Jeremia 5 - ŊWÀʼ NYÙY

Jay Jerusalem

¹ Nyùy Tàr suuy jii: «Vèn ghánén é dzəə seé Jerusalem, e bùʼrì virə́ʼ ví, e lèéy o. Vèn tar mentàrnín mvə mè, e tàr ji á sà‑áà yén wír, fə̀m e mòʼón, wír wo wù yii réŋ, kfə̀n kér suuyrú á. Yéné, é m fiʼ làysìn ajay wìr veé Jerusalem.

² Yii bèy, mo áwune fə̀m dzə́, kan yír Nyùy, yoŋ ji Nyùy Tàr dzə̀ shó e tin, á kan kisáŋ.»

³ Rúrú, Nyùy Tàr, à taʼ a dzə̀ ŋgaà suuyrú. Wò‑oò shwìvír áwune, la á yòʼ fə̀m gwàrìr. À wáa tàʼ e səʼsí áwune ŋkuuŋkùŋ, la áwune yòʼ yèʼéy kinyo fo fo. Áwune kù táv a dzə̀ kitú, tén fó kuvsín.

⁴ M leéy bey, e yèn ji vine dzə̀ á ambúʼ, aá yòʼ kér vifií. Áwune yòʼ kì vinyo ve Nyùy Tàr taʼ ji á wáa yiì, aá yòʼ kì nsər se Nyùy wov.

⁵ M nen yèn jii, mo‑óò du, e yèn a dzə̀ vilìmbìy vév, e sùŋnín aáwune. A dzə̀ áwune kù kìíy vinyo ve Nyùy Tàr taʼà. A dzə̀ áwune kù kìíy nsər se Nyùy wov. Yii bèy, m dù, e yèn, aá tátí ne adzə̀m, e mèŋ sáʼ Nyùy Tàr. Á tèn ne fó a neŋ e wun sar.

⁶ Á bèy, bvərə̀ʼ yíi fəə fo kòv, e koo áwune, é koosàʼ wiy fó woʼ, e sàʼ áwune. Baá yíi a neŋ aáwuné ghaa ŋkà se laʼ, a shweʼ virə́ʼ. Wù yíi sàtì wír wo wù bàŋrìn, e fəə̀ fó fo, e vinsàr vinsàr. A dzə̀ bìʼ fo ajay véví kùʼùn ne e ŋàŋ. Áwune bìn ne ndzə̀m e Nyùy, e tònén.

⁷ Nyùy Tàr suuy jii: «A dzə̀ m làysìn ajay vén é le? Wón véné màʼtì ne mo. Á sí kan a dzə̀ anyùy kisaŋe. M yìír áwune, á kúr, e kù cì kwán a dzə̀ é kinjàŋ, du, dzə́ a dzə̀ wùn aàsàkìi.

⁸ Áwune sì moo nyám se ŋkoʼ se sí yikin kijuŋ, a ker shií ji sí koó see vikìy, a wìr kér shií ji wun ku lì wiiy fər və.

⁹ A dzə̀ la m yòʼ màʼ ŋgeʼ aáwuné kitu bìʼ vinyo vìn à? Suuy mo woo Nyùy Tàr. A dzə̀ la m yòʼ siìr ŋkfə́tír e kfə́ə kitum kee ben ki a?

¹⁰ «Á ku nə̀ə́ e mǒ súm vitiír vé vayin fèn, e bìvír, yii bèy, e làa yòʼ laàr vitiír láarin ŋkuuŋkùŋ. Á kù yíi kàŋ tám si fó fo, bìʼ fo tám sìn si yòʼ dzəə̀n sé Nyùy Tàr.

¹¹ Rám Isray wùn à yé Judàa dzə́ bèn, aáwune mèŋ ne mo ŋkuuŋkùŋ. Suuy mo woo Nyùy Tàr.

¹² «Áwune bòʼtí ne kimboʼtì e mò woo Nyùy Tǎr bàm. Á yoŋ jii, ‹Yòʼ dzə̀ Nyùy Tàr yiì kinyo e vèr, yòʼ dzə̀ kinyo ke bi kí kòóy ver, a bó yòʼ dzə̀ rə́r sí nə̀ə́ ver, kìn jíŋ.

¹³ Aŋgàa ntum Nyùyi kù dzə̀ shwér, ntum ye á tiísi, yòʼ dzə̀ ntum Nyùy. Kinyo ke á tiísi ki ku bìnkìr, e gbù a dzə̀ aáwuné kitu.› »

Ntò se ŋgeʼ ye Nyùy Tàr wíy màʼ e Isray

¹⁴ Nyùy Tàr, wun woo Taà Mànjòŋ nén a yòŋ jii: «Jeremia, mo wír vìne suuy kin, bo mo‑óò yii, é jí sém sí wáa dzə moo və́y e wò shuù, aáwune wáa dzə meŋkaʼ me və́yí yíi laàr.

¹⁵ Isray, fo ké ki, m wíy yiì, é kitúm kee kwaʼda ki wiy, e nə̀ə́ ven e rə́r sí. Suuy mo woo Nyùy Tàr. Kitúm kìn ki dzə̀ kindzə̀n ke kitum, a dzə̀ kintav ke kitum. Kitúm, a vèn yòʼ kì lám wóv, a bó yòʼ dzə̀ vèn yù kinyo ke á suuyì.

¹⁶ Vé rər vəə́ dzə̀ viŋgum viŋgum, a ŋkòʼ yev mvə̀n tsə́nsi wíri tsə́nsín é sày.

¹⁷ Áwune wíy laàr vifá vén, e laàr viyíkìr fo kwaʼ. Áwune wíy laàr wón vén vee vilum, à vee vikìyí. Áwune wíy laàr ŋgoo sén sé bvəy, à sé nàʼ si. Áwune wíy laàr vitiír vén vé *vayin, à vicí vé *fig vi. Vé rərí wíy kètì ŋkà se laʼ sén see vikum, se vèn tiirin vifií shó.»

¹⁸ Nyùy Tàr kfə́n a suúy jii, «Fə̀m é vishiíy fóo fèy, bó m yòʼ wíy laàr wír vém ŋkuuŋkùŋ.

¹⁹ Jeremia, áwune wíy lóo dzər jii, Nyùy Tàr woo Nyùy wov sà yiì vin vee vinyo aáwune ben ji ka á, à yòŋ ji dzə̀ á bìʼ fo áwune‑eè meŋen mo aáwuné nsay, a ghvəm a dzə̀ á anyùy vitum. Kí nen yiì, aáwune sí yiì a dzə, a dzə̀ é nsay vitum, a rèŋ vikwàn fó.»

Nyùy tír wír və́

²⁰ Nyùy Tàr kfən sùúy jii, á ku sàmèr a sáʼ e rám Jakovi e dzə̀m, e fìʼtì e wír veé mbìv Judàa ji wun suuy a jii,

²¹ «Vèn yuúrí, ven vee viyúŋ, ven vee vinjìŋ ve wíri. Vèn kér sí, a bó vèn yòʼ yén virə́ʼ. Vèn kér vituʼùr, a bó vèn yòʼ yú vinyo.

²² Vèn yòʼ fan mo a? Suuy mo woo Nyùy Tàr. Vèn yòʼ leey mo, a wún wóné beéme à? Kí m neèr síy ji kikiŋ ke rìbà ndzə̀v, kikiŋ feyì, a bó yòʼ dzə̀ ndzə́ví tòʼ. A ndzə́ví fə̀m líynin moó le, bo bó yòʼ dzə̀ yí lìysín. A yí fə̀m wiy, yor moó le, la yí yòʼ lìy, e yàʼáy.

²³ Yii bèy, wír vìne dzə̀ antavkìtu, aá tén sáʼ yém. Áwune bàr ne dzə́ə, e nyèŋ mo.

²⁴ Áwune yòʼ lo, á yòŋ e vitú vév ví jii, ‹Vèsən wáa fàn Nyùy Tàr woo Nyùy wòsən. Nyùy, wo wù fó wuú é ghan see shó, fó yé kiŋgway, fó yé vishevtì. Wun wo wù yii, aá káv vifá e ghan see shó.›

²⁵ Vinyo vév ve bi ví tèʼtín ne vinyo vìn fo áwune, ajay véví sə́tí vijuŋ vìn, fo áwune wáa yu.

²⁶ «Wír kisaŋe sì e wír vémé mvəm, aá laay moo wír ve á koó menə́n. Á kóʼor kév vitám, koó a dzə̀ wíri.

²⁷ Mo menə́n mè rùn é ŋkém, dzə̀ mo vifá ve kiŋkùvrì vi runen lav sév, áwune nén a ker mbàm, e kùʼkìr.

²⁸ Áwune fàŋkìr ne, a beʼ virə́ʼ. Yii yév kisaŋe tònén ne. Áwune yòʼ bin nsaʼ wàn tsə̀, fó sho, a bó á yòʼ kiŋsìn gháy ŋgaà kitàn.

²⁹ A dzə̀ rú la m yòʼ màʼ ŋgeʼ aáwuné kitu bìʼ vinyo vìn à? A dzə̀ la m yòʼ siìr ŋkfə́tír e kfə́ə kitum kee ben ki a? Suuy mo woo Nyùy Tàr.

³⁰ «Kinyo ke tavín kí kòóy ne e wòŋàn, a kí beéme feyì.

³¹ Aŋgàa ntume sí tiísi a dzə̀ ntum kimboʼtì, aàtàá cùu fó sáʼ a dzə̀ ye yí gheen áwune. Wír vémé nén a kòŋ a dzə̀ kee shoon. Bo kimaysì kév kí wíy a dzə ka?»