Joon 12 - ŊWÀʼ NYÙY

Maria yóʼ Jesus e Betani

¹ Kishiíy kí wìy lòo ber ntuùfú, é bo Ŋkǎʼ Yáʼayshaà və̀yi wáa dzə, Jesus nèn wìy sa, e dù, a dzə e ntèʼ yee Betani fo Laasaror wo wù‑uù fəərin fó kpu və̀y‑iì dzə́.

² Mo wù wìyìn, á jàŋrì wíri, á wìy, wùn áwune wáa yikír. Laasaror wáa dzə sa fo, a yikír wùn à Jesus, a Maata jav kfə́ vifá ve yi.

³ Maria yiì lò, e lì biʼ ye juŋ yímóʼó kiyóʼóy kifur, aá fér e *nard, a yí lùm e mbàm e ŋàŋ, e wìy, e bòr e Jesus wuù, e gvə̀ʼə́r kitú, a səŋrí e nə́ŋ sə́ sí. Lav nèn bìnkìr, a shàŋ shàŋèn e dzə̀m.

⁴ Judar Iskariyor woo wan lìm Jesus wùmòʼ‑oò dzə̀ sá fo, a dzə̀ wun wo wù‑uù wíy lò, e kar menàŋ me Jesus. Wù nèn sàyín jii,

⁵ «Káv bìʼ rə̀ne dzə̀ moo vilaʼày vé wìr veé kiya kifur, bo á kì yíi fiìnè, e jàv mbàm e vé ŋgeʼe.»

⁶ A bó Judar yòʼ suuy bèy ji wun rə́r a mendzən me vé ŋgeʼe. Wù‑uù dzə̀ shóŋ, a leey wun fo wùn à Jesus kibàm ke lèm, shóŋri, baʼ shuu və́ shó.

⁷ Jesus suúy shó jii, «Màʼtì Maria. Wù yii kin, a wù náŋsin mo náŋsín, é bo kishiíy ke á wíy dzəə̀mè mo kí wìy a gheén.

⁸ Vèn à vé ŋgeʼe wíy siíy, a dzə ghán sidzə̀m, a bó vèsən yòʼ wíy a dzə.»

⁹ Wíri yú aneénín ji Jesus wìy a ne, e nèn fəə̀ a dù e Betani ji á yén wun, e kfə̀n yèn sáa Laasaror wo wù‑uù fəərin fó kpu və̀y.

¹⁰ Vitú ve atàá cù vi yén bey, e nèn wày wáyín ji á ku yùyrí saa Laasaror,

¹¹ bìʼ fo wír aníne‑eè yuun kinyo ke Jesus yiìn e Laasaror, e nèn a nyeŋ áwune nyéŋén, a yu kinyo a dzə̀ ké Jesus.

Wíri ndzə́ʼ Jesus ji Fon wov

¹² Màŋgòŋ wo wù‑uù baʼtin é Jerusalem nyanyày fo Ŋkǎʼ Yáʼayshaà nèn bvəə̀shí, e yù ji Jesus waà sí wiyì.

¹³ Á nèn keèmè, a dù ji á səə́si wun, a ker viyáŋ e wo, a ndzəʼ jii, «Fon wor èy, Fon wor èy, Nyùy Tàr ku səə̀vì wír wo wù wiy e wùn yir. Dzə̀ Fon wìr veé Isray.»

¹⁴ Jesus kóʼ é kitu ke wàn kimbèʼbìy, a wìy réŋréŋ mo vé‑eè yiìn ne sàŋ é Ŋwàʼ Nyùy jii:

¹⁵ «Ven vee wír veé *Sion, lá vèn yòʼ a fàn. Vèn yén mo Fòn won wiyì. Wù kòʼ a dzə̀ wan kimbèʼbìy.»

¹⁶ Wón lìm Jesuse yén kinyo kìn, e làa yòʼ a gwàrìr kinyo ke vé‑eè saŋen kiy. Wìy lòo dzə fo bàm, a Nyùy lí ne Jesus e yuv, bo kí wiy aáwuné vifii ji vé‑eè sàŋ kinyo kee shooy a dzə̀ bìʼ Jesus, kí ku kòóy a mo vé‑eè saŋen.

^17-18 Kinyo ke kí‑iì yiìn, bo màŋgòŋ keeme ji á du, e səəsí Jesus ki dzə̀ bìʼ fo vé‑eè yuun kiŋgaʼnìn ke kinyò ke wù‑uù yiìn, e yòŋ Laasaror fo say, wù fəə́ fó kpu. A vé‑eè yù, bìʼ fo màŋgòŋ wo wù‑uù dzəə̀n wùn à Jesus e ghan see shooy‑iì rə́si fer kinyo kee shooy.

¹⁹ Wír veé mbìv *Farasii nèn a kfə̀ynìn jii, «Kinyo kìn ki shaà ne vitaáví vesən. Vèn yén ri mo woŋe loòn ne e dzə̀m, a gbù a dzə̀ é wùn wó.»

Vitúm vi wíy, a tàʼ Jesus

²⁰ Wír ámóʼó wáa dzə sa ve vé‑eè koʼon fó kiŋkàʼ keé Jerusalem kìn ji á bunrì Nyùy, a vé‑eè wìy fó vitum veé Grik.

²¹ Áwune wìy, e tàʼ Filiv wo dzəə̀n wír woó Besayda, a dzə̀ ntèʼ é mbìv wòŋ yeé Galeli. Á yén, e sùúy sho jii, «Taàtá, vèr taʼ ji á yén Jesus.»

²² Filiv nèn dù, e bì Andru, wùn wun dù, e sùúy e Jesus.

²³ Jesus suúy aáwune jii, «Á lèn wo Nyùy sí yiì bùʼ ŋgaà wo yírí dzəə̀n *Wanwìr e vikuʼùy ve ghaʼán ví.

²⁴ Vèn wáa kiíy rúrú jii, a ŋgoòy kifa dzə̀ là fóo nəə́ e nsay, e kpu, bo kù dzə̀ yì jòʼsì sí e mòʼón. Yì nəə e nsay, kpú, bo kitiír kí wìy sìíy, e fò yìmòʼ yee ŋgoòy e nín.

²⁵ A wìr lò a dzə ji wun kù bávti dzəʼə̀m rə́, bo wù wíy ran ranén. Wìr maʼay dzəʼə̀m rə́, bo wù bávti bàvtín, e wìy nəə́ sho a dzə̀ é dzə̀ʼə̀m yee là may.

²⁶ A wìr taʼ ji wun wáa dzə wán wom lìm, wù kù a ghan vèr wun. M lóo dzə fo m dzə́, é kú a dzə vèr wun. Wìr wáa lìm fo mò, bo Tàr wor wíy bùʼ ŋgaàŋ.»

Jesus fiʼ mo wù wíy kpu, e màʼ sáʼ yeé ndzə fèn

²⁷ Jesus kfə́n a suúy jii, «Ghán sin si dzə̀ lèn, a shilív shí sí búʼ mo búʼún. Mo shí búʼ bèn, a dzə̀ m wàa lon fo Tàr wor ji wù ku tèér ŋgeʼ ye m sí nəə sho rə̀n a? Bó yòʼ dzə̀ m wàa lon, bìʼ fo mò‑oò wìyìn a dzə̀ bìʼ kee shoon.»

²⁸ Wù nèn yòŋ jii, «Tàr, ku yiì, é wíri wáa ghvəm a dzə̀ yír yé.» Jì Nyùy nèn sùŋnín fo yuv jii, «M yiì ne, á wáa ghvəm, a m kfə̀n wíy yiì.»

²⁹ Wír ve vé‑eè tíy fo ghaŋe yú kév, ámóʼó wáa suúy ji báykir a kishèv. Aámóʼó suuy ji kì súŋnin a nshìylav Nyùy sho.

³⁰ Jesus suúy e wír vìyi jii, «Jì yee shoon sùŋnín fo yuv ben ji wáa dzə kisəəm fo vèn, bó yòʼ dzə̀ fo mò.

³¹ Á lèn wo wír veé ndzə fène yíi lì lòn, aá baʼ Fon wo wù sáʼ ndzə yee shoon fo kàvàʼ.

³² A kém kí dzə̀ jii, á wíy koʼór mo é kici, wíri yéné, é m nèn sə̀ŋrì wir dzə̀m e mǒ wùn.»

³³ A wù‑uù suuy kin ji wun fiʼ dìn kfə́ə kpu ye wù‑uù wíy kpu.

³⁴ Màŋgòŋ nèn a suúy sho jii, «Vèr kì kér fó Ŋwàʼ Nyùy ji *Mfə̀ə́r wo Nyùy‑iì kàʼàn wíy a dzə sho ghán sidzə̀m. À kfə́n a suúy ji á wíy koʼór ŋgaà wo yírí dzəə̀n *Wanwìr e kici moó le? À yoŋ wír və̀n a dzə̀ la?»

³⁵ Jesus bìnèr jii, «Wìr wo wù fó rán dzə̀ vèn áwune lèn, a bó wù yòʼ dzəə́ yiì dzə̀ʼtì ntàmda. Vèn wáa ghan ghán yén, aá dzəə́ yén rán yee shooy, fo ndzə yiì sàsìn, e sə̀n ven. Yì yíi sən, é la wìr yòʼ dzəə kìíy fo wù du.

³⁶ Mo ŋgaà ran və̀n dzə̀ə́ vèn áwune, vèn wáy shilív é wùn wó, e fíʼ a ker rán yee shooy.» Jesus fèr vinyo vìn e wíri vidzə̀m, e nèn màʼtì áwune, e dù, e lìr.

Wìr wo wù ŋwáy jí se Jesus li a dzə̀ lòn

³⁷ Wíri siíy, e làa yòʼ fə̀m biimé kinyo kfə́, a wù‑uù sí ghán aáwuné mvəm, yii vinyo vinín ve ví din vitaáví vé Nyùy.

³⁸ A kí‑iì kòóy bey ji kinyo ke Aysaya woo ŋgaà ntum Nyùy‑iì saŋen kí fiʼ ghèén. Wù‑uù sàŋ jii: «Nyùy Tàr, wìr dzə̀ shó wo wù biimen ntum ye vèr tiísi a? Wìr dzə̀ shó wo wù yenen vitaáví vé Nyùy Tàr, e səə̀m a?»

³⁹ A bó yòʼ‑oò dzə̀ wír vìyi biìmé, bìʼ fo Aysaya kfə̀n‑eè sàŋ sá jii:

⁴⁰ «Nyùy sə̀tí ne sí yév, e yiì, melív mev mè lúr, fo sí yéví wáa yen vinyo, é melív mev mè səəm ke kí dzəə̀n, aá kfə́n fo Nyùy, é wù fer áwune.»

⁴¹ Aysaya wáa yòŋ kinyo kìn a dzə̀ kùm Jesus, bìʼ fo wù‑uù lo yèn Jesus e mvə̀m vikùʼùy ve dzəə̀n vé Nyùy.

⁴² Mo wíri fə̀m‑eè méŋ Jesus, ámóʼó ku yòʼ a way shilív é wùn wó, à vé wòŋ ámóʼó anín. Yii bèy, a bó yòʼ‑oò dzə̀ wìr wàa dìn e ŋgèŋgèr, bìʼ fo vé‑eè fan wír veé mbìv *Farasi, kfə̀n fan fo á jum áwune fó kintatì keé ŋgày se bùnrì.

⁴³ A vé‑eè fan bèy, bìʼ fo á koŋ búrí a dzə̀ yé wíri, nèn laysìn búrí ye dzə̀ wàa burí Nyùy.

⁴⁴ Jesus kfən lò, e waàmé jii, «Wìr wo wù wáy shilív e mǒ wùn, yòʼ wáy a dzə̀ e mǒ wùn. Wù wáy a dzə̀ e ŋgaà wo wù tumen mó wùn.

⁴⁵ Wìr wáa yén mo, bo wù yén sa a dzə̀ wír wo wù tumen mo.

⁴⁶ M wìy e ndzə fèn ji m fíʼ a dzə rán, é la wìr wo wù wáy shilív e mǒ wùn yòʼ dzə́ə a ghan fo mesənér.

⁴⁷ Wìr wáa dzə wo wù yú kinyo kém, wáŋ waŋén, bo bó yòʼ wíy saʼ mo ŋgaàŋ. M yòʼ wìy e ndzə fèn ji m wáy wíri a dzə̀ é lòn, m wìy kém ji m luŋer wíri lúŋerin.

⁴⁸ Wìr wo wù méŋ mo, káy kinyo ke m fiʼtì, sí kér kinyo ke kí wíy saʼ wun e kishiíy ke á wíy a tinén nsaʼ se wìr dzə̀m, a kù dzə̀ jí see shooy se m fiʼtì.

⁴⁹ Bó m yòʼ fiʼtì kinyo ji fiʼtì mo. M kù fiʼtì kinyo a dzə̀ ke Tàr wor wo wù tumen mo tiisin ji m wáa fìʼtì.

⁵⁰ A m kì ji ntum ye wù tumen mo shó rə̀n dzə̀ ye yì fó dzəʼə̀m yee là may. M nén a fìʼtì kinyo ke m fiʼtì kidzə̀m a dzə̀ kíwun ke Tàr wor tumen mo shó.»