Joon 11 - ŊWÀʼ NYÙY

Laasaror woo ŋkar Jesus kpú

¹ Wìr wùmòʼ nèn wìy lò, a jòy feyì, a yír ŋgaàŋe dzə̀ ji Laasaror, a dzə̀ fər vikìy ve á yoŋ ji Maria wùn Maata, aáwune shiiy e ntèʼ ye á yoŋ ji Betani.

² A Maria wo fər və‑əə̀ joy və̀n dzə̀ wo wù‑uù yoʼon wuú Jesus e biʼ yímóʼó, a səŋrí e nə́ŋ sə́ sí.

³ Vikìy víyi nèn tsə̀nsí ntum fo Jesus ji ŋkar rə tìm rə̀y joy a feyì.

⁴ Jesus yú, e sùúy jii, «Bó yàsí və̀n yòʼ dzə̀ wo kpu. Kù dzə̀ ji wù yii, aá yén mo vitaáví vé Nyùy vi dzəə̀n, a burí a dzə̀ ŋgaà wo dzəə̀n Wan Nyùy.»

⁵ Jesus‑eè kòŋ Maata wùn à Maria, à Laasaror və̀n e ŋàŋ.

⁶ Yii bèy, wù yú ntum rə̀n, e kù kfə̀n dzə̀ʼə̀m fo wù‑uù dzəə̀n vishiíy vibaà.

⁷ Wù wìy lò, e sùúy e wón və́ lìme jii, «Vèsən kfən kfə̀n é mbìv wòŋ yee Juda fèy.»

⁸ Á nèn yòŋ jii, «Ŋgaà Yèʼey, mo wír veé Judàa kù‑uu taʼ ji á yúyrí wò e yooné yooné fen, à wáa suúy ji à kfə́n fo lèn e le?»

⁹ Jesus bìnèr jii, «Ndzə yòʼ yii rán, e kèʼ fo shúy ntuùfú, yì jì shúy ntuùfú a? Wìr lóo ghan e shùy, la wù yòʼ bàyrìn e kifa, bìʼ fo ndzə ráné.

¹⁰ Kù yii bayrìn wír wo wù ghán a dzə̀ vitsə́ʼ, bìʼ fo bó wù yòʼ yén rán.»

¹¹ Wù suúy bey, e kfə̀n sùúy jii, «Ŋkar yèsən Laasaror buùné ne, a m du bèn, e yìm fo mbuùné fóo fèy.»

¹² Wón və́ lìme bìnèr jii, «Tàr, a wù buúne buùnén, bo wù yíi bonén.»

¹³ A Jesus kì suuy bèy, a dzə̀ ji Laasaror kpù á ne, aáwune yú kév ji wù buúne a buùnén.

¹⁴ Wù nèn màysì, e sùúy aáwune lèn kiránén jii, «Laasaror kpù ne kpuún,

¹⁵ a kí bòŋ mo bó m yòʼ kì dzəə̀n fó, é vèn fiʼ wìy wày shilív e mǒ wùn. Vèsən du ri fo.»

¹⁶ Tomar wo vé‑eè yoŋ yír rə́ yímóʼó ji Wóné nèn sùúy aámóʼó vee wón lìme jii, «Vèsən wáa dù rì, aá yúyrí vèsən áwune fó adzə̀m.»

Jesus fəə́r Laasaror fo kpu

¹⁷ Jesus meé fó, e yù, a Laasaror shiíy ne e sày vishiíy vikweè, a dzə̀ say ye á yii buʼ a dzə̀ é wǔn kilan.

¹⁸ Ntèʼ yee Betani rə̀n‑eè dzə̀ é ghaa ŋkàlaʼ Jerusalem, a ntàm dzə̀ moo amay abaà bey.

¹⁹ Jesus wáa wìy, a wír veé Juda foo fèyi kì wìykìr anín ji á shám Maata wùn Maria wo fər wov kpuun.

²⁰ Maata yú ji Jesus waà sí wiyì, e nèn fəə̀, a dù ji wùn wun wàá tárnín, Maria gòʼ kfə́ é lav.

²¹ Maata dù, e sùúy e Jesus jii, «Tàr, a wò‑oò dzə̀ fen, bo bó fər wom yoʼ kpù.

²² M suuy bèn, a m kì jii, aà fə̀m lón ka fo Nyùy lèn, wù kù fò á kíwun.»

²³ Jesus bìnèr jii, «Fər wò yíi fəə fo kpu.»

²⁴ Maata suúy jii, «M kì bey ji wù wíy fəə e kishiíy ke wíri wíy a fəəkír fo kpu e ghan sé bàm sí.»

²⁵ Jesus bìnèr jii, «Dzə̀ mo wo m fəər wíri fó kpu, fó áwune dzəʼə̀m yee là may. Wìr wo wù wáy shilív e mǒ wùn, a wù fə̀m kpù, bo wù wíy lùŋ, a dzə sho,

²⁶ bìʼ fo, a wìr dzə́ lèn, wáy shilív e mǒ wùn, bo bó wù yòʼ wíy nəə́ e kpu yee ŋkuuŋkùŋ. À ku yòʼ biìmé bèy a?»

²⁷ Wù bìnèr jii, «Tàr, m biìmé rú ji à dzə̀ Wan Nyùy woo *Mfə̀ə́r wo Nyùy‑iì kàʼàn ji wù wíy wìy e ndzə fèn.»

²⁸ Mo Maata suuyin bey, e nèn lò, e dù, e yòŋ fə́r və Maria, e sə̀mrì sho jii, «Tàr à wíri wìy ne, a wù taʼ, e yen wò.»

²⁹ Maria yú, e nèn tùmnín, a dù fo.

³⁰ Wù wáa dù, a bó Jesus yóʼ ne nə̀ə́ e mvə̀m ntèʼ, a wù dzə̀ə́ fo Maata kì wìyìn, e yèn wun.

³¹ Wír ve á kì wìyìn kinsham vìyi yén mo Maria tumnin, a fəə, á nèn a kwàʼtì ji wù du a ji wun du, a dìy e kitu ke sày. Á nèn lò sa fo bàm.

³² Maria dù, e yèn Jesus, e tsə̀m é si wo, a suúy sho jii, «A wò‑oò dzə̀ fen, bo bó fər wom yoʼ kpù.»

³³ Jesus yén mo Maria diyì, a wír ve á kì wìyìn e wùn bàm víyi diynìn sa, shilív sə́ shí wáa lùm, a buʼ.

³⁴ Wù lò, e dzə̀r jii, «Vé‑eè dzəə̀mè feé?» Maria bìnèr jii, «Tàr, kú a wìy rì, e dù, e yèn fóo.»

³⁵ Jesus dìy.

³⁶ Wír vìyi yén, e sùúy jii, «Vèn ku yèn mo wù kòŋèn Laasaror e ŋàŋ.»

³⁷ Aámóʼó nye kév a dzə̀ lám jii, «Jwè və̀n‑eè lo mvə̀ʼ sí mfìr, yì‑iì yiì ka lèn, la wù yòʼ tàŋ Laasaror fo wù kpú?»

³⁸ Shilív shé Jesus shi nèn kfə̀n màysì, e lùm. Á dù, e mèé e shùu sày, a vé‑eè bùʼ a dzə̀ é wǔn kilan, e dòm kilán, e sə̀tí sho,

³⁹ Jesus suúy jii, «Vèn tsəʼ kilán kìn fo shuù wo.» Maata woo fər ŋkfə və̀y nèn a shaʼnín jii, «Tàr, lèn dzə̀, a wù sí rəmè. Sì vishiíy vikweè mo vé‑eè dzəə̀mèn.»

⁴⁰ Jesus bìnèr sho jii, «M yoʼ lò sùúy e wò jii, aà wày a dzə̀ shilív e mǒ wùn, à yiì yèn mo vitaáví vé Nyùy vi dzəə̀n a?»

⁴¹ Á nèn tsə̀ʼ kilán kìy. Jesus leéy yúv, e yòŋ jii, «Tàr, m beerì feyì mo à yuun kinyo kém.

⁴² A m kì jii, à kù yii yuúri kinyo kém ghán sidzə̀m. M nén a suúy kin a dzə̀ bìʼ wír ve á tíy fo ghaŋ vìn, aá fíʼ yìi biimé ji tùm rú wò woo Nyùy mo.»

⁴³ Wù suúy bey, e yòŋ kitávín jii, «Laasaror, fəə́ fèn.»

⁴⁴ Ŋkfə və̀y nèn fəə̀ fó sày fèy, a wìy, a shwín sə́ wùn à kóy si kù dzə̀ə́ mo vé‑eè ndzəmen e ndzə̀y sé sày si, a sí rəə́ kù dzə̀ə́ sa mo vé‑eè sùmèn. Jesus nèn sùúy jii, «Vèn bvəti, é wù wáa dù e wún vəə́.»

Vé wòŋe táŋ ji á yúyrí á Jesus

⁴⁵ Wír ve vé‑eè wìyìn ji á shám Maria vìyi yén kinyo ke Jesus mùmèn kin, ámóʼó nèn wày shilív é wùn wó anín.

⁴⁶ Ámóʼó lò kév, e dù, e yèn wír veé mbìv *Farasi, e bì kinyo ke Jesus kì yiìn.

⁴⁷ Vitú ve atàá cù wùn à wír vee Farasi vee shooyi nèn kùm vé wòŋe adzə̀m. Á dzə̀ʼə̀m, a ghay jii, «A dzə̀ vèsən yèe, e bóo sə̀r wír və̀n. Wù ghán, shóʼ virom ve vinyò vinín,

⁴⁸ aá lòo dzə, e màʼtì, bo wìr dzə̀m yíi bìn a dzə̀ é bàm wó. Wír veé *Rome wíy nəə́ sho, aá nèn laàr woŋ wosən wùn à kirə́ʼ ké Nyùy kìn ki.»

⁴⁹ Wùmòʼ woo wír fo áwuné mvəm wáa dzə Kayfar, a yì‑iì dzə̀ taà cù wo kuʼùn é kiya foo fèy. Wù nèn lò, a suúy jii, «Vèn dzə̀ viyúŋ.

⁵⁰ A vèn kì kì vinyo, bo á kìíy ji kí bòŋ a ji wìr mòʼón kpú fo wíri, é kitúm ki luŋ kifur.»

⁵¹ Wù wáa suúy bèy, a bó yòʼ fə̀m sìysì wun fo wùn vifii. Mo wù‑uù dzəə̀n taà cù wo kuʼùn é kiya foo fèy, Nyùy nèn yiì, wù wáa suúy ji Jesus kér fó wìy kpu fo woŋ woo shooyi, a wù tiísi a dzə̀ ntum Nyùy.

⁵² A bó kí yòʼ‑oò dzə̀ ji Jesus kpú a dzə̀ fo wír veé wòŋ foo fèyi cáʼcáʼ. Wù‑uù wíy kpu ji wù fiʼ bàʼtí wír ve dzəə̀n vé Nyùy fo kitu ke nsay adzə̀m, aá wáa dzə kintatì kimòʼón.

⁵³ Kèʼ fo kishiíy fóo fèy, vé wòŋe nèn a shweʼ mo dzə̀ á yiì, e bóo yuyrí Jesus,

⁵⁴ la Jesus yòʼ dzə́ə a ghanén e wír veé Judàa mvə̀m wòŋ fèy. Wù nèn lò, e dù, a dzə e ŋgvə̀n kwaʼ ye yì dzəə̀n é ghaa kirə̀ʼ ké woʼ kí. Wùn à wón və́ lìme wáa dzə fo, e ntèʼ yìmòʼ ye á yoŋ ji Efrayim.

⁵⁵ Ghán sé *Ŋkǎʼ Yáʼayshaà símóʼ sí nèn kfə̀n wìy lòo gheén, wíri nèn a lòkìr fo virə̀ʼ, a dù e ŋkàlaʼ Jerusalem ji á tómbìy *kfə̀mrí vitú vév mo liì wov wòŋ taʼà, e bó a yi kiŋkàʼ kee shooy.

⁵⁶ Á dù bèy, á wáa dzə̀rnìn Jesus. Á tárnin e lav cù, á wàa ghaynín jii, «Vèsən kwaʼ ji ka? A dzə̀ rú Jesus yiì shaàrì fo kiŋkàʼ fen a?»

⁵⁷ A vé‑eè gháynin bèy, bìʼ fo vitú ve atàá cù wùn à wír veé mbìv Farasii‑iì saʼan ne jii, a wìr yèn fo wù dzəə̀n, ŋgaàŋ kù sùúy, aáwune tsə́nsí, aá wàá koó.