Joon 10 - ŊWÀʼ NYÙY

Jesus dzə̀ nshìy wo juŋ

¹ Jesus kfən sùúy jii, «Vèn wáa kiíy rúrú jii, wìr wo wù shaa shúu kày njiì, du, kóʼ a dzə̀ fó bàm, ŋgaàŋ dzə̀ shóŋ, a wù wiy a dzə̀ kimfaàsì.

² Wìr wo wù nəə kfə́ a dzə̀ fó shùu kày tìítiy dzə̀ nshìy njiì.

³ Wù lóo wìy, wìr wo wù shiy shúu kày kù nèn mvə̀ʼ. Wù nəə, wù yòŋrì njiì və é yír, yir, á kù nèn kìíy jí rə, e wìykìr, wù tsəə̀né, e fəə̀ shó fo kày.

⁴ Wù fəər ve dzəə̀n və́ adzə̀m, wù nèn shèm fó mbìy, a yòŋrì, á wàa wìy fo bàm, bìʼ fo á kiìn jí rə.

⁵ A bó yòʼ dzə̀ á shèm e wìr wo sə́n bàm. Á kù nyéŋ ŋgaàŋ nyéŋén, bìʼ fo bó á yòʼ kiìn jí rə.»

⁶ Jesus yòv ŋgàn rə̀n, la wíri yòʼ kìíy kinyo ke wù fiʼsìn sho gheéy.

⁷ Wù nèn a suúy jii, «Vèn wáa kiíy rúrú jii, dzə̀ mo shúu kày wo njiì shaa sho.

⁸ A wír ve vé‑eè wìyìn fó mbìy, a teʼ mo é sii dzə̀ ashóŋ. Vé‑eè wiy a dzə̀ kimfaàsì, a bó njiì yòʼ‑oò ló a yu jí yev, a jùmrì áwune.

⁹ Dzə̀ mo shúu kày. Wìr wo wù shaàn shó, e nə̀ə́ wíy lùŋ moo njiì wo wù fəə́ fo kày, yíkir, kfə̀n kfə́n e kày.

¹⁰ A ké shòŋ kí dzə̀ jii, wù wìy kfə́ ji wun shóŋ njiì, e yùyrí, e laàr. M nen wìy kém ji m yii, é wíri wáa ker dzəʼə̀m yee là may, a ker feyì nyanyày.

¹¹ «Dzə̀ mo nshìy njiì wo juŋ. Nshìy wo juŋ dzə̀ wo wù biíme, kpú fo njiì və́ kitu.

¹² A bó yòʼ dzə̀ wìr wo á liìn líin, a bó njiì yòʼ dzə̀ və́ə, wù biìmé. Wù yén, a nyàm ye bi wiyì, wù nèn shwèy, a nyeŋ. Nyàm nèn nə̀ə́ e mvə̀m ŋgoo njiì fèy, e koòrí ámóʼó, e tàʼár kibér.

¹³ A wù nyéŋ bèy, bìʼ fo á liìn wun líin, a bó yòʼ dzə̀ nsaʼ rə fó njiì foo fèy.

¹⁴ Dzə̀ mo nshìy njiì wo juŋ. M kì njiì wo dzəə̀n wóom, a njiì wom kì sá mo,

¹⁵ réŋréŋ mo m kiìn Tàr wor, a wù kì sá mo. M nen biìmé kpú, e fò kitú kém fo njiì wom və̀n.

¹⁶ A m kér sa njiì wùmòʼ, a bó wù yòʼ sì é ŋgoo fèn. M kér fó yìi baʼtí woo shooy e dzə̀m, aá yíi a yu jí yem, a wìy, é ŋgoo njiì nèn a dzə e mòʼón, é nshìy wáa dzə sa e mòʼón.

¹⁷ «Tàr wor nén a kòŋ mo a dzə̀ bìʼ fo m biimen kpú, a wù kfə̀n wíy fəə́r mo fó fo.

¹⁸ A bó yòʼ dzə̀ ji wìr wíy yuyrí mo ji yùyrí ŋgaàŋ. Kòŋ mo, e bóo fo kitú kém. Dzə̀ kilíŋ kém fó fo kitú kém, kfə́n a dzə kilíŋ kém fó fəə fo kpu. Á mo Tàr wor‑iì suuyin ji m yii.»

¹⁹ Wíri yuúrí vinyo vìn, e nèn kfə̀n bvəə̀rí.

²⁰ Wír aníne wáa nyàysì jii, «Wù dzə̀ ben, a *nyùy wùmòʼ bvəər vifií və́, wìr baá baán, aá yuúri ka fó kinyò ke wù suuyì?»

²¹ Yii bèy, ámóʼó wáa suúy jii, «Wù yòʼ suuy kinyo a dzə̀ ké wìr wo jívir nyùy wùmòʼ. A dzə̀ wír woo bey, wù mvə̀ʼ sí mfìr e le?»

Jesus dín ji wun dzə̀ Wan Nyùy

²² Ghán se á yii kér kiŋkàʼ kímóʼ kí é Jerusalem si nèn ghèén, a sì ŋwee kintòn, a dzə̀ ŋkàʼ wo vé‑eè kuúme mo á kfə̀n‑eè mvə̀ʼə̀n lav yev cù.

²³ Jesus wáa dzə e lav cù, e lò a kaarí e sar kishem ke á yoŋ ji ké Solomon,

²⁴ wíri báʼtí e wùn ghaŋ, e dzə̀r shó jii, «À taʼ ji vèr wìy shìy, e mèé e le, e bóo gwàrìr wír wo dzəə̀n wò? A bèn dzə̀ wò *Mfə̀ə́r wo á shiyì, à kù gwàrìr ver kijuŋ.»

²⁵ Wù bìnèr jii, «Mò‑oò sí suuy, la vèn yòʼ a biimé. A vinyo ve m rə́si yii e Tàr wór yir ví kfə̀n din sa mo m dzəə̀n,

²⁶ a bó vèn yòʼ biíme, bìʼ fo vèn yòʼ dzəə̀n wír fo mǒ ŋgoo njiì.

²⁷ Njiì wo dzəə̀n wóom e dzə̀m yú jí yem, wù kù nèn kìíy, a wìy e mǒ bàm. M kì wír vém adzə̀m,

²⁸ a m fó dzəʼə̀m yee là may aáwune. A bó yòʼ dzə̀ áwune dzəə nə̀ə́ e lòn, a bó yòʼ dzə̀ wìr faàsì áwune fo mǒ kiwo gheéy.

²⁹ Tàr wor wo wù wayin áwune e mǒ kiwo shaà wir dzə̀m, a bó wìr yòʼ dzə̀ shó wo dzə̀ wù faàsì kifá fo Tàr wór kiwo,

³⁰ a vèr Tàr wor dzə̀ ji kitú kimòʼón.»

³¹ Wíri nèn kfə̀n tàyrí tíy ji á yúyri Jesus sho.

³² Wù dzə́r aáwune jii, «Vèn‑eè ló a yen, a m yii vinyo ve juŋ vi vinín, a ví lo a dzə̀ fo Tàr wor. Fo vinyò fèn, vèn taʼ ji vèn yúyrí mo a dzə̀ fo kiné kí lèn?»

³³ Á bìnèr jii, «Bó vèr yòʼ kì yúyri wò fo kee shooy ki. Vèr yúyri wò, bìʼ fo à táŋ kilíŋ ke dzəə̀n ké Nyùy. Wò, wír fo wìr, aà suuy ji à dzə̀ sá ji Nyùy.»

³⁴ Jesus bìnèr jii, «Vé‑eè sàŋ e věn Ŋwàʼ Nyùy ji Nyùy‑iì suuy a jii, ‹Vèn dzə̀ sá ji anyùy›,

³⁵ a vèn kì sá ji kinyo ke kí dzəə̀n é Ŋwàʼ Nyùy ki kù yii tíy fo. Mo wír ve Nyùy‑iì yoŋ ji anyùy vìne dzəə̀n ve wù‑uù tiísi a dzə̀ vinyo və́ shó,

³⁶ m wáa dzə kém wír wo Tàr wor Nyùy‑iì shoʼon, e tùm é ndzə fèn, vèn kfə́n a suúy ji m táŋ kilíŋ ke Nyùy, bìʼ fo m suuy ji m dzə̀ Wan Nyùy moó le?

³⁷ A vèn yén, a vinyo ve m yii vìn vi yòʼ lo a dzə̀ fo Tàr wor Nyùy, la vèn yòʼ a biìmé kinyo kém.

³⁸ Vèn yén, a m kù yii a dzə̀ vinyo vee shoon, a bó vèn yòʼ fə̀m koŋ, e biíme kinyo ke m suuy e mǒ kitu, vèn kù biìmé bìʼ vinyo ve m yii vìn, é vèn nèn wìy kìíy rú kijuŋ ji kù dzə̀ vèr Tàr wor, a vèr wun dzə̀ ji kitú kimòʼón.»

³⁹ Wír vìyi nèn kfə̀n tò ji á bámé, wù nèn bìn, la á yòʼ dzəə yèn.

⁴⁰ Jesus lò fo fo, e tùmsín e mbìv ndzə̀v yee Jordan, e dù fo Joon‑eè kèʼèn, a way wíri é ndzəv, a dzə fo.

⁴¹ Wíri wáa wìy anín, a yen wun fo. Á lo, á wàa suúy jii, «Joon‑eè dzə̀ kfə́, a bó wù yòʼ‑oò ló a yiì a kiŋgaʼnìn ke kinyò kímóʼ kí ke kí wáa dìn vitaáví vé Nyùy. Yii bèy, a vinyo ve wù‑uù suuy kùm wír və̀n vidzə̀m vi‑iì ló a dzə rú.»

⁴² Wíri nèn a way shilív e Jesus wùn é kirə̀ʼ fóo fèy anín.