Jeremia 44 - ŊWÀʼ NYÙY

Nyùy Tàr tsə́nsí ntum e wír veé Juda ve á dzə́ e Ejivi

¹ Nyùy Tàr kfən siì sùŋnín e Jeremia, e tiìsí ntum sho kùm wír veé Juda adzə̀m ve vé‑eè dzə́ e nsay Ejiv, aá dzə̀ é ŋkà se laʼ see ji Migdol, Tapanes, Memfis, e kfə̀n a dzə e mbìv wòŋ yee Patros.

² Ntum rə̀n‑eè dzə̀ jii, Nyùy Tàr woo Taà Mànjòŋ, wun woo Nyùy wìr veé Isray suuy a jii, «Vèn yèn ne ŋgeʼ se tavkín sí sidzə̀m se m màʼàn é Jerusalem, e màʼ e ntèʼ seé Juda si sidzə̀m. Vèn leéy, e yèn, fóo sì é vifə̀m, e wìy shem lán, a bó wìr yòʼ dzə́ fo,

³ a kù dzə̀ bìʼ vinyo ve kisaŋ vi ve áwune‑eè yiìn. Vé‑eè ŋàʼár dòʼshwíiy wom e kiláy ke áwune ton, cu anyùy sho ki. Anyùy ve bó áwune yòʼ‑oò lò ghàn sìíy e kìíy, a bó vèn yòʼ kì sá, aàtàr véné yòʼ kì.

⁴ Vé‑eè yii bèy, a m kù rə́si tsə́nsi vé lìm vém vee aŋgàa ntum adzə̀m fo áwuné wùn, kán wún jii, ‹Éè mò, la vèn dzə́ə a yiì vinyo ve joònè ve vèn yii, a ví bír mo vin.›

⁵ Yii bèy, la wír vémé yòʼ yuùrí, aá yòʼ fə̀m gwarìr ji bo áwune kì kùvsín á yii yév kisaŋe, e yàr fó a tòn kiláy, a cù anyùy sho.

⁶ Dòʼshwíiy wom nèn kòʼ, a baarí moo və́y, m máʼ ŋgeʼ e ŋkà se laʼ seé Juda, e kfə̀n màʼ e Jerusalem, yì ghán, e bùʼrì dzə́ə see fó sidzə̀m. Fóo nen kfə̀n ji woŋ kinjúme, e dù e vifə̀m, e wìy shem lán.»

⁷ Á bèy, Nyùy Tàr woo Taà Mànjòŋ, wun woo Nyùy wìr veé Isray nèn yòŋ jii, «Vèn jày jay woo ben e věn kitu ji ka? Vèn taʼ ji á laar vilum wùn à vikìy, à wàʼbìn, à wóné fó rám Juda, é la wìr won yòʼ bèr a?

⁸ Vèn fer anyùy e wó yéné é nsay Ejiv fèn fo vèn wìyìn, a dzə, ton kiláy, cu sho, ŋáʼar dòʼshwíiy wom ji ka? Vèn taʼ ji á yiì laàr ven, é vitúm veé kitu ke nsay vi li yír yén ji liy, a jàʼ ven jáʼan a?

⁹ Vèn làysìn ne liì kisaŋ wo vé‑eè yii e nsay Juda, yii e dzəə seé Jerusalem à? Liì kisaŋ wo atàr véné‑eè yii, aàfon veé Judàa yii, a vikǐy ntoʼo yii sa, a vèn kù yii, a vikìy véné yii sa.

¹⁰ Bó vèn yòʼ kfə́menè, e wìy shem lán, a bó á yòʼ fan mo, aá yòʼ yú sáʼ yém, a bó á yòʼ lem nsər se mò‑oò foon e vèn aàtàr véné.»

¹¹ Bìʼ bey, Nyùy Tàr woo Taà Mànjòŋ, wun woo Nyùy wìr veé Isray nen sùúy jii, «Vèn leéy, e yèn, m yíi kìʼ ven e ŋgeʼ, e laàr rám Juda e dzə̀m.

¹² M yíi laàr wír vee kibér ke rám Juda ve vé‑eè wayin ji á kù du, a dzə e nsay Ejiv. Rə́r wùn à jiŋ kù yíi laàr áwune, e kèʼ fo wìr wo terí, e dù, e meé e wo kuʼùn. Áwune wíy kpu yé rər wùn à yé jiŋe, a dzə vé lòné, wíri lóo leéy, é wúné wáa beemé áwune, é yír yéví kfə́n ji liy, aá wáa jàʼ áwune jáʼan.

¹³ M wíy màʼ ŋgeʼ e wír ve á dzə́ e nsay Ejivi. M wíy tsənsí rə́r wùn à jiŋ, à kifə̀ʼ ki, réŋréŋ mo mò‑oò tsənsin é Jerusalem.

¹⁴ Wìr fo kibér ke wìr veé Juda ve á wìyìn, a dzə e nsay Ejivi yòʼ wíy leʼ, a bó wìr yòʼ wíy bòy, yée kfən e bàm é Juda. Á wíy a ker shií ji á kfə́n é Juda, a dzə fo, a bó yòʼ dzə̀ kí kfə̀n kòóy bèy. Kù wíy kfən ashàr wìr ve á dzəə̀n é kwaʼ nsàm.»

¹⁵ Á bèy, vilum adzə̀m ve vé‑eè kiìn ji vikìy véví ton a kiláy, cu anyùy sho, e lì vikìy adzə̀m ve vé‑eè dzəə̀n fó si, à wìr dzə̀m wo wù‑uù dzə́ e Patros, e nsay Ejiv, màŋgòŋ və̀n e dzə̀m nèn tàtí, a bìnèr e Jeremia, a waamé waamén jii,

¹⁶ «Mo à fə̀m fiʼtì kinyo kìn e vèr ji tùm Nyùy Tàr wò bèn, bó yòʼ dzə̀ vèr yuùrí.

¹⁷ Vèr kù wíy a yiì vinyo vér vidzə̀m, a dzə̀ mo vèr‑iì kàʼàn ne. Vèr wíy a tòn kiláy, a cù Yaà woó Yuv shó, e kfə̀n a cù wun e meluʼ mè. Vèr kù wíy a yiì réŋréŋ mo atàr vér wùn aàfone, à vé saʼa‑aà rə́si yii e ŋkà se laʼ seé Juda, kfə̀n yii e dzəə seé Jerusalem. Vèr‑iì yii bèy, kér vifá ve yi nyanyày, kér dzəʼə̀m ye juŋe, a bó ŋgeʼ yòʼ‑oò dzə́.

¹⁸ Mo vèr‑iì yàrìn fó a tòn kiláy, a cù Yaà woó Yuv shó, e yàr sa fó a cù wun e meluʼ mè, kitan ke vifa ki nèn nə̀ə́ ver, vèr kfə́n a kpu yé rər, a kpu yé jiŋ.»

¹⁹ Vikìy nèn sàyín sa kév jii, «À kwaʼ ji vèr‑iì ton kibán keé ntuʼ si, e njà Yaà woó Yuv, cu wun sho, kfə̀n cu e kiláy ke tonèn kí, cu sa e meluʼ mè, a bó alúm vérí yòʼ bínsi à?»

²⁰ Jeremia nèn yòŋ e wìr dzə̀m, à vilum, à vikìy ve vé‑eè foon binèr rə̀n e wune jii,

²¹ «Vèn kwaʼtì ji Nyùy Tàr yòʼ‑oò ló a yen, a bàn kiláy ke vèn‑eè ton e ŋkà se laʼ seé Juda, ton e dzəə seé Jerusalem, cu anyùy sho à? Vèn kù‑uù ton vèn aàtàr véné, e lì afon wùn à vé saʼa, wìr dzə̀m woó wòŋ tátí sá, a tòn.

²² Mo bó yòʼ‑oò dzə̀ Nyùy Tàr wàa kòmèr liì won kisaŋ wùn à vinyo ve joònè ve vèn yii, nsay yen nèn lày kisáŋ, a dzə kinjúm, e kfə̀n ji kifá ke liy ki, a dzə là wír, kù mo yì dzəə̀n lán və̀n.

²³ Ŋgeʼ sìn si‑iì nə̀ə́ ven, e wìy shem lán bèn, a dzə̀ bìʼ kiláy ke vèn‑eè ton, cu anyùy sho, nèn jáy e Nyùy Tàr. Vèn yòʼ‑oò ló a yunín Nyùy Tàr. Vèn yòʼ‑oò ló a yu sáʼ rə́, a jùmrì nsər sə́, a yu ntir sə́.»

²⁴ Jeremia nèn yòŋ e wìr dzə̀m, à vikìy shó jii, «Vèn yú kinyo ke Nyùy Tàr suuy e vèn kí, ven adzə̀m vee rám Juda ve á dzə́ e nsay Ejiv fèn.

²⁵ Nyùy Tàr woo Taà Mànjòŋ, wun woo Nyùy wìr veé Isray suuy jii, ‹Vèn sùúy ne e shuu wóné, à vilum, à vikìy ji vèn kù yíi a yiì a mo vèn‑eè kàʼàn, a tòn kiláy, a cù Yaà woó Yuv shó, e kfə̀n a cù wun e meluʼ mè, a dzə̀ kíwun ke vèn yii, din ji vèn kù tíy a dzə̀ á e kíwun ki. Á bèy, vèn yii ri mo vèn‑eè kàʼàn, é ŋkàʼmé won gheén.

²⁶ Yii bèy, vèn ku yòʼ yù mo mo woo Nyùy Tàr tín kàʼ won, ven adzə̀m vee rám Juda ve á dzə́ e nsay Ejiv. A m tín bèy, kfə̀n liʼ, kan yír yém ye ghaʼáné. Bó wìr fo vèn yòʼ dzəə́ wìy mvə̀ʼ shuu və́ é nsay Ejiv fèn, a lìʼ kinyo, a kàn yír yém jii, «Mo Nyùy Tàr woo Taà Ndzə dzəə̀n shó e tin». Suuy mo woo Nyùy Tàr.

²⁷ Vèn yuúrí, e yù, m kù yíi a kiyrí ven a dzə̀ ji ŋgeʼ si nəə́ ven, é la vijuŋ vi yòʼ a dzə. Wír vee rám Juda adzə̀m ve á dzə́ e Ejivi kù wíy kpu. Á wíy kpu yé rər, e kpu yé jiŋ, é la wìr yòʼ bèr.

²⁸ Wír ve á wíy bòy fo rər, e lò fo Ejiv, e kfən e Judàa wíy a dzə ashàr, é wìr dzə̀m fo kibér ke rám Juda ve vé‑eè wìyìn é Ejivi nèn kìíy ji sà tíy jí sém fó, moo sév á.

²⁹ « ‹Mo‑óò fó ven kisəəm, é vèn kiíy kijuŋ ji m wíy màʼ a ŋgeʼ e věn kitu e kirə̀ʼ fen, é kinyo ke mò‑oò tinen kàʼ won ji m wíy laàr a ven kí gheén.

³⁰ Vèn yuúrí, e yù, m wíy way Fòn Hofra woó Ejiv aàŋgàa vibàn vəə́ wo. M kù wíy way wun e wír ve á taʼ e laàr wuné wo, kù mo mò‑oò wayin sá Fòn Tsədekiya woó Juda e ŋgaà və vibàn woo Fòn Nebukadnessar woo fon woó Babilon kiwo, wun wo wù‑uù taʼ e laàr dzəʼə̀m rə́. Suuy mo woo Nyùy Tàr.› »