Jeremia 26 - ŊWÀʼ NYÙY

Atàá cù wùn aàŋgàa ntum Nyùy ámóʼó múm ji á yúy Jeremia

¹ Yì‑iì dzə̀ é ghan se Jehoyiakim woo wan Josia kù‑uù dzəə́ keʼ, a saʼ vifon e Juda kéʼen, Nyùy Tàr yòŋ Jeremia, e tiìsí ntum sho.

² Wù‑uù sùúy jii, «Dù tìím e maàndzə yeé shùu lav cù Nyùy Tàr, e sùŋnín e wìr dzə̀m wo wù wìyìn fó ŋkà se laʼ seé Juda ji wun yii cu e Nyùy Tǎr lav. Tiísí kinyo kidzə̀m ke m suuyin e wò ki aáwune, é la kfəʼ yòʼ tùm fó fo.

³ A tàm é ghanmóʼ, aáwune yuúrí, é wìr wáa kuvsín fo wun yiì kisaŋe. Á bèy, é m lo, e kùvsín kwaʼtì yém, e làa yòʼ dzə́ə màʼ ŋgeʼ ye m báʼti ji m wiy sho bìʼ vinyo ve kisaŋ ve áwune yii.

⁴ «Suúy aáwune ji Nyùy Tàr yoŋ a jii, ‹A vèn dzə̀ là fó a yunín mo, a jùmrì nsər sém se m foon e vèn,

⁵ e kù a ten fó a yunín jí se aŋgàa lìm vém ve m túm fo věn wùn akàŋ akàŋ,

⁶ bo m lo, e lovtí e lav cù rə̀n mo mò‑oò lovtin e Shilo, é vitúm veé kitu ke nsay vi wáa lì yír ŋkàlaʼ rə̀n ji liy ye á kuu wíri shó.› »

⁷ Atàá cù wùn à wír ve dzəə̀n ji aŋgàa ntum Nyùyi, à wìr dzə̀m‑eè lo yù mo Jeremia fiʼtì kinyo kìn e Nyùy Tǎr lav.

⁸ Jeremia màysì kinyo ke Nyùy Tàr‑iì yòŋèn e wun, e fìʼtì e wìr dzə̀m, atàá cù wùn aàŋgàa ntum Nyùy vìyi, à wìr dzə̀m nèn bàm wun, a yòŋ sho jii, «À kù kér fó kpu.

⁹ Yiì ka, é bo à wáa fìʼtì ji Nyùy Tàr yoŋ ji lav cù rə̀n yíi a dzə moo Shilo, é ŋkàlaʼ rə̀n du é vifə̀m, a dzə là wír?» Wìr dzə̀m nèn lò, e gìm Jeremia e maàndzə yeé lav cù, e kaàrí, e tàr.

¹⁰ Atǎr ntoʼ veé Judàa yú kinyo kìn, e nèn lò fo ntoʼ, e kòʼ é shùu lav cù, e dzə̀ʼə̀m aáwuné kirə̀ʼ, e shùu kibùʼ wo á yoŋ ji Wo Fíyi.

¹¹ Atàá cù wùn aàŋgàa ntum Nyùy vìyi nèn sùúy aàtǎr ntoʼo, e sùúy e wìr dzə̀m jii, «Kí ghèén ji á laar á jwè və̀n láarin, bìʼ fo wù tiisin ne lǒn ŋkàlaʼ rə̀n, a wíri dzə̀ a yú e vituʼùr vév ví.»

¹² Jeremia nèn sùúy aàtǎr ntoʼo, à e wìr dzə̀m jii, «Kù tùm Nyùy Tàr mo ji m tiísí á vinyo ve vèn yuun vin vidzə̀m, vinyo veé lav cù Nyùy Tàr, à veé ŋkàlaʼ fèn vi.

¹³ Á bèy, vèn kúvsín liì won, e kùvsín yii yéné, a yunín Nyùy Tàr woo Nyùy won. A vèn kùvsín, bo Nyùy Tàr lo, e kuvsín sa kwaʼtì rə́, e làa yòʼ dzə́ə màʼ ŋgeʼ ye wù baʼtin, a kìʼ ven shó.

¹⁴ Yii bèy, fo kém kí, m dzə̀ e věn mbvə̀ʼ kiwo, a dzə̀ kù kìíy ven kinyo ke vèn lo, e yiì e mò, kìn dzə̀ ke juŋ ki, kìn ke bi kí.

¹⁵ Yii bèy, vèn kú a kiíy e ké ru kí ji a vèn yùyrí mo, bo vèn jaŋ a dzə̀ lòn e věn kitu, bìʼ lànjò wo vèn yuyrin, e kfə̀n jàŋ sa e ŋkàlaʼ rə̀n wùn à e wìr dzə̀m woo fen kitu. Dzə̀ suuyrú ji Nyùy Tàr dzə̀ a túm á mo ji m tiísí á vinyo vìn, é vèn yú.»

¹⁶ Atǎr ntoʼ wùn à wìr dzə̀m nèn sùúy aàtàá cù wùn aàŋgàa ntum Nyùy vìyi jii, «Wìr və̀n yoʼ yiì kinyo ke dzə̀ á yùyrí wun. Wù tiìsí kinyo e vèsən a dzə̀ ntum ye Nyùy Tàr woo Nyùy wòsən tumen wun sho.»

¹⁷ Ŋgày sé wìr see fó símóʼ sí nèn nànèn e wírí si, a suúy e màŋgòŋ e dzə̀m wo wù‑uù baʼtin fó jii,

¹⁸ «Yì‑iì dzə̀ é ghan se Hesekiya‑aà dzəə̀n fon woó Juda, Mayka woó Moreshet tiísí sá ntum Nyùy. Wù‑uù sùúy e wìr dzə̀m woó Juda ji kinyo ke Nyùy Tàr woo Taà Mànjòŋ yoŋ ki dzə̀ á jii: « ‹Á wíy tuŋ Sion, e bìnèr moo súm bey, é Jerusalem kfə́n, a neŋ e vikfər vikfər, é gwan woó lav cù kwiíy, a dzə ji kóv.›

¹⁹ «Mayka‑aà lo tiìsí bèy, Fòn Hesekiya woó Juda yúyrí wun a? Wìr woó Juda‑aà lo yùyrí a? Bó Hesekiya yòʼ‑oò fàn Nyùy Tàr, a mùm ji wun yii, é kí boŋ Nyùy à? Bó Nyùy Tàr yòʼ‑oò kùvsín kwaʼtì rə́, e làa yoʼ dzə́ə màʼ ŋgeʼ se wù‑uù kàʼàn áwune shó à? A vèsən dzə̀ là fó a yen, bo á bèn sí jaŋ a dzə̀ ŋgeʼ ye tavín e vèsə́n kitu.»

²⁰ Vé‑eè yoŋ bèy, a wìr wùmòʼ ku tiìsí sa ntum Nyùy Tàr é ghan fóo fèy, a yírí dzə̀ Uria, a dzə̀ wan Shemayia, a wù‑uù dzə̀ wír woó Kiriat‑Jearim. Wù kù‑uù tiìsí vinyo veé ŋkàlaʼ fèn, à veé wòŋàn vi, kù mo Jeremia‑aà tiísi.

²¹ Fòn Jehoyiakim wùn à vé rər vəə́, à vé saʼ adzə̀me‑eè yù kinyo kìn, fòn nèn a shweʼ dzə́ə yée laàr Uria sho. Wù yú, a fàn, e nèn nyèŋ, e dù e Ejiv.

²² Fòn Jehoyiakim nèn tùm Elnatan woo wan Akbor e Ejiv wùn à wír ámóʼó,

²³ á dù, e ghàn, e tàʼ Uria, e wìy sho, e fò e Fòn Jehoyiakim. Wù nèn sùúy, á gwàr e nyùy, wù kpú, á lì dzə́n rə́, e dù màʼ fo vé‑eè dzəəmè wír vee fó tèr.

²⁴ Ké Jeremia ki nén a dzə, a Ahikam woo wan Shafan‑eè tòm wun, la á yòʼ dzəə lì wun, e fò ji á yúyrí.