Jeremia 52 - ŊWÀʼ NYÙY

Aŋgàa vibàné tón Jerusalem

¹ Vé‑eè kòʼór Tsədekiya ji fon woó Juda, a wù dzə̀ kiyá nshòv mòʼón e mbaà, wù sáʼ é Jerusalem kiyá nshòv mòʼón e ghvə̀m. Yè wov‑iì dzə̀ Hamutal woo wan Jeremia woó Libna.

² Wù‑uù yii vinyo ve ví wáa bir Nyùy Tàr, kù réŋréŋ mo Jehoyiakim‑eè yii.

³ Vinyo vee shooy vi màysì, e ŋàʼár dòʼshwiiy Nyùy Tàr, wù nèn lò, e jùm wír veé Jerusalem wùn à veé Judàa adzə̀m fo wun si, e màʼày e kwaʼ nsàm. Tsədekiya nèn wìy lò, a tav kitú wùn Fòn Nebukadnessar woó Babilon.

⁴ Á bèy, wáa dzə a Tsədekiya sí sáʼ vifon ji kiyá bvə̀ʼə̀, Nebukadnessar wùn à vé rər və́ adzə̀me nèn wìy, e nə̀ə́ Jerusalem e rə́r sí, a yì‑iì dzə̀ é kishiíy kee ghvə̀m fo ŋwee woo ghvə̀m e kiya foo fèy. Áwune‑eè tàm kiláʼáy kév é ghaa Jerusalem, e nèn ràŋ kay, e kaàrí ŋkàlaʼ sho ye yòʼ dzə̀ wìr fəə̀.

⁵ Yì ku nèn gòʼ e raŋèn bey, e dù, e meé e kiya kee nshòv mòʼón e ghvə̀m mo Tsədekiya‑aà saʼan ne vifon.

⁶ Wáa dzə e kishiíy kee bvə̀ʼə̀, e ŋwee woo kweè, e kiya foo fèy, a jìŋ sì é ŋkàlaʼ e távín, a wír vee fóo yòʼ dzəə́ kér kifá kée luʼ e shuù,

⁷ wír vée Babilone nèn tòʼ kay yeé ŋkàlaʼ. Fòn Tsədekiya wùn à vé rər vəə́ nèn woòné vitsə́ʼə́, e fəə̀ fó ŋkàlaʼ dzə́ə fó shùu kày, e nsàn virə̀v vé kày see sibaà, e ghaa kiboo keé ntoʼ, a wír veé Babilone kì ràŋ ne ŋkàlaʼ, e tàr. Áwune tósín, a leʼ, a dù dzə́ə fó kiwoóy ké ndzəv yee Jordan.

⁸ Yii bèy, vé rər veé Babilone nèn jùm Fòn Tsədekiya, e koò é mboʼ yeé Jeriko. Vé rər və́ adzə̀me léʼkír, e tàʼrí mbìv sidzə̀m, e màʼày wun fo.

⁹ Vé‑eè koò wun bèy, e lì, e wìy, e yèn fon woó Babilon sho e Ribla, e nsay Hamat. Wù sáʼ Tsədekiya, e nèn tìnén mo á yii shó.

¹⁰ Fòn woó Babilon‑eè yùyrí wón Tsədekiya e Ribla a wù yéné, e kfə̀n yùyrí sa vé saʼ veé Juda adzə̀m.

¹¹ Wù‑uù fə̀tí sí se Tsədekiya, e nèn tàŋsìn wun aàsháŋé, e bóo lì, a dù sho e Babilon. Á meé fó, wù wáy Tsədekiya e sháŋ, wù lìm sháŋ, e kpù é sháŋ.

Á bvə́ʼə́y lav cù

¹² Wáa dzə e kishiíy kee ghvə̀m, e ŋwee woo tàn, e kiya ke Fòn Nebukadnessar woó Babilon‑eè sí sáʼ ji kiyá nshòv bvə̀ʼə̀ e ghvə̀m, Nebusaradan wo dzəə̀n wun mfòóme anshìy fòn, a kfə̀n dzə̀ ŋgaà ntir fòn, wìy e Jerusalem,

¹³ e tòn lav cù Nyùy Tàr, e tòn ntoʼ wùn à lav se wìr ve kuʼkìn sí. Wù‑uù tàtí, e tònrì lav seé ŋkàlaʼ Jerusalem sidzə̀m.

¹⁴ Vé rər ve vé‑eè dzəə̀n e wun sar adzə̀me nèn kèr kay ye vé‑eè bomen, yí kaárí Jerusalem, e tàr.

¹⁵ Nebusaradan nèn kùúy aghéʼncey ámóʼó wùn à wír ve vé‑eè berin é ŋkàlaʼa, à wír veé Isray ve vé‑eè leʼen rə́r, e wìy, e nə̀ə́ e fòn woó Babilon sar shwin, e kfə̀n lì sa kibér ke wìr ve vé‑eè kiìn lím kiwoo, e dù sho e Babilon ji akookòŋé.

¹⁶ Yii bèy, wù‑uù lèm wír ámóʼó é bàm ve yì‑iì dzəə̀n aghéʼncey, e tsə̀ə́r ji á wáa lìm a súm sé vitiír vé *vayin, e kfə̀n a lìm sé vifa ve yi.

¹⁷ Wír veé Babilone‑eè kètì vitóm vee Nyùy Tǎr lav ve vé‑eè fèrìn e kisha kee *brons ki, e bvə̀ʼtí sa vitiir ve mbìʼ sí, e kfə̀n bvə̀ʼtí màkìghìn wo vé‑eè fèrìn e kisha kee brons ki, e nèn bèʼèy kisha kee brons kìy kidzə̀m, e dù sho e Babilon.

¹⁸ Vé‑eè lì sá kíŋ sí wùn à visoó vi, à kfə́ə vimfar vímóʼ ví ve vé‑eè náŋsin akfə̀ə́ làm sho, à vighín ví, aàláŋé, e lì kifá kidzə̀m kee kisha kee brons ki, ke vé‑eè yii lim sho e lav cù.

¹⁹ Vé‑eè lì sá kifá kidzə̀m ke vé‑eè fèrìn e *kisha ke mbàm ke baar kí, à ke vé‑eè fèrìn e kisha ke bàm ke fəvír kí. Vé‑eè lì vighín wùn à vikáŋ ve vé‑eè li və́y shó vi, e lì amàvìghìn, e lì kíŋ sí, e lì vitiir ve làm, e lì aláŋ, e lì sa akóm ve á yii yii cu melùʼ sho.

²⁰ Kisha kee brons, ke vé‑eè fèrìn vifá veé lav cù sho ki‑iì kùʼ é ŋàŋ ye yòʼ‑oò dzə̀ á yù móo fìʼ. Yì‑iì dzə̀ kisha kee brons keé vitom vee vibaà, à keé màkìghìn wùn à keé wón nàʼ vee nshòv sibaà e ghvə̀m ve vé‑eè fèrìn e kisha kee brons ki, màkìghìn wáa tiy sho, à keé kar se á tiir mbìʼ shó ki. Vifá vìn vidzə̀m vi kù‑uù dzə̀ ve Fòn Solomon‑eè fèrìn ji vee Nyùy Tǎr lav.

²¹ Vida ve vitom vi‑iì dzə̀ kóy e kweè kweè e kimbéʼ ki, a móo kaarí, e tar‑iì dzə̀ kóy e taár, a mvə́m si dzə̀ sirə́ sirə́, a kisər ke kisha ki dzə̀ wón wo akweè.

²² Vé‑eè fèr tán sí é vitu wo, a kù dzə̀ e kisha kee brons ki, a vida vi dzə̀ kóy e mòʼón e ntàm se kiwo si sibaà. Vé‑eè nàŋsín vitú e nsáŋtí woo wo ashàŋ, aá tátí wùn à wo vitùʼtúʼ, e kaàrí sho, e tàr. Á ku kfə̀n yiì sa nsáŋti vitùʼtúʼ e vímóʼ vee vitóm vi bey.

²³ Vitúʼtúʼ ve ví‑iì sə́ŋ aàshàŋ vìn vidzə̀m vi‑iì dzə̀ wií. Ve ví‑iì njéŋtin fo ghaŋ si ví‑iì dzə̀ nshòv ntuùfú e mbvə̀ʼə̀.

Á kuúy wír veé Juda e dù sho e Babilon

²⁴ Nebusaradan woo mfòómé‑eè koò Serayia woo kitú ke atàá cù, e koò sá Tsəfaniya woo taà cù wo wù tóm wun, à wír vee ataár ve á yii tíy e shùu lav cùu.

²⁵ Fo wír ve vé‑eè dzə̀ə́ e ŋkàlaʼa, wù lì kitú ke vé rər ke kí‑iì wám rə́r, e kfə̀n lì sa atǎr ntoʼ saàmbà ve yì‑iì dzəə̀n aŋgàa ntir fòn. Wù kfə̀n‑eè lì ŋgaà saŋ woo wo mfòómé wo wù‑uù fó sáʼ amfòómeé, e kfə̀n lì vé wòŋ ámóʼó sá wír mntuùfú ve vé‑eè dzə̀ə́ e ŋkàlaʼ.

²⁶ Nebusaradan woo mfòómé‑eè lì áwune adzə̀m bèy, e wìy, e fò e Fòn woó Babilon e Ribla.

²⁷ Fòn nèn fò sáʼ, á dzə̀v áwune, e yùyrí e Ribla foo fèy e nsay Hamat. Á mo vé‑eè kuuyin wír veé Juda bèn, e fəə̀ woŋ wóv shó, e dù sho e wòŋ wo səné.

²⁸ Wír veé Juda ve Nebukadnessar‑iì kuuyin, e dù sho, a wù sí sáʼ ji kiyá saàmbàa‑aà dzə̀ wír nshòv sitaár e mbaà aànsə̀kìi ataár (3,023).

²⁹ Wáa dzə a wù sí sáʼ ji kiyá nshòv waamé e ghvə̀m, wù kuúy ámóʼó fó Jerusalem wír nshòv sibaà e mtaár e ghiì waamé (832).

³⁰ Wáa dzə lèn, a wù sí sáʼ ji kiyá nshòv sitaár e mbaà, Nebusaradan wo dzəə̀n taà nshìy nèn kùúy wír veé Juda nshòv sitàn e mkweè e ghiì saàmbà (745). Wír ve vé‑eè kuuyin, e dù sho adzə̀me‑eè dzə̀ wír kishóv ghií ntuùfú aànsə̀kìi akweè (4,600).

³¹ Evil‑Merodak wìy sìíy, e yì vifon veé Babilon, e nèn shàm Fòn Jehoyiacin woó Juda, e fə̀ə́r wun fo sháŋ. Wù‑uù fə̀ə́r, a sì ji kiyá nshòv saàmbà e mtaár mo vé‑eè liìn Jehoyiacin ji wir sháŋ, a yì‑iì dzə̀ é kishiíy kee nshòv sitàn e mbaà e ŋwee woo nshòv sibaà e ghvə̀m e kiya foo fèy.

³² Fòn Evil‑Merodak ku nèn a ker wun kijuŋ, e kòʼór ghay və́, wú kúʼ, e shaà mo wù‑uù foon áàfon ámóʼó ve vé‑eè koon sá, wùn áwune wáa dzə e Babilon ji akookòŋé.

³³ Á bèy, Jehoyiacin shóʼtí ndzə̀y sə́ sé sháŋ, e nèn a dzə e ntoʼ, a yikír wùn fòn ghán sidzə̀m, e dù, e meé mo kpúu‑uù liìn wun.

³⁴ Fòn woó Babilon‑eè lo, wù wàa fo shimbàm e kitu ke kishiíy se Fòn Jehoyiacin wáa ker, a yiì menyòrìn mvə shó. Wù kú a fo bèy ghán sidzə̀m, e dù, e meé mo kpúu‑uù liìn Fòn Jehoyiacin.