Jeremia 39 - ŊWÀʼ NYÙY

Wír veé Babilone tón Jerusalem

¹ Yì‑iì dzə̀, a Tsədekiya sí sáʼ ji kiyá bvə̀ʼə̀ mo wù‑uù yiin vifon e Juda, Fòn Nebukadnessar woó Babilon wùn à vé rər və́ adzə̀me nèn wìy e ŋwee woo ghvə̀m, e nə̀ə́ Jerusalem e rə́r sí, e gìm fó.

² Kiyá ki meé ji nshòv mòʼón e ghvə̀m mo Tsədekiya‑aà saʼan ne vifon, á nèn bvə̀ʼ kay yeé ŋkàlaʼ, e tòsín, e sùm fó. A yì‑iì dzə̀ é kishiíy kee bvə̀ʼə̀, e ŋwee woo kweè.

³ Mo á sùmèn Jerusalem bèy, vé saʼ fòn woó Babilone nèn dù, e màʼ antaʼ vév é Shùu Kày Kintìntìne. A vé‑eè dzə̀ jii, Nergal‑Shareser, Samgar‑Nebo, Sarsekim woo kitú kév, à wùmòʼ woo Nergal‑Shareser woo kitú kév kímóʼ kí, e bóo lì vé saʼ ámóʼó.

⁴ Vé‑eè lóo sùm fó, Tsədekiya woo fon Juda wùn à vé rər və́ adzə̀me yén, a wír veé Babilone sí nəə, á nèn sàm fó ŋkàlaʼ vitsə́ʼə́, a leʼ, a dù dzə́ə fo fòn sum, e shaà fo nsàn virə̀v vé kày vee vibaà, e nèn a dù e mbìv Araba.

⁵ Yii bèy, vé rər veé Babilone wáa jùm áwune, e koò Tsədekiya e mboʼ yeé Jeriko. Mo á koon bey, e nèn lì, e dù, e fò e Fòn Nebukadnessar woó Babilon, a wù dzə̀ é Ribla, e nsay Hamat. Wù nèn tìnén mo á yii e Tsədekiya.

⁶ Wù‑uù yùyrí wón Tsədekiya e Ribla fèy, a Tsədekiya yéné, e kfə̀n yùyrí sa vé saʼ veé Juda adzə̀m.

⁷ Wù‑uù fə̀tí sí se Tsədekiya, e nèn tàŋsìn wun aàsháŋé, e lì, a dù sho e Babilon.

⁸ Vé rər veé Babilone siíy é Jerusalem, e tòn ntoʼ, e kfə̀n tòn lav se wíri, e nèn bvə̀ʼə́y kay yeé ŋkàlaʼ.

⁹ Nebusaradan, wo yì‑iì dzəə̀n wun mfòóme anshìy fòn nèn fə̀ə́r kibér ke wìr ke kí‑iì berin é mvə̀mlaʼ, à ve vé‑eè leʼen, e wìy, e yèn wune, e tsə̀nsí, á dù sho e Babilon.

¹⁰ Yii bèy, a wù‑uù bèr wír vee aghéʼncey ámóʼó é nsay Juda, ve á yòʼ‑oò kér kifá, e nèn jàvtì súm sé vitiír vé *vayin wùn à kwáʼ si aáwune.

Á bóyír Jeremia

¹¹ Fòn Nebukadnessar woó Babilon‑eè fò sáʼ yee kùm Jeremia e Nebusaradan woo mfòóme anshìy fòn, a yí dzə̀ jii,

¹² «Dù, e lì Jeremia, a leéy fo fo kijuŋ, e làa yòʼ a nyàvrì sho. Kú a yiì e wun mo wù yíi a yòŋ.»

¹³ Á bèy, Nebusaradan woo mfòóme anshìy fòn wùn à vitú ve saʼ vee ji Nebushasban wùn Nergal‑Shareser, à kibér ke vé saʼ fòn woó Babilon ki

¹⁴ nèn tùm, á dù, e lì Jeremia fo kibùʼ ke nsheèlav. Á lì, e wày e Gedalia woo wan Ahikam kiwo, wù tsəə́né, e dù sho fo laʼ, a Ahikam və̀n dzə̀ wan Shafan. Jeremia nèn dù, a dzə wùn à wír vəə́.

Nyùy Tàr káʼ ji wun yíi kìŋsìn a Ebed‑Melek

¹⁵ Yì‑iì dzə̀, a Jeremia dzə̀ə́ e finèn é kibùʼ ke nsheèlav, Nyùy Tàr yòŋ sho jii,

¹⁶ «Dù, e sùúy e Ebed‑Melek woo wir Etiopia ji Nyùy Tàr woo Taà Mànjòŋ, wun woo Nyùy wìr veé Isray suuy a jii, ‹Leéy, e yèn, m wíy yiì kinyo ke mò‑oò yòŋèn ji m wíy yiì e ŋkàlaʼ rə̀n. A dzə̀ m kù màʼ a dzə̀ ŋgeʼ fo, é la vijuŋ vi yòʼ a dzə fo. Vinyo vìn vi wíy a koóy e kishiíy fó, áà wáa yen e sí yée.

¹⁷ Yii bèy, a m wíy kìŋsìn wò e kishiíy fóo fèy, áà luŋ, a bó wìr yòʼ wíy way wò e wír ve à fan vìyí kiwo. Suuy mo woo Nyùy Tàr.

¹⁸ E ké ru kí, m wíy lùŋèr wò, é la á yòʼ yùy wò, é vilaámé vé vi wáa dzə dzəʼə̀m yé, bìʼ fo à wayin shilív e mǒ wùn. Suuy mo woo Nyùy Tàr.› »