Joel 1 - ŊWÀʼ NYÙY

¹ Kinyo kìn ki dzə̀ ntum ye Nyùy Tàr‑iì tiisin e Joel woo wan Petuel.

Wír veé Judàa diy vifá vév ve ŋguùmé sí laàrìn

² Éè ŋgày sé wìr, vèn yuúrí. Wìr dzə̀m wo wù dzə́ e nsay Juda ku mvə̀ʼtì vituʼùr, e yuùrí. Feyì feyì, naaŋkàntì kinyò kee ben ki‑iì ghàn ne kòóy e věn ghan á? Fə̀m áàtàr véné ghan, kí‑iì ghàn ne kòóy a?

³ Vèn fiʼti sáʼka və̀n e wón véné, é wón véné fiʼti sá e vév vee wóné. Fiʼtì, é wón won véné samer e ŋgwàʼ ye yì dzəə́ wìy a koʼ.

⁴ Kí dzə̀ jii, vifá ve ŋguùmé sé mbìy si‑iì wìyìn, e shèr shèrìn, sé bàm sí wìy ne, e ndzə̀ə́y kifá kidzə̀m ndzəə́yín.

⁵ Éè amfoòkìnó, vèn yimen, a dìy. Ven vee anomèlùʼ, vèn wáa toŋ, a jeetí. Tútúʼ wo á fer meluʼ sho yòʼ kfə̀n dzə̀ə́. Meluʼ me fíy me vèn koŋ a no mè bùú ne.

⁶ Mànjòŋ ŋguùmé mèʼèm ne, e wìy, e sùm nsay yèsən. Sí tàvkír e ŋàŋ, a sóŋé kù dzə̀ ji yé bvərə̀ʼ, njím moo viŋkoònyàm ve kiyìy ké bvərə̀ʼ.

⁷ Sí laàr ne vitiír vesən vé *vayin, e sòóy vicí vesən vé *fig vidzə̀m. Sí wòʼ ne ndzə̀m sé vici, ví wáa fər fərín vidzə̀m.

⁸ Vèn wáa dìy, a shèŋ kitú, kù moo wánlè ŋgòn wo wù màʼàn ndzə̀y sé kpu, a dìy kpú lum və viŋgòn.

⁹ Cú vifa ve yii sèéy ne fo Nyùy Tǎr lav, a bó á yòʼ dzəə́ cu Nyùy Tàr e meluʼ mè. Atàá cùu sí diy, sov vitú, bìʼ fo vifá vé a cù Nyùy Tàr shó vi buŋen ne.

¹⁰ Súm sí sìkìr kisáŋ, a nsay diyì, bìʼ fo ŋguùmé sí laàrìn ne vifá fo fo. Sí ndzə̀ə́y ne vitiír vé vayin, e sòóy vicí vé *oliv ví máy.

¹¹ Vé sumé, vèn wáa sòv vitú vi. Ven ve á lim vitiír vé vayin, vèn wáa dìy. Ŋguùmé sí ndzə̀ə́y ne sáŋ yee *wit wùn à yee *barlìi. Kifá ke á dzəə́ wìy kav fo sum kí yòʼ kfə̀n dzə̀ə́.

¹² Vitiír vé vayin vi yùm ne vidzə̀m. Vicí vé fig vi soóy, à vé *grenadin vi. Vicí vé mbàŋ wùn à vé apər vi sòóy ne, e mày. Vicí ve á yii koy vi yúm fó sum vidzə̀m, vijuŋ ve wíri kì yíi a yu vi búŋ.

¹³ Ven vee atàá cù, vèn maʼ ndzə̀y sé kpu si, a dìy. Ven ve á lim e kiy cù, vèn wáa toŋ, a jeetí. Ven ve á cu Nyùy wom, vèn maʼ ndzə̀y sé kpu si, e dù, a dìy vitsə́ʼ vifur. Vèn wáa dìy, bìʼ fo cú vifa ve yii yòʼ dzə̀ə́, a yé melùʼu sèéy ne. Á yòʼ dzəə́ yii cu e Nyùy wón lav.

¹⁴ Vèn fó sáʼa, aá wáa lèm jíŋ ji á lón Nyùy. Vèn jaŋri wíri, aá tiím e Nyùy si. Vèn báʼtí vilìmbìy vi wùn à wìr dzə̀m woó Juda. Vèn báʼtí áwune e Nyùy Tàr woo Nyùy wón lav, aá wáa toŋ e wun ji wù ku sə̀ á ven.

¹⁵ Rúrú, kishiíy ké Nyùy Tàr kí sì fó mentsə̀m. Kishiíy ke wun woo Ŋgaà Vitaàví Vidzə̀m lo, e wìy ji wun laar virə́ʼ.

¹⁶ Vèn ku yèn ri mo á laàrìn ne vifá fo sum. Vèn yén ri mo kishéʼrì ki màyìn ne fo Nyùy wòsə́n lav. Á yòʼ dzəə́ yí ŋkàʼ fó, savnìnè.

¹⁷ Ŋgoòy se vifa si yùm ne e nsay ŋgaŋ, vifá ve á wáy e ŋwaʼ vi búŋ, ŋwaʼ si góʼ, a tiynín kisáŋ, e lò, e sàʼkìr.

¹⁸ Nyám sesən sí sí ghán, ján, toóŋe toòŋén, bìʼ fo sí yòʼ dzəə́ kér yí, a ŋgoo se njiì si yén sa ŋgeʼ, bìʼ yí ye yí buŋen.

¹⁹ Éè Nyùy Tàr, m tóŋ a dzə̀ e wò. Və́yí laàr ne kwáʼ nyàm, e tòn vicí ve ví dzəə̀n é kwaʼ vidzə̀m.

²⁰ Nyám se kwaʼ si kù tóŋ sa, kan a dzə̀ wò, bìʼ fo ndzə́v sí yumkin ne, və́yí kfən tòn kwáʼ.