Jeremia 47 - ŊWÀʼ NYÙY

Nyùy Tàr súŋnín kùm Filistia

¹ Nyùy Tàr‑iì sùŋnín e Jeremia woo *ŋgaà ntum və kùm wír veé Filistia, é bo Farao wìy a tòn Gasa.

² Nyùy Tàr‑iì yòŋ jii: «Á leéy ri mo aŋgàa vibàné baʼtin ne e wòŋ kùyi moo ndzə́v, aá yíi a kuŋ virə́ʼ, a wìy moo kúŋ. Á yíi kuŋ fó wùn à vifá vee fó vi vidzə̀m, e kuŋ sa ŋkà se laʼ wùn à wìr msòŋ wo wù dzəə̀n fó. Wíri wíy a toŋ ji á sə́ á áwune, wìr dzə̀m wo wù dzə́ fo wíy a dìy.

³ Áwune wíy yu, a nsən se nyàm se ŋkoʼ si givì, e yu sa mo *viténtén vé rər ví wiyì, e yu mo kár si yii njèʼèr. Wìr yòʼ wíy a tiím ji wun li wán, tímé wíy kpu áwune adzə̀m.

⁴ Sì ghán se á laar wír veé Filistia adzə̀m, e tsə̀ʼ ntom Taya wùn Sidon ye yì berin e mòʼón. Rúrú, Nyùy Tàr sí laar wír veé Filistia, áwune vee kibér ke wìr ke kí loòn fó meshavtí meé Kaftor.

⁵ Wír veé Gasàa kwaày ne vitú, a dìy, veé Ashkelone wáa dzə kév kisə́sə. Óò kiber ke wìr keé mboʼ fèn, vèn wíy jàʼtì wún ben, e jòʼsì e le?

⁶ Vèn sí tóŋ jii, ‹Éè mǒ nyùy rə̀r yee ye Nyùy Tàr, à wíy laàr bèn, e yàr e ghàn ka? Ku kfə̀n é bàm e wò kiburúʼ, a dzə fo, a meèmè.

⁷ A dzə̀ yì siì yàr e le, a Nyùy Tàr yóŋ ne ji á mo kí kú a dzə? Wù fò ne sáʼ jii, á ku taàmé a Ashkelon wùn à wír veé ŋguùŋè ndzə̀ví.› »