Joel 2 - ŊWÀʼ NYÙY

Ŋguùmé sí dzə̀ kisəəm ké kishiíy ké Nyùy Tàr

¹ Vèn tóŋ sóŋé é Sion. Vèn búʼ shirəə́ shi e mǒ gwan wo ranén. Wìr dzə̀m wo wù dzə́ e nsay Juda wáa yàʼ, bìʼ fo kishiíy ké Nyùy Tàr kí sí wiyì, a kí sí méʼ fo mentsə̀m.

² Dzə̀ kishiíy, a kí sə́n, beéme. Kishiíy, a dzə̀ ndzə vitsə̀ʼ, a mbàʼ si súm. Dzə̀ vé rər ve á meʼèm, wiy moo ŋguùmé, e sə agwan moo mbàʼ. Vé rər ve á tavin béne yòʼ‑oò ghàn ne bàʼtí, a bó á yòʼ kfə̀n wíy a dzə.

³ Á wíy laàr kifá kidzə̀m, kù mo laàr ŋguùmé. Á wíy ndzəə́y vifá, kù moo ji tòn və́y. Nsay yee áwuné mbìy dzə̀ moo kiboó keé Eden, a yee áwuné bàm dzə̀ nsay ŋgaŋ. Rúrú, sí yòʼ bávti kifá gheéy, fə̀m shishàr.

⁴ Sí shwínin nyám se ŋkoʼ, léʼ moo nyám se ŋkoʼ seé shùu rər.

⁵ Sí léʼ e vitu ve agwan, a kiléŋléŋ kí koó moo ké *vitentén vé rər. Sí kfə́r visáŋsáŋ, báykir mo və́yí bàykír fo kinshaàrì. Sí du e ŋgoo sí ŋgoo si, du, moo mànjòŋ wo wù du e shùu rər.

⁶ Sí meʼèmè, wíri wàa fàn, a yàʼ, meʼèm, á wàa kìʼ arəə́yín.

⁷ Sí wiy, ghíʼ wíri, kù moo ji ghìʼ vé rərí, kóʼ virə́v vé kày veé ŋkàlaʼ, kù moo vintav ve vé rərí. Sí kù du e ŋgoo, a símóʼ sí yòʼ bar ŋgoo.

⁸ Sí yòʼ ghán, tsə́yninè. Sidzə̀m si kù tiir kitú, du a dzə̀ fó mbìy. Sí tóʼnin kifá kidzə̀m ke á téʼ áwune shó toʼnín, a bó yòʼ dzə̀ kifá ki sə̀ə́r áwune.

⁹ Sí gbu, e sùm ŋkàlaʼ súmen, a koʼ e virəv vé kày. Kóʼó, é sí nəə́ é lav si, a nəə́ fo shuù se wundu moo ashóŋ.

¹⁰ Sí lóo wìy, é nsay wáa sə̀ʼ, é yúví wáa yàʼ, é shùy wùn à ŋwee ndzə́mén, é la mejiy mè yòʼ dzə́ə a ban.

¹¹ Kù danèr Nyùy Tàr mànjòŋ və və̀n, du aáwuné mbìy, wámkirì. Vé rər və́ víne dzə̀ nyanyày, aáwune ve á yú jí rə víne dzə̀ antav ve ghaʼtíné. Rúrú, kishiíy ké Nyùy Tàr kí dzə̀ kigháʼán, a kí beéme e ŋàŋ. A dzə̀ bòy la é kishiíy fen.

Ŋgaà ntum Nyùy lón ji wíri biner melív mev

¹² Yii bèy, Nyùy Tàr kù dzəə́ kér shíi won. Wù suuy e vèn jii: «Vèn kfə́n é bàm e mǒ wùn shilív shén shidzə̀m, a lèm jíŋ, a toŋ, a dìy.»

¹³ Lá vèn yòʼ a sàtì a dzə̀ ndzə̀y ji vèn fíʼ a dìn mo vèn dzə́ e nsòv. Vèn su a dzə̀ melív men mè, e kfə̀n é bàm e Nyùy Tàr woo Nyùy wón wùn. Wù rə́r mendzən me wíri, shám áwune. Wù yòʼ yii táv shwiiy kilòŋ. Wù yòʼ yii yar fó a dìn koŋ ye wù kér fo wír vəə́. Wù yòʼ yii koŋ, e màʼ ŋgeʼ e wìr kitu.

¹⁴ Yòʼ kì la, a Nyùy Tàr yíi kuvsín kwaʼtì rə́, e səə̀vì ven, e yiì, é vifá vi kfə́n a kuy e sum. Səəvì, é vèn kfən kòóy vifá vé a cù Nyùy Tàr woo Nyùy won shó, a cù wun e vifá ve yi vi, a cù e meluʼ mè.

¹⁵ Vèn tóŋ sóŋé é Sion. Vèn fó sáʼa ji á wáa lèm jíŋ, a lon Nyùy. Vèn jaŋri wíri, aá báʼtí e Nyùy Tǎr si.

¹⁶ Vèn báʼtí wíri, e *kfə̀mrí, ye dzə̀ á wàa koʼtí e mǒ si. Vèn báʼtí ŋgày sé wìr si, e bàʼtí wóné, à vé vine shó. A fə̀m dzə̀ wír, aá tátí vijín vifíy, á kù màʼtì lav vijìn, e wìy.

¹⁷ Atàá cù, áwune ve á yii cu Nyùy Tàrí ku tìím e ghaa kiy cù, a kìʼ kibuʼ ke kí nəə e lav cù, a dìy, a lon Nyùy Tàr jii, «Éè Nyùy Tàr, ku bàvtí dzəʼə̀m wìr vée. Wír vìne dzə̀ ve à shavin shávín ji vé. Lá à yòʼ yiì, aáwune kfə́n ji kifá ke nshéʼmé ki. Lá à yòʼ màʼtì, é vitúm vi wáa te lám aáwune, a dzər jii, ‹Nyùy won bèé lèn?› »

Nyùy kfən bòrír nsay vifa ve yi

¹⁸ Nyùy Tàr nen dìn shií wo wù kér fo wun nsay, e rə̀r mendzən me wìr və́.

¹⁹ Nyùy Tàr wáa bìnèr kinyo ke wìr və́, a suúy aáwune jii, «Ké lèn ki, m lo, e tsənsí vifá ve yi, à meluʼ mè, à meŋgvə́r mè nyanyày mo a dzə̀ ví ghèén ven. Vèn yòʼ dzəə́ yiì a dzə kifá ke nshéʼmé ki fo vitúm ve ví kaarin ven ví.

²⁰ M yíi jùm mànjòŋ vé rərí wo wù nəən ven fó mbìv yee fó kùy. M yíi fəə́r ŋguùmé fo věn nsay, e jùm, é símóʼ sí du é kirə̀ʼ ké woʼ kí, e kpùkír fo. M yíi jùm ŋgoo yee fó mbìy, é yì du, e gbù e Ndzə́v Shiŋgwaŋ, e jùm ŋgoo yee fó bàm, é yì du, e gbù e Rìbà Ndzə̀v woo Mediteranean. Dzə̀ fó, fo dzə́n sév sí wíy a neŋnín, a shàŋ. Rúrú, m yíi laàr mànjòŋ və̀n bìʼ rə́mrə́m kinyò ke á yiìn.»

²¹ Éè nsay, lá à yòʼ dzə́ə a dìy. Kú a yu vijuŋ vi lèn, a sheʼrí, Nyùy Tàr yiì ne kinyo ke ghaʼtín kí.

²² Éè nyám si, lá vèn yòʼ a fàn. Jíyí sí lo, e koʼ e kwaʼ si, a tèʼ, a səəné, é vicí ví wáa koóm báŋ si. Vicí vé *fig wùn à vitiír vé vayin vi lo, e koóm, e koóm bèn, a kivtí tám si.

²³ Éè wìr veé Sion, vèn wáa sheʼrí. Vèn wáa yu vijuŋ ve vinyò ve Nyùy Tàr woo Nyùy won yiìn e vèn ví. Wù yiì ne, wuú mbìyi gbú, e fíʼ dìn ji wun yù ne tóŋ yén. Wù sə̀ʼə́r ne wuú mbìyi, e sə̀ʼə́r yé bàmé, yí ku lò ben e mbòŋén, kù mo yí‑iì rə́si ló.

²⁴ Sáŋé yíi a dzə e riimé se á búʼ sho nyanyày. Meluʼ mè yíi runkír e bii se á kám sho, é meŋgvə́r mè rúnkír é bii se á nyeŋ sho.

²⁵ Nyùy Tàr suuy jii: «M wíy siìr vifá ve vèn‑eè làyìn é ghan se ŋguùmé sí‑iì ndzəəyin vifá vén. M wíy siìr vidzə̀m, e kèʼ fo vifa ve sé mbìy si‑iì laàrìn, e dù, e meé e ve sé bàm sí‑iì ndzəəyin. Kù‑uù tsə̀nsí mo mànjòŋ wom wo ghaʼán və̀n, é bo wù nəə́ ven.

²⁶ Ké lèn ki, m lo, e fo ven vifá ve yi nyanyày, ve ví gheén ven. Vèn wáa sheʼrí Nyùy Tàr woo Nyùy won, wo wù yiìn viŋgaʼnìn ve vinyò e vèn. Bó wíri yòʼ dzəə́ wìy a shoór wír vém, a fə̀m dzə̀ é ghàn ka.

²⁷ Á bèy, wìr veé Isray, é vèn nèn kìíy ji m dzə̀ á vèsən, e kfə̀n kìíy ji m dzə̀ Nyùy Tàr woo Nyùy won, a wùmòʼ yòʼ kfə̀n dzə̀. Bó wíri yòʼ dzəə́ wìy a shoór wír vém.»

Kishiíy ké Nyùy Tàr

²⁸ Nyùy Tàr kfə́n a suúy jii: «Wíy lòo dzə fo bàm, é m fó Kiyoy kém e wìr dzə̀m, é wón vén vee vilum wùn à vee vikìyí wáa yu vinyo fo mò, a tiisí. Ŋgày sé wìr sén sí wíy a yen vinyo e njèm, é wón vén vee wónlě nsùme wáa yen vinyo e njà vinjeenjèm.

²⁹ Wíy lòo dzə e kishiíy fóo fèy, é m kfən fò sá Kiyoy kém aàŋgaà vém lìme adzə̀m, kìn dzə̀ woo lumèn, kìn dzə̀ woo wiíy.

³⁰ M wíy dìn visəəm ve ghaʼtín ví é yuv, e kfə̀n dìn e nsay. Mensə́ wùn à və́yí, a kindzə́ʼ ke ghaʼtín kí wíy a dzə.

³¹ Shùy wíy ndzəmén, lóo sən sənén, ŋwee lóo bàŋ moo mensə́, é bo kishiíy ké Nyùy Tàr ke ghaʼán kí gheén.

³² Yii bèy, a wìr dzə̀m wo wù tóŋ e Nyùy Tàr wíy lùŋ. Kí dzə̀ jii, wír ámóʼó wíy bòy e Gwan Sion woo Jerusalem, kù mo Nyùy Tàr‑iì suuyin. Áwune wíy a dzə e mvə̀m kiber ke wìr, wír, ve Nyùy Tàr shoʼon ji á luŋ.»