Joel 3 - ŊWÀʼ NYÙY

Nyùy wíy saʼ vitúm vee aŋgàa vibǎn wìr və́

¹ Nyùy Tàr suuy jii: «Rúrú, wíy lòo dzə e ghan see shooy, é m siir vikuʼùy vé wìr veé Juda fo, à vé Jerusalem vi.

² Siirì, é m báʼtí vitúm vee aŋgàa vibǎn wìr vém é Kiwoóy ké Jehoshafat. Dzə̀ fó, fo m wíy way áwune é kibàʼ ke nsaʼ, e saʼ áwune bìʼ kinyo ke á yiìn e wír vém veé Israyi, kitúm, ke mò‑oò shavin ji wír vém vee jeéyí. Áwune jùm ne wír veé Isray, á táʼrí, e dùkìr e vitum ve sən ví, e jàv nsay yev ye dzəə̀n yéem féyì feyì.

³ Vé‑eè lo, á shwèŋ wír vém, e bóo kiíy wóo lì ji kwàn. Áwune lo, á lì wán woo lumèn, e kàv sàkì sho, li woo wiíy, á kàv meluʼ sho, a no.

⁴ «Éè wìr veé Taya, à veé Sidone, e lì wir dzə̀m woó ŋguùŋè Filistia, vèn taʼ ji vèn yée le e mò? Vèn taʼ ji vèn siir ŋkfə́tír vèsən a? A vèn taʼ, e siìr, vèn wàa yen, bìʼ fo m lo, e siìr vinyo ve vèn yiìn ne e věn kitu, a siìr e kileʼ ki.

⁵ Vèn lì ne kisha kém ké mbàm ke fəvír kí wùn à ke baar kí, e kùúy bùʼ wom woó kilùm, e bèʼèy, e dù sho e věn virə̀ʼ vé anyùy.

⁶ Vèn fiìnè ne wír veé Juda wùn à veé Jerusaleme e veé Griki, á lí áwune, e fəə̀ shó fo áwuné nsay.

⁷ Ké lèn ki, m lo, e siìr áwune é bàm fó vitum ve vèn‑eè fiìnèn áwune shó, siirì, é m siir kinyo ke vèn‑eè yiìn aáwune e věn kitu.

⁸ M yíi yiì, aá fiine wón vén vee vilum wùn à vee vikìyí e wír veé Judàa, é wír veé Judàa fiine sá e veé Sabeyàa, a dzə̀ kitúm kee kwaʼda. Suuy mo woo Nyùy Tàr.

⁹ «Á samer e vitúm vi jii, vèn báʼtí rə́r sí. Vèn fəə́r vé rərí, aá wáa meʼ fo mentsə̀m, méʼé, aá nəə́ rə́r.

¹⁰ Vèn ku lì visoó vén, e tòn nyùy sé rər shó, e lì akòómèntá vén, e tòn kòŋ sí shó. Vèn ku yèʼéy sa anjoó, aá távkír, a dzə̀v nsaŋ.

¹¹ Ven vee vitúm ve vèn kaarin Juda, vèn ŋáʼáy cér, a wìy. Vèn báʼtí é kiwoóy kee fo Nyùy tínen nsaʼ sə́.» Éè Nyùy Tàr, ku tsə̀nsí vé rər vée, aá sə́y, e ghìʼ áwune fó.

¹² Nyùy Tàr bínsí jii: «Vitúm vidzə̀m vi ku ŋàʼáy, e bàʼtí e Kiwoóy ké Jehoshafat. Dzə̀ fó, fo m yíi dzə̀ʼə̀m, a tinén nsaʼ vitum ve ví kaarin Juda.

¹³ Sáŋé bìy ne. Vèn tsə́nsí vé tine, aá du, e tìn. Tútúʼ rùn ne e bií melùʼ. Vèn nəə́, e nyèŋ, é meluʼ mè fəə́ fó fo. Vinyo ve vitúm vi buʼtì vi kùʼ ne e ŋàŋ. Á kù yíi nyèŋrì áwune é mfòn, mo á nyèŋ meluʼ, mbìʼ sí rúnkír, a fəə.»

¹⁴ Yímóy, wíri bàʼtí ne ansə̀kì ansə̀kì, aá sì é kiwoóy kee fo Nyùy Tàr kwaŋrì vinyo. Dzə̀ fó, fo kishiíy ké Nyùy Tàr kí yíi sàsìn, e bvəy.

¹⁵ Kishiíy kin ki wíy lòo gheén, é shùy wùn à ŋwee ndzə́mén, a mejiy mè yòʼ wíy a ban.

Nyùy wíy səə̀vì wír və́

¹⁶ Nyùy Tàr wíy a wamkír fo Sion, a tsənsí kisúŋnìn kfə́ fó Jerusalem. Nsay wíy a sə̀ʼ, é yúví wáa yàʼ. Yii bèy, Nyùy Tàr wíy a dzə kikfə́vsì ke wìr və́, a dzə kirə́ʼ ke tavín ke wír veé Israyi laay sho.

¹⁷ «Á bèy, é ven vee wír veé Israyi nèn kìíy ji m dzə̀ á Nyùy Tàr woo Nyùy won, a m dzə́ e Sion fo m shavin ji gwan wom wo ranén. Jerusalem wíy a dzə kirə́ʼ ke ranén kí, a bó vitúm vi yòʼ dzəə́ wìy nəə́ fo, e tòn áwune.

¹⁸ Wíy lòo dzə e kishiíy fóo fèy, é meluʼ me nyomèn mè wáa shem fo virùmèn, é vín nàʼa wáa leŋ, a səy fo agwan. Ndzə́v seé wòŋ woo Juda si wíy runkír sidzə̀m. Ndzə́ví wíy a mee fo Nyùy Tǎr lav, a leŋ, a dù, a borír Kiwoóy ké Shittim.

¹⁹ «Ké Ejiv, wù wíy yum, e kfən ji kirə́ʼ ké woʼ, é Edom kfə́n ji kirə́ʼ ke kifá ki yòʼ kfə̀n kum fo. Dzə̀ bìʼ ghíʼ ye áwune‑eè ghiʼin wír veé Juda, e nə̀ə́ fo, e yùyrí wíri là njò.

²⁰ Yii bèy, wíri wíy a bvəə̀tìn bvəə̀tìn é nsay Juda, e dù, e jòʼsì. Mo ŋgwàʼ si wíy a koʼ, Jerusalem kù wíy a tiy fo.

²¹ Á mo m wíy siìr ŋkfə́tir wìr vém ve vé‑eè yuyrin là njò, a bó yòʼ dzə̀ féyì m wìy màʼtì, aá boy fó nsaʼ. Mo woo Nyùy Tàr wíy a dzə e Sion vèr à wír vémé.»