitú, é wír veé ndzə fène wáa sheʼrí kév sheʼrín. Yii bèy, fo bàm, é nsòvkìtu won kfə́n é kisheʼrì.

²¹ Wiíy yii lóo lùm, wù wàa sòv kitú, bìʼ fo ghán sə́ sé nyar si gheenen ne. Wù yií dzəə, wù nèn a sheʼrí a dzə̀ wír wo fíy wo wù kooyin, e làa yòʼ dzə́ə a kuumé nyár rə̀y.

²² Dzə̀ sá réŋréŋ mo vèn sov kitú lèn, a vèn wíy a sheʼrí e ghan sé bàm sí, bìʼ fo m du bèn, e dù, e kfən. A bó yòʼ dzə̀ wìr dzəə wìy sə̀ kishéʼrì kee shooy fo vèn.

²³ «Wíy lóo dzə e ghan see shooy, é la vèn yòʼ dzə́ə a dzər kifá a dzə̀ e mò. M suuy ven kinyo ke ru kí jii, vèn wíy lon kifá a dzə̀ fo Tàr wor e mǒ yir, é wù ku nèn fò kíwun.

²⁴ Kèʼ mo vèsən‑eè dzəə̀n, e meé lèn, vèn yòʼ‑oò yiì ne lòn kifá fo Nyùy e mǒ yir. M nén a suúy e vèn lèn jii, vèn wáa lon rì bèy, é Nyùy wàá fó, é kishéʼrì ki nèn màysì, e rùn e věn meliv.

²⁵ «Mò‑oò rə́si fer vinyo e vèn a dzə̀ é ŋgàn, a ghán se m wíy a fèr tìítiy, a fìʼ kiránén mo Tàr wor dzəə̀n sí sí gheenè.

²⁶ Sí wíy gheén, é vèn nèn a lon kifá ke á lón fo Tàr wor a dzə̀ e mǒ yir. A bó yòʼ dzə̀ ji wíy a lon mo fo Tàr wor ji wù fó kifá kee shooy e vèn.

²⁷ Tàr wor sí koŋ ven, bìʼ fo vèn‑eè sí koŋ mo, biíme ji m lò rú a dzə̀ fo wun woo Tàr wor.

²⁸ Mo mò‑oò loòn fo Tàr wor, e bóo wìy e ndzə fèn, m kfə̀n sí lo fo ndzə fèn, e kfən fo Tàr wór wùn.»

²⁹ Wón və́ lìme nèn bìnsí jii, «Á lèn wo à suuyin kinyo, kí rán, e làa yòʼ dzəə màʼ a dzə̀ é ŋgàn.

³⁰ Vèr kìíy ne lèn ji à kì vinyo vidzə̀m, a bó shií yòʼ dzə̀ə́ wo wìr rə́sí, a sòv wò sóvin, a vèr biìmé ne lèn ji wò‑oò lò rú fo Nyùy.»

³¹ Jesus bìnèr jii, «Dzə̀ ji vèn biìmé ne lèn à?

³² Vèn wáa kiíy jii, ghán sí yíi gheén, a sí sì é kiwo, é vèn táʼrí adzə̀m, e kfə̀n e věn melaʼ, e màʼtì mo vèr mòʼón. Yii bèy, a bó m yòʼ yii dzə́ vèr mòʼón, kù yii dzə́ vèr Tàr wor.

³³ M sùúy ne vinyo e vèn, é vèn fíʼ a tiy e mǒ wùn, é melív men mè wáa dzə nyaáŋ. Vèn dzə́ e ndzə fèn lèn, a ŋgeʼ si kooy ven sinín. Yii bèy, vèn wáa wàrkìr, bìʼ fo m ghaʼan ne vitaáví vé ndzə rə̀n.»