Jeremia 31 - ŊWÀʼ NYÙY

Wír veé Israyi wíy kfən aáwuné nsay

¹ Nyùy Tàr suuy jii, «Wíy lòo dzə e ghan see shooy, é m wáa dzə Nyùy ràm seé Isray sidzə̀m, aáwune wáa dzə wír vém.

² «Wír ve vé‑eè bòyìn fó rərí‑iì bòy, e kòóy rəsìn e kirə̀ʼ ké woʼ kí, a dzə̀ rəsìn ye wír veé Israyi‑iì diyì. Suuy mo woo Nyùy Tàr.»

³ Nyùy Tàr‑iì dìn kitú kfə́ e vèr é yàŋgùʼ, e yòŋ jii: «Koŋ ye m koŋ vené yòʼ wíy mày, m kù wíy a kòŋ ven ghán sidzə̀m.

⁴ Éè Isray, à dzə̀ ŋgònjuù yem, m kfə̀n wíy bàʼrì wò, áà kfə́n, a dzə e baʼrìn. À kfə̀n wíy lì menshùm mè, e fəə sho, a cèŋ, a yu vijuŋ.

⁵ À kfə̀n wíy bìy vitiír vé *vayin, aà wíy bìy aàgwan veé Samaria. Vé bìyi wíy bìy, é ku wìy a yu áwune vijuŋ fo fo.

⁶ Ghán sí wiyì se vé ŋkiyi wíy a jàŋ fo Gwan Efrayim jii, ‹Vèn ŋáʼáy, é vèsən wáa dù e Sion, e dù, e yen Nyùy Tàr woo Nyùy wòsən.› »

⁷ Nyùy Tàr yoŋ jii, «Vèn wáa yòv kitávín, a sheʼrí rám Jakov. Leŋe wáa koʼ mo dzəə̀n wun fon vitum. Ŋkèŋé wáa koʼ, é vèn wáa sùyrì mo, a suúy jii, ‹Éè Nyùy Tàr, ku sə̀ wír vé, kibér ke wìr vé veé Isray.›

⁸ Vèn leéy ri, e yèn, mo woo Nyùy Tàr, m wíy wìy aáwune fó vitum veé mbìv yee kuy, e baʼtí áwune fó buu se ndzə. Áwune wíy a wìy aàmfìri shó, aàntèŋe, a wìy, à vikìy ve á nyoor wóné, à ve á lúmée. Ŋkfə̌n wìri wíy a kfən fèn e gháʼán.

⁹ Áwune wíy a wìy, a dìy, a mbaà a dzə̀ mo, a m lí ne áwune, a kfən sho. M wíy dànèr áwune, e shaà sho e ghaŋ se ndzəv, e dzəə ye yì dzəə̀n ben ji fèm, fo bó yòʼ dzə̀ wìr gbù. A dzə̀ bìʼ fo m dzəə̀n tàr à Isray, a Efrayim dzə̀ wán wom mbìy.

¹⁰ «Éè vitum, vèn yuúrí kinyo ke Nyùy Tàr kí, e sàmèr e virə̀ʼ ve ví dzəə̀n é ghaa rìbà ndzə̀v é ndzəywoŋ. Vèn ku fìʼtì jii, wun wo wù taʼarin wír və́, kù wíy baʼtí áwune, a leéy fo fo, kù mo nshìy lèéy fo wun ŋgoo nyàm.

¹¹ Nyùy Tàr wíy tin rám Jakov fo vikwàn, e fəə́r áwune fo ŋgaà wov vibàn wo tavín wo.

¹² Áwune wíy a wìy, a yòv, a yu vijuŋ e Gwan Sion. Á wíy a sheʼrí afómo ve Nyùy Tàr foon aáwune. Á wíy a sheʼrí vifá ve yi wùn à meluʼ mè, à meŋgvə́r mè, a sheʼrí ŋgoo se bvəy wùn à sé nàʼ si. Dzəʼə̀m yéví wíy a dzə moo kiboó ke kí rəsìn ghán sidzə̀m, é la áwune yòʼ dzəə wìy a ker kíghàʼ gheéy.

¹³ Wónlě ŋgòne wíy a shèr ceŋ, a sheʼrí, é wónlě nsùm wùn à ŋgày sé wìr si wáa yu vijuŋ. M wíy bìnèr diy ye áwune diyì, é yí kfə́n ji kishéʼrì, e sham áwune, e bìnèr mendzən mev é vijùŋ.

¹⁴ M wíy yiír atàá cù e vifá ve yi vee jeéy ví, e bùʼ wír vém e kfəə́ se vifa ve juujùŋ vi vidzə̀m. Suuy mo woo Nyùy.»

Nyùy Tàr shám Isray

¹⁵ Nyùy Tàr suuy jii: «Shirəə́ shi kóʼ fo Rama, yòv kpu kóʼ fo fo, aá diy kibiíbí. Dzə̀ Racel mo wù diy wón və́, aá sə́mer ntéŋ, a dzə̀ bìʼ wón və́ ve á yòʼ dzə̀ə́.»

¹⁶ Nyùy Tàr yoŋ e wun jii, «Sə́sín, lá à yòʼ dzə́ə a dìy, sòr mensíy mè fo wò si. M wíy laamé wò bìʼ wón vé ve wò‑oò lìyìn. Áwune wíy kfən e bàm fo aŋgàa vibàné nsay. Suuy mo woo Nyùy Tàr.

¹⁷ Kwaʼtì ye juŋe dzə̀ kùm kibvəə́shí ké. Wón vée wíy kfən aáwuné nsay. Suuy mo woo Nyùy Tàr.

¹⁸ «M yú feyì feyì mo rám Efrayime ndzə́kir, suuy jii, ‹Éè Nyùy Tàr, vèr‑iì dzə̀ moo nyám ye á yóʼ ne lànér, à tír ver, vèr yúnín wò. Lì ver é bàm, é vèr kfə́n, e yèn wò. Kù dzə̀ wò Nyùy Tàr woo Nyùy wor.

¹⁹ Vèr‑iì bìn ndzə̀m e wò, lèn wáa dzə, a vèr sí rəm ntéŋ. Mo à yiìn, vèr kiíy jay wor, vèr nén a dzə e nsòvkìtu, a ker woómé wùn à dzə̀rkìtu, bìʼ ajay ve vèr‑iì yii, aá dzəə́ kúy kuyín.› »

²⁰ Nyùy Tàr suuy jii: «Bó rám Efrayime yòʼ dzə̀ ji wán wo m kòŋèn a? Kí m tìír vifií é wùn wó feyì? Fə̀m mo m lo, m wàa suŋnín e wùn wó, m kù dzəə́ kér shíi və. M lo, m kù a yar jíŋ rə, a m kù wíy sham mendzən mvə.

²¹ «Éè ŋgònjuù, wò woo Isray, túyrí vifá vi, a səə̀m dzə́ə shó. Yiì visəəm ví é ghaŋ se dzəə, é ví wáa sə wò. Á kuumé dzə́ə kijuŋ, dzə́ə ye wò‑oò fəən shó, a kfən. Á kfən e bàm e wò ŋkà se laʼ.

²² Éè làykìsáŋ ŋgònjuù, à wíy tùʼtìn bèn, e jòʼsì e le? Nyùy Tàr sí keʼ kinyo ke fíy ki é kitu ke nsay, moo kinyo ke wiíy wo wù lo, a kìŋsìn lumèn.»

Nyùy kfə̀n wíy səə̀vì wír və́

²³ Nyùy Tàr woo Taà Mànjòŋ, wun woo Nyùy wìr veé Isray suuy jii, «M wíy siìr wír veé Juda fo kwaʼ vikwàn. Á wíy a yòŋ, à ve á dzəə̀n é ntèʼ sií shó jii: « ‹Nyùy Tàr ku səə̀vì gwan wun woo Nyùy wo ranén, kirə́ʼ ke dzəə̀n ké vinyò ve ru ví.›

²⁴ «Wir dzə̀m, à ve á lim súmé, à ve á liy a dzə̀ nyáme wíy tatí, a dzə e nsay Juda wùn ǎ ntèʼ see fó.

²⁵ M wíy rəə̀r wír ve á dorkin ne, e tavír wír ve á yòʼ dzəə́ kér kitar.»

²⁶ Á bèy, mo woo Jeremia yú kin, e yìmèn, e lòo leéy, e yèn ji m kì buùné á mbuùné ye juŋ.

²⁷ Nyùy Tàr kfən lò, e sùúy jii, «Á yuúrí, e yù, ghán sí wiyì se m lo, e yiì, é wíri wùn à nyám si wáa tsəə̀tìn tsəə̀tìn é nsay Isray, à ye Juda.

²⁸ Yì‑iì dzə̀ é ghan se sí‑iì shaàn, mò‑oò kìyrí áwune, e lò, e mèn fo fo, e kèr fó, e kfə̀n nə̀ə́, e tòn fó, e sə̀ʼsí, e màʼ ŋgeʼ ye tavín fó. Kù dzə̀ sá mo m wíy lì ghán lèn, e bàʼrì fó, e tuúy. Suuy mo woo Nyùy Tàr.

²⁹ «Wíy lòo dzə e ghan fóo fèy, é la wíri yòʼ dzə́ə a yòŋ jii: « ‹Atàrí kfə̀r ne kicí ke kí kwáyri, sóŋé ló a ŋèʼ a dzə̀ wóné.›

³⁰ Wìr kù wíy a kpu a dzə̀ fo və́ə woo jay. Wìr kfə́r kicí ke kí kwáyri, é wáa ŋèʼ rə́ yee sóŋ.»

³¹ Nyùy Tàr suuy jii, «Vèn leéy, e yèn, ghán sí wíy gheén, é m gwar *mensaŋ me fíy mè vèr à wír veé Israyi, à veé Judàa.

³² A bó mee shoon mè yòʼ dzəə́ wìy a dzə moo me mò‑oò gwàrìn vèr aàtǎr ram véví é ghan se mò‑oò gharin áwune e kiwó kém kí, e fə̀ə́r fo wòŋ woo Ejiv. Áwune‑eè bìvír mee shooy, fə̀m mo mò‑oò dzəə̀n tàr wov. Suuy mo woo Nyùy Tàr.

³³ «Yii bèy, a mensaŋ me m wíy gwàr vèr à wír veé Isray, a me mvə mè seéy ne mè dzə̀ jii, m wíy way nsər sém aáwuné vifii, e saŋ aáwuné meliv. M wíy a dzə Nyùy wov, aáwune wáa dzə wír vém. Suuy mo woo Nyùy Tàr.

³⁴ Bó wìr yòʼ dzəə́ wìy a yeʼéy wír woo wun ghaŋ, kìn ji fə̀r wáa tir fə́r ji wù kiíy Nyùy Tàr. Áwune wíy kiíy mo wír adzə̀m, à wìr wo kuʼùn, à woo fó tèr. M wíy làysìn ajay vév, e làa yòʼ dzə́ə a kuumé vinyo vév ve bi ví gheéy. Suuy mo woo Nyùy Tàr.»

³⁵ Vèn yú kinyo ke Nyùy Tàr suuy ki, wun wo wù fèrìn shúy, yì wáa ban e shùy, e fèr ŋwee wùn à mejiy mè, mè wáa ban vitsə́ʼə́. Wù lo, wù wùr rìbà ndzə̀v, wù wàa yòr. Yír rəə́ dzə̀ Nyùy Tàr woo Taà Mànjòŋ.

³⁶ Wù suuy jii, «Mo bó yòʼ dzə̀ kí kòóy ji m yii, é vifá vìn vi yar fó a lìm mo kí dzəə̀n, bo bó yòʼ dzə̀ sá feyì m wìy màʼày rám Isray. Bó yòʼ dzə̀ m màʼày, aá lay fó kitum ke m leey fo fo.»

³⁷ Nyùy Tàr kfə̀n suuy jii, «A dzə̀ wìr lì mfìʼ mo yúví kùʼùn, a dzə a? A dzə̀ sá wìr ghànén kitú ke nsay kidzə̀m a? Mo bó yòʼ dzə̀ kí kòóy bey, bo bó yòʼ dzə̀ sá kí kòóy ji m maʼay rám Isray, ji á rə́si buʼtì a vinyo búʼtin. Suuy mo woo Nyùy Tàr.

³⁸ «Vèn leéy, e yèn, ghán sí wiyì, se á kfə̀n wíy bom ŋkàlaʼ Jerusalem ji ye Nyùy Tàr, e kèʼ fo Kirùmèn ke Hananel, e dù, e bàʼ e Shùu Kày woó Kimbvən. Suuy mo woo Nyùy Tàr.

³⁹ Kinshàán ki wíy nyeŋ tìítiy e bìíy, e kèʼ fo fo, e dù e Gwan Garev, e nèn wòmèr, e dù e Goa.

⁴⁰ Kiwoóy ke á yii maʼày dzə́n sé wíri shó, kfə̀n sər sa kibvə́ sho, e lì súm seé bvə̀m gwan, e kèʼ fo Kiwoóy ké Kidron, e dù, e bàʼ e kor woó Shùu Kày Nyàm se Ŋkoʼ, e mbìv ye shùy yii tó fo foo, wíy a dzə kirə́ʼ kee jeéy kí kidzə̀m ji ké Nyùy Tàr. Bó á yòʼ kfə̀n dzəə́ wìy a tuŋ fó, aá yòʼ dzəə́ wìy bvəʼə́y.»