Jeremia 24 - ŊWÀʼ NYÙY

Ŋkaà se fig see sibaà

¹ Fòn Nebukadnessar woó Babilon‑eè wìy é Jerusalem, e koò Fòn Jehoyiacin woó Juda, a yì‑iì dzə̀ wan Fòn Jehoyiakim. Wù‑uù tàtí, e koò wùn aàtǎr ntoʼ veé Judàa, à vé fèri, à vé kilàme, e dù sho e Babilon. Kee shooy ki shaà, Nyùy Tàr ghém ndzə, m yén ŋkaà se *fig sibaà e njà kinjeenjèm, aá tiír é shùu lav cù.

² Ŋkaà yìmòʼ‑oò kér fig, a wù dzə̀ e juŋ moo wo wù tavin, e bàŋ bèy. Yìmòʼ wáa ker fig, a wù fóy ne e dzəə ye bó yòʼ dzə̀ wìr kfə̀r.

³ Nyùy Tàr nèn dzə̀r e mò jii, «Jeremia, à yèn a dzə̀ ka?» M bìnèr jii, «M yèn a dzə̀ fig. Fig, a wo juŋ bóŋ féyì, a wo bi bír ne feyì e dzəə ye bó yòʼ dzə̀ wìr kfə̀r.»

⁴ Nyùy Tàr nèn yòŋ e mò jii,

⁵ «Mo woo Nyùy Tàr wo m dzəə̀n Nyùy wìr veé Isray suuy jii, wír veé Juda ve m fəərin, á dú é Babilone dzə̀ moo fig wo juŋ wo à yenen, a m yií a geʼ aáwune.

⁶ M yíi a leéy áwune kijuŋ, e wìy lì áwune, e kfən sho e nsay fèn. M wíy baʼtí áwune, e làa yòʼ taʼár taʼarín. M wíy dzə̀ʼə̀r áwune, e làa yoʼ tsə̀ʼ.

⁷ M wíy fo áwune shilív she á kiíy ji m dzə̀ á Nyùy Tàr, aáwune nèn a dzə wír vém, é m wáa dzə Nyùy wov. Áwune wíy kfən e mǒ wùn shilív shév shidzə̀m.

⁸ «Yii bèy, ké Fòn Tsədekiya woó Juda wùn aàtǎr ntoʼ və́ kí dzə̀, a m wíy lovtí sho moo fig wo wù birin ne, a yòʼ dzə̀ wìr kfə̀n kfə̀r. M wíy yiì sho bèy, e tatí kibér ke wìr keé Jerusalem ke kí gòʼòn é wòŋàn, à ve á loòn fó wòŋ, e dù, a dzə e Ejivi.

⁹ M wíy lovtí aáwune, vitúm veé kitu ke nsay vidzə̀m vi lóo yen, é wúné wáa beemé áwune, aá kfə́n a dzə ji kifá ke nshéʼmé ki e vitúm ví mvəm, aá wáa màʼ áwune é ŋgàn, a jàʼ jàʼàn, a lì áwune ji liy yé a kuù wíri shó, e kù a yiì bèy virə́ʼ vidzə̀m vee fo m wíy taʼár áwune, aá dukir.

¹⁰ M kù wíy tsənsí rə́r wùn à jiŋ, à kifə̀ʼ ki, é kí tee áwune, e meé mo áwune wíy səʼsí, e mày fo nsay ye mò‑oò foon e wùn aàtàr véví.»