Jeremia 8 - ŊWÀʼ NYÙY

¹ «Wíy lòo dzə̀ e ghan fóo fèy, aá fəə́r vighvə́r vé afòn wùn à vé atǎr saʼ veé Judàa fó sày, e fəə́r vé atàá cù, à vé aŋgàa ntum Nyùyi, à vé wìr ve á dzə́ e Jerusaleme adzə̀m. Suuy mo woo Nyùy Tàr.

² Á wíy fəə́r, e sàŋrì, é shùy wùn à ŋwee, à mejiy mè wáa ban sho, mo dzəə̀n vifá ve áwune‑eè rə́si koŋè, fó kitú sho. Áwune‑eè léʼnin e bǎm vifa fèn, shwéŋé, kfə̀n cu. Vighvə́r vin vi kù sí wìy gòʼ là báʼtí, là dzəəmè, a neŋ moo jáŋ bèy.

³ Ké kiber ke wìr veé ŋgwàʼ ye yì kér liì wo bi rə̀n, m wíy jùm, aá du é nsay vitum. A virə́ʼ vidzə̀m fo á wíy a dzə, á wíy a shèŋ a dzə̀ kitú, a suúy jii, yì‑iì bòŋ á ji áwune kpúkír, e shaà ké a dzə atin. Suuy mo woo Nyùy Tàr woo Taà Mànjòŋ.»

Jay wùn à vilaʼày və́ ví

⁴ Nyùy Tàr nèn yòŋ mo, e sùúy ji m yoŋ á e wíri jii: «Wìr yii gbu, wù gòʼ, a neŋ fo nsay à? Wìr yii jáy dzə́ə, la wù yòʼ siìr ŋkfənèr à?

⁵ Yií ka lèn, é bo wír veé Jerusalem vìne bin ndzə̀m e mò bínen ŋkuuŋkùŋ. Áwune kù ghvə́m a dzə̀ mebvə̀m, a dzə̀ kifá kisáŋ, e tèn fó kfən e bàm, e yen mo.

⁶ M bònén ne yuùrí, kinyo kee tìítiy ki yoʼ fəə̀ fo áwuné shuù. A wìr yoʼ kùvsín fo wun yìi kisaŋe. Wìr yòʼ fə̀m sovìr kitú kfə́ ji jay və sà dzə̀ ka á? Wìr kù fuv, du a dzə̀ rə́ə yee dzə́ə, moo nyamŋkoʼ ye yì gvəytin, a nəə́ e mvə̀m rə̀r.

⁷ A fə̀m dzə̀ kilìmbìy ke ŋguùmé, mo kí féŋ e yùv, bo kí kù yii kiiy ghán sə́ sé kfən. A vibìŋ wùn à meghaà mè, à vintùŋàshàʼshàʼ vi kù kiiy sév. Yii bèy, a bó wír vémé yòʼ kiiy vinyo ve mo woo Nyùy Tàr tinen, e fò aáwune ji nsər.

⁸ «A dzə̀ vèn wàa yòŋ ji vèn dzə̀ afií á? A dzə̀ vèn wàa yòŋ ji á kì yéʼéy yee mǒ Ŋwàʼ Nsər a? Kí aŋgàa saŋe bìnèr ne yéʼéy yém e kimboʼtì ki? Á sáŋ vinyo ve á sáŋé, wáy kimboʼtì sho.

⁹ Á wíy dìn kisáŋ ke afiì, aá woómé, á lóo jìʼkìr, é dzə̀rkìtu wáa koo áwune. Mo áwune meŋen ne jí se Nyùy Tàr, bo á kér vifií a dzə̀ viné ví lèn?

¹⁰ Mo kí dzəə̀n ben, m wíy fo vikìy vév e wír ve səné, e fo kwáʼ sév e wír ve á wíy tòn fene, bìʼ fo wìr dzə̀m, à wo terí, à wo kuʼùn, kù sí diy a dzə̀ seʼ ŋgwaákínyé. Aŋgàa ntum Nyùy wùn aàtàá cùu, à wìr dzə̀m lò ne, a shwìv a dzə̀ kinshwìv.

¹¹ Áwune li kileémé ke kí kiʼ wír vém fó tèr. Áwune kù goʼ ji nyaáŋ waà dzə̀, a bó nyaáŋ yòʼ dzə̀.

¹² Áwune‑eè buʼtì viŋkoʼòy ve vinyò woóme à? Àáy, áwune yòʼ‑oò ló a woomé, fə̀m à shishàr sho. Á yòʼ‑oò ló a ker dzə̀rkìtu gheéy. Bìʼ bey, áwune wíy a dzə e ŋgoo wìr ve á wíy laàr. M wíy màʼ ŋgeʼ aáwuné kitu, aá kpú kpuún. Suuy mo woo Nyùy Tàr.

¹³ M wíy ndzəə́y vifá vév veé sum, é la kifá ki yòʼ dzə́ə a dzə e kitiír ké *vayin kìn é kici ké *fig. Fə̀m à vav si, sí wíy soóy. Kifá kidzə̀m ke m foon aáwune kí wíy lày. Suuy mo woo Nyùy Tàr.»

¹⁴ Wíri wíy a kàn ndzə jii, «Vèsən dzə́, yii ka fen? Vèsən báʼtí, a nyeŋ, a dù e ŋkà se laʼ see vikum, e kpù fó. Nyùy Tàr woo Nyùy wòsən shòv ne vèsən, e fò e kpúu. Wù nòór vèsən e mendzə́v mè, a ndzəʼ dzə̀ shó. A kù dzə̀ bìʼ fo vèsən yiìn ne kibí e wun.

¹⁵ Vèsən‑eè shiy nyaáŋ, la mbòŋé yòʼ fəə̀. Vèsən wáa shìy ghán sé kiman, lo wìy ŋgeʼ.»

¹⁶ E ké ru kí, nyám se ŋkoʼ se aŋgàa vibàn vér sí sì, a sí yoysìn fo mbìv Dan. Lúm sév sé nyàm si tóŋé, virə́ʼ ví sə̀ʼsì. Aáwune sí nəə, e fòr nsay yer, e fòr kifá kidzə̀m ke kí dzəə̀n shó. Á sí nəə, e fòr ŋkà se laʼ sér, à wìr dzə̀m wo wù dzə́ fo.

¹⁷ Nyùy Tàr suuy jii, «Vèn leéy, e yèn, m sí tsə́nsi yó si e věn mvəm, é sí térí ven. Dzə̀ abúv, aá yòʼ yú nsə̀ŋ.»

Jeremia rə́r mendzən me wìr və́

¹⁸ Mendzən mem mè dzə̀, a bó yòʼ dzə̀ mè mày, a shilív shém shí yaʼ feyì.

¹⁹ Á ku yù, tóŋ wìr vérí ghamnìn nsay e dzə̀m. Á tóŋ jii, «Nyùy Tàr yòʼ dzə̀ə́ e Sion à? Dzə̀ ji Fòn Sion yòʼ dzə̀ə́ à?» Nyùy Tàr súŋnín jii, «Áwune wáy nyár e mǒ shiliv ji ka? Áwune fèr mebvə̀m, a ghvəm anyùy vitum.»

²⁰ Wíri kú a toŋnín jii, «Ghán sé ŋkav vifa si shaà ne, símóʼ sí kfən wìy, e shaà, a bó Nyùy Tàr yóʼ ne wìy, e sə̀ ver.»

²¹ Mo wír vérí yú nyár kileemé ben, dzə̀ sá mo m yú. M dìy ne bèn, wúné ló, e seèmè mo séemen.

²² Dzə̀ ji kifú kí yòʼ dzə̀ é Gilead à? Aŋgàa shìvi yòʼ dzə̀ fó à? Yií ka fo á fer kileémé ké wìr vém?