Jeremia 27 - ŊWÀʼ NYÙY

Jeremia kúr kimbùŋ ké mbòŋ e wun kilòŋ

¹ Tsədekiya woo wan Josia‑aà yì vifon e Juda, shintàm shi lòo dàr, Nyùy Tàr súŋnín e mò woo Jeremia.

² Wù‑uù yòŋ e mò jii, «Fèr kimbùŋ kí, é kí wáa ker akfəə̀ vee júv, e kùr e wò kilòŋ.

³ Tsə́nsí ntum e fòn woó Edom, e tsə̀nsí e fòn woó Moav, e tsə̀nsí e woó Ammon, e tsə̀nsí e woó Taya, e lì woó Sidon. À kù yíi a tsənsí, a tiisí a dzə̀ e vév vé ntum ve á wìyìn é Jerusaleme, ji á bun Fòn Tsədekiya woó Juda.

⁴ Suúy aáwune ji á du, e tiìsí aàtàr véví á ji Nyùy Tàr woo Taà Mànjòŋ, woo Nyùy wìr veé Isray suuy a jii,

⁵ ‹Kù dzə̀ mo wo mò‑oò bomen kitú ke nsay e vitaáví vém ve wiy ví, mo və̀n, wo m dzəə̀n e gháʼán, e bòm wir dzə̀m, à nyám se sí dzəə̀n shó si. A dzə̀ kù kìíy mo wír wo m fó sho.

⁶ Lèn və̀n, m fò ne vitúm vidzə̀m e ŋgaà lìm wom woo Fòn Nebukadnessar woó Babilon, e kfə̀n fò nyám se kwaʼ sho, sí wáa lìm sa fo wun.

⁷ Vitúm vìn vidzə̀m vi wíy a lìm fo wun, e kfə̀n wìy a lìm fo wón vəə́, à fo wón won vəə́, e wìy dù, e meé mo kfə́ kee kitúm ki wíy gbù, é vitúm vinín wùn aàfon ve tavkíné nèn siìr áwune ji akwàn.

⁸ « ‹Yii bèy, a kitúm kee shó, kìn woŋ woo shóo lòo dzə, e tèn fó a lìm fo Nebukadnessar woo fon Babilon, a yiì mo sáʼ rəə́ taʼà, bo m lo, e màʼ ŋgeʼ fo. Rə́r sí yíi nəə́ fo, é jìŋ koó, é kifə̀ʼ ki wiy, e meé mo m yíi màʼtì Nebukadnessar, é wù laar fó ŋkuuŋkùŋ. Suuy mo woo Nyùy Tàr.

⁹ Á bèy, lá vèn yòʼ a yuurí kinyo ke aŋgàa səm vifòn vén, kìn wír ve á shwéŋ vinyo, kìn ve á tóʼti njèm, kìn ve á mbaa aŋkfə, kìn aŋgàa səm, wír vìn ve á yoŋ ji lá vèn yòʼ a lìm a fo fòn Babilon.

¹⁰ Kinyo ke áwune fiʼtì e vèn kí dzə̀ kimboʼtì, a kí yíi yiì, é m jum ven fo věn nsay, é vèn fəə́, e dù, e kpù é ndzə.

¹¹ Yii bèy, a kitúm ke kí wíy a yunín fon woó Babilon, a lìm fo wun, m wíy màʼtì, é kí wáa dzə e rə́ə yee nsay, a lìm fó.› » Á kinyo ke Nyùy Tàr suuyin.

¹² Kù dzə̀ sáʼka wo mò‑oò fèrìn sá e Fòn Tsədekiya woó Juda. Mò‑oò sùúy shó jii, «Fòn wùn à kitúm kfə́ kí wáa yunín a fon woó Babilon, a lìm a fo wùn à wír vəə́, é wùn à kitúm kfə́ kí nèn waà wìy lùŋ.

¹³ Fòn sà màʼtì ji wùn à wíri kpú rə́r, e kpù jíŋ, e kpù kifə̀ʼ, bìʼ ka á? Á kinyo ke Nyùy Tàr yòŋèn ji kí wíy koóy a kitúm ke kí tenen fó a yunín fon woó Babilon.

¹⁴ Lá vèn yòʼ a yuurí kinyo ke wìr ve á dzəə̀n ji aŋgàa ntum Nyùy vìyi suuy e vèn, ji lá vèn yòʼ a lìm fo fòn woó Babilon. Áwune tiísi a dzə̀ ntum kimboʼtì.

¹⁵ Ke Nyùy Tàr suuy ki dzə̀ jii, wun yoʼ tùm á áwune. Áwune tiísi a dzə̀ á ntum kimboʼtì e wun yir. A kí wíy lò, e jòʼsì a dzə̀ ji Nyùy Tàr wíy fəə́r ven fó wòŋàn, é vèn du, e kpù é ndzə, vèn aàŋgàa ntum ve á bóʼti vené.»

¹⁶ M nèn lò, e sùúy aàtàá cù wùn à e wìr dzə̀m ji Nyùy Tàr suuy a jii, «Lá vèn yòʼ a yuurí kinyo ke aŋgàa ntum véné fiʼtì e mǒ yir, ji á sí lo e lì a vifá ve ker veé lav cù fo Babilon, e kfən sho e bàm. Áwune tiísi a dzə̀ ntum kimboʼtì e vèn.

¹⁷ Lá vèn yòʼ yuùrí kinyo kév. Vèn wáa lìm a dzə̀ fo fòn woó Babilon, e fíʼ lùŋ. Vèn taʼ e yiì, é ŋkàlaʼ rə̀n du é vifə̀m bèn ji ka?

¹⁸ Aáwune bèn dzə̀ rú vé ntum vém, aá kér jí sém, áwune wàa lon rì mo woo Nyùy Tàr woo Taà Mànjòŋ ji m yii, é la á yòʼ lì kibér ke vifa ve ker ve ví dzəə̀n é lav cù e Jerusalem, à ve ví dzəə̀n é ntoʼ Juda vi, e dù sho e Babilon.»

¹⁹ Nyùy Tàr woo Taà Mànjòŋ súŋnin bèy, a wù yoŋ a dzə̀ vitóm veé lav cù vee vibaà wùn à mbǐʼ mendzə̀v wo á yoŋ ji Rìbà Ndzə̀ví, à vitiir ve ví kér kár vi, à vifá ve ker vímóʼ ve ví‑iì berin é ŋkàlaʼ fèn vi.

²⁰ A dzə̀ vifá ve Nebukadnessar woo fon woó Babilon yòʼ‑oò lo lì e ghan se wù‑uù koon Fòn Jehoyiacin woó Juda fo Jerusalem wo yì‑iì dzəə̀n wan Fòn Jehoyiakim. Wù‑uù koò wùn à kfə́m sé wìr veé Juda, à veé Jerusaleme, e dù sho e Babilon.

²¹ Kinyo ke Nyùy Tàr woo Taà Mànjòŋ, wun woo Nyùy wìr veé Isray suuy kùm vifá ve ker ve ví berin e Nyùy Tǎr lav e Jerusalem, à ve ví berin é ntoʼ Juda ki dzə̀ jii,

²² «Vifá vee shoon vi dzə̀, aá wíy lì, e dù sho e Babilon, é ví goʼ fó, e wìy dù, e meé mo m wíy kòŋ ji m siir é bàm, é m nèn lì, e kfə̀n shó e bàm, e lèm e kirə̀ʼ fen. Suuy mo woo Nyùy Tàr.»