Jeremia 46 - ŊWÀʼ NYÙY

Wír veé Babilone tón veé Ejiv e Karkemish

¹ Nyùy Tàr‑iì sùŋnín e Jeremia woo *ŋgaà ntum və, e tiìsí ntum se vitum sho.

² Kinyo ke Ejiv ki dzə̀ jii, yì‑iì dzə̀ é kiya ke kí‑iì meen ji kweè mo Jehoyiakim woo wan Josia‑aà yiin vifon e Juda, a Fòn Nebukadnessar woó Babilon tón ne vé rə́r Fòn Neko woó Ejiv, aá dzə̀ é Karkemish, e ghaa ndzəv yee Yufret. Jeremia wáa yiysí jii:

³ «Vèn báʼtí aŋkeè vén rərí, à ve kuʼkìné, à ve terií, báʼti, á wàa koʼtí e shùu rər.

⁴ Vèn kúr aŋkàlaá e nyám sí wùn, e bàʼtí *viténtén vé rər, e kòʼ. Vèn sáy kòŋ sén sí, e sòv tán sé kishà si, e màʼ vikúm vé kishà vi, é wìr tiím e wun kirə̀ʼ.

⁵ «Óò mbaà, m yén kin a dzə̀ ka? Áwune fàn ne, áwune sí kfə́n e bàm. Á ghàʼ ne vintav vév vé wìr, ví sí kfə́n e bàm e kinyeŋ ke tavín kí, a bó wìr yòʼ kfə̀n leey bám. Virə́ʼ vidzə̀m vi kù sí beéme áwune beemén. Suuy Nyùy Tàr.

⁶ Bó ŋgaà kinyeŋ yòʼ dzəə́ yú fó nyeŋ, a vintav ve wìr vi yòʼ yú fó leʼ. Áwune bàyrìn ne, e gbùkìr, e ghaa ndzəv yee Yufret, e wòŋ kùyi.

⁷ «Dzə̀ la wo wù wiy moo ndzə́v yee Naay, wiy moó ghan se ndzə́v sí runkin, a kuŋ virə́ʼ?

⁸ Dzə̀ Ejiv, aá kù wiy moo ndzə́v yee Naay, wiy moo ndzə́v se sí runkin, a kuŋ virə́ʼ. Ejiv yoŋ jii, ‹Vèr yíi run, e sùm kitú ke nsay, aá yíi laàr vitúm wùn à wír ve á dzə́ foo.›

⁹ Hey, vé nyàm se ŋkoʼo, vèn wáa nəə́ nəə́n é shùu rər. Vé vitenténé, vèn dzəv nyám si, é sí túmnín. Vé rərí, vèn kú a dù, a nyoòrì fo, ven veé Etiopia wùn à veé Libiyàa, aá kér aŋkeè, à veé Lidia, aá kì mvən ye maʼàné.»

¹⁰ Á bèy, kishiíy kin ki dzə̀ ké Nyùy Tàr woo Taà Mànjòŋ, wun woo Taà Ndzə. Dzə̀ kishiíy ke wù siir ŋkfə́tír áàŋgaà və́ vibàné. Nyùy rə rə̀r wíy laàr áwune ŋkuuŋkùŋ, kù moo koosàʼ, wo wù laarì, wù nò mensə́, e kù nò, e meé mo buù və‑ə́ə̀ kpú. Rúrú, Nyùy Tàr woo Taà Mànjòŋ, wun woo Taà Ndzə yíi yiì cu rə́ lán. Wù yíi yiì e wòŋ kùyi, e ghaa ndzəv yee Yufret.

¹¹ Éè wìr veé Ejiv, vèn kóʼ ri, a tàʼ kifú kí fó Gilead. Vifú ve vèn li vinín vinín vi kù lay kisáŋ, a bó yòʼ dzə̀ kifá ki fèr ven.

¹² Vitúm vi yùʼnín ne mo á shoorin ven, kitú ke nsay kidzə̀m ki yúʼnín mo vèn dzəə̀n é mvə̀m nyar. Vé rər véné bayrìn aámóʼó vitu, áwune tàtí ne, e fòrkìr e nsay adzə̀m.

Fòn Nebukadnessar nəə́ Ejiv e rə́r sí

¹³ Nyùy Tàr kfən sùŋnín e Jeremia woo *ŋgaà ntum və, e yòŋ kinyo ke Fòn Nebukadnessar woó Babilon, wo wù yíi wìy ji wun laar á nsay Ejiv. Wù‑uù yòŋ jii:

¹⁴ «Á wáa ghan, a fìʼtì Ejiv e dzə̀m, a sàmèr e Migdol, e kfə̀n a sàmèr e Memfis, wùn ǎ Tapanes. Á ku fìʼtì fo jii, ‹Vèn báʼtí vifá vén vé rər ví, a dzə kibáʼtín, rə́r sí sí nəə, e laàr kifá kidzə̀m fo věn wòŋ.

¹⁵ Apis woo nyùy won nyéŋ ka lèn? Lúm nyàm wóné yèe fó a tiy? Dzə̀ bìʼ fo Nyùy Tàr dòmèn ne wun, e bàʼ.

¹⁶ Mànjòŋ won bayrìn, gbukìrì, a wìr yoŋ e wùmòʼ jii, «Lò é yuv cér, é vèsən wáa kfən e bàm. Kfə́né, aá yén wír vesən e vèsə́n nsay, e bòy fo rər se aŋgàa vibàné wiy sho.»

¹⁷ Á wáa yòŋ Farao woo fon Ejiv ji ŋgaà njèʼèr, ŋgaà njèʼèr, a wù màʼtì ne ghay və́, wú shaá.› »

¹⁸ Nyùy Tàr woo Taà Mànjòŋ dzə̀ Fon. Wù suuy jii, «Mo m dzəə̀n shó e tin, ŋgaà vibàn yíi nəə́ ven, a wù dzə̀ moo Gwan Tabor, wo wù somen, e shaà agwan, e kfə̀n a dzə̀ moo Gwan Karmel, wo wù jáʼ e kitu ke rìbà ndzə̀v.

¹⁹ Éè wìr veé Ejiv, vèn báʼtí, á sí lò, e koo ven, e fəə sho. Memfis yíi a dzə e saʼkìn, a dzə e bvə́ʼə́yín, là wír.»

²⁰ Ejiv dzə̀ moo kimbòŋmbòŋ ke wàn nyàm, a ŋgaà vibàn wiy fo wòŋ kùyi, e taamé wun, kù mo vifə́r vé kwaʼ vi bòm e nyàm wùn.

²¹ Vé rər vév ve á làʼàné kù bòŋ a dzə̀ fó si. Á dzə̀ moo wón nyàm ve á koʼorin, á fáŋkír fáŋkin. Bó yòʼ dzə̀ áwune tìím, e taàmé rə́r. Áwune kù yíi lò, e tumnín, e leʼkír. Kishiíy ke Nyùy Tàr maʼ ŋgeʼ e wír veé Ejiví kitu ki sì. Kishiíy, a dzə̀ ke wù laar áwune.

²² Ejiv sí nyéŋ, nyamkìr moo búv, a dzə̀ bìʼ aŋgàa vibàn vév ve á nyoorì áwune. Á nyoorì áwune e njàm sí, kù mo á lo, a bàʼtì a dzə̀ vicí.

²³ Ejiv dzə̀ moo kintìŋ ke kòv ke bó yòʼ dzə̀ á tòsín, aàŋgàa vibàn véví kù yíi laàr. Suuy Nyùy Tàr. Aŋgàa vibàn véví wiy moo ŋguùmé. Á dzə̀ nyanyày, ye bó yòʼ dzə̀ á tàŋ.

²⁴ Á wíy shoór ŋgònjuù yee Ejiv, á wíy way áwune e vitúm veé wòŋ kùy ví kiwo.

²⁵ Nyùy Tàr woo Taà Mànjòŋ, wun woo Nyùy wìr veé Isray suuy jii, «Á leéy, e yèn, m yíi màʼ ŋgeʼ e Amon woo nyùy woó Tebes kitu, e màʼ bèy e wòŋ Ejiv wùn aànyùy vee fóo adzə̀m, e màʼ sa aàfon véví kitu. Rúrú, m kù yíi màʼ ŋgeʼ e Farao kitu, e màʼ sa e wìr dzə̀m wo wù tiirin vifií é wùn wó.

²⁶ M wíy way áwune e wír ve á taʼ, e laàr áwuneé kiwo, aá dzə̀ jii, Fòn Nebukadnessar woó Babilon wùn à vé rər vəə́. Kee shooy ki shaa, é wíri nèn kfə̀n a dzə e Ejiv mo vé‑eè yii rə́si dzə́. Suuy mo woo Nyùy Tàr.»

Nyùy Tàr káʼ ji wun wíy lùŋèr wír və́

²⁷ «Éè rám Jakov, vèn dzə̀ aŋgàa lìm vém, lá vèn yòʼ a fàn. Éè wír veé Isray, lá vèn yòʼ a yàʼ. M wíy bòyìr vèn à rám yéné rú fó vitum veé ndzəywoŋ, fo vé‑eè koon ven, e dù sho, á wáa rèŋ vikwàn. Rám Jakovi wíy kfən e bàm, a neŋ ji dèʼ, a dzə e kiŋsìn, é la wìr wó a bemér áwune yòʼ a dzə.

²⁸ Éè rám Jakov, vèn dzə̀ aŋgàa lìm vém, lá vèn yòʼ a fàn, m dzə̀ vèsən. Suuy mo woo Nyùy Tàr. Mò‑oò tàʼár ven, á dùkìr e vitum, a m kù wíy səʼsí vitúm vìn vidzə̀m, e səʼsí bèn ŋkuuŋkùŋ. Yii bèy, fo kén kí, m yòʼ wíy səʼsí ven səʼsín. M wíy nyèr ven nyérin ji weè, a bó yòʼ dzə̀ m màʼtì, vèn dù, la m maʼ ŋgeʼ e vèn.»