Joon 13 - ŊWÀʼ NYÙY

Jesus sú wuú won və́ lìm

¹ Kishiíy ke á kì bvəə́shi, a yi *Ŋkǎʼ Yáʼayshaà ki nèn ghèén, a Jesus kiíy ne ji sì á ghán se wun sí yìi màʼtì ndzə rə̀n, e kfən fo Tàr wóv wùn. Mo wù kù‑uù sí koŋ wír ve yiì dzəə̀n və́ é ndzə fèn, wù ku nèn a kòŋ bèy, e dù, e mày.

² Yiì lòo dzə e ŋkuùr wùn áwune yiì dzə̀ʼə̀m, a yikír, a Satan kì ŋàʼár ne shilív shé Judar Iskariyor wo dzəə̀n wan Simon ji wù wáy Jesus aàŋgaà və́ vibàné wo.

³ Jesus wáa dzə, a wù kì kijuŋ ji Tàr wov wày ne vinyo vidzə̀m a dzə̀ e wùn kiwo, a wun‑eè lò fo Nyùy, a wun sí kfə́n a dzə̀ fó,

⁴ wù nèn lò fo kitu ke vifa ve yi, e shòʼ kikúm kfə́, e lì ndzə̀y se á yii sə́ʼsi wún shó, e sìŋ,

⁵ e baà mendzə́v é kighin, e kèʼ, a sù wuú won və́ lìm sho. Wù su, wù sə̀ʼsí e ndzə̀y se wù kì siŋen siy si.

⁶ Wù dù, e mèé fo Simon Pita wùn, wù nèn dzə̀r shó jii, «Tàr, a dzə̀ wàa sù wò wuú yém a?»

⁷ Jesus bìnèr jii, «Bó yòʼ dzə̀ à kìíy kinyo ke m yii lèn kìn. Aà wíy kiíy a dzə̀ é ghan sé bàm sí.»

⁸ Pita ku nèn a shaʼnín jii, «Bó yòʼ dzə̀ féyì, à sù wuú yém.» Jesus suúy jii, «Aà dzə̀ là fó biimé ji m su wò, bo bó yòʼ dzə̀ à wàa dzə wír wom.»

⁹ Simon Pita nèn biìmé lèn jii, «A sì bey, bo à kù su sa sí yém wùn à wó yémé. Bó yòʼ dzə̀ à sù a dzə̀ wuú cáʼcáʼ.»

¹⁰ Jesus bìnèr jii, «Wìr wo wù suùn ne wún, wún vəə́ sì e ránén e dzə̀m. A wù lò lèn, wù sù a dzə̀ kiwuú. Kú a kiíy jii, vèn sì aránén, yii bèy, a bó á yoʼ ràn adzə̀m.»

¹¹ A wù suuy ji bó á yoʼ ràn adzə̀m, bìʼ fo wù kiìn wír wo wù‑uù yíi way wun aàŋgaà və́ vibàné wo.

¹² Wù yiì sù wuú yév, e màysì, e nèn màʼ ndzə̀y sə́, e kfə̀n dzə̀ʼə̀m fo nsay, a suúy aáwune jii, «Vèn kì mo m yiìn ben, a kí dzə̀ á?»

¹³ Vèn yoŋ mo ji Tàr, kfə̀n yoŋ ji Ŋgaà Yèʼéy, a vèn yoŋ réŋ. Dzə̀ rú mo m dzəə̀n.

¹⁴ Mo m loòn, a m dzə̀ Tàr won, e kfə̀n a dzə Ŋgaà Yèʼéy won, e sù wuú yén, bo dzə̀ sá mo vèn kú a yiì, é wìr wáa sù kiwuú ké wùmòʼ.

¹⁵ Kinyo ke m yiìn kin ki nén a dzə mfìʼ ye vèn wáa yiì sa mo m yiìn.

¹⁶ Vèn wáa kiíy rúrú jii, bó wan lìm yòʼ dzə̀ wù shaà tàr wov lìm. A bó yòʼ dzə̀ wír wo á tumen túmén shaà sá wír wo wù tumen wun.

¹⁷ Mo vèn kiiyin ne kinyo kìn lèn, a vèn lò, a yiì, é vèn wáa yu vijuŋ.

¹⁸ «Mo m suuy vinyo vìn bèn, bó m yòʼ suuy e wìr dzə̀m. M kì wír ve m shoʼon ji vém, a m kfə̀n kì ji kinyo ke vé‑eè saŋen é Ŋwàʼ Nyùy ki kér fó wìy gheén. Vé‑eè sàŋ jii, ‹Vèr wìr kì yíkir kighín kimòʼón, wù kfən lò, e shòʼ e mǒ bàm.›

¹⁹ M nén a suúy kinyo kìn e vèn lèn bèn, é bo kí yiì a koóy. Kí yií kooyì, é vèn fiʼ biìmé ji dzə̀ rú mo wo dzəə̀n mo.

²⁰ A m suuy e vèn rúrú jii, wìr wo wù səə́si wír wo tumen mo, ŋgaàŋ səə́si a dzə̀ mo və̀n. Wìr wáa səəsí mo, bo wù səə́si a dzə̀ ŋgaàŋ wo wù tumen mo.»

Jesus tóʼ ŋgaà və menàŋ

²¹ Mo Jesus suuyin vinyo vìn, shilív sə́ shí lùm, wù nèn tòʼ lèn kiránén jii, «Vèn wáa kiíy rúrú jii, kù dzə̀ wír fo vèn vin wo wù yíi way mo áàŋgaà vém vibàné wo.»

²² Wón və́ lìme nèn a leeynín sí, a meŋnín wír woo shó wo wù suuyì.

²³ Aá kì dzə́ bèy, a wùmòʼ woo wan lìm wo Jesus‑eè koŋ e ŋàŋ, kì dzə̀ʼə̀m, e yèʼém e Jesus wùn.

²⁴ Simon Pita nèn lò, e kwàr woo shooy, e sùúy jii, wù dzə́r shó a ji wù sà yoŋ a dzə̀ la á?

²⁵ Wù nèn bìnèr shuu, e dzə̀r jii, «Tàr, à suuy wír və̀n a dzə̀ la?»

²⁶ Jesus bìnèr jii, «Wír wo m yíi sə̀ʼ nshèv é kiban, e fo sho, dzə̀ ŋgaàŋ.» Wù nèn sə̀ʼ, e fò a dzə̀ e Judar wo dzəə̀n wan Simon Iskariyor.

²⁷ Mo Judar səən kibán kìy, Satan ku nèn nə̀ə́ e wùn shiliv. Jesus suúy e Judar jii, «Dù ri cér, e yiì kinyo ke à kér fó yiì ki.»

²⁸ Wón lìm Jesus ve wùn áwune kì yíkirìi yú bey, e làa yòʼ a kiíy mo wù suuy e Judar bèy, a kí dzə̀.

²⁹ Mo kù‑uù kér Judar kibam kév ké lèm, ámóʼó nèn a kwàʼtì jii, Jesus suuy bèy a dzə̀ á ji Judar du, e yùn vifá ve wùn áwune yíi yi kiŋkàʼ shó, kìn wù suuy a ji wù koóy kifá, e fò e vé ŋgeʼe.

³⁰ A Judar kì sə̀ ne kibán kìy bèy, e kù nèn fəə̀ fəə́n, a dù, a yì‑iì sì vitsə́ʼ.

Jesus tír kpú e wón vəə́

³¹ Mo Judar fəən, Jesus nèn sìíy, a suúy jii, «Á lèn wo á yíi yen vikuʼùy vé ŋgaà wo yírí dzəə̀n *Wanwìr. Wíri lóo yen, aá wáa yen vikuʼùy a dzə̀ vé Nyùy.

³² Mo vikuʼùy vé Nyùy vi yíi a yensín e Wanwìr və̀n wùn, é wun woo Nyùy nèn a dìn sa vé Wanwìr vee vikuʼùy, e làa yòʼ siʼsíʼ.»

³³ Jesus nèn kfə̀n yòŋ jii, «Wónen, bó m yòʼ dzəə́ yìi dzə̀ʼtì vèsən shinín. Vèn wíy siíy, a tàʼ mo, e làa yòʼ yen. A kù dzə̀ kíwun ke mò‑oò suuy e vé wòŋe ji bó yòʼ dzə̀ á wìy fo m du.

³⁴ M nén a fo ven lèn a dzə̀ nsər ye fíy jii, vèn siiy, á wàa kòŋnìn, é wìr wáa kòŋ fə́r və réŋréŋ sá mo m kòŋèn ven.

³⁵ Vèn lóo kòŋnìn bèy, é wír adzə̀me nèn yèn rú ji vèn dzə̀ wír vém.»

Jesus tóʼ ji Pita yíi meŋ wun

³⁶ Simon Pita nèn sàyín jii, «Tàr, à du a dzə̀ feé?» Jesus bìnèr jii, «M du e kirə̀ʼ, a bó yòʼ dzə̀ à wìy fó lèn. À wíy siíy, e jùmrì mo a dzə̀ é ghan sé bàm sí.»

³⁷ Pita nèn kfə̀n dzə̀r jii, «Tàr, yiì ka fo wòsò wáa dù lèn? A fə̀m dzə̀ kpú, bo m dzə̀ kibáʼtín fó kpu, áà luŋ.»

³⁸ Jesus nèn dzə̀r shó jii, «A dzə̀ à kpù rú fo mò a? Kú a kiíy rúrú jii, bo kiyuú ki yiì a toŋ, aà méŋ ne akàŋ ataár ji bó à yòʼ kì á mo.»