Jeremia 23 - ŊWÀʼ NYÙY

Vilìmbìy ve bi ví wùn à fòn nshámmé

¹ Nyùy Tàr suuy jii, «Lòné dzə̀ wó vilìmbìy ve ví maʼày wír vém, moo nshìy bvəy wo bi, aá táʼri.»

² Á bèy, Nyùy Tàr woo Nyùy wìr veé Isray nén a suúy kùm vilìmbìy ve ví leey wír və́ jii, «Vèn tàʼár ne wír vém, e jùm, á dúkír, e làa yòʼ a leéy fo fo. Vèn leéy, e yèn, m yíi màʼ ŋgeʼ e vèn, a kù dzə̀ bìʼ liì won kisaŋ. Suuy mo woo Nyùy Tàr.

³ Mómò kitú kém, m yíi baʼtí kibér ke wìr vém fó vitum, fo mò‑oò jùmèn, á táʼrí, e dùkìr. M yíi siìr áwune é nsay ye dzəə̀n yéev, aá wáa dzəə́, a kùʼ, a dzə aneénín.

⁴ M wíy shoʼ anshìy ve á wáa leéy áwune. Áwune yòʼ dzəə́ wìy a fàn, kìn ji á wáa yàʼ, a bó wìr yòʼ dzəə́ wìy lày fo áwuné mvəm. Suuy mo woo Nyùy Tàr.

⁵ «Vèn leéy, e yèn, ghán sí wiyì, se m wíy yiì, é tám woo réŋé fəə́ e Davir ram, é m kóʼór ji fon. Wù wíy a saʼ vifon və́ é dzəə yee réŋ, a tinén vinyo tìítiy, a yiì a dzə̀ vinyo ve ru ví é wòŋ. Suuy mo woo Nyùy Tàr.

⁶ Wíy lòo dzə e wun ghan sé saʼ, é wír veé Judàa boy, é dzəʼə̀m wìr veé Israyi wáa dzə e kiŋsìn. Yír ye á wíy a yòŋ wun shoo dzə̀ jii, ‹Nyùy Tàr woo Ŋgaà Lùŋèr wor.› »

⁷ Á bèy, Nyùy Tàr nén a suúy jii, «Ghán sí sí wiyì, se wíri yòʼ dzəə́ wìy a kàn yír yém, a yòŋ jii, ‹Mo Nyùy Tàr wo wù‑uù fəərin wír veé Isray fo wòŋ woo Ejiv dzəə̀n shó e tin.›

⁸ Á sí wìy a kàn, a yòŋ a dzə̀ jii, ‹Mo Nyùy Tàr dzəə̀n shó, wun wo wù‑uù fəərin wír veé Isray fo vitum veé wòŋ kùyi, e fə̀ə́r fo vitum vidzə̀m ve wù‑uù jùmèn áwune, á dù, a dzə sho.› Aá wáa kàn bèy, e kù a dzə a dzə̀ e yéev yee nsay.»

Jeremia roomè aŋgàa ntum Nyùy kisaŋe

⁹ Kinyo ke *aŋgàa ntum Nyùy, tímé sí búʼ mo shó buʼún, a vighvə́r vém ví sí yaʼ yàʼàn vidzə̀m. M sì moo wír wo wù noon meluʼ e ŋàŋ, wír, wo wù noon meluʼ, mè koó. Kí kooy bèn bìʼ ntum Nyùy Tàr, kooy, bìʼ jí se wun woo Ŋgaà wo Ranén.

¹⁰ Wír ve á maʼày Nyùyi rùn ne e wòŋàn, aŋgàa ntume dzə́ dzə́ kisaŋe, li kilíŋ kév ké lìm, yii a dzə̀ lím kisaŋe shó. Lǒn Nyùyi shòv ne fó, nsay nén a dìy, yí nyàme yúmkír é virə̀ʼ vé woʼ.

¹¹ Ke Nyùy Tàr yoŋ ki dzə̀ jii, «À ŋgaà ntum, à taà cù, wìr wo wù ghvə́m Nyùy yòʼ kfə̀n dzə̀ə́. M sí yén, aá yii liì kisaŋ, fə̀m à e mǒ lav sho. Suuy mo woo Nyùy Tàr.

¹² Bìʼ bey, dzəə̀ ye áwune ghán sho yíi a lèrìr, é fóo kfə́n vitsə́ʼə́, aáwune wáa gbùkìr fo. Yíi lòo dzə e ghan see shó, é m wiy e ŋgeʼ ye tavín aáwuné kitu. Suuy mo woo Nyùy Tàr.

¹³ Ké aŋgàa ntum veé Samaria, mò‑oò lo yèn joonè wo áwune‑eè yii. Áwune‑eè tiísi ntum a dzə̀ ye *Baal, e nèn jìʼìr wír vém veé Isray, á jáy dzə́ə.

¹⁴ Yii bèy, ké aŋgàa ntum veé Jerusalem, m nen yèn, a kév kí fóy ne fóyin. Áwune ghán, jaŋ kinjàŋ, bóʼti a dzə̀ kimboʼtì, távir kóy aŋgàa vinyò ve bi ví, yii, a wìr yòʼ kfə̀n kúvsin fo wun yiì ye bií. Áwune adzə̀me sì moo wír veé Sodom bèy fo mò. Wír veé Jerusaleme kfə̀n ne ji wír veé Gomorra.»

¹⁵ Bo kinyo ke Nyùy Tàr woo Taà Mànjòŋ suuy kùm aŋgàa ntum veé Jerusalem ki dzə̀ jii: «M yíi yiír áwune e viyíkìr ve bi ví, e fo mendzə́v me ndzəʼ mè, aá nó, bìʼ fo áwune bivirin ne woŋ e dzə̀m e liì kisaŋ.»

¹⁶ Nyùy Tàr woo Taà Mànjòŋ nén a suúy lèn e wír veé Jerusaleme jii, «Lá vèn yòʼ yuùrí kinyo ke aŋgàa ntume tiísi e vèn. Áwune tiísi a dzə̀ vinyo ve kisaŋ vi. Vinyo ve áwune fiʼtì ji Nyùy ghém a ndzə, aá yén e njà vinjeenjèm vi lo a dzə̀ fo áwuné vifii. Ví yòʼ lo a dzə̀ fo Nyùy Tàr.

¹⁷ Áwune kù suuy e wír ve á ŋwayin jí Nyùy ŋwáyíné ji Nyùy Tàr suuy a jii, ‹Vèn yíi a dzə kijuŋ.› Suuy sa e ve á tavin kitú, a yiì a dzə̀ mo melív mev mè koŋèe jii, ‹Bó kinyo ki yòʼ yíi sə̀ʼ ven.›

¹⁸ «Yii bèy, wìr fo áwune‑ee yií ne a dzə fo Nyùy Tàr siysì kinyo a? Wìr fo áwune yòʼ fə̀m‑ee yií ne yù kinyo kfə́, e bóo kiíy, a bó wù yòʼ‑oo yuúrí ne, e bóo fə̀m a gwàrìr.

¹⁹ Vèn leéy, e yèn dòʼshwiiy Nyùy Tàr. Wù kòʼ ne moo kinsəm, a wìy moo kiìkir wo biibí, a wù lo, e shùʼùy e vé yìi kisaŋé kitu.

²⁰ Dòʼshwiiy Nyùy Tàr yòʼ wíy mày, a bó wù máysí lim rə́, e yiì kinyo kidzə̀m ke kí dzəə̀n e wun kwàʼtì. Vishiíy vin vi yíi wìy, é vifií vén ví mvəʼkir.»

²¹ Nyùy Tàr suuy jii, «M yòʼ‑oò lo tùm aŋgàa ntum vìn, yii bèy, áwune ku dù. Bó m yòʼ‑oò lo tiìsí kinyo aáwune, yii bèy, á ku dù, a fìʼtì ntum ji yì lò a fo mò.

²² A dzə̀ ji áwune‑eè ló a dzə fo mò‑oò bá antaŋ vém, bo vé‑eè fiʼtì a dzə̀ kinyo kém e wír vémé, e nèn yiì, aáwune maʼti liì wov wo bi, à liì kisaŋ wo áwune‑eè kérí.

²³ Dzə̀ ji m dzə̀ Nyùy woo kirə́ʼ kimòʼón, a bó m yòʼ dzə̀ virə́ʼ vidzə̀m à? Suuy mo woo Nyùy Tàr.

²⁴ A dzə̀ wìr lìr é kirə̀ʼ, ye bó yòʼ dzə̀ m yèn wun à? Suuy mo woo Nyùy Tàr. Bó m yòʼ dzə̀ é yuv wùn ǎ nsay à? Suuy mo woo Nyùy Tàr.

²⁵ «M yù ne kinyo ke aŋgàa ntum ve á bóʼti kimboʼtì e mǒ yirí suuyì. Á suuy ji m súŋnin aáwune a dzə̀ á e njèm.

²⁶ Kimboʼtì ki wíy a dzə aàŋgàa ntum kimboʼtì vìné meliv ben e dù, e meé e le? Áwune tiísi ntum kisaŋ a dzə̀ fo áwuné vifii.

²⁷ Áwune kwaʼtì ji njèm sév se á fer e wíri sí yíi yiì, é wír vémé laysin mo, mo atàr véví‑iì làysìn, e dù, a cù a dzə̀ Baal à?

²⁸ Á bèy, ŋgaà ntum wo shiin njèm wun kú a fìʼtì a dzə̀ njèm rə, é ŋgaà ntum wo tumen mo wun kú a fìʼtì kinyo kém mo kí dzəə̀n. Vishaárín vi kfə̀n tàtí ka lèn e mvə̀m sàŋ? Suuy mo woo Nyùy Tàr.

²⁹ Bó jí sém sí yòʼ dzə̀ moo və́y, e kfə̀n a dzə moo nshiy ye yì bvə́ʼti kilán e vinsev vinsev à? Suuy mo woo Nyùy Tàr.

³⁰ «Bo kee lèn ki dzə̀ jii, m lo, e kìʼ aŋgàa ntum ve á koó kinyo fo wírí shuù, fiʼtì ji jí sém. Suuy mo woo Nyùy Tàr.

³¹ Á bèy, m kù lo, e kìʼ aŋgàa ntum ve á fiʼtì kinyo kév, suuy ji tùm á mo woo Nyùy Tàr.

³² Rúrú, m yíi kìʼ aŋgàa ntum ve á li njèm se kimboʼtì si, ghán, fiʼtì. Áwune fer, nèn danèr wír vém e kiràʼsìwùn ké kisaŋ ki, yii, aá jáy dzə́ə. Bó m yoʼ shòʼ áwune, e tùm, a bó yòʼ dzə̀ wír vémé lùŋ fo áwune gheéy. Suuy mo woo Nyùy Tàr.»

Ntum Nyùy Tàr ye ru

³³ Nyùy Tàr nèn sùúy e mò jii, «A wìr fo wír vìne, kìn dzə̀ ŋgaà ntum, kìn taà cù, lò, a dzər e wò ji ntum ye Nyùy Tàr rəʼəyin wò sho sà dzə̀ ji ka á, à bìnèr aáwune jii, ‹Kù dzə̀ ven vin, ve á siìn ji kifá ke kí rə́ʼəy Nyùy Tàr, a wù lo, e shwèy ven.› Suuy mo woo Nyùy Tàr.

³⁴ «A ŋgaà ntum, kìn taà cù, kìn wìr wùmòʼ lòo dzə, e yòŋ ji á yuúrí á ntum ye Nyùy Tàr rəʼəyin wun sho, bo m yíi màʼ ŋgeʼ e wùn à kfə́ə rəə́ kitu.

³⁵ Kinyo ke wìr kì yíi a dzər e ŋkar rə, kìn e fər və kí dzə̀ jii, ‹Nyùy Tàr yòŋ ji ka?› Kìn jii, ‹Nyùy Tàr sùúy ji ka?›

³⁶ Yii bèy, lá kí yòʼ dzəə wìy fəə̀ fo wìr shuù ji ntum ye Nyùy Tàr rəʼəyin wun sho rə̀ne. Bìʼ fo wìr wo wù yoŋ bèy sí fer a dzə̀ kfə́ kee kinyo, nèn bívir jí se mo woo Nyùy wo m dzəə̀n shó e tin, mo woo Nyùy Tàr woo Taà Mànjòŋ, wo m dzəə̀n Nyùy won.

³⁷ Kinyo ke a dzə̀ wìr kù a dzər e ŋgaà ntum ki dzə̀ jii, Nyùy Tàr sà yòŋ e wun ji ka á? Kìn ji Nyùy Tàr sà suuy ji ka á?

³⁸ Yii bèy, aáwune lòo dzə a tav ji á fiʼtì a dzə̀ á ntum ye Nyùy Tàr rəʼəyin á áwune shó, vèn kù bìnèr aáwune ji Nyùy Tàr suuy a jii, ‹Mo vèn yoŋ bèy, a mò‑oò shàʼnín ne,

³⁹ bo m kù yíi tuʼ ven fo mǒ si, e rə̀ŋ kwaʼda, e yiì sa bèy e ŋkàlaʼ ye mò‑oò foon e vèn aàtàr véné.

⁴⁰ M wíy shoór ven, e yiì, é vèn wáa ker woómé see là may, a bó wìr yòʼ wíy làysìn.› »