Jeremia 9 - ŊWÀʼ NYÙY

¹ Wìr ku lì ji kitú kém kí kì dzə̀ ntoò ndzə̀v, a sí yémé dzə̀ dàn mensiy, bo m kì diy e shùy, diy vitsə́ʼə́, bìʼ wír vér ve á yuyrin.

² Kì yée fó a dzə ji kirə́ʼ kí dzə̀ é woʼ, kirə́ʼ kee fo a dzə̀ vé ghane wàa shiíy, bo m kì màʼtì wír vér, e lò fo áwuné ghaŋ. Áwune dzə̀ vé kinjàŋe adzə̀m, ŋgoo wìr ve á buʼtì vinyo.

³ Nyùy Tàr suuy jii: «Kimboʼtì ki fəə́ fo áwuné kiliimé, fəə́ feyì mo mvəne fəə̀ fó kinte. Áwune tàv a dzə̀ é kimboʼtì, suuyrú nen mày fo wòŋ. Á yii jay e kintuŋ kintuŋ, aá yòʼ kfə̀n kiiy mo.

⁴ «Wìr wáa kiíy kfə́ə ŋkar ye wù koó. Lá wìr yòʼ a way shilív e fər və́ wùn. Fər wìr kù sì ŋgaà kimboʼtì e wìr bàm moo Jakov, a ŋkar wìr kù sì ji ŋgaà kinsuʼ.

⁵ Wìr dzə̀m kfə̀n ne ji ŋgaà kimboʼtì e fər və́ bàm, a bó wìr yòʼ kfə̀n suuy suuyrú. Á mèrìr ne kiliímé kév a dzə̀ e kimboʼtì ki. Áwune yòʼ kfə̀n yú fóo bìnkìr, e màʼtì liì kisaŋ.

⁶ Á kù sí waʼrì, yúy wíri e séʼ wo á sə́, kuvrì a dzə̀ kiŋkùvrì. Áwune tèn ne fóo binsí mo ji Nyùy.» Suuy Nyùy Tàr.

⁷ Á bèy, wun woo Nyùy Tàr woo Taà Mànjòŋ nén a suúy jii: «Vèn yú, m yíi mùmrì áwune lèn e və́yí, e yen mo á dzəə̀n. Wír vémé kù sí yii a dzə̀ liì kisaŋ, bo a siì dzə̀ m kfə̀n yèe le lèn?

⁸ Kiliímé kév kí dzə̀ ji mvən ye naáné, kinyo kidzə̀m ke kí fəə́ fo fo ki dzə̀ kimboʼtì. Wìr lo, wù wàa suŋnín e fər və, kí wàa bòŋ, a wù kér a dzə̀ kwaʼtì ye bií é shiliv kùm wun.

⁹ A dzə̀ rú la m yòʼ màʼ ŋgeʼ aáwuné kitu, bìʼ vinyo vìn à? A dzə̀ la m yòʼ siìr ŋkfə́tír e kfə́ə kitum kee ben ki a?» Suuy Nyùy Tàr.

¹⁰ M nèn yòŋ jii, «M yíi a toŋ, a dìy bìʼ agwan, a yòv lúŋ kpu bìʼ vitsəə̀m vé nyàm veé woʼ. Fóo sì e ghá, a bó wìr yòʼ kfə̀n shaa fo, a bó á yòʼ kfə̀n yú tóŋ nyàm. Menə́n wùn à nyám si lèʼkír ne, e lày.»

¹¹ Nyùy Tàr suuy jii, «M yíi yiì, é Jerusalem kfə́n é vikfər vikfər, e dù ji kirə́ʼ kee fo kuúrá yii shiiyì. M yíi yiì, é ŋkà se laʼ seé Juda si kfə́n ji vifə̀m. Kirə́ʼ ke bó wìr yòʼ yii dzə́ fo.»

¹² M nèn dzə̀r e Nyùy Tàr jii, «Nsay yèe, e bóo bir, e kfən e ghá moo wóʼ, a bó wìr yòʼ kfə̀n shaa fo? Dzə̀ la wo wù kér vifií vée kiíy kinyo kìn? Nyùy Tàr, à naàrì kinyo kìn a dzə̀ e la wo dzə̀ wù sùúy e wíri?»

¹³ Nyùy Tàr bìnèr jii, «Dzə̀ bìʼ fo áwune meŋen yéʼéy ye mò‑oò foon aáwune é Ŋwàʼ Nsər, e tèn fó a yu jí yem, a ghan e mǒ mbòv.

¹⁴ Á bèy, áwune nén a jùmrì a dzə̀ liì kisaŋ wo melív mev mè tíy sho. Á sí léʼnin a dzə̀ e mebvə̀m me *Baal mè bàm, mo atàr véví‑iì dànèn áwune.

¹⁵ Mo woo Nyùy Tàr woo Taà Mànjòŋ, woo Nyùy wìr veé Isray nén a suúy jii, ‹Á yuúrí, e yù, m wíy yiír wír vìn e lúylúyí, e fo mendzə́v me ndzəʼ, aáwune nó.

¹⁶ M wíy taʼár áwune é nsay ye wùn aàtàr véví yòʼ‑oò lo yiì kìíy, e tsənsí rə́r aáwuné bàm, e meé mo sí wíy laàr áwune.› »

Jerusalem tóŋ ji á sə́ á áwune

¹⁷ Nyùy Tàr woo Taà Mànjòŋ yoŋ lèn jii, «Á leéy kinyo ke kí kooyì, e jàŋ vikìy ve dzə̀ á dìy kpú, aá wiy. Á ku jàŋ vikìy ve á kiìn mo á yov kpú kijuŋ.»

¹⁸ Wíri ku nèn bìnsí jii, «Áwune ku wìy cér, a dìy, e věr kitu, é mensíy mè wáa səy fo věr si, a dàn fo věr jùv se si.»

¹⁹ Kiléŋléŋ ké toŋ ki wiy fo Sion jii, «Vèr sàʼkìr ne. Vèr sì é nshoórmé ŋkuuŋkùŋ. Vèr kù‑úù fəə́ fo věr nsay, mo á sàʼtìn ne lav sér, sí gbúkír.»

²⁰ M nèn yòŋ jii, «Éè vikìy, vèn yuúrí, e yù jí Nyùy Tàr. Vèn mvəʼti vituʼùr vén ví, e yuùrí kinyo ke wù suuyì. Vèn yéʼéy wón vén vee vikìy mo á diy kpú, é wìr yéʼéy ŋgaà və shùu lav lúŋ kpu.

²¹ Kpúu nə̀ə́ ne ver dzə́ə fó awundu. Yí nə̀ə́ ne e věr ntoʼ si, li wón fó ghaŋ se dzəə, li wónlě nsùm fo mentàrnín.

²² Ke Nyùy Tàr suuy ki dzə̀ á jii, ‹Dzə́n sé wíri sí wíy a neŋnín, a neŋnín e kwaʼ moo jáŋ. Sí wíy a neŋ moo ŋgwàsáŋ wo vé kivi kív, maʼà, a wìr yòʼ báʼti.› »

²³ Nyùy Tàr kfə́n a suúy jii, «Lá ŋgaà kìíy yòʼ a sùmrì wún bìʼ kiíy rə́. Lá ŋgaà vitaàví yòʼ a dzə̀v nsaŋ bìʼ vitaáví və́. Lá ŋgaà bùʼ yòʼ a koʼnín bìʼ bùʼ və.

²⁴ Ghèén é wìr wáa sùmrì wún a dzə̀ ji, wun kìíy ne a mo kijuujùŋ, ji m dzə̀ á Nyùy Tàr wo wù yii shám wíri, tínen kinyo tìítiy, yii vinyo réŋ é kitu ke nsay. Á vinyo ve m yii tíy sho. Suuy mo woo Nyùy Tàr.»

²⁵ Nyùy Tàr kfə́n a suúy jii, «Á yuúrí, e yù, kishiíy kí wíy gheén, é m maʼ ŋgeʼ e wìr dzə̀m wo á sáŋ mbèʼ sə́ ji á náŋsin a dzə̀ wún.

²⁶ Kù dzə̀ jii, wír veé Ejiv, à veé Judàa, à veé Edome, à veé Ammone, à veé Moavi, à wìr dzə̀m wo wù dzə́ e kirə̀ʼ ké woʼ kí, wo á kèŋrìn kitú kfə́ fó mbìy, áwune kù dzə̀ ben, á sàŋ mbèʼ sév, aá náŋsin a dzə̀ wún. Wír veé Israyi wáa dzə adzə̀m feyì, a melív mev mè kù dzə̀ ben là náŋsín.»