Jeremia 7 - ŊWÀʼ NYÙY

Jeremia fó sáʼ Nyùy Tàr é lav cù

¹ Nyùy Tàr‑iì sùŋnín e Jeremia, e sùúy jii,

² «Tiím é shùu kày wo wú du e Nyùy Tǎr lav, a fìʼtì sáʼ yémé fó jii, á yuúrí á ntum Nyùy Tàr. Wìr dzə̀m woó Juda wo wù nəə kay ji wun cu Nyùy Tàr ku waà yuùrí.

³ Nyùy Tàr woo Taà Mànjòŋ, wun woo Nyùy wìr veé Isray suuy jii, ‹Vèn kúvsín liì won, e kùvsín yii yéné, é m yiì màʼtì, é vèn wáa dzə e nsay fèn.

⁴ Lá vèn yòʼ tìír vifií é vinyò ve á rə́si goʼ jii, «Á lav cù Nyùy Tàr, á lav cù Nyùy Tàr, a bó yòʼ dzə̀ kinyo ki sə̀ʼ.» Kee shooy ki dzə̀ kimboʼtì.

⁵ « ‹Ké ru kí, a vèn lòo dzə, e kùvsín liì won, e kùvsín yii yén, e làa yòʼ a loʼ rú afə́r vén,

⁶ e làa yòʼ a nə̀ʼsì viŋgwìy wùn à wón tsə̀ə́, à vikǐy ŋkfəə, e làa yòʼ a yuyrí alànjò é wòŋàn, e làa yòʼ a jùmrì sa anyùy, e lor vitú vén,

⁷ bo m yíi màʼtì ven é nsay fèn, ye mò‑oò foon ne aàtàr véné, e kèʼ fo yàŋgùʼ ji yéev ŋkuuŋkùŋ.

⁸ « ‹Vèn leéy, e yèn mo vèn sí wáy shilív é ntir se kisaŋ si, a yòʼ dzə̀ sí bòyìr ven.

⁹ A dzə̀ vèn wàa shoŋ vishóŋ, a yuyrí wíri, a jàŋ kinjàŋ, a kàn yír Nyùy kisáŋ, a tòn kiláy, a cù *Baal sho, a ghvəm anyùy, a bó vèn yòʼ kì fó fo,

¹⁰ e kfə̀n a wìy e mǒ lav cù, a tiím e mǒ si, a yòŋ jii, «Vèr dzə̀ fen akiŋsìn», kù ji vèn yoŋ bey, e fəə̀, a bùʼtì vinyo, a dù duùn fó mbìy à?

¹¹ A dzə̀ lav yee fo á cu mo kfə̀n ji mbvə̀ʼ yen ashòŋ a? Vèn wáa kiíy jii, mómò kitú kém, m yèn ne. Suuy mo woo Nyùy Tàr.

¹² Vèn du ri e Shilo, wo dzəə̀n kirə́ʼ ké mbìy ki ke mò‑oò shoʼon ji á wáa cù mo fó. Du, é vèn yén kinyo ke mò‑oò yiìn fó, bìʼ liì kisaŋ wìr vém veé Isray.

¹³ Mo woo Nyùy Tàr, m nén a kàʼ ven jii, mo vèn yiìn ne vin vee vinyo, m súŋnín e vèn akàŋ akàŋ, la vèn yòʼ yuùrí, m jáŋ ven, la vèn yòʼ biìmé,

¹⁴ bo kinyo ke mò‑oò yiìn é Shilo ki dzə̀ ke m yíi yiì e lav yee fo á cu mo rə̀n, a dzə̀ fo shilív shén shí tíyí, e kù yiì réŋréŋ bey e nsay ye mò‑oò foon e vèn aàtàr véné rə̀n.

¹⁵ M yíi jùm ven fo mǒ si mo mò‑oò jùmèn afə́r vén adzə̀m vee wír veé Efrayim.›

Wíri táv kitú wùn à Nyùy

¹⁶ «Fo ké ki Jeremia, lá à yòʼ a bùnrì fo wír vìne. Lá à yòʼ a toŋ e mò bìʼ áwune. Lá à yòʼ a lon mo ji m sə́ áwune. M yòʼ yíi yuurí.

¹⁷ Bó à yòʼ yén kinyo ke áwune yii e ŋkà se laʼ seé Juda, kfə̀n yii e dzəə seé Jerusalem à?

¹⁸ Wón véví sív meŋkaʼ, aàtàrí li, ton və́y shó, a vikìy tóv meŋkfəŋ, ton ntuʼ se kiban sho ji sé Yaà woó Yuv. Aá yii bèy, cutì meluʼ, cu anyùy sho, yii, a kilòŋ kí shwiiy mo.

¹⁹ Áwune kwaʼ ji á tínsin a dzə̀ mo a? Áwune kù tínsin a dzə̀ vitú vév, a woómé si yíi a dzə sév. Suuy mo woo Nyùy Tàr.

²⁰ Á bèy, mo woo Nyùy Tàr woo Taà Ndzə nén a yòŋ jii, dòʼshwíiy wom yíi koʼ bìʼ kirə́ʼ kin, é m maʼ ŋgeʼ e wìr msǒŋ kitu, e màʼ e nyám si, e màʼ e vicí vee fó vi, e màʼ e vifá ve ví kúy e nsay foo fèy vi. Dòʼshwíiy wom wíy a shwi moo və́y wo bó yòʼ dzə̀ wú ndzə̀mén.»

²¹ Nyùy Tàr woo Taà Mànjòŋ, woo Nyùy wìr veé Isray nen kfə̀n a màʼ lám jii, «Vèn kú a lì nyám sén sé cù ye tonèné, a tatí lèn sé cù ye seéné shó, a kfər e wún wóné kfərín sidzə̀m.

²² Bó m yòʼ fə̀m‑eè lo lòo fəə́r atàr vén fó nsay Ejiv, e yòŋ ji áwune wáa yiì a cu ye tonèné, kìn ye seeríné.

²³ Mò‑oò yòŋ aáwune a dzə̀ jii, ‹Vèn wáa yunín mo, é m nèn a dzə Nyùy won, é vèn wáa dzə wír vém.› M kfən yòŋ jii, ‹Vèn wáa ghan a dzə̀ e mǒ mbòv, é vinyo vén ví nèn a dù kijuŋ.›

²⁴ Yii bèy, la áwune yòʼ yù, aáwune yòʼ fə̀m‑eè ló a gwàrìr. Á lò, e nèn a jùmrì kinyo a dzə̀ ke vifií vév ví tíy sho, à ke melív mev mè koŋ ki, e nèn lò, a kfən kfənén é bàm, e làa yòʼ a dù duùn fó mbìy.

²⁵ E kèʼ mo atàr véné‑eè fəən fó nsay Ejiv, e wìy shem lán və̀n, m kù rə́si tsə́nsi vé lìm vém vee aŋgàa ntum, aá wiy, yén ven mo kishiíy kí dzəə̀n,

²⁶ a vèn yòʼ yú kinyo kém, a vèn yòʼ fə̀m gwarìrì, kù táv a dzə̀ kitú. Kén kí ku nèn fòy, e shaà ké atàr vén sháan.»

²⁷ Nyùy Tàr suúy bey, e nèn yòŋ e mò jii, «Jeremia, à yíi naàrì kinyo kìn kidzə̀m aáwune, aá yòʼ yíi biimé. À yoŋ wír fo áwuné mvəm, é la wù yòʼ fə̀m ghày.

²⁸ Á bèy, áà nèn yòŋ aáwune jii, ‹Vèn dzə̀ kitúm ke kí yòʼ yúnin Nyùy Tàr woo Nyùy won, a kí yòʼ sə́ ntir. Suuyrú lày ne fo věn mvəm, a kinyo ke ru kí yòʼ dzəə́ fəə́ fo věn shuù.

²⁹ Vèn kóm vitú vén ví, e màʼày nə́ŋ si. Vèn wáa yòv lúŋ kpuu, a dìy e vitu ve agwan. Nyùy Tàr mèŋ ne ven, e màʼày ŋgwàʼ ye yì koʼorin dòʼshwíiy və rə̀n.› »

Liì kisaŋ woó Kiwoóy ké Hinnom

³⁰ Nyùy Tàr kfə́n a suúy jii, «Wír veé Judàa yiì ne kinyo ke bi kí e mǒ si. Áwune tìír ne joonè wóv woo mebvə̀m e lav yee fo á cù mo, fóo bír.

³¹ Á kfə̀n bàʼrì kíy se cù símóʼ sí é Kiwoóy ké Ben Hinnom, aá yoŋ ji sé Tofet, e nèn a tòn wón vév vee vilum wùn à vee vikìyí fó ji cu, a m yòʼ‑oò yiì yòŋ kinyo kee bey, a bó kí yòʼ fə̀m‑eè yiì ne a dzə e mǒ kwàʼtì.

³² Á bèy, ghán símóʼ sí wíy gheén, é la á yòʼ dzə́ə a yòŋ fó ji Tofet, kìn ji Kiwoóy ké wan Hinnom. Á wíy a yòŋ ji Kiwoóy ké Kinjuyrì. Suuy mo woo Nyùy Tàr. Á wíy a yòŋ bèy, bìʼ fo á wíy dzəə̀mè wír ve á yuyrin a dzə̀ fó, e meé mo kirə́ʼ kí wíy dor.

³³ Dzə́n sé wìr veé wòŋàn si kù sí wìy a dzə viyíkìr ve menə̀n, à vé nyàm se kwaʼ vi, a bó kifá ki yòʼ wíy a dzə ké a jivír menə́n mèn wùn à nyám si fo sí wáa yi.

³⁴ M wíy yiì, é la á yòʼ dzəə wìy yù léŋ kisheʼrì, kìn wó vijùŋ, à yòv vijìn é ŋkà se laʼ seé Juda, aá yòʼ wíy yu sa e dzəə seé Jerusalem, bìʼ fo woŋ dzə̀me wíy kfən ji woŋ kinjúme.