Jeremia 41 - ŊWÀʼ NYÙY

¹ Wìy lòo dzə e saàmbà ŋwee woó kiya foo fèy, Ishmael wìy wùn à wíri e ghvə̀m, e yèn Gedalia e Mispa. Ishmael‑iì dzə̀ wan Netania woo wan Elishama, a dzə̀ kfə́ə wón ntoʼ. Yì‑iì dzə̀, é bo á wáa tòn ntoʼ, a wù dzə̀ wír wo kuʼùn é ntoʼ. Ishmael wùn Gedalia dzə̀ʼə̀m, e lòo yikír e Mispa,

² Ishmael wùn à wír vee ghvə̀m vìne nèn tùm, e yùyrí Gedalia e nyùy rə̀r, a dzə̀ wun wo fòn woó Babilon‑eè shoʼon ji wù wáa saʼ a woŋ.

³ Ishmael‑iì yùyrí sá wír veé Juda adzə̀m ve vé‑eè dzəə̀n e Gedalia ghaŋ, e kfə̀n yùyrí sa vé rər veé Babilon ve vé‑eè dzəə̀n fó.

⁴ Kishiíy kí shaà, ndzə jàv, é bo wíri yiì a gwàrìr ji á yùyrí ne a Gedalia,

⁵ ŋgoo vilum yìmòʼ wáa shaà, aá dzə̀ wír mwaamé, aá kér cu vifa ve yi wùn à kiláy kí ji á du shó e Nyùy Tǎr lav. Vé‑eè lò fó Shekem, ámóʼó fó Shilo, ámóʼó fó Samaria, aá kóm vighev, e saàsì ndzə̀y sév, e jàʼtì wún.

⁶ Ishmael nèn fəə̀ fó Mispa, a dù, wùn áwune tár, a wù bóʼ tóŋ. Mo wù yenen áwune, e nèn yòŋ jii, «Vèn wáa wìy rì, e yèn Gedalia woo wan Ahikam.»

⁷ Áwune wìy, e mèé e ŋkàlaʼ fèy, Ishmael wùn à wír vəə́ nèn gwàtì wír vìy, e màʼrì e mbǐʼ mendzə̀v wo buʼùné.

⁸ Yii bèy, a wír ámóʼó kì dzə̀ e wír vìyí mvəm wír e ghvə̀m, ve á kì lonen Ishmael ji lá wù yòʼ yùyrí a áwune. Áwune kér a sáŋ yee *wit wùn à yee *barli, à meŋgvə́r mè, à vilu vi, mo á lìtìn á e kwaʼ. Wù nen màʼtì, e làa yòʼ yuyrí vee shoon wùn à ŋgoo yev.

⁹ Ké mbìʼ wo Ishmael‑iì màʼrìn dzə́n sé wìr ve áwune kì yuyrin shó, e lì a yé Gedalia, kí dzə̀ jii, dzə̀ wo Fòn Asa‑aà bùʼùn, wú wáa sə wun e ghan se Fòn Baasha woó Isray‑iì nəən áwune e rə́r sí. Ishmael woo wan Netania və̀n nèn sə̀n fó e dzə́n sí.

¹⁰ Ishmael lò fo fo, e koòrí wir dzə̀m wo wù‑uù berin é Mispa. Wù‑uù koòrí wón ntoʼ vee vikìy, e koòrí wir dzə̀m wo Nebusaradan woo mfòóme anshìy fòn Babilon‑eè lèmèn e Gedalia woo wan Ahikam. Ishmael‑iì koò áwune ji vé sháŋé, a tsəəné, a liysín sho e nsay Ammon.

¹¹ Johanan woo wan Karea wùn aàmfòómé rər ve wùn áwune‑eè dzəə̀né yú kinyo ke kisaŋ ke Ishmael woo wan Netania mùmèn kin,

¹² e lì shuu wóv rər e dzə̀m ji wùn áwune nəə́ á Ishmael e rə́r sí. Á jùmrì wun, e kòóy e kisə̀m ke wiy kí, e Gibeon.

¹³ Wìr dzə̀m wo Ishmael‑iì koon yén, a Johanan wùn aàmfòómé rərí wiyì, e nèn a sheʼrí.

¹⁴ Á bèy, wìr dzə̀m wo Ishmael‑iì koon fó Mispa, a dù sho nèn tùmnín, e dù yèn Johanan.

¹⁵ Yii bèy, Ishmael lì vé rər və́ waamé, wùn áwune léʼ Johanan, e dù e nsay Ammon.

¹⁶ Johanan wùn aàmfòómé rər ve wùn áwune‑eè dzəə̀né nèn lì wir dzə̀m ve áwune bòyìrìn fó Gibeon, a dù sho, aá dzə̀ jii, vé rərí, e lì vikìy wùn à wóné, aàtǎr saʼa, a dzə̀ ji wir dzə̀m wo Ishmael‑iì yuyrin Gedalia, e koò fó Mispa, a dù sho ji vé sháŋé.

¹⁷ Wùn à Johanan nèn dù, a dzə e Gerut Kimham e ghaa Betlehem, aá sí du duùn é Ejiv,

¹⁸ bìʼ fo áwune‑eè fan wír veé Babilon. Vé‑eè fan áwune bey, bìʼ fo Ishmael woo wan Netania‑aà yuyrin ne Gedalia wo fòn woó Babilon‑eè lèmèn ji wù wáa saʼ a woŋ.