Jeremia 28 - ŊWÀʼ NYÙY

Jeremia wùn ŋgaà ntum kimboʼtì woo Hananiya

¹ Yì‑iì dzə̀ é kiya foo fèy, e ŋwee wo wú meen ji tàn, a kiyá kìn ki dzə̀ ke kí‑iì meen ji kweè mo Tsədekiya‑aà kèʼèn, a saʼ vifon e Juda, Hananiya wo yì‑iì dzəə̀n ji ŋgaà ntum Nyùy wùmòʼ wìy, e sùŋnín e Jeremia, a Jeremia dzə̀ é lav cù wùn aàtàá cùu, à wír ámóʼó anín. Hananiya‑aà dzə̀ wan Asur, a wù ló fó Gibeon. Wù‑uù sùúy ji

² Nyùy Tàr woo Taà Mànjòŋ woo Nyùy wìr veé Isray suuy a jii, «M bèʼ ne kimbùŋ ké fòn woó Babilon, e sə̀ʼə́r fo věn mbèʼ.

³ Viyá vi yíi lò ji ví shaa vibaà, é m siir vifá ve ker vidzə̀m vee Nyùy Tǎr lav ve Fòn Nebukadnessar woó Babilon‑eè fəərin fó fèn, e dù sho e Babilon.

⁴ M yíi siìr sa Fòn Jehoyiacin woó Juda fèn, wun woo wan Jehoyiakim. M yíi siìr wùn à wír veé Juda ve vé‑eè koon, e dù sho e Babilone adzə̀m. M kù yíi beʼ kimbùŋ ké fòn woó Babilon, e səʼə́r fo věn mbèʼ. Suuy a Nyùy Tàr.»

⁵ *Ŋgaà ntum Nyùy woo Jeremia nèn sùúy kfə́ kee kinyo e Hananiya wo yì‑iì dzəə̀n sá ji ŋgaà ntum Nyùy. Wù‑uù suuyì, aàtàá cù wùn à wìr dzə̀m wo wù‑uù dzəə̀n e Nyùy Tǎr lavi tíy fo si.

⁶ Wù‑uù bìnsí jii, «Kòcònè, Nyùy Tàr ku yiì bèy. Wù ku yiì, é kinyo ke à fìʼtìn kí ku kòóy rú bey, é vifá ve ker veé lav cù vi kfə́n é bàm fó Babilon wùn à wír ve vé‑eè kuuyin fó fèn, e dù sho foo.

⁷ Yii bèy, yuúrí kinyo ke m suuy e wò, kfə̀n suuy e wìr dzə̀m ki.

⁸ Aŋgàa ntum Nyùy vee fó ŋgùʼ ve vé‑eè wìyìn mbìy fo wòsòo‑oò wìy, a fìʼtì ji rə́r wùn à jiŋ, à kifə̀ʼ ki wíy nəə́ a vitúm vinín wùn à woŋ se tavkín sí.

⁹ Ké ŋgaà ntum wo wù fiʼtì kfə́ ji Nyùy wíy yiì, é nyaáŋ wáa dzə ki nén a dzə jii, á yíi lòo sìn, a kinyo ke wù fìʼtìn kí gheén ne, aá nèn kìíy ji wù lò rú a dzə̀ á ntum Nyùy Tàr.»

¹⁰ Ŋgaà ntum woo Hananiya nèn sə̀ʼə́r kimbùŋ fo Jeremia mbèʼ, e bèʼtí,

¹¹ e nèn sùúy, a wìr dzə̀m tíy fo, ji Nyùy Tàr suuy a ji yíi lòo dzə e bǎm viya vibaà, é wun béʼ á kimbùŋ ke Fòn Nebukadnessar woó Babilon neèrìn e vitúm ví mbèʼ. Á bèy, ŋgaà ntum woo Jeremia nèn lò, a dù du rə́.

¹² Ŋgaà ntum woo Hananiya‑aà bèʼ kimbùŋ ké ŋgaà ntum woo Jeremia bèy, vishiíy ví lòo liysín, Nyùy Tàr nèn sùŋnín e Jeremia jii,

¹³ «Dù, e sùúy e Hananiya ji Nyùy Tàr yoŋ a jii, mo wù beʼen kimbùŋ kee kicí kí, bo wun yíi fèr lèn a dzə̀ á kee kisha ki.

¹⁴ Nyùy Tàr woo Taà Mànjòŋ, mo woo Nyùy wìr veé Isray suuy jii, ‹M yíi neèr kimbùŋ ké kishà ki e vitúm vìn vidzə̀m ví mbèʼ, aá wáa beʼ. Áwune yíi a lìm fo Fòn Nebukadnessar woó Babilon. M yíi yiì sa, é nyám se kwaʼ si wáa lìm fo wun.› »

¹⁵ Ŋgaà ntum woo Jeremia nèn yòŋ e ŋgaà ntum woo Hananiya jii, «Hananiya, yuúrí, e yù, à yiì ne, wír vìne biímé kimboʼtì, a bó Nyùy Tàr yoʼ tùm wò.

¹⁶ Bo ke Nyùy Tàr yoŋ ki dzə̀ jii, ‹M sí yìi laàr dzəʼə̀m yé fo kitu ke nsay. À yíi kpu e mvə̀m kiya fèn, a dzə̀ bìʼ fo à bayirin ne wíri, á táv kitú fo Nyùy Tàr.› »

¹⁷ Wáa dzə e ŋwee wo wú meen ji saàmbà, e kiya foo fèy, ŋgaà ntum woo Hananiya ku nèn kpù.