Jeremia 34 - ŊWÀʼ NYÙY

Jeremia tiísí ntum e Fòn Tsədekiya

¹ Yì‑iì dzə̀, a Fòn Nebukadnessar woó Babilon wùn à vé rər vəə́, à vitúm veé kitu ke nsay ve ví dzəə̀n e wun sar saʼ vi tátí, a fùnèn wír veé Jerusalem wùn à ntèʼ seé ghaŋ wo si, Nyùy Tàr súŋnín e Jeremia.

² Nyùy Tàr, wun woo Nyùy wìr veé Isray‑iì sùúy e Jeremia jii, «Dù, e yèn Fòn Tsədekiya woó Juda, e yòŋ sho ji Nyùy Tàr suuy a jii, ‹Yuúri yù, m sí wáy ŋkàlaʼ rə̀n e fòn woó Babilon kiwo, é wù ton e və́yí.

³ À yòʼ yíi bòy fo wun kiwo. Á kù yíi koo wò, e dù, e fo sho. À yíi yen fon woó Babilon e sí yée, é vèn wun wáa suŋnín, é wìr wáa yen wùmòʼ, aá nèn lì wò, e dù sho e Babilon.

⁴ « ‹Mo kí fə̀m dzəə̀n bey, éè Fòn Tsədekiya woó Juda, yuúrí kinyo ke Nyùy Tàr yòŋèn kí. Nyùy Tàr suuy kùm wò jii: Bó à yòʼ wíy kpu a yé rər.

⁵ À wíy kpu kpú yee nyaáŋé. Mo vé‑eè diy kpú atàr vé, ton kiláy, áwune ve vé‑eè saʼan vifon, é bo à yí ntaʼ wov, kù dzə̀ sá mo wíri wíy a tòn e yé yee kpúu. Á wíy a dìy wò, a shèŋ kitú, a yòŋ jii, fòn wor lày ne. Sùúy mo woo Nyùy Tàr vinyo vìn.› »

⁶ Jeremia woo *ŋgaà ntum Nyùy nèn dù, e tiìsí ntum rə̀n e Fòn Tsədekiya woó Juda, a wù dzə̀ é Jerusalem.

⁷ Wù‑uù tiísi, a vé rə́r fòn woó Babilone nəə́ ne fó e rə́r sí, sí wáa màʼ, e kù a màʼ sa e Lakish, a màʼ e Aseka, a dzə̀ vikum ve ŋkà se laʼ seé Juda se sí‑iì jòʼsìn là ton.

Wíri bóyír akwàn, e kfə̀n siìr e vikwàn

⁸ Nyùy Tàr‑iì súŋnin e Jeremia, a Fòn Tsədekiya wùn à wìr dzə̀m woó Jerusalem tár ne shuu, e lìʼ ji á maʼti á akwàn vév.

⁹ A kí‑iì dzə̀ ji wìr dzə̀m maʼti á akwàn vév ve kù‑uù dzəə̀n wír Hibru, kìn dzə̀ woo lumène, kìn woo wiíyi, é la wìr yòʼ kfə̀n lì a fə́r və woo wir Juda ji kwàn.

¹⁰ Vilìmbìy vidzə̀m, à wìr dzə̀m wo wù‑uù lìʼìn nèn biìmé ji á lo, e màʼtì a akwàn vév vee vilum wùn à vee vikìyí, e làa yòʼ dzə́ə wìy siìr a e vikwàn. Á biímé bey, e nèn màʼtì.

¹¹ Yii bèy, wáa dzə e ghan símóʼ sí, áwune nèn kfə̀n siìr vilum wùn à vikìy ve vé‑eè màʼtìn ne, á bóy, á kfə́n a rèŋ vikwàn.

¹² Nyùy Tàr nèn sùŋnín e Jeremia jii,

¹³ «Yì‑iì dzə̀ é ghan se mò‑oò fəərin atàr vén fó wòŋ Ejiv, fo vé‑eè reŋ vikwàn, mò‑oò gwàr *mensaŋ vèr áwune, e fò nsər jii,

¹⁴ a wìr lò, a ker kwàn a dzə̀ wir Hibru mo wù yunen, wù lim fo wun kiyá ntuùfú, kí meé ji saàmbà, wù waà màʼtì. Wù kù kér fó wìy màʼtì, é la wù yòʼ dzə́ə a lìm a e wun sar. Yii bèy, la atàr véné yòʼ yuùrí, a bó á yòʼ fə̀m‑eè ló a gwàrìr nsər yem.

¹⁵ Vèn ló kén lèn, e bìnkìr, a yiì a dzə̀ kinyo ke m wáa yen, é kí wáa gheén mo. Vèn‑eè màʼtì afə́r vén, á bóy fó vikwàn, a vèn yií ne kilìʼ e mǒ si, e lav ye dzəə̀n yéem ji á ku yiì a bèy.

¹⁶ Yii bèy, a kfə̀n lò ne ven vin, e bìvír kwaʼtì yén, e bìvír yír yém, wìr wáa siìr kwàn və́ woo lumèn, à woo wiíyi é vikwàn ve áwune‑eè bòyìn ne fo fo, e dù, a dzə fo áwuné vitu, vèn kfən siìr áwune ji á wáa rèŋ vikwàn fo vèn.»

¹⁷ Á bèy, Nyùy Tàr suuy jii, «Mo vèn yòʼ‑oò lo yùnín mo, e yiì kinyo ke vèn‑eè lìʼìn ji wìr yíi a màʼtì a fə́r və, é wù wáa bòy fo vikwàn, vèn yuúrí, m lo, e màʼtì sa ven, é rə́r wùn à jiŋ, à kifə̀ʼ ki nəə́ ven. Vitúm veé kitu ke nsay vidzə̀m vi lóo leéy ven, é wúné wáa beemé áwune. Suuy mo woo Nyùy Tàr.

¹⁸ Wìr dzə̀m wo wù‑uù yaʼayin kilìʼ ke wù‑uù lìʼìn vèr wun, e làa yòʼ lèm ntò se kilìʼ ke vé‑eè yiìn e mǒ si, m yíi yiì e ŋgaàŋ mo á yiìn e nàʼ wo vé‑eè toʼnin viwaŋ vibaà.

¹⁹ Rúrú, m wíy lovtí bèy e vilìmbìy veé Juda wùn à veé Jerusalem vi, aàtǎr ntoʼ véví, aàtàá cùu, e lì wir dzə̀m wo wù‑uù shaàn é kintìntìn ke viwàŋ ve nyàm ye vé‑eè toʼnin rə̀y.

²⁰ M wíy way áwune áàŋgàa vibàn véví wo, wír ve á jwímer dzəʼə̀m yév. Dzə́n sév sí wíy a dzə viyíkìr ve menə̀n, à vé nyàm se kwaʼ vi.

²¹ «M wíy way sa Fòn Tsədekiya woó Juda wùn à vé saʼ vəə́ áàŋgàa vibàné wo, áwune ve á jwímer dzəʼə̀m yév. M wíy way e vé rə́r fòn woó Babiloné wo, ve vé‑eè loòn ne, e yùŋén fo áwuné bàm.

²² Vèn yuúri yù, m wíy fo sáʼ, é vé rər veé Babilone kfə́n, e nə̀ə́ ŋkàlaʼ rə̀n e rə́r sí, e sùm fó, e tòn e və́yí. M wíy laàr sa ŋkà se laʼ seé Juda, é fóo du é vifə̀m, é la kiŋkwir ke wìr ki yòʼ a kùm fo. Suuy mo woo Nyùy Tàr.»