Jeremia 32 - ŊWÀʼ NYÙY

Jeremia yún súm

¹ Nyùy Tàr‑iì sùŋnín e Jeremia, a Tsədekiya sáʼ ne vifon e Juda kiyá e ghvə̀m, a dzə̀ sá kiyá ke kí‑iì meen ne ji nshòv waamé e ghvə̀m mo Nebukadnessar‑iì saʼan ne vifon və́ é Babilon.

² Wáa dzə e ghan fen, a vé rə́r fòn woó Babilone gím Jerusalem, e sùm fó e rə́r sí, a Jeremia woo *ŋgaà ntum Nyùy dzə̀ é Jerusalem, aá fín wun e kibùʼ ke nsheèlav ke kí dzəə̀n é ntoʼ Juda.

³ Fòn Tsədekiya woó Juda‑aà fin wun e lav, sáʼ jii, wù sà ghán, fiʼtì ntum Nyùy ye wù fiʼtì ji ka á? Wù fiʼtì ji Nyùy Tàr suuy a jii, wun sí wáy a ŋkàlaʼ rə̀n e fòn woó Babilon kiwo, é wù koó wíri, e fəə̀ shó.

⁴ A bó Fòn Tsədekiya woó Juda yòʼ wíy bòy saa fo wír veé Babiloné kiwo. E ké ru kí, á kù wíy way wun e fòn woó Babilon kiwo, é wùn wun wáa suŋnín, é wìr wáa yen wùmòʼ.

⁵ Fòn woó Babilon wíy lì Tsədekiya, e dù sho e Babilon. Wù du, é wù kú a dzə fo, e meé mo wún wómé wíy bòŋ. A Tsədekiya fə̀m lò, a fùnèn wír veé Babilon, bo wù yòʼ‑óò só áwune. Suuy a Nyùy Tàr.

⁶ Nyùy Tàr nèn yiì lò, e sùŋnín e mò woo Jeremia, e sùúy jii,

⁷ «Leéy, e yèn, Hanamel woo wan Shallum woo fər tàr won yíi wìy, e yen wò ji à yún á súm və́ wo wú dzəə̀n é Anatot, mo dzəə̀n wò wir kfəə woo fó mentsə̀m wo a dzə̀ wù yùn.»

⁸ Fər wom Hanamel nèn yiì wìy, e yèn mo é kibùʼ ke nshèelav fo mò‑oò dzəə̀n, kù mo Nyùy Tàr kì yòŋèn e mò, e nèn yòŋ ji m yún á súm və́ wo wú dzəə̀n é Anatot, e nsay Benjamin, bìʼ á fo kér a mo ghay wóo tin kirə́ʼ kee shooy, e yun ji kém. M nèn kìíy rú ji kì sùŋnín á Nyùy Tàr e mò.

⁹ M nèn yùn súm woó Anatot və̀y fo fər wom Hanamel, e fìʼ *kisha ke mbàm ke fəvír kí *ashekel nshòv saàmbà e ghvə̀m, e làʼ sho.

¹⁰ Mò‑oò sàŋ ŋwàʼ, e fìnèr, a dzə̀ wo wú din ji m yùn á ne fó, e tàʼ anjen ve á tiím vinjen vém, e bóo fìʼ vidzəəsì vé mbàm e mfìʼ si.

¹¹ M nèn lì aŋwàʼ vee abaà ve á din ji m yùn á ne fó, wo wú dzəə̀n e finèrìn wùn à wo wú dzəə̀n e rəə́, aá din mo nsìysì‑iì dzəə̀n,

¹² e fò e Baruk wo tàr wov dzəə̀n Neria woo wan Maaseyia. A mò‑oò fó, a Hanamel woo fə́r wom wùn aànjen vém ve vé‑eè wayin kiwó e ŋwàʼ, à wír ve vé‑eè dzəə̀n é kibùʼ ke nsheèlav adzə̀me yéné.

¹³ Mò‑oò naàrì e Baruk e wìr dzə̀m si jii,

¹⁴ Nyùy Tàr woo Taà Mànjòŋ, wun woo Nyùy wìr veé Isray suuy ji à sə́ á aŋwàʼ vìn, wo wú dzəə̀n e finèrìn wùn à wo wú dzəə̀n e rəə́, e wày é ntòn wo bomén, fo á yii lem aŋwàʼ ji á fiʼ dzə̀ʼə̀m ntàmda.

¹⁵ Nyùy Tàr woo Taà Mànjòŋ, wun woo Nyùy wìr veé Isray suuy a jii, «Wíri kù kfə̀n wíy a yun kéŋ e nsay fèn. Á wíy a yun lav si wùn à kwáʼ si, à súm sé vitiír vé vayin si.»

Bunri Jeremia

¹⁶ Mo m foon aŋwàʼ njùn vin e Baruk woo wan Neria, e nèn a bùnrì Nyùy Tàr, a suúy jii:

¹⁷ «Àshè, Nyùy Tàr woo Taà Ndzə, dzə̀ wò wo wò‑oò bomen yúv wùn à nsay e vitaáví vé ve ghaʼán ví, wò wo à dzəə̀n e gháʼtín. Kinyo ke a dzə̀ kí ghàʼ wò ki yòʼ dzə̀.

¹⁸ À din koŋ yé ye wiyí e wíri ansə̀kì ansə̀kì. Yii bèy, aà lo, à màʼ ŋgeʼ aàtàrí, yì ràmtìn, e dù e wóné. Feyì feyì, à dzə̀ Nyùy wo kuʼùn, aà dzə̀ e gháʼtín. Yír yée dzə̀ Nyùy Tàr woo Taà Mànjòŋ.

¹⁹ À kér vifií vé ntir ve ghaʼán ví, yii viŋgaʼnìn ve vinyò. À yii yén vinyo vidzə̀m ve wíri yii, laáme wir dzə̀m mo liì və wùn à yii rəə́ dzəə̀n.

²⁰ Wò‑oò yiì ne dìn visəəm ve ghaʼtín ví, e yiì viŋgaʼnìn ve vinyò e wòŋ Ejiv, aà kù dzəə́ yii bèy lán e Isray, yii sa e wìr msòŋ e dzə̀m mvəm, yír yée nén a dzə e kiíyín kirə́ʼ kidzə̀m.

²¹ «Wò‑oò bèmér aŋgàa vibàn e visəəm ve ghaʼtín ví wùn à viŋgaʼnìn ve vinyò vi, e fə̀ə́r wír vé veé Isray fo Ejiv e vitaáví vé ve wiy ví, wò wo à dzəə̀n e gháʼán.

²² Wò‑oò fə̀ə́r áwune, e fò nsay rə̀n ji yéev, a dzə̀ nsay ye wò‑oò lìʼìn ne aàtàr véví ji à wíy fo aáwune, nsay, a vín nàʼ wùn à vilu vi tsəətìn sho tsə́ətin.

²³ Áwune nəə́, e yòv fó, e nèn tèn fó a yunín wò, a jùmrì nsər sé. Áwune yòʼ‑oò ló a yiì vinyo ve wò‑oò yòŋèn ji á wáa yiì. À nen yiì, ŋgeʼ rə̀n gbú aáwuné kitu.

²⁴ «Leey, e yèn, wír veé Babilone yàvtí ne vikfə́r ve tiy, e kaàrí ŋkàlaʼ sho ji á nəə́, e sùm. Á bèy, a rə́r wùn à jiŋ, à kifə̀ʼ ki lo, e way áwune áàŋgàa vibàn ve á taáme áwuneé wo, aá sum. Kí à yén ji kinyo ke wò‑oò suuyin kidzə̀m ki sí kooyì.

²⁵ Àshè, Nyùy Tàr woo Taà Ndzə, kfə̀n lò ne wò lèn, e sùúy ji m fəə́r á mbàm, e yùn á súm woo shoon, a ker sa anjen fèn, aá sí lo, e way ŋkàlaʼ rə̀n e wír veé Babiloné kiwo.»

²⁶ Nyùy Tàr nèn sùŋnín e mò jii,

²⁷ «Yuúrí, e yù, m dzə̀ Nyùy Tàr woo Nyùy wìr msòŋ e dzə̀m. Kinyo ki yòʼ dzə̀ shó ke a dzə̀ kí ghàʼ mo.

²⁸ Bo kí dzə̀ jii, m lo, e way ŋkàlaʼ rə̀n e Fòn Nebukadnessar woó Babilon kiwo, é wùn à wír vəə́ ton fó. Suuy mo woo Nyùy Tàr.

²⁹ Wír veé Babilon ve á taáme ŋkàlaʼ rə̀ne yíi nəə́, e tòn fó e və́yí, e tatí, e tòn wùn à lav see fo wíri kóʼ, ton kiláy é kitu wo, cu *Baal sho, kfə̀n maʼ meluʼ fo ji cú anyùy, yii, a dòʼshwíiy wom kóʼó.

³⁰ «Wír veé Isray wùn à veé Judàa kù‑uù rə́si yii vinyo a dzə̀ ve ví wáa nyar mo, e kèʼ fo áwuné ŋgwàrìn wòŋ. Wír vìne kù tínsin mo tínsín e yii yév kisaŋe. Suuy mo woo Nyùy Tàr.

³¹ Ŋkàlaʼ rə̀n yiì ne, kilòŋ kí wáa shwiíy mo, dòʼshwíiy wom kóʼ, e kèʼ fo kishiíy ke vé‑eè bàʼrìn, e wìy shem lán, a mo‑óò bvə́ʼə́y fo mǒ si.

³² A m kù‑úù bvə́ʼə́y bìʼ vinyo ve bi ví vidzə̀m ve wír veé Isray wùn à veé Judàa yiìn, e ŋàʼár dòʼshwíiy wom shó. A kù‑uù dzə̀ áwune wùn aàfon véví, à vilìmbìy vi, aàtàá cùu, à wír ve á dzəə̀n ji aŋgàa ntum Nyùyi, e lì wír ve á dzə́ e Jerusalem adzə̀m.

³³ Áwune bìn ne ndzə̀m e mò, e laà yòʼ bìnkìr, a leéy a dzə̀ mo. Yii bèy, a m kù rə́si yéʼey áwune, la á yòʼ yuùrí kinyo kém, aá yoʼ sə̀ ntir.

³⁴ Vé‑eè tìír joonè wóv woo mebvə̀m e lav ye dzəə̀n yéem, e bìvír fó.

³⁵ Áwune kfə̀n‑eè bòm kirə́ʼ ké cù ke nyùy woo Baal e Kiwoóy ké Ben Hinnom, a lì wón vév vee vilum wùn à vee vikìyí, a yiì cu sho e nyùy woo *Molek, a bó m yòʼ‑oò yiì yòŋ kinyo kee bey, a bó kí yòʼ fə̀m‑eè yiì ne a dzə e mǒ kwàʼtì ji áwune yii kfə́ə joònè woo ben, e yiì, é Juda jáy.»

Nyùy káʼ ji wun wíy siìr a wír və́ aáwuné nsay

³⁶ Nyùy Tàr nèn lò, e yòŋ e mò woo Jeremia jii, «Á bèy lèn, mo woo Nyùy Tàr woo Nyùy wìr veé Isray nén a suúy kinyo kímóʼ kí kùm ŋkàlaʼ rə̀n, ye vèn à wír ámóʼó fiʼtì ji rə́r wùn à kifə̀ʼ ki yíi way e fòn woó Babilon kiwo.

³⁷ Vèn yuúrí, e yù, m wíy jùm wír veé ŋkàlaʼ fèn, aá du é vitum, é m kfən wìy bàʼtí áwune fó fo, e siìr fèn. A m kù wíy baʼtí fo vitum vidzə̀m, fo kilòŋ kí‑iì shwiiyin mo, dòʼshwíiy wom wo tavín kóʼ, kí nyár mo, m jùm áwune, á dùkìr. M siir áwune é nsay fèn, é m nèn a kìŋsìn, aá wáa dzə kijuŋ,

³⁸ aáwune nèn a dzə wír vém, e m wáa dzə Nyùy wov.

³⁹ M wíy yiì, aáwune wáa dìy kinyo kimòʼón, a tiír vifií cáʼ ji á wáa ghvəm mo ghán sidzə̀m, aáwune nèn wìy a dzə kijuŋ, é rám yéví wìy a dzə sa bèy.

⁴⁰ M wíy gwàr *mensaŋ vèr áwune, a dzə̀ me mè kù wíy a tiy fo ghán sidzə̀m. Bó m yòʼ dzəə́ wìy yàr fó a yiì kijuŋ aáwune. M wíy yiì, é melív mev mè wáa tiy e mǒ wùn, aá wáa ghvəm mo, e làa yòʼ dzə́ə wìy bìn ndzə̀m e mò.

⁴¹ M wíy a ker áwune é shiliv she juŋ shi, a geʼ sho. M wíy tuúy áwune é nsay fèn ŋkuuŋkùŋ, a leéy fo fo shilív shém shidzə̀m, à vitaáví vém ví vidzə̀m.»

⁴² Nyùy Tàr suuy jii, «Mo mò‑oò wìyìn e rə́mrə́m ŋgeʼ rə̀ne e wír vìné kitu, kù dzə̀ réŋréŋ mo m yíi wìy e vijuŋ ve ghaʼtín ví vidzə̀m, ve m kàʼàn áwune shó.

⁴³ Mo vèn fə̀m yoŋ ji nsay rə̀n sì ji wóʼ fo bó wíri, kìn nyám si yòʼ yii dzə́, bìʼ wír veé Babilon ve á tònèn ne fen. Vèn wáa kiíy jii, wíri kù dzəə́ wìy a yun virə́ʼ é nsay fèn.

⁴⁴ Wíri kù wíy a fətí mbàm, a yun sho, a saŋ aŋwàʼ njun, áànjene wáa wayrí wó sho, a fìnèr. Á kù wíy a yiì bèy e nsay Benjamin, a yiì bèy e ntèʼ se sí kaarin Jerusalem, a yiì bèy e ŋkà se laʼ seé Juda, à se sí dzəə̀n é mbìv wòŋ yee agwan, à se sí dzəə̀n é mbìv Shefela, à seé Negev si, a dzə̀ bìʼ fo m wíy siìr woŋ wóv aáwune. Suuy mo woo Nyùy Tàr.»