Jeremia 42 - ŊWÀʼ NYÙY

Wíri mbaá Jeremia ji wù sə́ á áwune, e lòn Nyùy

¹ Amfòómé rər adzə̀m wùn à Johanan woo wan Karea, à Jesania woo wan Hoshayia, à wìr dzə̀m, e kèʼ fo wo terí, e dù e wo kuʼùn nèn wìy,

² e yèn Jeremia woo *ŋgaà ntum Nyùy, e sùúy sho jii, «Kii wò, ku yiì kinyo ke vèr lón wò sho ki. Ku mbaà Nyùy Tàr woo Nyùy wò ji wù sə́ á ver adzə̀m ve á berin. Vèr‑iì dzə̀ wír agháʼán, a kù bèr ne ve à yén lèn vìn.

³ Á lon Nyùy Tàr woo Nyùy wò ji wù din á fo vèr du, e kfə̀n sùúy a kinyo ke vèr yii.»

⁴ Jeremia nèn bìnèr aáwune jii, «M yù ne, a m yíi a lon rú Nyùy Tàr woo Nyùy won mo vèn suuyin. Wù suuy kinyo kidzə̀m ke wù suuyin, é m ku nèn fèr e vèn, e làa yòʼ ber kímóʼ kí gheéy.»

⁵ Áwune nèn yòŋ e Jeremia jii, «E ké ru kí, Nyùy Tàr kù yíi a dzə ŋgaà njen wor, a vèr fey yiì a dzə, e làa yòʼ a yiì kinyo kidzə̀m ke Nyùy Tàr woo Nyùy wò yòŋèn ji à suúy e vèr.

⁶ A kí bòŋèn, a kí birin, bo vèr kù yíi a yunín Nyùy Tàr woo Nyùy wor, wo vèr túm wò fo wùn wó. Vèr kì ji a vèr yiì a yunín wun, bo vinyo vér ví wíy a dù kijuŋ.»

Nyùy Tàr bínér bunrì Jeremia

⁷ Vishiíy ví shaà e ghvə̀m, Nyùy Tàr tiísí ntum rə e Jeremia.

⁸ Jeremia nèn kùm Johanan woo wan Karea wùn aàmfòómé rərí adzə̀m ve wùn áwune‑eè dzəə̀n, wìr dzə̀m báʼtí, e kèʼ fo wo terí, e dù e wo kuʼùn.

⁹ Wù‑uù sùúy jii, «Vèn yuúrí kinyo ke Nyùy Tàr suuyì, wun woo Nyùy wìr veé Isray, wo vèn‑eè tumen mo fó wùn wó, ji m du, e mbaà wun e kíghàʼ won. Wù suuy jii,

¹⁰ ‹A vèn lòo dzə, e gòʼ e wòŋàn, bo m yíi bàʼrì ven, e làa yòʼ sàʼtì. Bo m yíi tuúy ven, e làa yòʼ shoʼóy shoʼoyín. M kér mendzən feyì bìʼ ŋgeʼ ye tavín ye mò‑oò nəən ven shó.

¹¹ Lá vèn yòʼ dzə́ə a fàn fon woó Babilon wo vèn fan və̀y. Lá vèn dzə́ə a fàn wun. M kù dzə̀ vèsən, a m yíi sə ven, e fəə́r fo wun kiwo. Suuy mo woo Nyùy Tàr.

¹² M yíi sham ven, e yiì, é wù wáa ker mendzən, e màʼtì ven e yéen yee nsay.›

¹³ «Yii bèy, a vèn lòo dzə, a yòŋ ji á yòʼ yíi gòʼ e wòŋàn, e tèn kinyo ke Nyùy Tàr woo Nyùy won,

¹⁴ a yòŋ a dzə̀ ji vèn kù du e wòŋ woo Ejiv, fo vèn yòʼ dzəə́ wìy a yu kikum ke rər, kìn sóŋ rər ye yí diyì, a bó jìŋ yòʼ dzəə́ wìy a yar ven, vèn wàa kiíy.

¹⁵ Óò kiber ke wìr veé Juda, bo kinyo ke Nyùy Tàr woo Taà Mànjòŋ, wun woo Nyùy wìr veé Isray suuy ki dzə̀ jii, ‹A vèn lòo dzə e wày ji vèn kù‑úù du, a dzə a dzə̀ é Ejiv,

¹⁶ bo rə́r se vèn fan sìy si yíi nəə́ ven fó, é jìŋ ye tavín ye vèn yaʼà koó ven, é vèn kpú, e mày.

¹⁷ Wìr dzə̀m wo wù wayin ji wun kù du, a dzə kfə́ é Ejiv kù wíy kpu yé rər, kìn yé jiŋ, kìn yé kifə̀ʼ, a bó wìr fo áwune yòʼ wíy ber. Áwune yòʼ wíy bòy fo ŋgeʼ ye tavín ye m wíy nəə́ áwune shó.› »

¹⁸ Nyùy Tàr woo Taà Mànjòŋ, wun woo Nyùy wìr veé Isray kfə́n a yòŋ jii, «Mo dòʼshwíiy wom‑eè koʼon, kí nyár mo, m màʼ ŋgeʼ e wír veé Jerusalemé kitu, á mo vèn yíi dù e Ejiv, é kí koóy sá ven bey. Vèn wíy a dzə vé lòné, wíri lóo leéy ven, é wúné wáa beemé áwune, é yír yéné kfə́n ji liy, aá wáa jàʼ ven jáʼan, a vèn yòʼ dzəə́ wìy yen nsay rə̀n.»

¹⁹ Jeremia ku kfə̀n a suúy jii, «Éè kiber ke wìr veé Juda, Nyùy Tàr sùúy ne ji lá vèn yòʼ dù a e Ejiv. Ku kfə̀n a dzə kíwun ke m tír ven shó lán.

²⁰ Vèn sí taʼ e yiì jay wo tavín, vèn dzə́n kidzə́n e kitu ke koŋ. Vèn‑eè tùm mo fo Nyùy Tàr woo Nyùy wón wùn ji m du, e mbaà wun. Wù suuy kinyo ke wù suuyin, m fèr á e vèn kidzə̀m, é vèn yii á mo kí dzəə̀n.

²¹ Á bèy, a dzə̀ kíwun ke m fìʼtìn e vèn lán. Yii bèy, la vèn yòʼ yùnín jí Nyùy Tàr woo Nyùy won, ye wù tumen mo, m naárí e vèn.

²² Ké lèn ki, vèn wáa kiíy ji vèn wíy kpu a yé rər, kìn yé jiŋ, kìn yé kifə̀ʼ, e kirə̀ʼ kee fo vèn shoʼon ji á du, a dzə.»