Jeremia 49 - ŊWÀʼ NYÙY

Nyùy Tàr wíy saʼ Ammon

¹ Ntum yee kùm wír veé Ammon rə̀ne. Nyùy Tàr suuy jii: «Dzə̀ ji bó Isray yòʼ kér wón vee vilum à? Dzə̀ ji wù yòʼ kér njìlaʼ à? Nyùy woo *Molek yóv nsay rám Gad bìʼ ka? Wír ve á cu Moleki‑iì wìy, a dzə fo bìʼ ka?

² Á bèy, ghán símóʼ sí wíy gheén, é m yii, é wír veé Rabbàa yú mo léŋ rərí wiyì. Rabba, wo dzəə̀n ŋkàlaʼ wìr veé Ammon, fo sáʼa lo. Suuy mo woo Nyùy Tàr. Fóo wíy dù e vifə̀m, a fum e vikfər. Á wíy tòn ntèʼ se sí kaarin fó e və́yí. Isray wíy kfən e bàm fó, e sə nsay yev ye vé‑eè faàsìn fo áwune. Suuy mo woo Nyùy Tàr.

³ «Éè Heshbon, vèn wáa dìy. Á laàr ne Ay. Éè vikìy veé Rabba, vèn wáa toŋnín. Vèn maʼ vinsàʼ ve ndzə̀y ví, a dìy. Vèn wáa dìy, a yaŋyáŋ e mvə̀m kày yeé ŋkàlaʼ, a dù mbìy, a kfən e bàm. Á wíy lì nyùy won woo Molek, e dù sho, e koo sa atàá cù və́ wùn à ŋgàŋ sə́ sí, e dù sho.

⁴ Éè làykìsáŋ ŋgònjuù yee Ammon, vèn dzəv nsaŋ bìʼ mboʼ sén sé sum ji ka? Dzəv bèy, bínsi mo sí borin é ŋàŋ. Vèn tìír ne vifií e věn bùʼ, a yòŋ jii, ‹A dzə̀ taàmé la ver?›

⁵ Vèn wáa kiíy ji m wíy yiì, é vitúm vee věn ghaŋ vidzə̀m vi wáy kindzə́m e věn meliv. Wìr wíy tumnín, a leʼ a dzə̀ e kitú kfə́ kí, e làa yòʼ a leéy wùmòʼ. Wíri wíy taʼrí, é la wìr wóo baʼtí áwune yòʼ a dzə. Suuy mo woo Nyùy Tàr woo Taà Ndzə, mo woo Taà Mànjòŋ.

⁶ Yii bèy, ghán sí wíy gheenè, é m siir vijuŋ ve wìr veé Ammon aáwune. Suuy mo woo Nyùy Tàr.»

Nyùy Tàr wíy saʼ Edom

⁷ Ntum yee kùm Edom rə̀ne. Nyùy Tàr woo Taà Mànjòŋ suuy jii: «Dzə̀ ji bó kiíyi yòʼ dzə̀ə́ e Teman à? Dzə̀ ji vév vé ntiri yòʼ dzəə́ kiiy móo tir wír à? Dzə̀ ji akiíyí mày ne fo áwuné mvəm a?

⁸ Éè wìr veé Dedan, vèn binkir cér, e nyèŋ, e dù, e làáy e mbvə̀ʼ si. M sí yìi laàr rám Esav. Sì ghán se a dzə̀ m màʼ ŋgeʼ aáwuné kitu.

⁹ Wíri yii nəə e sum ji á káv vifá, la á yòʼ kù kàv, e màʼtì viŋkwir à? Aàshóŋé nə̀ə́ wír vitsə́ʼə́, kí bo á kù yíi lì a dzə̀ vifá ve á kér shií shó?

¹⁰ Yii bèy, a m wíy sòr kém nsay rám Esav sórin ŋkuuŋkùŋ. M wíy yiì, é virə́ʼ vév vé kilìr vi kfə́n tèéter, é la áwune yòʼ dzə́ə a ker fó lìr. M wíy tatí wùn à wón véví, aàfə́r véví, à wír vee áwuné ghaŋe, e laàr laàrìn ŋkuuŋkùŋ.

¹¹ A dzə̀ ké wón tsə̀, á màʼtì, m wíy a kìŋsìn áwune. A dzə̀ sá vikǐy ŋkfəə wàa yòy, a tiír e mǒ wùn.»

¹² Nyùy Tàr suuy jii, «A wun sà yiì, wír ve yòʼ kì dzə̀ á nò bàr ŋgeʼe nó, áwune vee rám Esavi wàa kwàʼ kév ji á yíi bòy fo ŋgeʼ a? Bó yòʼ dzə̀ áwune bòy á fo ŋgeʼ. Áwune kù‑úù nó á bàr və̀n.»

¹³ Wun woo Nyùy Tàr sùúy a ne, suuy bèy, kan a yír rə́. Ŋkàlaʼ Bosra kù wíy dù a ji vifə̀m ve wíri wáa leéy, é wúné wáa beemé, aá wáa jàʼ jàʼàn, a lì yír yee Bosra ji liy, é ntèʼ see fó si du sá e vifə̀m ŋkuuŋkùŋ.

¹⁴ Mo woo Jeremia, m yù ne ntum Nyùy Tàr, a wù túm nshìylav rə e vitúm ví mvəm, a yì fúŋ jii, «Vèn báʼtí, e ŋàʼáy, aá du, e màʼ Edom e rə́r sí.»

¹⁵ Nyùy Tàr nén a suúy e Edom jii, «Vèn yuúrí, e yù, m wíy sèn ven, é kitúm kén kí wáa dzə ji shintèʼ e vitúm ví mvəm. Á wíy a kay ven káyín.

¹⁶ Kiŋkoʼòrwùn kén kí bòʼtí ne ven, ven ve á sévti ji wìr dzə̀m kù sí fan a ven fánen. Ven ve á dzə́ e mvə̀m vilála, ven ve á dzə́ e ntoò gwan. Mo vèn fə̀m bàʼrìn láʼ yén é taa yuv moo lùŋ, m kù wíy ker ven fó fo, é vèn sə́y é nsay. Suuy mo woo Nyùy Tàr.

¹⁷ «Edom wíy dù e vifə̀m, a beemé. Wìr dzə̀m wo wù shaa fo wíy a fàn, a ker gháʼ, a shèŋ kitú, a dzə̀ bìʼ kinyo ke ghaʼán ke kí kooyin fó, á yén.

¹⁸ Kinyo ke kí wíy koóy Edom ki kù dzə̀ ke kí‑iì kooyin Sodom wùn Gomorra, à ntèʼ se sí dzəə̀n aáwuné ghaŋ si. Bó wìr yòʼ wíy a kùm fo, fə̀m e mòʼón feyì, a bó yòʼ dzə̀ wìr wàa dù ji wun du, a dzə fo. Suuy mo woo Nyùy Tàr.

¹⁹ Á yuúrí, e yù, m wíy sàsìn, e bvəy, e taʼár wír veé Edom, kù moo bvərə̀ʼ wo wù fəən fó kòv woó Jordan, e dù, e taʼár njiì fo jiy, aá sám fo áwuné nsay. M yii bèy, é m nèn shòʼ wír wo kòŋèn mo, e lèm ji kilìmbìy kév. Wìr woo moo mo dzə̀ la? Wìr wo a dzə̀ vèr wun tàm dzə̀ la? Kilìmbìy ke a dzə̀ kí kàr kinyo kém kí dzə̀ la?»

²⁰ Á yuúrí á nsìysì wo Nyùy Tàr kér kùm Edom, à vinyo ve wù táŋ kùm wír ve á dzə́ e Teman vi. Wù yíi sə̀ŋ áwune, fə̀m à wón ve ŋeeríné, e fəə sho, é wìr dzə̀m woo fó wáa fàn, a yàʼ.

²¹ Edom wíy gbù, é kiléŋléŋ kí səʼsi nsay e dzə̀m. Tóŋe wíy koʼ fo fo, aá yú, e mèé e Rìbà Ndzə̀v wo Baar.

²² Á ku lèéy, e yèn, ŋgaà vibàn wíy sàsìn e bvəy fo taa moo lùŋ wo wiy, e sàŋrì vav, a səy ji wun gwév Bosra. Melív me vé rər veé Edom mè wíy a buʼ e kishiíy fóo fèy, moo shilív shé wiíy wo wù lúmé bèy.

Nyùy Tàr wíy saʼ Damaskus

²³ Ntum yee kùm Damaskus rə̀ne. Nyùy Tàr suuy jii: «Wír veé Hamat wùn à veé Arpadi yù ne sáʼka wo bi və̀n. Á yù ne, kí jívír áwune, melív mev mè wáa buʼ, áwune wáa shwir moo rìbà ndzə̀v wo wù tsə́ynin tsə̀ynín, a bó yòʼ dzə̀ wù rə̀sìn.

²⁴ Vitaáví vé wìr veé Damaskus vi mày ne, fane súm áwune, á bínkír, a leʼ, a yàʼ, shilív shév shí wáa buʼ, á wáa yu nyár moo yé wiíy wo wù lúmé.

²⁵ Damaskus yèe, e bóo bvəərí? Ŋkàlaʼ, a vé‑eè yùʼnín ne. Ŋkàlaʼ, a yì‑iì dzə̀ ye vijùŋ fo fo.

²⁶ A kí dzə̀ jii, wíy lòo dzə e kishiíy fó, aá laar wónlě nsùm vév é dzəə seé mvə̀mlaʼ. Á wíy yuyrí vé rər vév adzə̀m. Suuy mo woo Nyùy Tàr woo Taà Mànjòŋ.

²⁷ M wíy tòn kay yeé Damaskus e və́yí, e laàr vikum ve virə̀ʼ ve Fòn Ben‑Hadad‑iì bomen.»

Nyùy Tàr wíy saʼ Kedar wùn Hasor

²⁸ Ntum yee kùm Kedar wùn Hasor rə̀ne, e lì virə́ʼ ve ví‑iì yú sáʼ fo Hasor, é bo Fòn Nebukadnessar woó Babilon wìy tòn fó. Nyùy Tàr suuy jii: «Á ŋáʼáy, e nə̀ə́ Kedar e rə́r sí. Á laar á wír veé mbìv yee fo shùy yii tó.

²⁹ Á wíy shoʼóy vibàn vév, e tatí, e kuúy à ŋgoo sév sé nyàm si shó. Á wíy lì ndzə̀y sév sé vibàn, e lì vifá vév vidzə̀m, aàkameri shó. Wíri wíy a jàŋ áwune, a rəəmé jii, ‹Virə́ʼ vidzə̀m vi sí beéme beèmén.›

³⁰ Éè wìr veé Hasor, kén kí nén a dzə jii, ‹Vèn léʼ cér, e dù kwaʼda, du, á làáy é mbvə̀ʼ. Fòn Nebukadnessar woó Babilon bà ne ntaŋ kùm ven. Wù sìysì ne kinyo ke wù lo, e yiì e vèn.› Suuy mo woo Nyùy Tàr.

³¹ «Vèn ŋáʼáy, a nəə́ kitúm kìn ki, áwune yòʼ gwarìr kinyo, yén ji á dzə́ a kijuŋ, là kinyo ké a fàn. Dzə̀ ŋkàlaʼ, a yì tíy e ŋgèŋgèr. Yì dzə̀ là shuu se kày, là mfìn si. Á yòʼ kér wír wo a dzə̀ wù sə̀ áwune é ghan sé ŋgeʼ. Suuy mo woo Nyùy Tàr.

³² Vèn kuúy akamer véví, e dù sho. Vèn kuúy ŋgoo sév sé nyàm si, e lì ji nsàʼmboʼ. M wíy taʼár wír vìn, ve á keŋrì vitú vév kéŋrin, táʼarì, aá dukir vitóŋtóŋ vidzə̀m. M wíy tsənsí ŋgeʼ, é yì nəə́ áwune mbìv sidzə̀m. Suuy mo woo Nyùy Tàr.

³³ Hasor wíy dù ji kirə́ʼ ke yii dzə́ kuúrá shó, a dzə ji vifə̀m ŋkuuŋkùŋ. Bó wìr yòʼ wíy a kùm fo, fə̀m e mòʼón feyì, a bó yòʼ dzə̀ wìr wàa dù ji wun du, a dzə fo.»

Nyùy Tàr wíy saʼ Elam

³⁴ Vé‑eè kòʼór Tsədekiya ji fon woó Juda, Nyùy Tàr yiì lò, e sùŋnín e Jeremia woo *ŋgaà ntum və kùm woŋ Elam.

³⁵ Nyùy Tàr woo Taà Mànjòŋ‑eè sùúy jii: «M yíi laàr vé kinte veé Elam adzə̀m, dzə̀ áwune ve dzəə̀n kóy woo fó wo tavíné.

³⁶ M wíy tsənsí shwér, é wú wiy fó buu se ndzə see sikweè, e nəə́, e kàr Elam. M wíy taʼár áwune, aá dukir buú se ndzə see shooy sidzə̀m. Bó kitúm ki yòʼ wíy a dzə sho ke wír veé Elam ve m fəəriné wíy buŋ fo fo.

³⁷ M wíy yiì, é wír veé Elame wáa fàn aŋgàa vibàn vév. Á wíy a fàn wír ve á taʼ e laàr dzəʼə̀m yév. Dòʼshwíiy wom wíy koʼ e ŋàŋ, é m maʼ ŋgeʼ aáwuné kitu. M wíy tsənsí rə́r aáwuné bàm, e meé mo sí wíy laàr áwune ŋkuuŋkùŋ. Suuy mo woo Nyùy Tàr.

³⁸ M wíy laàr fon woó Elam wùn à vé saʼ vəə́, e nèn tuúy a dzə̀ yém yee sáʼ fo. Suuy mo woo Nyùy Tàr.

³⁹ «Yii bèy, wíy lóo dzə e ghan sé bàm sí, é m kfən siìr vijuŋ ve wìr veé Elam aáwune. Suuy mo woo Nyùy Tàr.»