Jeremia 50 - ŊWÀʼ NYÙY

Á wíy tòn Babilon

¹ Nyùy Tàr‑iì sùŋnín e Jeremia woo *ŋgaà ntum və, e tiìsí ntum sho kùm woŋ Babilon wùn à ŋkàlaʼ yee fó.

² A yì dzə̀ jii: Á ghán á e vitúm ví mvəm, e fìʼtì sáʼka woo kùm Babilon. Á kóʼór á cícíwàr, é wú wáa naàrì kinyo kìn. Lá á yòʼ sə̀r a sáʼka və̀n, á kú a fìʼtì a ji á tòn ne a Babilon. Á shòór ne a Bel woo nyùy wov, wun woo Merodak wáa yàʼ. Á shòór ne a vibámmbó vév, mebvə̀m mev mè wáa yàʼ.

³ Kitúm ki wìy ne fo mbìv yee kuy, kí wìy ne, e taàmé Babilon. Dzə̀ kitúm ke kí yíi laàr fó. Wíri wíy tumnín fo fo, e leʼkír, à nyám si shó, a bó kifá ki yòʼ kfə̀n wíy a kùm fo.

Wír veé Israyi wíy kfən aáwuné nsay

⁴ Nyùy Tàr suuy jii: «Wíy lòo dzə e ghan fóo fèy, é wír veé Isray wùn à veé Judàa tátí, e wìy, a tàʼ mo woo Nyùy Tàr woo Nyùy wov, e kù a tàʼ mo e mensíy mè si.

⁵ Áwune wíy dzər dzə́ə ye yì du e Sion, dzə́rí, aá nèn bìnkìr, e kìʼ a dzə̀ fó. Á wíy a yòŋ ji á ku dù, e tàtí a Nyùy Tàr, e yì kilìʼ ji á kù wíy a tiy e wun mbòv, e dù, e mày, aá yòʼ dzəə́ wìy làysìn a kilìʼ kee shooy.

⁶ «Rúrú, wír vémé‑eè dzə̀ moo njiì wo wù‑uù làyìn é kwaʼ, anshìy véví tsəə̀né ne áwune, á jáy dzə́ə. Á yiì ne, njiì wáa ghan, a jan aàgwan. Áwune ghán aàgwan, lo fo və̀n, túmsin e və̀sə, aá méŋ ne fo kibìn kév kí dzəə̀n.

⁷ Wìr bvə́y sho, wù nèn a laàr laàrìn. Aŋgàa vibàn véví yoŋ jii, ‹Bó vèr yoʼ jày kinyo, bùʼtì áwune vinyo e Nyùy Tàr, wo wù kér áwune. Dzə̀ Nyùy Tàr wo atàr véví‑iì yoy, tiir e wùn wó.›

⁸ «Ven veé Isray, vèn wáa leʼ, a fəə fo wír veé Babiloné mvəm, vèn fəə́ fo áwuné nsay. Vèn wáa dzə wír mbìyi vée fəə fo fo.

⁹ M wíy baʼtí mànjòŋ fo vitum ve tavkín veé mbìv yee kuy, é wù wiy, e taàmé Babilon. Á wíy sìysì wún é virə̌ʼ virə̀ʼ, e nəə́, e tòn fó e rə́r sí. Áwune dzə̀ anjàn kintee, a mvən yéví yòʼ yii shaa fo ghaŋ.

¹⁰ Á wíy kuúy vifá fo Babilon, a wìr wíy a lì və́ ve ví gheenen wun. Suuy mo woo Nyùy Tàr.»

Á wíy bvəʼə́y Babilon

¹¹ Nyùy Tàr wáa yòŋ jii: «Ven veé Babilon, vèn shéʼri, yú vijuŋ e ŋàŋén, ven vin, ve vèn nəən wír ve m shoʼon ji vém, e kùúy vifá vév. Vèn líynin mo kifum ke wàn nyàm ki nyèŋ sáŋ. Tóŋ, a virə́ʼ ví səʼsì, mo tóŋ nyám se ŋkoʼ.

¹² Á bèy, aá wíy shoór woŋ wón é dzəə ye bi féyì. Woŋ wo dzəə̀n ji yè woné wíy a woomé. Fóo lo, e kfən ji kitúm ke terí kí e vitúm ví mvəm, e dù ji woŋ kinjúme, e dù ji wóʼ.

¹³ Wìr yòʼ wíy a dzə e ŋkàlaʼ Babilon bìʼ dòʼshwiiy Nyùy Tàr. Fóo wíy dù e vifə̀m ŋkuuŋkùŋ. Wìr dzə̀m wo wù wíy a shaà fo wíy a ker gháʼ, a shèŋ kitú bìʼ dzə́ə ye á lovtin e fóo.»

¹⁴ Nyùy Tàr nén a yòŋ lèn jii, «Ven vé kintee, vèn siysi wúné, e tìím, e kaàrí ŋkàlaʼ Babilon, e tàr. Vèn maʼ Babilon, lá wìr yòʼ bàvtí mvən rə́, áwune jày ne e mò woo Nyùy Tàr.

¹⁵ Á tóŋ sóŋ rərí, e kaàrí fó, e tàr. Á leéy, e yèn, Babilon fò ne shiŋkfəŋ. Á bvə̀ʼə́y ne virə́ʼ vév ve tavkín ví, e bvə̀ʼə́y bèy, e kètì kay yee fó. Dzə̀ ŋkfə́tír mo Nyùy Tàr siirì. Á maʼ á ŋgeʼ e Babilon kitu, e kù lòvtí sho mo áwune‑eè lovtin aámóʼó.

¹⁶ Lá á yòʼ biìmé, é wìr woó Babilon wáy kifá e nsay, a yen fó biimé, é wù káv ke kavín kí. Viŋgwìy ve ví dzəə̀n fó vi kù wíy a leʼ, a dù, a yen wír vév. Áwune kù wíy a kfən a dzə̀ aáwuné nsay, a dzə̀ bìʼ aŋgàa vibàn ve á nəən ne Babilon e rə́r sí.»

Wír veé Israyi wíy kfən aáwuné nsay

¹⁷ Nyùy Tàr suuy jii: «Wír veé Israyi dzə̀ moo njiì wo abvərə̀ʼə́ jùmèn, wù táʼrí. Wìr mbìy wóo kèʼ, a laàr áwune‑eè dzə̀ fon woó Assiriya. Fòn Nebukadnessar woó Babilon nèn màysì, e bvə̀ʼə́y.

¹⁸ Bìʼ bey, m nén a yòŋ jii, ‹M wíy màʼ ŋgeʼ e fòn woó Babilon kitu, e màʼ sa e woŋ vəə́, kù mo mò‑oò màʼàn e fòn woó Assiriya kitu.› Kù yoŋ mo woo Nyùy wìr veé Isray, mo woo Nyùy Tàr woo Taà Mànjòŋ.

¹⁹ Yii bèy, ké Isray, m wíy siìr áwune aáwuné nsay, aá wáa dzə fo, a yi vifá ve yi ve á káv fo Gwan Karmel, a yi ve á káv fo Bashan, a yi sa veé wòŋ agwan veé Efrayim, a yi veé Gilead, e kù a yi bèy, e meé mo buù wov‑íì kpú.

²⁰ Wíy lòo dzə e ghan fóo fèy, aá wáa tàʼ ŋgaà vinyò ve bi ví fo wír veé Israyí mvəm, é la wù yòʼ a dzə, a tàʼ wir liì kisaŋ fo Juda, é la wù yòʼ a dzə, bìʼ fo m wíy làysìn ajay wìr ve mò‑oò bavtin dzəʼə̀m yév, á bér. Suuy mo woo Nyùy Tàr.»

Ŋgeʼlàʼ Babilon

²¹ Nyùy Tàr yoŋ jii: «Á ŋáʼáy, e taàmé wír veé Meratayim. Á ku taàmé a wír ve á dzə́ e nsay Pekod. Á ku laàr áwune, e sə̀ʼsí vifá ve á yaʼayin vidzə̀m. Á ku yiì vinyo vidzə̀m ve m yòŋèn ji á yii aáwune. Suuy mo woo Nyùy Tàr.

²² Á yú á mo léŋ rərí sí kóʼ fo wòŋ foo fèy, ŋgeʼ ye tavín nə̀ə́ ne fo.

²³ Á leéy, e yèn, mo á bvəʼtin ne Babilon, woŋ wo yì‑ii dzəə̀n ji ŋgòʼ, a dzə̀ áwune ve vé‑eè laar vitúm veé kitu ke nsay. Lèn və̀n, vitúm vi leey mo fóo siìn é vifə̀m, a wúné beéme áwune.

²⁴ Jwè Babilon, vèn‑eè tsə́y kóy vèsən, á bèy, m kóʼór kitám kén, e koò ven, vèn wáa kiíy, aá lí ne sho.»

²⁵ Nyùy Tàr woo Taà Ndzə, wun woo Taà Mànjòŋ, wù kér kinyo ke wù taʼ yiì e wòŋ Babilon. Dòʼshwíiy və kòʼ ne, wù mvə́ʼ kitáv ké vifa ve rər, e fə̀ə́r vifá və́ vé rər fó fo.

²⁶ Wù yoŋ jii, á ku taàmé Babilon mbìv sidzə̀m. Á bvə́ʼ á vitáv vév vé vifa ve yi. Á bvə́ʼə́y á fó, e fùm é vikfər vikfər, mo á fùm vifá ve yi bèy. Á laar á fó ŋkuuŋkùŋ, é la kifá ki yòʼ bèr.

²⁷ Á ku yùy vé rər vév adzə̀m. Á ku lì áwune, e dù, e yùyrí moo wón nyàm ve á du, e see. Lòné koò ne wír veé Babilon, ghán sév sí ghèén ne. Sì ghán se a dzə̀ ŋgeʼ si kù nə̀ə́ áwune.

²⁸ Á yuúrí, e yù mo wír ve vé‑eè koon, e dù sho e Babilone léʼ, wiyì. Á wiy, fiʼtì e Sion mo Nyùy Tàr woo Nyùy wov màʼàn ne ŋgeʼ e Babilon, e siìr ŋkfə́tir lav rə cù ye á bvəʼəyin.

²⁹ Á kum vé kintee, aá wiy, e taàmé ŋkàlaʼ Babilon. Á bí wir dzə̀m wo wù yii maʼ mvən, aá wiy, e tàm táv sév, e kaàrí Babilon sho, á ku kaàrí, e tàr, a yen a fo wìr léʼ. Á ku laàmé Babilon mo yii rəə́ dzəə̀n, e lòvtí aáwune, kù mo áwune‑eè lóvti aámóʼó. Áwune guynìn, ŋwáy Nyùy Tàr, wun wo dzəə̀n Ŋgaà wo Ranén woó Isray.

³⁰ Bìʼ bey, wíy lòo dzə e kishiíy fóo fèy, aá laar wónlě nsùm vév é dzəə seé ŋkàlaʼ. Á wíy yuyrí vé rər vév adzə̀m. Suuy Nyùy Tàr.

³¹ «Wír veé Babilon, vèn kóʼor wún é ŋàŋ, a m mèŋ ne ven, ghán sí ghèén ne. Sì ghán se m lo, e màʼ ŋgeʼ e věn kitu. Suuy mo woo Nyùy Tàr woo Taà Ndzə, mo woo Taà Mànjòŋ.

³² Ven vé kiŋkoʼòrwùné, vèn yíi a bàyrìn, a gbùkìr, é la wìr wóo nàn yòʼ a dzə. M yíi bàʼrì və́y e věn ŋkà se laʼ, é wú sə́ʼsí kifá kidzə̀m ke kí dzəə̀n fó.»

³³ Nyùy Tàr woo Taà Mànjòŋ kú a suúy jii: «Wír veé Israyi dzə̀ é nə̀ʼsì, a kù dzə̀ sá mo veé Judàa dzəə̀n bey. Aŋgàa vibàn ve á koon áwuneé shiy feyì, aá tèn ne ji bó yòʼ dzə̀ á màʼtì áwune fó kiwo, ji á fəə́.

³⁴ Yii bèy, Mfə̀ə́r wov dzə̀ e távín. Yír rəə́ dzə̀ Nyùy Tàr woo Taà Mànjòŋ. Wù kù yíi bìn nsaʼ yev, e yiì, é woŋ wóví wáa neŋ ji dèʼ, là fan. Ké wír veé Babilon, é wù maʼ a dzə̀ ŋgeʼ aáwuné kitu.»

³⁵ Nyùy Tàr yoŋ jii: «Rə́r sí wíy nəə́ e wòŋ Babilon, e laàr wír ve á dzə́ fo, e laàr vé saʼ vee fó, aàŋgàa ntir véví shó.

³⁶ Rə́r sí wíy laàr vé fù vee fó, é kí din kiyúŋ kév. Sí wíy nəə́ vé rər vee fó, aáwune wáa fàn, a yàʼ.

³⁷ Rə́r sí wíy bvəʼə́y nyám sév sé ŋkoʼ wùn à *viténtén vé rər ví. Sí wíy nəə́ vé rər ve á dzəə̀n aáwuné mvəm, aá wíykír fó vitum, aáwune wáa yàʼ moo vikìy. Sí wíy nəə́, e kuúy bùʼ wov e dzə̀m, e dù sho.

³⁸ Kifír kí wíy tavkír, é ndzə́v see fó si yúmkír. Wír veé Babilone fèr ne mebvə̀m, e lèm woŋ e dzə̀m, a mè beéme beèmén. Mebvə̀m mèn mè yiì ne, áwune dú é viyuŋ.

³⁹ «Á bèy, ŋkàlaʼ Babilon sí yiì dù e vifə̀m, a dzə kirə́ʼ kee fo nyám seé woʼ wùn aàkuúraá tárí, e kfə̀n a dzə kirə́ʼ kee fo vighvəŋ vi dzə́. Bó wìr yòʼ dzəə́ wìy a dzə fo, a bó wìr yòʼ wíy a kùm fo, kù bey, mo ŋgwàʼ si wíy a koʼ.

⁴⁰ M wíy lovtí e ŋkàlaʼ Babilon, réŋréŋ mo mò‑oò lovtin e Sodom wùn Gomorra, e lòvtí e ntèʼ see áwuné ghaŋ si. Bó wìr yòʼ kfə̀n wíy a kùm fo fə̀m e mòʼón feyì, a bó yòʼ dzə̀ wìr wàa dù ji wun du, a dzə fo. Suuy mo woo Nyùy Tàr.

⁴¹ «Á leéy, e yèn, mànjòŋ wiy fo wòŋ kùyi. Kitúm ke wiy kí wùn aàfon aníne bàʼtí ne rə́r, a mèʼèm, a wìy fo ndzəywoŋ.

⁴² Áwune wiy, kér vinte wùn à nyùy sév sé rər sí. Áwune dzə̀ vé bvə̀m ŋgeʼe, aá yòʼ rə́r mendzən me wìr. Áwune kòʼ ne nyám se ŋkoʼ, a wìy, a yòr moo rìbà ndzə̀v. Éè Babilon, wò woo ŋgònjuù, á lì ne ghán, e bàʼtí rə́r, a taamé wò.

⁴³ Fòn woó Babilon yú sáʼka woo kùm wír vìn, kóy sə́ sí tiíné. Shilív shí wáa buʼ wun, wù wáa yu nyár moo wiíy wo wù lúmé.

⁴⁴ «Á yuúrí, e yù, m wíy sàsìn e bvəy, e taʼár wír veé Babilon, aá sám fo áwuné nsay, kù moo bvərə̀ʼ wo wù fəən fó kòv woó Jordan, e dù, e tàʼár njiì fo jiy. M yii bèy, é m nèn shòʼ wír wo kòŋèn mo, e lèm ji kilìmbìy kév. Wìr woo moo mo dzə̀ la? Wìr wo a dzə̀ vèr wun tàm dzə̀ la? Kilìmbìy ke a dzə̀ kí kàr kinyo kém kí dzə̀ la?»

⁴⁵ Á ku yuùrí nsìysì wo Nyùy Tàr kér kùm Babilon, à vinyo ve wù táŋ kùm wír ve á dzə́ e nsay Babilon vi. Wù kù wíy sə̀ŋ wón vév ve ŋeeríné, e fəə sho, é wìr dzə̀m woo fó wáa fàn, a yàʼ.

⁴⁶ Á wíy tòn ŋkàlaʼ Babilon, é kiléŋléŋ kí səʼsi nsay e dzə̀m. Ŋkěŋ toŋe wíy koʼ fo fo, é vitúm vi yúʼnín.